Հա

Ազգային

Չորեքշաբթի, 13 Սեպտեմբերի 2017 10:50

Արմէն Ռուստամեան. «Մեզ համար կարեւորը գաղափարներն ու ծրագրերն են»

Սեպտեմբերի 12-ին ՀՀ ԱԺ-ում լրագրողների հետ զրոյցում ՀՅԴ Բիւրոյի քաղաքական ներկայացուցիչ, ՀՀ ԱԺ ՀՅԴ խմբակցութեան ղեկավար Արմէն Ռուստամեանը նշեց, որ Դաշնակցությիւնը դէմ է «Ելք»-ի՝ ԵԱՏՄ-ից դուրս գալու առաջարկին: 

«alikonline.ir» - Սեպտեմբերի 12-ին ՀՀ ԱԺ-ում լրագրողների հետ զրոյցում ՀՅԴ Բիւրոյի քաղաքական ներկայացուցիչ, ՀՀ ԱԺ ՀՅԴ խմբակցութեան ղեկավար Արմէն Ռուստամեանը նշեց, որ Դաշնակցությիւնը դէմ է «Ելք»-ի՝ ԵԱՏՄ-ից դուրս գալու առաջարկին: Տեղեկացնում է «arfd.am»-ը:

Հարցին՝ կուսակցութիւնն արդեօ՞ք քննարկել է հարցը, նա ապատասխանեց, որ դա հայեցակարգային խնդիր է, եւ իրենց մօտեցումներն այս սկզբունքային խնդրին վաղուց ձեւակերպած եւ ձեւաւորած են: «Պարտադիր չէ, որ ամէն անգամ լայն հանրաքւէ անցկացնենք` հասկանալու համար, թէ ՀՅԴ-ն ինչպիսի մօտեցում ունի այս հարցի հետ կապւած»,- ասաց պատգամաւորը, ապա յաւելեց, որ սա առանցքային հարցերից մէկն է, որն իրենք լայնօրէն քննարկել ու ուսումնասիրել են դեռեւս այն ժամանակ, երբ Հայաստանը որոշեց ԵԱՏՄ անդամ դառնալ:

Ռուստամեանը նաեւ վստահեցրեց, որ դրանից յետոյ իրենց մօտեցումները չեն փոխւել, ընդհակառակը` համոզւել են, որ Հայաստանի անվտանգութեան խնդիրները լուծելու ամենաճիշտ որոշումն էր այդ պահին: Նա նաեւ իրենց տեսակէտի ճշմարտացիութիւնը փաստելու համար բերեց օրինակ, որ ԵՄ-ն էլ իր տեսակէտը փոխել է: «Հնարաւորութիւն է տալիս նորից վերադառնալու «ե՛ւ, ե՛ւ»-ի քաղաքականութեանը՝ ունենալ միաժամանակ անդամակցութիւն թէ՛ ԵԱՏՄ-ում, թէ՛ համապարփակ պայմանագրով ասոցացւել ԵՄ-ի հետ»,- նշեց պատգամաւորը:

Հարցին՝ ի՞նչ անվտանգութեան հարց լուծւեց ԵԱՏՄ-ին անդամագրւելուց յետոյ, եւ դիտարկմանը՝ իրականում ՌԴ-ն որեւէ աջակցութիւն ցոյց չտւեց քառօրեայ պատերազմի ժամանակ, նա արձագանգեց. «Բացարձակապէս օդից վերցւած յայտարարութիւններ են, իրականութեան հետ դրանք կապ չունեն: Մենք փաստ ունենք. մենք քառօրեայ պատերազմում յաջողած երկիր ենք: Այդպիսի հարց տւողները չեն հասկանում` ինչ է նշանակում պաշտպանութիւն եւ զինւած ուժեր: Եթէ թւում է, որ միայն զինւորներն են յաղթում` դատարկ ձեռքերով, չարաչար սխալւում էք: Մեր զինւորների հերոսութեան վրայ որեւէ մէկը չի կասկածել, այդ թւում` նաեւ թշնամին, սակայն եթէ մենք չունենանք ռազմական միջոցներ, դժւար է միջնադարեան միջոցներով այսօր պայքարել առաջադէմ երկրների դէմ»:

Ռուստամեանի խօսքով՝ մենք ունենք անվտանգութեան երկու հիմնական բաղադրիչ՝ յարաբերութիւններ Ռուսաստանի հետ եւ ՀԱՊԿ-ը: Նա ընդգծեց, որ այսօր Հայաստանն այլընտրանք չունի, թէեւ նշեց, որ դա չի նշանակում, որ չի կարող ունենալ: «Դրանով մենք չպէտք է սահմանափակւենք, պէտք է ամէն ինչ անել, որ կարողանանք այլընտրանքներ ունենալ, մեր անվտանգութիւնը ապահովել»:

