Հա

Գաղափարական

06/03/2013 - 13:00

alt«yerkirmedia.am» - Ազատութեան հրապարակի հանրահաւաքում երէկ ելոյթ ունեցաւ նաեւ ՀՅԴ Հայաստանի Գերագոյն մարմնի ներկայացուցիչ, ՀՀ Ազգային ժողովի ՀՅԴ խմբակցութեան ղեկավար Արմէն Ռուստամեանը:
Սիրելի՛ հայրենակիցներ,
Այսօր հրատապ անհրաժեշտութիւն է առաջացել՝ գնահատելու, թէ որոնք են ներկայ փուլում շարժման դիմագրաւած գլխաւոր մարտահրաւէրները:
* Պէտք է արձանագրել, որ իշխանութիւնները չեն պատրաստւում բաւարարել յետընտրական իրավիճակի լիցքաթափմանն ուղղւած Րաֆֆի Յովհաննիսեանի պահանջները:

* Մի անգամ եւս փաստւեց, որ իշխանութիւնները յօժարակամ կերպով երբեք չեն գնալու անհրաժեշտ զիջումների: Առաւել եւս չեն զիջելու իշխանութիւնը:
* Դրան կարող է պարտադրել միայն քաղաքական զօրեղ գործօնի վերածւող համաժողովրդական շարժումը:
Շարժման մաս կազմող քաղաքական, հասարակական ուժերի եւ շահագրգիռ բոլոր կողմերի խնդիրն է՝ յստակ ձեւակերպւած նպատակի եւ սկզբունքների շուրջ կազմակերպել եւ յստակ քայլերի ու գործողութիւնների միջոցով ընդլայնել ու հզօրացնել սկիզբ առած այս շարժումը: Ուստի՝ օրւայ հրամայականը շարժման ճշգրիտ հունաւորումն ու կազմակերպումն է:
Առ այդ՝ ինչ վերաբերում է շարժման վերջնական նպատակին, ապա այն շատ յստակ է եւ անփոփոխ՝ հասնել ժողովրդի լիակատար իշխանութեան հաստատմանը երկրում՝ բոլոր մակարդակներով: Դրան տանող ամենավստահելի ճանապարհն է՝ շարժումն ուղղորդել հանգրւանային յաջողութիւններ արձանագրող տեւական պայքարի հունով: Այսինքն՝ եթէ տւեալ պահին չի յաջողւում իշխանութիւնը վերցնել ամբողջութեամբ եւ միանգամից, դա մեզ չպէտք է հիասթափեցնի, այլ մեզ մղի դրան հասնել աստիճանաբար՝ փուլ առ փուլ:
Ըստ այդմ՝ իշխանութեան միահեծան եւ մոնոպոլ դրւածքը սասանելու, շարժման ռեսուրսը մեծացնելու որեւէ առիթ եւ հնարաւորութիւն պէտք է լիարժէք օգտագործել՝ հասնելու կոնկրետ շօշափելի արդիւնքի: Իսկ դա չի կարող պակաս ձեռքբերում համարւել: Հէնց այդպիսի հանգրւանային յաջողութիւններն են քայլ առ քայլ մօտեցնելու շարժմանը իր հետապնդած նպատակին:
Սա պայքար է լայն ճակատով՝ սկսած ամէն շէնքից, թաղամասից, բնակավայրից, քաղաքից մինչեւ հանրապետութեան ամենաբարձր մակարդակները: Եւ այս պայքարի մէջ է, որ մեզանից իւրաքանչիւրն իր տեղն ու դերը կը տեսնի, ամէն մէկն իր անելիքը կունենայ: Այս պայքարն է, որ կը յանգեցնի այնպիսի իշխանափոխութեան, որ ամբողջական կը լինի, որ չի աւարտւի սոսկ մարդափոխութեամբ, ինչը մենք բազմիցս տեսել ենք, որն իսկապէս կը հաստատի ժողովրդի իշխանութիւնը եւ կերաշխաւորի երկրում արմատական փոփոխութիւնների իրականացումը:
Այդպիսի առաջնահերթ քայլերի գործադրման ծրագիր Դաշնակցութիւնը առաջարկել է, եւ մենք համոզւած ենք, որ անհրաժեշտ է մեր ողջ ներուժը ներդնել դրա իրականացումը յաջողեցնելու համար: Սակայն, ժողովրդի այսպիսի տեւական եւ աննահանջ պայքարն ապահովելու համար՝ անհրաժեշտ է նախեւառաջ ձեւաւորել շարժման ողնաշարը՝ նրա կազմակերպական կառոյցը՝ սկսած կենտրոնական ղեկավարումից մինչեւ շարժման մարզային ու համայնքային ստորաբաժանումների կազմաւորումը:
Այսօր իշխանութեան հասնելու շարժման առաջին փուլը մայիսի 5-ին կայանալիք Երեւանի աւագանու ընտրութիւններն են: Հայաստանի նման երկրում Երեւանի քաղաքային իշխանութիւնը ձեռք բերելը շարժման համար վստահաբար ունենալու է վճռական նշանակութիւն՝ իշխանութեան միահեծան այս վիճակը փոխելու եւ իշխանութիւններին շատ աւելի լուրջ զիջումներ պարտադրելու ճանապարհին:
Սիրելի՛ հայրենակիցներ,
Այսպէս ձեւաւորւած եւ կազմակերպւած շարժումն է, որ, գործելով «հանդարտ ուժի» տրամաբանութեամբ, հետզհետէ թափ է հաւաքելու, դառնալու է անկասելի եւ անպայմանօրէն հասնելու է իր նպատակին, եւ մենք բոլորս ապրելու ենք մեր երազած Հայաստանում»:

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։