Հա

Ազգային

20/09/2012 - 13:32

2012 թւականի սեպտեմբերի 21-ով ահա, հայաշխարհը ընդառաջ է գնում Հայաստանի Հանրապետութեան անկախութեան վերականգնման 21-րդ տարեդարձին: Ընդամէնը օրեր առաջ, նոյն սեպտեմբերի 2-ով նշանաւորւող հերոսական Արցախի անկախութեան հռչակման 21-րդ տարեդարձը եւս որպէս նախերգանք՝ հանդիսացել ու հանդիսանում է բուն հայոց ամբողջական պետականութեան անկախութեան ակունքն ու սկզբնաղբիւրը՝ մարմնաւորելով հայոց ազատատենչութեան ու արդարամտութեան ոգին: Ոգեղէն այդ արժեհամակարգը նւաճւեց ամենաթանկ գների մատուցմամբ, արեամբ ու մարդկային անկրկնելի զոհողութիւններով:

Առաւել դժւարինն ու թանկը, սակայն, նոյն նւաճւած անկախութեան պահպանումն ու պաշտպանումն է օրինաչափօրէն:
21-ամեայ հայոց անկախ զոյգ հանրապետութիւնների համար հիմնահարցը եւ հետեւաբար՝ գլխաւոր մարտահրաւէրը՝ համազգային տարողութեամբ իսկ, Արցախեան հիմնահարցի ամբողջապէս հայանպաստ կարգաւորումն է ու «Դէ ֆակտօ» (իրական) կարգավիճակի «Դէ իւրէ» (իրաւական) ամրագրումը: Այսինքն՝ ազատագրական արդարահատոյց պայքարի յաղթական ելքը, անտարակուսօրէն, պէտք է հանգուցալուծւի քաղաքական ու առաւել եւս՝ դիւանագիտական յաղթանակներով:
Ահաւասիկ, 21-ամեայ Հայաստանի Հանրապետութեան պետական թէ ազգային շահերի կիզակէտում գտնւող հիմնահարցի դիմագրաւումը մինչեւ բարւոք լուծման, հանդիսանալու է համահայկական թիւ 1 մարտահրաւէրն ու համազգային նշանակութեամբ անվտանգութեան ու առաջընթացի գրաւական: Իսկ Հայաստանի Հանրապետութիւնը որպէս գլխաւոր երաշխաւորը նոյն անվտանգութեան, 21 տարիների ընթացքում, թէեւ տեղ-տեղ դանդաղ ու որոշ պահերում դիւանագիտական ոչ-համարժէք քայլերով, բայցեւայնպէս՝ հայութեան նեցուկն ու պահանջը իր թիկունքում զգալով՝ շարունակում է աշխարհին ապացուցել, որ արժանի է ձեռքբերւած ու նւաճած անկախութեանը: Եւ իրաւամբ, 21-ամեայ պետական կենսափորձը այլեւս բաւարար հիմքեր է ստեղծել, որպէսզի համահայկական-համազգային հիմնահարցի բարւոք լուծման ճամբին նաեւ յաղթահարւեն ոչ պակաս կարեւորութիւն ունեցող մարտահրաւէրներ, որոնք պետական թէ ազգային մասշտաբով ցաւագին կերպով իրենց զգացնել են տալիս եւ որոնք համընդհանուր երթը աւելիով են դանդաղեցնում ու Աստւած մի արասցէ, լայն հասարակայնութեան մօտ հիասթափութեան ու յուսալքութեան նշոյլների տեղիք տալիս: Այդ կարգի գերզգայուն եւ այլեւս խոր մտահոգութիւնների տեղիք տւող մարտահրաւէրներն են՝ Հայաստանի սոցիալ-տնտեսական իրավիճակն ու ժողովրդագրական դեմոգրաֆիան վտանգող արտագաղթի եղելոյթը: Իսկ այս վերջինների նպատակային դիմագրաւումը ինչ խօսք՝ լինելով համազգային պահանջարկ, կենսագործւելու դէպքում, աւելիով է ամրապնդելու պետական կարգուսարքը եւ ազգ-ժողովրդի մօտ աւելիով է արմատաւորելու անկախութեան գաղափարին փարւելու տեսլականը:
Նորանոր յաղթանակների ու յուսավառ ամեակների տենչանքով՝ ազգովին ընդառաջ գնանք Հայաստանի Հանրապետութեան անկախութեան 21-րդ տարեդարձին:

 
Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։