Հա
14/08/2018 - 09:10

Ռեզա Արդաքանիան. «Հայաստանը պատուհան՝ դէպի ԵԱՏՄ շուկայ»

Իրանը Հայաստանը դիտարկում է որպէս պատուհան՝ դէպի Եւրասիական տնտեսական միութեան 180 մլն.-անոց շուկայ: Այս մասին Երեւանում երէկ` oգոստոսի 13-ին տեղի ունեցած հայ-իրանական միջկառավարական յանձնաժողովի 15-րդ նիստի ժամանակ յայտարարել է Իրանի էներգետիկայի նախարար Ռեզա Արդաքանիանը։

«alikonline.ir» - Իրանը Հայաստանը դիտարկում է որպէս պատուհան՝ դէպի Եւրասիական տնտեսական միութեան 180 մլն.-անոց շուկայ: Այս մասին Երեւանում երէկ` օգոստոսի 13-ին տեղի ունեցած հայ-իրանական միջկառավարական յանձնաժողովի 15-րդ նիստի ժամանակ յայտարարել է Իրանի էներգետիկայի նախարար Ռեզա Արդաքանիանը։

Նրա խօսքով՝ Իրանի քաղաքականութիւնը հիմնւած է ոչ միայն տարածաշրջանի երկրների, այլ նաեւ աշխարհի տարբեր երկրների հետ յարաբերութիւնների զարգացման վրայ: «Անշուշտ, Հայաստանի եւ Իրանի միջեւ քաղաքական յարաբերութիւնները կարող են նպաստել տարածաշրջանի երկրների միջեւ յարաբերութունների բարելաւմանը»,- նշել է նախարարը:

Նա միեւնոյն ժամանակ նշել է, որ թէեւ հայ-իրանական յարաբերութիւնները գտնւում են բարձր մակարդակի վրայ, այդուհանդերձ, երկու երկրների միջեւ համագործակցութիւնը զարգացնելու համար կայ աւելի մեծ պոտենցիալ եւ ներուժ, որը լաւագոյնս չի օգտագործւում:

Նախարարը կարեւորել է էներգետիկ կապերի զարգացումը հարեւան այլ երկրների՝ Պակիստանի, Աֆղանստանի, Թուրքմենստանի, Ադրբեջանի, Թուրքիայի եւ Իրաքի հետ:

Նախարարը խօսելով Հայաստանի տարածքով Ռուսաստանին էլեկտրաէներգիա մատակարարելու հնարաւորութեան մասին ընդգծել է. «Մենք Հայաստանի հետ բանակցութիւններ ենք սկսել Ռուսաստանին էլեկտրաէներգիա մատակարարելու հնարաւորութեան շուրջ»:

Նա յաւելել է, որ Իրանի համար կարեւոր առաջադրանքը եւրոպական էլեկտրական ցանցերին միանալն է՝ ընդգծելով, որ Թեհրանն այդ նպատակին հասնելու մի քանի տարբերակներ ունի:

«Այդ տարբերակներից մէկը մեր հիւսիսային հարեւանների միջոցով Եւրոպայի էլեկտրական ցանցերին միանալն է»,- ասել է նախարարը:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։