Հա

Ազգային

10/02/2018 - 11:00

Արմէն Ռուստամեան. «Մեր տեսակէտից չենք պատրաստւում հրաժարւել, քանի ռէյտինգային ընտրակարգը պահելու տրամաբանական պատասխան չենք ստացել»

ՀՀ ԱԺ ՀՅԴ խմբակցութեան ղեկավար Արմէն Ռուստամեանը հաւաստիացնում է, որ ռէյտինգային ընտրակարգի շուրջ ՀՅԴ-ի եւ ՀՀԿ-ի տարաձայնութիւնները երկու կուսակցութիւնների յարաբերութիւնների վատացման չեն յանգեցնի: 

«alikonline.ir» - ՀՀ ԱԺ ՀՅԴ խմբակցութեան ղեկավար Արմէն Ռուստամեանը հաւաստիացնում է, որ ռէյտինգային ընտրակարգի շուրջ ՀՅԴ-ի եւ ՀՀԿ-ի տարաձայնութիւնները երկու կուսակցութիւնների յարաբերութիւնների վատացման չեն յանգեցնի: Տեղեկացնում է «yerkir.am»-ը:

«Այդպիսի բան գոյութիւն չունի, յարաբերութիւնների վատացման խնդիր գոյութիւն չունի, ամէն ինչ պէտք է տեղի ունենայ կարգաւորւած, մեխանիզմների մշակման դաշտում: Սրանք բոլորը նախատեսւած են բուն կոալիցիոն յուշագրով, որից դուրս Դաշնակցութիւնը չի գործել: Մենք գործել ենք համաձայն այն պայմանաւորւածութիւնների ինչ-որ կոալիցիոն յուշագրով նախատեսւած են: Մենք այնտեղ շատ յստակ ասել ենք, որ այն հարցերը, որոնք համատեղ չենք քննարկում, չենք համաձայնեցնում, ամէն կողմն իրաւունք ունի իր տեսակէտը պաշտպանելու հրապարակային, մինչեւ այն պահը, որ դա դառնում է որոշում եւ պարտադիր է բոլորի համար»,- խորհրդարանում լրագրողների հետ զրոյցում ասաց պատգամաւորը:

Ռուստամեանը եւս մէկ անգամ շեշտեց, որ Ընտրական օրէնսգրքի (ԸՕ) շուրջ եղած անհամաձայնութիւնների մէջ տարօրինակ բան չկայ: «Որեւէ անակնկալ մենք որեւէ մէկին, այդ թւում` նաեւ ՀՀԿ-ին, չենք մատուցել: Այն մօտեցմանը, որը ես հրապարակել եմ, մեկնաբանելով մեր յայտարարութիւնը, վաղուց բոլորը ծանօթ էին, մենք թաքուն չենք արել դա»,- բացատրեց նա:

Պատգամաւորն ընդգծեց, որ կոնսենսուսի համար են կողմ եղել այս ԸՕ-ին եւ վերապահումով են ընդունել Ընտրական օրէնսգիրքը, որում ամրագրւած է ռէյտինգային այնպիսի համակարգ, որի վերաբերեալ դեռ ժամանակին ՀՅԴ-ն շատ յստակ ասել է` անընդունելի է:

«Մենք համամասնական դասական ձեւերին ենք կողմնակից, եւ ցանկացած շեղում, նորարարութիւն միշտ պրոբլեմներ է առաջացնում: Տրամաբանութիւնն ասում էր, որ մէկ անգամ գոնէ սա պէտք է փորձել, որպէսզի տեսնենք` մենք ճի՞շտ էինք, թէ՞ ոչ: Փորձարկումից յետոյ աւելի ենք համոզւել, որ մեր մօտեցումները շատ ճիշտ են եղել, եւ այն ռէյտինգային ձեւը, որ Հայաստանում գործում է, շեղում է համամասնական ընտրակարգից»,- ընդգծեց նա:

Ռուստամեանը բացատրեց, որ պատրաստւում են իրականացնել կոալիցիոն յուշագրով նախատեսւած բոլոր կէտերը, այդ թւում` այն կէտը, որտեղ ասևում է` ԸՕ-ը պէտք է կատարելագործւի: «Կատարելագործումն արդէն ենթադրում է, որ այն, ինչ կայ, մեզ չի բաւարարում եւ չի բաւարարում ոչ միայն մեզ, այլ նաեւ ՀՀԿ-ին, այլապէս այդ կոալիցիոն յուշագիրը չէր համաձայնեցնի այդ կէտը: Ուրեմն ինքներս ընդունում ենք, որ այդտեղ անելիք կայ: Նրանք մի ծաւալի անելիք են այդտեղ պատկերացնում, մենք` այլ ծաւալի: Բնական իրավիճակ է, որ մենք մեր բանակցութիւններով ու խորհրդակցութիւններով յանգենք ընդհանուր յայտարարի: Ցանկացած քայլ, որը կը տանի դէպի կատարելագործում, մենք, բնականաբար, ընդունելու ենք: Ես չեմ բացառում, որ այս կարեւորագոյն հարցը տարաձայնութիւններ ձեւաւորող խնդիր կառաջացնի, բայց մենք մեր տեսակէտից չենք պատրաստւում հրաժարւել, քանի  այս համակարգը պահելու տրամաբանական պատասխան չենք ստացել»,- շեշտեց Ռուստամեանը:

Հարցին` հնարաւո՞ր է դուրս գան կոալիցիայից, նա պատասխանեց. «Կոալիցիայից դուրս գալու խնդիր եթէ լինէր, մենք չէինք էլ մտնի կոալիցիա: Պէտք է նկատի ունենալ, որ այս տարաձայնութիւնը վաղուց կար, նախքան կոալիցիա ձեւաւորելը կար: Տարաձայնութիւնը չի եղել հիմնական անկիւնաքարը, որի վրայ կառուցւել է կոալիցիոն համագործակցութիւնը: Այս համագործակցութիւնը պէտք է օգուտ տայ մեր ժողովրդին, մեր երկրին, սրա համար ենք գնացել կոալիցիայի»:

Անդրադառնալով «Ծառուկեան» խմբակցութեան հետ այս հարցում համագործակցելուն` Ռուստամեանն ասաց, որ իրենց համար ընդունելի չէ այն մարտավարութիւնը, որ նրանք ուզում են շարունակել: «Այսինքն` տանենք, քւէարկենք, թող չընդունեն: Մենք այդպիսի մօտեցումը չենք համարում կառուցողական: Ենթադրենք` այդ երկու ամիսը յետաձգւել է, երկու ամսւայ մէջ բերել են յանձնաժողով, եւ այն տւել է բացասական եզրակացութիւն: Ընթացքն ինչպիսի՞ն է. յետոյ գալու է ԱԺ, քւէարկւի եւ չմտնի օրակարգ, յետո՞յ, դրա հաճոյքը ո՞րն է»,- նշեց նա, ապա եւս մէկ անգամ շեշտեց, որ այդ ձեւն իրենց համար ընդունելի չէ:

«Մենք գնանք նրան, որ հաստատ գիտենք` չի ընդունւելու, այդ ճանապարհն ինչո՞ւ անցնենք, դրա իմաստը ո՞րն է: Մենք պէտք է անենք մի բան, որը արժեւորւի, կեանքի կոչւի: Ռէալ պոլիտիկս ասւածը դա է, որ դու կարողանաս քո ծրագրերն իրականացնել, ոչ միայն ինքնանպատակ յայտարարել, այդ ծրագրերով հրապուրւել, այլ այդ ծրագրերը կեանքի կոչել, դա է արել Դաշնակցութիւնը մինչեւ հիմա»,- նշեց պատգամաւորը, ապա յաւելեց. «Մենք գիտենք, որ այս հարցը գլխաւոր տարաձայնութիւններ առաջացնող հարցն է եղել, եւ մեզ համար ԸՕ փոխելը չի նշանակում` մենակ մի հարցով հրապարակ գալ: Պէտք է փաթեթը ձեւաւորենք, որովհետեւ առաջացել է խնդիր, նոր ընտրութիւններ են տեղի ունեցել, որոնց հետեւանքը քննարկւել է եւ գնահատւել միջազգային կառոյցների կողմից, եւ կան առաջարկութիւններ` այդ կառոյցներից բխած: Մենք այդ շտապողականութիւնը չենք հասկանում, աւելի լաւ է դանդաղ գնանք, բայց տեղ հասնենք, այլ ոչ թէ շտապենք ինչ-որ մի կրակոց, հրաւառութիւն տալու համար, որի արդիւնքը զրօ է»:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։