Պատգամաւորը նաեւ նշեց, որ տնտեսապէս ԵԱՏՄ-ում ունենք մեծ հնարաւորութիւններ, որոնք լիարժէք չեն օգտագործւել: «Մենք ենք մեղաւոր, որ այդ շուկան լիարժէք չենք օգտագործել: Մենք չենք կարողացել այդ նոր իրավիճակին համապատասխանացնել մեր տնտեսութիւնը: Դա մեր խնդիրն է, որը պէտք է լուծենք: Այդ խնդիրը պէտք է լուծի կառավարութիւնը, իշխանութիւնները»,- ասաց նա` յաւելելով, որ այնպէս էլ չէ, որ ոչինչ չի արւել:

Ըստ Ռուստամեանի` «Ելք»-ի նախաձեռնութիւնը դրական կողմ ունի: ««Ելք»-ի նախաձեռնութիւնը եւս մէկ անգամ թերացումների մասին խօսելու հնարաւորութիւն է տալիս, այդ առումով` շատ ողջունելի է»,- եզրափակեց նա:

Արմէն Ռուստամեանն անդրադարձաւ Հայաստան-ԵՄ ասոցացման համաձայնագրի ստորագրմանը:

Լրագրողները հետաքրքրւեցին` արդեօ՞ք վերջին պահին համաձայնագիրը կրկին չի ստորագրւի: Ռուստամեանը պատասխանեց, որ այս անգամ նման բան չի լինի: «Այն պատճառը, որի հետեւանքով համաձայնագիրը չստորագրւեց, այլեւս գոյութիւն չունի: Բոլոր բանակցութիւնները գնացել են այն տրամաբանութեամբ, որ Հայաստանն արդէն ԵԱՏՄ անդամ է, եւ դա նշանակում է, որ այդ հանգամանքը հաշւի առնելով է, որ այդ գործընթացը սկսւել է, այսինքն` սրանք իրար հակառակ չեն»,- նշեց նա:

Հարցին՝ ճնշում չի՞ լինի Ռուսաստանի կողմից, պատգամաւորը պատասխանեց, որ չի կարծում: «Չի կարող լինել, այդ ընթացքից Ռուսաստանն էլ է տեղեակ, գիտի, որ դա տեղի է ունենում: Խնդիրները, չեմ կարծում, այն սրութեամբ են, որ կային նախորդ անգամ»,- կարծիք յայտնեց նա:

Հարցին՝ մէկ գիշերում որոշում չի՞ կայացւի, Ռուստամեանը պատասխանեց` ոչ:

Նրա խօսքով՝ այդ համաձայնագիրը շատ լուրջ բաներ է մեզ տալու: «Մեզ տալու է պետական շինարարութեան հետ կապւած այն արժեհամակարգի արագ տեղայնացումը, որը մեզ այսօր անհրաժեշտ է: Մենք այսօր նոր խորհրդարանական համակարգի մէջ ենք, եւ եւրոպական պառլամենտարիզմի փորձը եւ դրա ձեռքբերումներն ու նւաճումները մեզ այսօր օդ ու ջրի պէս պէտք են, որպէսզի կարողանանք ճիշտ ուղորդել մեր համակարգը»,- ասաց պատգամաւորը:

Իսկ հարցին՝ տեղեա՞կ են, թէ ինչ փաստաթուղթ է համաձայնագիրը, քանի որ «Ելք»-ը նշում է, թէ չեն տեսել այն, Ռուստամեանը պատասխանեց, որ ընդհանուր գծերով ծանօթ են:

ՀՅԴ խմբակցութեան ղեկավար Արմէն Ռուստամեանի կարծիքով` Կարէն Կարապետեանի գալով` իսկապէս նոր շունչ մտաւ կառավարման համակարգի մէջ: Այսօր խորհրդարանում լրագրողների հետ զրոյցում, պատասխանելով հարցին՝ ի՞նչ դրական փոփոխութիւններ կարող է նշել վարչապետի մեկամեայ գործունէութեան ընթացքում, նա նշեց, որ նորարարութիւնների արդիւնքները տեսնելու համար ժամանակ է պահանջւում:

«Դժբախտաբար, դեռ այդ վիճակը չունենք, ուստի տեմպերը պէտք է դրան համապատասխանեցւեն, տեմպերը կարող են գոհացնող չլինել, բայց ուղղութիւնը, որ կառավարութիւնը վերցրել է եւ կառավարութեան ծրագրով ներկայացւեց, գրեթէ 90 տոկոսով համապատասխանում է մեր պատկերացումներին»,- ասաց պատգամաւորը:

