Հա

Գաղափարական

13/03/2013

altԱրցախի Հանրապետութեան միջազգայնօրէն ճանաչման ուղղութեամբ տարւող աշխատանքներն ուղղակիօրէն ու անուղղակիօրէն ցոյց են տալիս իրենց արդիւնաւէտութիւնը:
Կարեւոր քաղաքական իրադարձութիւն էր Լիտւայի Սէյմում Լիտւայի Հանրապետութիւն-Արցախի Հանրապետութիւն խորհրդարանական բարեկամական խմբի ստեղծումը, որն ապտակ էր Ադրբեջանի արտաքին քաղաքականութեանը եւ խօսուն փաստ այն բանի, որ Ադրբեջանի ագրեսիայի եւ սպառնալիքի քաղաքականութիւնը դատապարտւած է կործանման, իսկ հայկական քաղաքականութեան նոր ուղղութիւնը՝ Արցախի Հանրապետութեան միջազգայնօրէն ճանաչման շուրջ, արդէն անսակարկելի իրողութիւն է, ինչը միջազգային ասպարէզում ակնյայտ է վերջին մէկ տարւայ ընթացքում:

Աշխարհի տարբեր երկրներում ՀՅԴ Հայ Դատի գրասենեակների եւ յանձնախմբերի աշխատանքները Արցախի միջազգայնօրէն ճանաչման, Հայոց Ցեղասպանութեան, Սումգայիթում, Բաքւում եւ ադրբեջանական այլ բնակավայրերում հազարաւոր հայերի հանդէպ իրագործած ցեղասպանութեան դատապարտման ուղղութեամբ, բնականաբար, արժանանում են նաեւ ադրբեջանական եւ թուրքական կողմերի դիմադրութեանը:
Հայոց Ցեղասպանութեան 100-րդ տարելիցի նախաշեմին աշխարհի տարբեր երկրներում ակտիւացել է թուրքական եւ ադրբեջանական լաբբին: Համաշխարհային հանրութեան մէջ շփոթութիւն առաջացնելու համար ադրբեջանցիների յօրինած «Խոջալուի միֆ»-ն իր գագաթնակէտին է հասել: Մինչ Թուրքիան շարունակում է մոլեգնօրէն դիմադրել ճշմարտութեան դէմ, իսկ Ադրբեջանը այսպէս ասած «Խոջալուի ցեղասպանութիւնը» խաւիարային դիւանագիտութեան շնորհիւ՝ թմբկահարում է տարբեր ատեաններում, նոյն Ադրբեջանում սպառնում են կտրել Սումգայիթի ողբերգական իրադարձութիւնները նկարագրող ադրբեջանցի գրողի ականջը:
Ուշագրաւ է, որ ԱՄՆ-ի Սպիտակ տան կայքէջում գրառւած «Խոջալուի ցեղասպանութեան դատապարտման յայտարարութեան» տակ ստորագրած աւելի քան հարիւր հազար քաղաքացիների բողոքին ի պատասխան, ինչպէս կայքէջի կանոններն են թելադրում, յայտարարութիւն է արւել, որի մէջ մասնաւորապէս նշւած է. «Ամերիկան խորապէս ցաւում է պատերազմի ընթացքում Հայաստանի ու Ադրբեջանի զոհերի համար»: Փաստօրէն, կեղծիքի վրայ հիմնւած վերջին՝ առնւազն 25 տարիների ադրբեջանական արտաքին քաղաքականութիւնը եւս մէկ ապտակ է ստացել, քանզի Սպիտակ տունը ադրբեջանական կողմին ուղղակի ասում է, որ դա ոչ թէ ցեղասպանութիւն է, այլ՝ պատերազմական գործողութիւններ: Եւ դրանք միանգամայն տարբեր են:
Ահա թէ ինչու է Ադրբեջանն ամէն կերպ նախայարձակ լինում, քանզի այլ կերպ չի կարող պատասխանել բազմաթիւ այն հարցերից մէկին, որ, օրինակ, 1988 թ. պատերազմական գործողութիւններ Ադրբեջանի տարածքում չեն եղել, եւ ինտերնացիոնալիստական եղբայրական հանրապետութեան քաղաքներում ինչպէս են զինւած ադրբեջանցիները գազանաբար սպանել հարիւրաւոր հայերի: Սա ոչ այլ ինչ է, քան՝ ցեղային պատկանելութեան համար ոճրագործութիւն՝ ցեղասպանութիւն: Հէնց այս կեղտոտ էջերն ամէն գնով փակ պահելու կամ խառնաշփոթ առաջացնելու համար՝ Ադրբեջանն ամէն տարի նոր հակահայկական առիթ է յօրինում՝ ապակայունացնելու քաղաքական իրավիճակը:
Զգօն եւ յարատեւ պայքար է հարկաւոր բոլոր ասպարէզներում՝ ոչ միայն չէզոքացնելու ադրբեջանական հակահայկական լաբբինգն ու պոռոտախօսութիւնը, այլեւ մեր դատի արդարացիութիւնը ներկայացնելու եւ ցանկալի արդիւնք ապահովելու համար:
Դաշնակցութեան աշխարհասփիւռ կառոյցը, համագործակցելով ԼՂՀ-ի իշխանութիւնների հետ, միշտ պատրաստ է այս ուղղութեամբ լուրջ աշխատանքներ իրականացնել:
Այս տարի յատկապէս Սումգայիթի ցեղասպանութեան դատապարտման, Արցախի ազգային-ազատագրական շարժման 25-ամեակի առթիւ, ինչպէս նաեւ ԼՂՀ-ի միջազգայնօրէն ճանաչման ուղղութեամբ ակտիւ ձեռնարկներ են կազմակերպւել բոլոր աշխարհամասերում:

«Ապառաժ»-ի խմբագրական

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։