Հա

Գաղափարական

10/05/2012 - 13:07

alt«yerkir.am» - Մայիսի 9-ին ՀՀ կառավարութեան նիստերի դահլիճում ՀՅԴ-ն հրաւիրել էր հաւաք, որին ներկայ էին՝ Ընտրական յանձնաժողովի անդամներ, վստահւած անձինք՝ այն թիմը, ովքեր մայիսի 6-ին ընտրական տեղամասերում պայքարեցին ՀՅԴ-ի համար, ոչ միայն կուսակցականներ, այլեւ՝ համակիրներ: Հանդիպումը նւիրւած էր, առաջին հերթին, Շուշիի ազատագրութեան եւ յաղթանակի օրւան: Սակայն, ընդհանուր գծերով ամփոփւեցին նաեւ վերջին խորհրդարանական ընտրութիւններն ու ՀՅԴ-ի առաջիկայ անելիքները:

Նախօրէին հրապարակ էր իջել ՀՅԴ Հայաստանի Գերագոյն մարմնի յայտարարութիւնը, որով ամփոփ գնահատական էր տրւել ընտրական գործընթացին, եւ նախանշւել էին կուսակցութեան առաջիկայ անելիքները, իսկ մայիսի 9-ի հաւաքի ընթացքում ընտրութեանը մասնակցած թիմին եւ կուսակցական ընկերներին աւելի խորքային եւ հիմնաւոր գնհատականներ տրւեցին տեղի ունեցածի վերաբերեալ:
Հանդիպումը բացեց ՀՀ ԱԺ-ի ՀՅԴ խմբակցութեան քարտուղար Արտաշէս Շահբազեանը, որը ներկաներին շնորհաւորեց Շուշիի ազատագրման 20-ամեակի կապակցութեամբ: Այնուհետեւ խօսք առաւ ՀՅԴ Բիւրոյի անդամ, ՀՀ ԱԺ-ի ՀՅԴ խմբակցութեան ղեկավար Վահան Յովհաննիսեանը, որը, մասնաւորապէս, խօսեց հայ ժողովրդի մայիսեան յաղթանակների կարեւորութեան մասին: Նա միեւնոյն ժամանակ նշեց նաեւ, որ այն, ինչ տեղի ունեցաւ ընտրութիւնների ժամանակ, ամենեւին էլ այն քայլը չէր, որ պէտք է ամրապնդի ժողովրդի ոգին, եւ որ ընտրութիւնն է այն գրաւականը, որով մենք ոչ միայն կը կարողանայինք նշել, այլեւ պահպանել այդ յաղթանակների արդիւնքները եւ առաջիկայում տանել նոր յաղթանակներ:
Նշւեց, որ ՀՀ ԱԺ-ի վերջին ընտրութիւնների ժամանակ ՀՅԴ-ն պարտւեց ոչ թէ իր քաղաքական մրցակիցներին, այլ՝ ընտրակաշառքին եւ պետական-իշխանական լծակների ամբողջական կիրառմանը: Նշւեց, որ դրանով իշխող քաղաքական ուժը, ըստ էութեան, ժողովրդի մի զգալի զանգւածին դարձրել է տեղի ունեցած մեքենայութիւնների, խախտումների եւ կեղծարարութեան յանցակիցը’ դրանով իր պատասխանատւութեան բեռը գցելով հասարակութեան մի ստւար զանգւածի վրայ: Այդուհանդերձ՝ Վահան Յովհաննիսեանն ասաց, որ նման իրավիճակներում ՀՅԴ-ն աշխատելու փորձ ունի, եւ այս կուսակցութեան կենսագրութեան մէջ բազմաթիւ նման դէպքեր են եղել: Իսկ այդ դժւարութիւնները ոչ թէ ընկճել են կուսակցութեանը, այլ, ընդհակառակը, աւելի վճռականութիւն են հաղորդել կուսակցութեան գաղափարներն ու ծրագրերն իրականացնելու ուղղութեամբ: Այնուհետեւ խօսքը փոխանցւեց ՀՅԴ Հայաստանի Գերագոյն մարմնի ներկայացուցիչ Արմէն Ռուստամեանին, որը մէկ անգամ եւս հաստատեց, որ ՀՅԴ-ի առաջիկայ ուղեգիծը հաստատակամ մնում է նոյնը, այն է՝ ամբողջական իշխանափոխութիւն իրականացնելը: Միաժամանակ, ազդարարւեց, որ Դաշնակցութեան կողմից խորհրդարանական ընտրութիւններից առաջ հրապարակ իջեցւած եւ ներկայացւած ծրագիրը կարող է դառնալ ընդդիմադիր բոլոր ուժերի համար՝ որպէս մէկ միասնական ընդդիմադիր պլատֆորմ, որը պէտք է բոլոր ճիգերով իրականացւի, որպէսզի Հայաստանը դառնայ այն երկիրը, որ երազում ենք մենք բոլորս: Նա մէկ անգամ եւս շեշտեց, որ Դաշնակցութիւնը հաստատակամ է իր նախանշած ուղեգծով շարժւելու, եւ իր խօսքերը եզրափակեց ՀՅԴ Հայաստանի Գերագոյն մարմնի յայտարարութեան հատւածով՝ «Վաղ թէ ուշ՝ մեր երկրում յաղթանակելու է ազատութիւնը, արդարութիւնը եւ Դաշնակցութիւնը»:

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։