Հա

Գաղափարական

27/01/2013

alt«tert.am»-ը զրուցել է Հայ Յեղափոխական Դաշնակցութեան Հայաստանի Գերագոյն մարմնի փոխներկայացուցիչ Արսէն Համբարձումեանի հետ՝ առաջիկայ նախագահական ընտրութիւններին կուսակցութեան որդեգրելիք մարտավարական եւ այլ խնդիրների շուրջ:
Ի պատասխան դիտարկման, թէ «Բարգաւաճ Հայաստանն» ու Դաշնակցութիւնը յայտարարեցին, որ սեփական թեկնածուով հանդէս չեն գալու եւ չեն սատարելու որեւէ մէկի, սակայն հիմա ԲՀԿ-ական որոշ քաղաքապետեր յայտարարում են Սերժ Սարգսեանին սատարելու մասին, ՀՅԴ Գերագոյն մարմնի փոխներկայացուցիչը նախ խնդրեց ՀՅԴ-ին չհամեմատել որեւէ այլ կուսակցութեան հետ, որովհետեւ իրենց կազմակերպական կառոյցի որոշումները կատարելու պրակտիկան բոլորովին այլ է եւ աւելացրեց. «Բնականաբար, Դաշնակցութեան պարագայում բացառւում է, որ որեւէ դաշնակցական բացայայտ կամ ոչ-բացայայտ շեղւի կուսակցութեան որոշումից»:

Հ.- Պրն. Համբարձումեան, արդեօք այս պահին քննարկումներ ընթանո՞ւմ են թէ նախագահական ընտրութիւններին Դաշնակցութիւնն ինչպէս է ուղղորդելու իր ընտրազանգւածին: Այսինքն՝ գնա՞լ ընտրութիւնների թէ՝ ոչ, ինչպէ՞ս եւ այլն:
Պ.- Մենք յայտարարել էինք, որ ընտրութիւններին սեփական թեկնածուով չմասնակցելով՝ մի կողմ չեն քաշւելու եւ փորձելու ենք մեր տեսակէտներն ու դիրքորոշումները հանրութեանը ներկայացնել: Այդ թւում, հետեւելով ընտրարշաւին, քարոզարշաւին եւ, կարծում եմ, մինչեւ քւէարկութեան օրը ՀՅԴ Գերագոյն մարմինը յայտարարութեամբ կամ կոչով հանդէս կը գայ եւ իր ընտրողներին ու կազմակերպչական կառոյցներին կուղղորդի:

Հ.- Իսկ ճի՞շտ են մամուլի այն տեղեկութիւնները, որ ներկայում կուսակցութեան ներսում կան թեւեր, որոնցից մէկը պնդում է, որպէսզի ՀՅԴ-ի ընտրողները գնան ընտրատեղամաս եւ այնտեղ անվաւեր դարձնեն քւէաթերթիկները՝ դրանց վրայ գրելով «Դաշնակցութիւն»: Նշւում է, թէ այս կերպ ներքին հաշւառում կարւի, թէ որքան ձայներ ունի Դաշնակցութիւնը:
Պ.- Հերթական հարիւրերորդ թէ որ անգամ ստիպւած եմ փաստել, որ Դաշնակցութիւնում երբեւէ թեւեր չեն եղել եւ չեն կարող լինել: Եւ այդ տեսակ քննարկումներն ընդամէնը ոմանց երեւակայութեան արդիւնքն են:

Հ.- Իսկ ներքին քննարկումներ արւո՞ւմ են թէ ինչպէս պէտք է ուղղորդել ընտրողներին:
Պ.- Բնականաբար: Ասացի՝ քւէարկութիւնից մի քանի օր առաջ կը ներկայացնենք մեր դիրքորոշումը: Ամէն դէպքում, այս պահի դրութեամբ, որեւէ հիմք չունենք որեւէ մէկի սատարելու կամ աջակցելու: Եթէ որեւէ բան չփոխւի:

Հ.- Իսկ այս ընթացքում ուսումնասիրե՞լ էք թեկնածուների ծրագրերը:
Պ.- Ոչ, նախ թեկնածուներից ոչ բոլորն են իրենց ծրագրերը ներկայացրել, իսկ այն, ինչ ներկայացւել է, դրանց մեծ մասին ի սկզբանէ ծանօթ էինք եւ գիտէինք, թէ ինչ պիտի ասւի: Այստեղ միայն ծրագրերի խնդիրը չէ, եւ այն վերաբերում է հետեւեալին, որ ինչ-որ մէկի աջակցելն ինքնանպատակ կը լինի, եթէ այդ աջակցութեան արդիւնքում՝ ընտրութիւնների առումով որակական որեւէ բան չփոխւի: Եթէ չենք մասնակցել, չենք մասնակցել եւ մեր հիմնաւորումները ներկայացրել ենք, եւ հիմա ինչ-որ մէկի սատարելը մի քանի տոկոս աւելացնելով նրա ձայները՝ չեմ կարծում, որ որեւէ բան է փոխելու: Այսինքն՝ այսօր շատ լուրջ պատճառներ պիտի լինեն, շատ տեսանելի ու էական փոփոխութիւն առաջացնելու հեռանկար պիտի տեսնենք, որպէսզի ինչ-որ մէկի աջակցելու խնդիր ունենանք: Այսօր այդ հնարաւորութիւնը չենք տեսնում:

Հ.- Իսկ Հայ ազգային կոնգրեսի կոչերին՝ նստել տանը եւ ընտրութիւններին պատասխանել այսպէս ասած՝ չընտրութիւններով, նաեւ Անդրէաս Ղուկասեանի բոլոր թեկնածուների ինքնաբացարկի կոչերին ինչպէ՞ս է վերաբերում Դաշնակցութիւնը:
Պ.- Մենք ունենք մեր մօտեցումը, իսկ թէ ով ինչ մարտավարութիւն է որդեգրել՝ իրենց ներքին գործն է: Մենք ընտրութիւնները չենք բոյկոտում, որովհետեւ, այնուամենայնիւ, կարծում ենք, որ, վաղ թէ ուշ, Հայաստանում իշխանութիւն ձեւաւորելու եւ այն փոխելու միակ ճիշտ եւ ցանկալի տարբերակը ընտրութիւններն են: Եւ, հետեւաբար, ընտրութիւնների գաղափարը վարկաբեկելու ցանկութիւն չունենք: Աւելին՝ կարծում ենք, որ ընտրողները պիտի ակտիւօրէն մասնակցեն ընտրական գործընթացներին, եւ իրենց դիրքորոշումն ասեն՝ անկախ այն հանգամանքից, որ այս ընտրութիւնները լաւատեսութիւն չեն ներշնչում:

Հ.- «Բարգաւաճ Հայաստան»-ը, ինչպէս եւ Դաշնակցութիւնը յայտարարեցին, որ սեփական թեկնածուով հանդէս չեն գալու եւ չեն սատարելու որեւէ մէկի: Հիմա առանձին ԲՀԿ-ական քաղաքապետեր յայտարարում են Սերժ Սարգսեանին սատարելու մասին: Դուք եւս ունէք կուսակցական համայնքի ղեկավարներ: Հաւանակա՞ն է, որ տեղերում նման յայտարարութիւններ հնչեն նաեւ դաշնակցական համայնքի ղեկավարներից:
Պ.- Խնդրում եմ Ձեզ հարցերը տալիս՝ Դաշնակցութեանը չհամեմատել քաղաքական այլ ուժերի հետ, եւ այդ համեմատութիւնից ելնելով՝ հարցեր ուղղել: Դաշնակցութիւնը դաշնակցութիւն է եւ ՀՅԴ կազմակերպական կառոյցի ե՛ւ կազմակերպւածութիւնը, ե՛ւ որոշումները կատարելու պրակտիկան բոլորովին այլ են: Այնպէս որ՝ չպէտք է համեմատել: Բնականաբար, Դաշնակցութեան պարագայում բացառւում է, որ որեւէ դաշնակցական բացայայտ կամ ոչ-բացայայտ շեղւի կուսակցութեան որոշումից:

Հ.- Ընտրական յանձնաժողովներում ՀՅԴ-ն ունի տեղեր, հաւանակա՞ն է, որ դրանք զիջի այլ կուսակցութիւնների:
Պ.- Երբեւէ լսած կա՞ք, որ Դաշնակցութիւնը յանձնաժողովում իր տեղերը զիջած լինի: Դաշնակցութիւնը յանձնաժողովի իր անդամներին արդէն իսկ նշանակել է, վաղը վերջնաժամկէտն է, փորձելու ենք մեզ տրւած քւոտայի շրջագծում բոլոր նշանակումները կատարել: Եւ մեր անդամները, օրէնքի սահմաններում, իրենց լիազօրութիւնները լիարժէք փորձելու են իրականացնել եւ ապահովել ընտրութիւնների օրինականութիւնը այնքանով, որքանով իրենց կը յաջողւի:

Հ.- «Քւէն ուժ է» շարժումը, որի մասին երկու տարի շարունակ խօսւում էր, մի տեսակ լռութեան է մատնւած ԱԺ-ի մայիսի 6-ի ընտրութիւններից յետոյ: Այն այս ընտրութիւններին գործելո՞ւ է:
Պ.- Գաղափարը կայ, գաղափարը շարունակում է մնալ, նորից եմ կրկնում՝ մենք այն համոզմանն ենք, որ մեր երկրում միայն ընտրութիւնների միջոցով է հնարաւոր ապահովել իշխանութիւնների հեռացում: Հիմա տարբեր պատճառներով նախագահական ընտրութիւններին այդ հնարաւորութիւնը մենք չենք տեսնում, եւ դրա հիմնաւորումը ներկայացրել ենք: Բայց, մենք մեր հնարաւորութիւնների, կարելիութիւնների, ընտրական յանձնաժողովներում ունեցած մեր տեղերի միջոցով փորձելու ենք վիճակը բարելաւել: Ինչքանո՞վ դա մեզ կը յաջողւի՝ ցոյց կը տայ ժամանակը:

 
Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։