Հա

Ազգային

27/07/2017 - 12:30

Հայ Դատը Գերմանիայի քաղաքական ուժերի շրջանում Արցախի հարցի ակտիւ քարոզարշաւ է անցկացնելու

ՀՅԴ Գերմանիայի Հայ Դատի գրասենեակն առաջիկայ աշխատանքներում շեշտը դնելու է Արցախի հարցի վրայ: Այս մասին «Արմէնպրես»-ի հետ զրոյցում նշեց Գերմանիայում ՀՅԴ Հայ Դատի յանձնախմբի ղեկավար Անդրանիկ Ազնաւուրեանը՝ անդրադառնալով առաջիկայ անելիքներին եւ Գերմանիա-Թուրքիա յարաբերութիւնների սրացմանը:

«alikonline.ir» - ՀՅԴ Գերմանիայի Հայ Դատի գրասենեակն առաջիկայ աշխատանքներում շեշտը դնելու է Արցախի հարցի վրայ: Այս մասին «Արմէնպրես»-ի հետ զրոյցում նշեց Գերմանիայում ՀՅԴ Հայ Դատի յանձնախմբի ղեկավար Անդրանիկ Ազնաւուրեանը՝ անդրադառնալով առաջիկայ անելիքներին եւ Գերմանիա-Թուրքիա յարաբերութիւնների սրացմանը:

 

- Պարոն Ազնաւուրեան, վերջին շրջանում թուրք-գերմանական յարաբերութիւնները բաւական սրւել են: Տեսնում ենք, որ Գերմանիայից կոշտ արձագանգներ են գալիս: Ի՞նչ տրամադրութիւններ են Գերմանիայում ներկայում, եւ որքանով է ստեղծւած իրավիճակը նպաստում հայկական հարցերն առաջ տանելու գործում:

- Այո, Թուրքիա-Գերմանիա յարաբերութիւնները բաւական սրւել են: Գերմանիայում Թուրքիայի նկատմամբ բացասական տրամադրութիւններ կան: Հանրութեան մօտ բացասական կեցւածք կայ: Ընդհանուր տպաւորութիւնն այն է, որ Թուրքիան փորձում է շահագործել իր ռազմավարական դիրքը յատկապէս միգրանտների, փախստականների հարցում: Հետեւաբար, Թուրքիան, այդ հարցն օգտագործելով, փորձում է քաղաքական հարթութիւնում Գերմանիայից ստանալ այնքան, որքան հնարաւոր է՝ նիւթական, Էրդողանի իշխանութեան ամրապնդում, ինչու չէ նաեւ հայկական հարցերում շահեկան դիրքեր: Մենք տեսնում ենք, որ Գերմանիան պաշտպանողական դիրքից անցում է կատարում աւելի ագրեսիւ քաղաքական դիրքերի եւ փորձում է Թուրքիային ցոյց տալ, որ նա չի կարող իր բոլոր մտածածներն իրագործել, մանաւանդ, մարդու իրաւունքներին վերաբերող հարցերի հետ կապւած: Գերմանիայի քաղաքական գրեթէ բոլոր ուժերը միահամուռ, որոշները փոքր-ինչ աւելի առաջ գնալով, մասնաւորապէս, ձախակողմեաններն ու կանաչները, ցանկանում են աւելին պայանջել Գերմանիայի կառավարութիւնից: Այն ինչ Գերմանիայի կառավարութիւնն այսօր որդեգրել է, բաւական խիստ է:

Ինչ վերաբերում է հայկական հարցերին, ապա ասեմ, որ Գերմանիայում չեն ուզում հայկական հարցը կապել Թուրքիայի նկատմամբ իրենց պաշտօնական կեցւածքի հետ: Եթէ յիշում էք Գերմանիայի իշխանութիւնները բանաձեւ ընդունեցին Հայոց Ցեղասպանութեան հարցի հետ կապւած, այսօր էլ այս երկիրը յստակ կանգնած է իր այդ որոշման կողքին: Դա արդէն Թուրքիայի համար լուրջ հարց է, եւ թուրքական կողմը ցանկանում է, որ դա փոխւի, նոյնիսկ անամօթաբար պահանջեց, որ այդ որոշումը յետ քաշւի: Մօտեցում, որը, ինչպէս տեսնում ենք Գերմանիայում ընդհանրապէս ընդունելի չէ:

 

- Պարոն Ազնաւուրեան, ձեր վերլուծութիւններն ի՞նչ են ցոյց տալիս, Թուրքիայի նկատմամբ Գերմանիայի դիրքորոշումը, յարաբերութիւնների սրացումը արդեօ՞ք նկատւում է նաեւ Եւրոմիութեան անդամ միւս երկրներ մօտեցումներում, թէ սա զուտ գերմանա-թուրքական գործ է:

- Ոչ, սա զուտ գերմանա-թուրքական գործ չէ, այլ Եւրոպա-Թուրքիա գործ է: Պէտք է նկատի առնել այն, որ Գերմանիայում ամենամեծ թուրքական համայնքն է, բնականաբար այն Թուրքիայի լուսարձակի տակ է յայտնւել: Ինչ վերաբերում է միւս եւրոպական երկրներին, ապա այնտեղ կան թուրքեր, սակայն այդքան ուժեղ, կազմակերպւած  չեն այդ համայնքները: Գերմանիայում կան Էրդողանի համակիր շատ մեծ թւով թուրքեր, որոնք պատրաստ են քաղաքական ոտնձգութիւններ կազմակերպելու: Բնականաբար, Թուրքիայի առաջին թիրախը Գերմանիան է, եթէ կարողացաւ Գերմանիային դնել իր ուզած ճանապարհի վրայ, ապա մնացած եւրոպական երկրները, երեւի թէ, իր կարծիքով, աւելի դիւրին կը լինեն: Եւ մենք այսօր Գերմանիայի պաշտօնեաների, գործիչների յայտարարութիւններում տեսնում ենք, որ իրենք պահանջում են Եւրոպայից կտրուկ կեցւածք Թուրքիայի նկատմամբ:

 

- Նշեցիք, որ Գերմանիայում Էրդողանի մեծ թւով համակիրներ կան, կարո՞ղ ենք ասել, որ ներքին ընդւզումները չեն բացառւում:

- Չի բացառւում, դա միշտ պէտք է նկատի ունենալ: Մի քանի առիթներով նման բաների փորձ եղաւ, բայց զսպւեցին: Դա յատկապէս եղաւ հանրաքւէի նախաշեմին, երբ թուրք գործիչները եկան եւ այստեղ ելոյթներ ունեցան ընտրապայքարի շրջանակում, այստեղ բաւական խլւրտումներ տեղի ունեցան:

 

- Պարոն Ազնաւուրեան, Գերմանիայի Հայ Դատի յանձնախումբն ի՞նչ աշխատանքներ է նախատեսում առաջիկայում, օրակարգային ի՞նչ հարցեր կան նախատեսւած:

- Հայոց Ցեղասպանութեան հարցը կարեւոր է, սակայն Գերմանիայում հրատապ չէ, որովհետեւ այդ ուղղութեամբ բաւական աշխատանք տարւել է, հետեւաբար շեշտը դնում ենք Արցախի հարցի վրայ: Արցախի հարցով, ցաւօք, մեր հանրութիւնն այնքան պատրաստւած չէ, որքան Հայոց Ցեղասպանութեան հարցի հետ կապւած: Հետեւաբար` այստեղ հսկայական աշխատանք կայ անելու նախ Արցախի հարցը միջազգային հասկացողութեամբ բացատրելու, ներկայացնելու, որ այստեղ ոչ միայն պատմական հողերի հետ կապւած հարցեր են, այլեւ իրաւական: Նրբութիւնները նկատի առնելով, այստեղ պէտք է լուրջ քարոզչական աշխատանք սկսել: Ցաւօք, Գերմանիայում Արցախի քաղաքական ներկայացուցչութիւնը քաղաքական խօսակցութիւններից, կարծես, դուրս է մնացել, նախայարձակ աշխատանք նկատելի չէ: Հետեւաբար` այդ ուղղութեամբ ենք աշխատելու:

 

- Իսկ աշխատելու էք այն ուղղութեամբ, որ Գերմանիայի քաղաքական, հասարակական գործիչների բերէք Արցախ, տեղում ծանօթանալու խնդրին:

- Անշուշտ, դա նոյնպէս կայ: Ներկայում էլ Գերմանիայից գործիչներ գալիս են Արցախ, ապագայում էլ կը շարունակւի այդ աշխատանքը: Բայց կարծում եմ, որ այդ այցերը, իրենց դրական կողմերն ունենալով հանդերձ, քաղաքական որոշումների վրայ այդպէս ուժեղ ազդեցութիւն կարճ ժամանակում չեն ունենալու: Այստեղ յստակ քաղաքական շահեր կան, հետեւաբար այս շահերը պէտք է գերմանական կուսակցութիւններին բացատրել, ցոյց տալ, որ պարզապէս Ադրբեջանի կողմ լինելով, հարցերը չեն լուծւի, ընդհակառակը աւելի կը խորանան: Պէտք է խաղաղութիւն հաստատող լուծում մտածել: Հետեւաբար` քաղաքական կուսակցութիւնների մօտ ակտիւքարոզարշաւ պէտք է կատարենք՝ ներկայացնելով խնդրի բոլոր կողմերը եւ լուծման իմաստով Արցախի ժողովրդի ակնկալիքները:

Յարակից լուրեր

  • Դաշնակցութեան դիրքորոշումը վերջնական կը ներկայացւի խորհրդարանի ամբիոնից
    Դաշնակցութեան դիրքորոշումը վերջնական կը ներկայացւի խորհրդարանի ամբիոնից

    Արցախում տեղի ունեցած վերադասաւորումների, ներքաղաքական իրավիճակի, առաջիկայում սպասւող նախագահական ընտրութիւնների եւ այլ հարցերի շուրջ «Tert.am»-ը զրուցել է ԱՀ ՀՅԴ խմբակցութեան պատգամաւոր Դաւիթ Իշխանեանի հետ:

  • Արցախի ի նպաստ յաղթանակ մը
    Արցախի ի նպաստ յաղթանակ մը

    Միացեալ Նահանգներու Ներկայացուցչական տունը հինգշաբթի, 11 յուլիսին որդեգրեց բանաձեւ մը, որ ամերիկեան կառավարութեան կ՛արգիլէ Ատրպէյճանին ծախել այնպիսի զէնքներ, որոնք կրնան գործածուիլ Ստեփանակերտի օդակայանը օգտագործող օդանաւերու դէմ։ Ատրպէյճանի այս սպառնալիքին եւ անոր յաճախակի գործադրութեան հետեւանքով, Արցախի մայրաքաղաքին օդակայանը անդամալոյծ կը մնայ տասնամեակներէ ի վեր։

  • Արցախի մէջ հիմնուեցաւ Հ.Մ.Ը.Մ.-ի 111-րդ մասնաճիւղը
    Արցախի մէջ հիմնուեցաւ Հ.Մ.Ը.Մ.-ի 111-րդ մասնաճիւղը

    Հ.Մ.Ը.Մ.-ի երկրորդ հարիւրամեակի ծրագիրներուն առաջնահերթութիւնը Արցախի մէջ Հ.Մ.Ը.Մ.-ի մասնաճիւղ հիմնելու անհրաժեշտութիւնն էր։

  • Ծաւալւած գործընթացն իր մէջ պարունակում է լուրջ վտանգներ
    Ծաւալւած գործընթացն իր մէջ պարունակում է լուրջ վտանգներ

    Սամուէլ Բաբայեանը եւ նրա թիմակիցները փորձում են մեր հանրութեանը մոլորութեան տանելով եւ զգացական թելերի վրայ խաղալու քայլերով բացատրել, որ իբր այս գործընթացով Արցախը վերջնականորեն կը միաւորւի մայր Հայաստանին:

  • «Դաշնակցութիւն» խմբակցութիւնը հանդիպել է Արարատ Դանիէլեանին
    «Դաշնակցութիւն» խմբակցութիւնը հանդիպել է Արարատ Դանիէլեանին

    Երէկ՝ յուլիսի 12-ին, ԱՀ Ազգային ժողովի «Դաշնակցութիւն» խմբակցութեան պատգամաւորները հանդիպել են ԱՀ արդարադատութեան նախարար Արարատ Դանիէլեանի հետ՝ մանրամասն քննարկելու առաջին ընթերցմամբ ընդունւած ԱՀ Ընտրական օրէնսգրքի եւ Կուսակցութիւնների մասին օրէնքի նախագծերը, բանաւոր ներկայացնելու խմբակցութեան առաջարկութիւնները եւ մտքեր փոխանակելու մի շարք այլ հարցերի շուրջ:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։