Հա

Ազգային

07/02/2018

Աղւան Վարդանեան. «2018-ի իւրաքանչիւր օրը Մայիսի 28-ով շնչաւորելու անհրաժեշտութիւն կայ»

Ներկայացնում ենք փետրւարի 6-ին ՀՀ ԱԺ յայտարարութիւնների ժամին ՀՅԴ խմբակցութեան քարտուղար Աղւան Վարդանեանի ելոյթը.

«alikonline.ir» - Ներկայացնում ենք փետրւարի 6-ին ՀՀ ԱԺ յայտարարութիւնների ժամին ՀՅԴ խմբակցութեան քարտուղար Աղւան Վարդանեանի ելոյթը.

«Յարգելի խորհրդարան,

2018 թւականը մեր երկրի կեանքում հարուստ է բացառիկ իրադարձութիւններով: Բայց դրանց թւում, վստահ եմ, գլխաւորը, առանցքայինը, նշանայինը անկախ պետականութեան վերականգնման 100-ամեակն է՝ մեր ժողովրդի մտածողութեան մէջ առասպելաբանութեան վերածւած Մայիսի 28-ը:

Այո՛, մենք խորհրդարանական կառավարման անցնելու եզրափակիչ փուլում ենք՝ դրանից բխող քաղաքական բազմաթիւ առաջնահերթութիւններով. Հանրապետութեան նախագահ, վարչապետ պէտք է ընտրենք, նոր կառավարութիւն ձեւաւորենք, երկիրը որակական, արմատական բարեփոխումներով զարգացնելու նոր ուղիներ փնտրենք:

Այո՛, երկրում առկայ սոցիալ-տնտեսական, հոգեւոր-մշակութային խնդիրները, արտաքին մարտահրաւէրները ամենօրեայ սեւեռուն ուշադրութիւն են պահանջում:

Այո՛, մենք չլուծւած շատ հարցեր ունենք, կենցաղն էլ իր հոգսերն է թելադրում:

Բայց այս ամբողջի մէջ մենք պարտաւոր ենք գիտակցել, որ հիմքերի հիմքը անկախ պետականութիւնն է, իսկ 100-ամեայ անկախութեան համապետական, համազգային արժեւորումը՝ ապագայում լաւագոյնս իրացւելու առիթ ու հնարաւորութիւն:

Ես համաձայն չեմ, որ բացառիկ այդ տարեթիւը սահամանափակւի մի քանի օրւայ տօնակատարութեամբ:

Ամբողջ տարին այդ նշանի տակ պէտք է անցնի:

Հայաստանի Հանրապետութեան լիաժէք քաղաքացի դաստիարակելու, նոր սերնդի մէջ պետականութեան գիտակցութիւն սերմանելու, մեր մեծերի՝ Արամ Մանուկեանի, Նժդեհի, Դրոյի, Սիլիկեանի, Անդրանիկի, Վրացեանի, Շանթի, Աղբալեանի, Թեհլերեանի, Վարուժանի, Սիամանթոյի, Տէրեանի, Թումանեանի՝ հայկականութեան, ազգային բարձր բարոյականութեան, նւիրումի, անձնազոհութեան օրինակը վարքականոն դարձնելու առումով 2018-ի իւրաքանչիւր օրը Մայիսի 28-ով շնչաւորելու անհրաժեշտութիւն կայ:

Այո՛, վարչապետի գլխաւորութեամբ կառավարական յանձնաժողով է ստեղծւած: Այո՛, պատշաճ նշելու ծրագրեր կան, բայց շրջանակը պէտք է ընդլայնւի՝ բոլոր քաղաքական ուժերը, Հայ առաքելական եկեղեցին, կառավարութիւնն ամբողջ կազմով, Երեւանի քաղաքապետարանը, մարզերը, համազգային կառոյցները, լրատւամիջոցներն ամենօրեայ գործունէութիւն պէտք է ծաւալեն:

Ճիշտ է, Մայիս 28-ը կերտելու մէջ էական դերակատարություն է ունեցել Դաշնակցութիւնը, բայց այն համայն հայութեան դարաւոր իղձերի մարմնացումն էր, բոլոր հայերի անկախ պետականութեան մեծ սկիզբը: Եւ Դաշնակցութիւնը նաեւ այս առումով է բոլորինը:

Յարգելի խորհրդարան, յարգելի հայրենակիցներ,

Չկայ անկախ պետականութիւնից բարձր արժէք: Այդ մեծ սկիզբը յաւէրժական դարձնելու պարտքն ու պատասխանատւութիւնը մերն է ու յաջորդ սերունդներինը:

Այդ յաւէրժութիւնը երաշխաւորելու համար է անհրաժեշտ 2018-ի ամէն օրը լցնել Մայիսի 28-ի բովանդակութեամբ ու խորհրդով»:

Յարակից լուրեր

  • Մեր լինելութեան գրաւականը
    Մեր լինելութեան գրաւականը

    1918 թւականի Մայիսի 28-ին, աշխարհաքաղաքական բարդ իրավիճակում, թրքական ոճրագործ բանակի գործողութիւնները Արեւելեան Հայաստանում արիաբար կասեցնելով եւ ինքնապաշտպանական հերոսական մարտերից յետոյ, իրագործւեց հայ ժողովրդի դարաւոր երազանքը՝ հիմնադրւեց Հայաստանի անկախ Հանրապետութիւնը:

  • Ինչ տօն ենք տօնում
    Ինչ տօն ենք տօնում

    Ակնյայտ է, որ որոշ մարդկանց համար այսօր էլ դեռ յստակ չէ, թէ ինչին է նւիրւած 100-ամեակի տօնը, որ համազգային շուքով տօնում ենք այս տարի: Միթէ՞ այդպիսի տպաւորութիւն չի ստացել ցանկացած մարդ ներկայ գտնւելով (եթէ յաջողւել է ներկայ գտնւել) Սարդարապատի տօնակատարութեանը: Ինքս առիթ ունեցայ տանը լինելու եւ հեռուստացոյց միացնելու, երբ հարիւրամեակի համերգին ինչ-որ երիտասարդ փորձում էր անգլերէն երգ երգել եւ հասկանալով, որ այստեղ էլ բան չեմ կորցրել փոխեցի ալիքը:

  • Սարքուած խայտառակութիւնը
    Սարքուած խայտառակութիւնը

    Մայիս 28-ին, Սարդարապատի յուշահամալիրին առջեւ, սարքւեց խայտառակութիւն մը։ Պարզուած ամօթին գիտակից էին թէ անգիտակից, հայրենի պետական այրերը, միեւնոյնն է։ Կատարուածը մեր պատմութեան դէմ դաւաճանութեան համազօր էր, պատահածը մեր ազգային արժանապատուութեան դէմ նախատինք էր։

  • 28 Մայիս 1918. Հայ ժողովուրդը արեամբ նուաճեց ազատ, անկախ ու միացեալ ապրելու իր իրաւունքը
    28 Մայիս 1918. Հայ ժողովուրդը արեամբ նուաճեց ազատ, անկախ ու միացեալ ապրելու իր իրաւունքը

    Մայիս 28-ին, 100 տարի առաջ, Արարատեան դաշտին մէջ, հայ ժողովուրդը սեփական ուժով պարտութեան մատնեց թրքական ասպատակ զօրքերը եւ արժանաւորապէս, այլեւ հերոսական արեամբ նուաճեց ազատ, անկախ ու միացեալ ապրելու իր իրաւունքը։

  • Հայաստանի եւ սփիւռքի դաշնակցականները տօնել են յաղթական Մայիսի 28-ը
    Հայաստանի եւ սփիւռքի դաշնակցականները տօնել են յաղթական Մայիսի 28-ը

    Հայաստանի Հանրապետութեան 100-ամեակին նւիրւած տօնակատարութիւնների շրջանակում Հայ Յեղափոխական Դաշնակցութիւնը երէկ՝ մայիսի 28-ին բազմամարդ քայլերթ էր կազմակերպել Երեւանում՝ Մատենադարանից մինչեւ Հանրապետութեան Հրապարակ: Բազմամարդ երթին մասնակցում էին ինչպէս Հայաստանի տարբեր մարզերից, այնպէս էլ սփիւռքի հայկական գաղթօջախներից ժամանած բազմաթիւ դաշնակցականներ, կուսակցութեան համակիրներ: 

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։