Հա

Ազգային

08/01/2017

ՆՒԻՐԵԱԼՆԵՐ - Յարութիւն Մխիկեան (1942-2007)

2007 թւականի դեկտեմբերի 8-ին, Աթենքի ցուրտ հողին յանձնւեցաւ անկենդան մարմինը 7 դեկտեմբերին վախճանած արժանաւոր դաշնակցականի մը՝ ասպետական ոգիով պատնէշի վրայ կանգուն գործած ընկեր Յարութիւն Մխիկեանի։

Ժպիտը դէմքէն անպակաս՝ անձնւէր ծառայութեան կոչւած դաշնակցականը

Ն.


2007 թւականի դեկտեմբերի 8-ին, Աթենքի ցուրտ հողին յանձնւեցաւ անկենդան մարմինը 7 դեկտեմբերին վախճանած արժանաւոր դաշնակցականի մը՝ ասպետական ոգիով պատնէշի վրայ կանգուն գործած ընկեր Յարութիւն Մխիկեանի։
Հ. Յ. Դաշնակցութեան Յունաստանի ընտանիքին հաւատաւոր ու անձնւէր ներկայացուցիչներէն եղաւ Մխիկը, ինչպէս որ գաղափարի ընկերները կը սիրէին անւանել զինք։
Յարութիւնի անձին մէջ ու անոր երկարամեայ գործունէութեան ընթացքին, ընկերասիրութիւնն ու զւարթախոհութիւնը ինքնատիպ ոճով համադրւեցան ազգային նախանձախնդրութեան եւ դաշնակցական խստապահանջութեան հետ։
Նոյնպէս՝ բաց մտքի ու ազատախոհութեան, այլեւ՝ հաւասարակշռւածութեան եւ լայնախոհութեան արժանիքները Յարութիւն Մխիկեան գիտցաւ ու կրցաւ հարստացնել եւ հունաւորել ազգային-կուսակցական արժէքներու անխաթար պահպանման ու հանրային-միութենական կազմակերպւածութեան եւ կարգապահութեան առաջնահերթութիւններով։
Վաթսունհինգ տարեկան էր Մխիկ, երբ անողոք հիւանդութիւնը առյաւէտ զինք հեռացուց իր ընտանեկան հարազատներէն, մտերիմներու լայն շրջանակէն եւ գաղափարի մեծ ընտանիքէն։ Բայց միայն մարմնապէս Մխիկ հեռացաւ յունահայ կեանքէն, որովհետեւ իր պարզ ու վճիտ ժպիտով եւ անխոնջ նւիրումի իր պատրաստակամութեամբ՝ Յարութիւն Մխիկեանի յիշատակը կը շարունակէ ներշնչման աղբիւր ծառայել։
Ան ծնած էր 1942-ին Գոքինիա, ուր եւ յաճախած ու աւարտած էր «Զաւարեան» վարժարանը։ Պատանի տարիքէն դաշնակցական ապրումներով եւ ազգային հանրանւէր ծառայութեան մղումով համակւած՝ Յարութիւն 1955-ին միացաւ հայեցի ուսման ծարաւով Լիբանան՝ Համազգայինի «Նշան Փալանճեան» ճեմարանի գիշերօթիկ ուսման փութացող յունահայ իր սերնդակիցներուն։ Ուսման աւարտին վերադարձաւ Յունաստան, 1962-ին անդամագրւեցաւ Դաշնակցութեան եւ երիտասարդական թափով լծւեցաւ ազգային, միութենական եւ կուսակցական ծաւալուն գործունէութեան։
Կեանքի ասպարէզ ընտրեց օդանաւորդութեան սպասարկման ոլորտը՝ միանալով յունական ազգային Օլիմպիակի ընկերութեան։ Իսկ հանգստեան կոչւելէ ետք, տնօրէնի պաշտօնի կոչւեցաւ ազգային «Լեւոն եւ Սոֆիա Յակոբեան» վարժարանէն ներս։ Կարճատեւ եղաւ տնօրէնի պաշտօնավարութիւնը, որովհետեւ հիւանդութեան ախտանշանները ստիպեցին զինք, որ դադրեցնէ կրթական իր գործունէութիւնը։