Ըստ նրա` գլխաւոր հարցն այն է, թէ շրջափակւած Հայաստանը դէպի ծով ելք չունենալու պայմաններում ինչպէս պէտք է իր սեփական ռեսուրսները ձեւաւորի եւ այդ ուղղութեամբ խնդիրները լուծի: «Կառավարութեան մէջ էլ ենք մենք նոյնը անելու: Մեր բռնած ուղղութիւնը ճիշտ է, եւ կամաց-կամաց Հայաստանը դուրս է գալու այս ճգնաժամից»,- վստահեցրեց Ռուստամեանը:

Հարցին՝ կը ցանկանա՞ք, որ Կարէն Կարապետեանը շարունակի իր սկսած գործն առաջիկայ տարիներին, նա արձագանգեց. «Մեզ համար կարեւորը գաղափարներն ու ծրագրերն են, որոնք պէտք է շարունակութիւն ունենան, դրա համար մենք ընդունել ենք կառավարութեան ծրագիր, որը 2017-2022 թւականների հետ է կապւած: Անձի հետ կապւած չէ: Իրականացնողն ո՞վ կը լինի, մեզ համար, իհարկէ, կարեւոր է, որ իր հոգով-սրտով այս գործը կարողանայ կատարել, բայց այդպիսի մարդիկ շատ կան, եւ մեզ համար, այդ առումով, անձն այնքան էլ կարեւորութիւն չունի»:

Հարցին էլ՝ ինչո՞ւ ՀՅԴ-ն չունի վարչապետի սեփական թեկնածու, Ռուստամեանը պատասխանեց, որ դա քաղաքական օրինաչափ գործընթաց է: «Դուք երեւի տեղեակ չէք կոալիցիոն համաձայնագրի տեքստից: Աայնտեղ շատ յստակ գրւած է, որ այդ տեղը տրւած է ՀՀԿ-ին, այդ պատճառով էլ իմաստ չունի, որ ՀՅԴ-ն իր սեփական թեկնածուի մասին խօսի»,- ասաց նա:

Ինչ վերաբերում է հարցին, որ Ծառուկեանը չի բացառել կոալիցիա կազմելը, արդեօ՞ք ՀՅԴ-ն տեսնում է երեք ուժերի կոալիցիա, Ռուստամեանը նշեց, որ հիպոթետիկ հարցերի չի անդրադառնում, եթէ կոնկրետ վիճակ լինի, այդ մասին կը խօսեն:

Արմէն Ռուստամեանը անդրադարձաւ մշակոյթի նախարարութեան կողմից Թումանեանի տուն-թանգարանի տնօրէն Նարինէ Թուխիկեանի կազմակերպած ցուցահանդէսի փակմանը:

«Սա, իհարկէ, վրդովեցուցիչ է: Ես նոր եմ տեղեկացել դրա մասին: Հանգամանքներին քանի որ ծանօթ չեմ, չեմ կարող պատասխանել, բայց ցուցահանդէս փակելը նորմալ բան չէ»,- ասաց նա:

Հարցին՝ խնդիրը թեմա՞ն էր, պատգամաւորն արձագանգեց. «Ես չգիտեմ, մանաւանդ` եթէ 37-ի զոհերին է վերաբերում, ապա մշակոյթի նախարարութիւնն ինքը պէտք է խրախուսի նման ցուցահանդէսների անցկացումը: Մենք մեր պատմութիւնը պետք է լաւ ուսումնասիրենք»:

Նա եւս մէկ անգամ նշեց, որ իր համար դա վրդովեցուցիչ է: «Մարդը ուսումնասիրութիւն է արել, դրա հետ կապւած ցուցահանդէս է հրաւիրել, իսկ մենք գիտենք, որ Յովհաննէս Թումանեանի երեք զաւակները հէնց դրա զոհն են եղել, այսինքն` կապ կայ այդ ամէն ինչի մէջ»,- ասաց Ռուստամեանը:

Նշենք, որ օգոստոսի 4-ին Յովհաննէս Թումանեանի թանգարանի բացօթյեայ տարածքում կայացաւ «Խաւարում» խորագրով ցուցադրութեան բացումը, որը նւիրւած էր խորհրդային բռնատիրութեան զոհերին: ՀՀ մշակոյթի փոխնախարար Արեւ Սամուէլեանի պահանջով ցուցահանդէսը փակւեց: Ցուցահանդէսի փակման կապակցութեամբ Սամուէլեանը նշել էր. «Ճիշտ է, թեման ակտուալ է, մենք պէտք է պատմութեանը պարզ երեսով նայենք, բայց կարծում եմ, որ այն մի փոքր քաղաքականացւած էր: Այժմ սկսւել են փողոցների անվանափոխութեան հետ կապւած գործընթացներ, եւ այդ ցուցահանդեսն էլ ընկալւել է այդ համատեքստում»:

Յարակից Հրապարակումներ

Ամենաշատ ընթերցւած

Քւէարկութիւն

Կարո՞ղ է արդեօք նախագահի այցը Նիւ Եօրք նպաստել Իրանի միջազգային դիրքի ամրապնդմանը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։