Յարութիւն Մխիկեան ամուսնացած էր Ռոզիկ Պետոյեանի հետ. ունեցան երեք զաւակներ՝ Սօսի, Գրիգոր եւ Քրիստափոր։
Մխիկ կը հանդիսանայ ներկայացուցչական դէմքերէն մէկը դաշնակցական այն սերունդին, որ յունահայ ազգային-հասարակական ու գաղափարական-կուսակցական կեանքը վերանորոգելու եւ ժամանակակից աշխարհին համընթաց զարգացնելու ուղղութեամբ՝ կարեւոր, այլեւ վճռորոշ ներդրում ունեցաւ։
70-ականներու վերջերէն սկսեալ Մխիկ մաս կազմեց ՀՅԴ Յունաստանի պատասխանատու մարմնին՝ Մեկուսի կոմիտէ կոչւելու, թէ Կենտրոնական կոմիտէ անունը կրելու շրջաններուն։ Քանի մը նստաշրջան վարեց նաեւ ներկայացուցիչի պատասխանատւութիւնը։
Ինչպէս Սփիւռքի տարածքին ընդհանրապէս, նաեւ մասնաւորապէս յունահայ կեանքէն ներս, գաղափարական-քաղաքական բուռն խմորումներու եւ Հայ Դատի պայքարի շիկացման այդ ժամանակներուն, Յարութիւն Մխիկեան աշխոյժ եւ պատասխանատու մասնակցութիւն բերաւ նորահաս մեր սերունդներու քաղաքականացման եւ յեղափոխականացման ի խնդիր Դաշնակցութեան ծաւալած բազմակողմանի գործունէութեան։
Իբրեւ ՀՅԴ Յունաստանի շրջանը ներկայացնող պատգամաւորի՝ Յարութիւն Մխիկեան բազմիցս մասնակցեցաւ համակուսակցական խորհրդաժողովներու, մարմիններու հաւաքներու եւ ՀՅԴ Ընդհանուր ժողովի։
Յունահայ ազգային իշխանութեանց եւ միութենական կառոյցներու գործունէութեանց մէջ եւս Յարութիւն Մխիկեան անսակարկ նւիրեալ ու աշխոյժ գործիչ մը հանդիսացաւ։
Յատկապէս ազգային ուսումնական խորհուրդին ճամբով մասնակից դարձաւ յունահայ կրթական կեանքի ղեկավարումին։ Հ.Մ.Ը.Մ.-ի սկաուտական եւ մարզական կեանքին գործօն մասնակցութիւն բերաւ, նաեւ մաս կազմեց Հ.Մ.Ը.Մ.-ի Շրջանային վարչութեան։ Յատկապէս աշխոյժ եղաւ իր գործունէութիւնը «Համազգային»-ի մէջ, որու թատերախումբի ելոյթներուն մասնակցեցաւ եւ բեմական սիրւած ներկայութիւն մը եղաւ։
Յարութիւն Մխիկեանի յիշատակին ձօնւած այս հակիրճ վկայութեան աւարտին կարժէ ընդգծել, թէ Մխիկ խմբակազմով՝ հաւաքական ոճով գործելու արժանիքով օժտւած ազգային-հասարակական եւ կուսակցական-միութենական պատասխանատու մըն էր. - Իր «ես»-ը գիտցաւ համարկել հաւաքական «մենք»-ին, «մերձաւոր»-ներու եւ «հեռաւորներ»-ու խտրութիւն չդրաւ իր գործընկերներուն եւ պաշտօնակիցներուն միջեւ եւ, կարեւորագոյնը, ամբողջական հոգածութեամբ եւ խրախուսանքով մեծ ընկեր հանդիսացաւ յունահայ կեանքին բացւած նոր սերունդներուն եւ երիտասարդութեան։
Վերջապէս, Մխիկ երկար տարիներ անվերապահօրէն իր ներդրումը ունեցաւ «Ազատ օր»-ի առաքելութեան վերանորոգման եւ անխափան շարունակման մէջ՝ վարչական թէ խմբագրական աշխատանքներուն օգնութեան ձեռք երկարելով եւ իբրեւ հարազատի՝ մնայուն այցելուն եւ զօրակիցը հանդիսանալով խմբագրութեան։

 

Յարակից լուրեր

  • Մեր ճշմարիտ յաղթանակը
    Մեր ճշմարիտ յաղթանակը

    Չմոռնանք, որ Դաշնակցութիւնը մուտք գործեց կառավարական դաշինքէն (կոալիցիա) ներս ԻՐ ԻՆՔՆՈՒՐՈՅՆ ՊԼԱՏՖՈՐՄՈՎ, որ կը ցոլացնէր ՀՅԴ 32-րդ Ընդհանուր Ժողովի եւ ՀՅԴ Հայաստանի Գերագոյն ժողովներու որոշումները։ Դժբախտաբար այս շատ կարեւոր հանգամանքը ցարդ լիարժէք եւ տեսանելի կիրառում չէ ստացած իրական կեանքի մէջ։ Պատճառը մասամբ այն է, որ կառավարական դաշինքը գործի երկար փորձ չէ ունեցած տակաւին եւ շատ բան կը մնայ քննարկելի։ Այնուամենայնիւ պէտք է ընդունիլ, որ կարելի չէ ասով միայն բացատրել դաշինքի գործունէութեան մէջ գոյութիւն ունեցող այս շատ կարեւոր բացը։

  • Հայկական ազատամարտի վերջին դրուագը եւ անկախութեան սերունդը
    Հայկական ազատամարտի վերջին դրուագը եւ անկախութեան սերունդը

    Պայթեցաւ փետրուարեան ապստամբութիւնը:

    Այդ շարժումը եկաւ վերջնական կաղապարում տալու քաղաքական համոզումներուն եւ սպասելիքներուն: Փետրուարի 18-ը դարձաւ սոյն քաղաքական շրջակետը, որ որոշակի ցցուեցաւ երկու իրարամերժ քաղաքական հոսանքներու միջեւ եւ եղաւ հիմնական ելակէտը Դաշնակցութեան քաղաքական գործունէութեան:

  • Ռոստոմ (Ստեփան Զօրեան, 1867-1919). Հայ ժողովուրդի տանջահար սիրտին յեղափոխական ժայթքը. Հայոց Լեռներու անսասան հզօրութեամբ Կամքի մարմնաւորումը
    Ռոստոմ (Ստեփան Զօրեան, 1867-1919). Հայ ժողովուրդի տանջահար սիրտին յեղափոխական ժայթքը. Հայոց Լեռներու անսասան հզօրութեամբ Կամքի մարմնաւորումը

    Յունուար 18-ի այս օրը մեր ժողովուրդը կը նշէ ծննդեան տարեդարձը հայ յեղափոխականի եւ դաշնակցական ղեկավարի լուսապսակ այն դէմքին, որ իր խօսքով եւ գործքով անմահացաւ ՌՈՍՏՈՄ անունով՝ հայոց սերունդներուն կտակելով Ազգի եւ Հայրենիքի ամբողջական ազատագրութեան ու Հայ Մարդու լիիրաւ ինքնահաստատման եւ զարգացման համապարփակ տեսլականը։

  • Լեւոն Թադէոսեան (Պապաշա, 1865-1935). Հայ յեղափոխական շարժման «Հայրիկ»-ը. Դաշնակցական ղեկավար գործիչի բարոյական հեղինակութեան աւանդը
    Լեւոն Թադէոսեան (Պապաշա, 1865-1935). Հայ յեղափոխական շարժման «Հայրիկ»-ը. Դաշնակցական ղեկավար գործիչի բարոյական հեղինակութեան աւանդը

    Դեկտեմբեր 19-ին կ’ոգեկոչենք յիշատակը մեր ժողովուրդի եզակի ծնունդներէն Լեւոն Թադէոսեանի, որ իր անձով ու գործով արժանաւորապէս մարմնաւորեց հայ ղեկավար գործիչի բարոյական հեղինակութեան աւանդը։

    1935-ի այս օրը, Փարիզի մէջ, 70 տարեկան հասակին աչքերը առյաւէտ փակեց հայ յեղափոխականի ու քաղաքական-պետական ազգային գործիչի ԴԱՇՆԱԿՑԱԿԱՆ նուիրեալ մը՝ Լեւոն Թադէոսեան, որ իր գաղափարական առաքինութեան եւ անձնդիր ծառայութեան համար արժանացաւ Պապաշա (ռուսերէն՝ հայրիկ) անուանումին։

  • Հ.Յ.Դաշնակցութեան հիմնադրման 127-ամեակի առթիւ հանդիսաւոր տօնակատարութիւն՝ Նոր Ջուղայում եւ Շահինշահրում
    Հ.Յ.Դաշնակցութեան հիմնադրման 127-ամեակի առթիւ հանդիսաւոր տօնակատարութիւն՝ Նոր Ջուղայում եւ Շահինշահրում

    Շրջանի Հայ Դատի «Արձագանգ» քարոզչական յանձնախմբի նախաձեռնութեամբ, Հայ Յեղափոխական Դաշնակցութեան հիմնադրման 127-ամեակի առթիւ, հինգշաբթի՝ դեկտեմբերի 14-ին, Նոր Ջուղայում, իսկ ուրբաթ՝ դեկտեմբերի 15-ին, Շահինշահրում տեղի ունեցաւ տօնակատարութիւն։ 

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։