Հա

Ազգային

05/04/2018 - 11:10

Հայ Դատը իմ կեանքի ճանապարհն է

ՀՅԴ Եւրոպայի Հայ Դատի գրասենեակի նախագահ Գասպար Կարապետեանի քաղաքական թեմաներով մեկնաբանութիւններն ու հարցազրոյցները հրապարակւում են գրեթէ ամէն օր, համարեայ բոլոր կայքերում: «Ապառաժ»-ը եւս բազմիցս առիթ է ունեցել զրուցելու Հայ ազգի, Հայ Դատի եւ հայրենիքի Նւիրեալ Գասպար Կարապետեանի հետ: Այս անգամ, սակայն, զրոյցի թեման քաղաքական չէ. նիւթն ամբողջութեամբ նւիրւած է Գասպար Կարապետեան անհատին:

«alikonline.ir» - ՀՅԴ Եւրոպայի Հայ Դատի գրասենեակի նախագահ Գասպար Կարապետեանի քաղաքական թեմաներով մեկնաբանութիւններն ու հարցազրոյցները հրապարակւում են գրեթէ ամէն օր, համարեայ բոլոր կայքերում: «Ապառաժ»-ը եւս բազմիցս առիթ է ունեցել զրուցելու Հայ ազգի, Հայ Դատի եւ հայրենիքի Նւիրեալ Գասպար Կարապետեանի հետ: Այս անգամ, սակայն, զրոյցի թեման քաղաքական չէ. նիւթն ամբողջութեամբ նւիրւած է Գասպար Կարապետեան անհատին:

 

- Հիմնական ի՞նչ սկզբունքներով են դաստիարակել ձեզ Ձեր ծնողները:

- Դաստիարակութիւնս, անշուշտ, ազգային էր։ Մայրական կողմի պապիկս ունեցել էր ազգային, կուսակցական անցեալ եւ եղել է Մուստաֆա Քեմալի ուժերի կողմից փնտրւող անձերից մէկը Իզմիրում: Ծնողներս եւս կրելով ազգային դաստիարակութիւնը՝ նոյն սկզբունքներով են դաստիարակել ինձ՝ նախ ուսում տալով հայկական նախակրթարանում, ապա անդամագրելով ինձ նոր հիմնւած ՀՅԴ պատանեկան, երիտասարդական եւ սկաուտական միութիւններին: Հիմնական դերակատարութիւն ունեցաւ նաեւ Բէյրութի Նշան Փալանջեանի անունը կրող գիշերօթիկ վեցամեայ ճեմարանը, որտեղ ուսում ստացայ Սիմոն Վրացեանի տնօրինութեան եւ Մուշեղ Իշխանի, Գառնիկ Փանեանի, Հրաչ Տասնապետեանի, Կարօ Սասունի, Կոմսի, Արշաւիր Շիրակեանի եւ Միսաք Թոռլաքեանի շնչով։

 

- Որո՞նք են Սփիւռքում ապրելու լաւ եւ վատ կողմերը:

- Սփիւռքում ապրելու վատ կողմը նախ եւ առաջ ձուլւելու վտանգն է, ինչը հասկանալի է եւ անխուսափելի։ Մեր կառոյցներն ու նախ եւ առաջ ընտանիքները պէտք է կարողանան դիմադրել այդ վտանգին: Մենք ամէն երկրում չէ, որ ունենք հայկական դպրոցներ, ակումբներ, միութիւններ եւ եկեղեցիներ, որոնք պէտք է հայկականութեան ճանապարհը ցոյց տան երիտասարդութեանը։ Բայց, այնուամենայնիւ այսօրւայ դրութեամբ մենք յաջողում ենք այս հարցում:

Լաւ կողմն այն է, որ բազմաթիւ երկրներում ունենալով հսկայ Սփիւռք, կարելիութիւն ունենք ազդելու, ճնշում գործադրելու եւ այնպիսի գործունէութիւն ծաւալելու, որը բխում է Մայր հայրենիքի շահերից:

 

- Ինչպէ՞ս որոշեցիք թոշակի անցնելուց յետոյ ուսում ստանալ Յունաստանի Ազատ համալսարանի «Եւրոպական պատմութեան եւ մշակոյթի» բաժնում:

- 2007 թւականին, 59 տարեկան հասակում որոշեցի, որ պէտք է լուրջ գործով զբաղւեմ: Յունաստանի Ազատ համալսարանը երկրորդ մասնագիտութիւն ունենալու հնարաւորութիւն էր ընձեռնում տարիքով մեծ կամ ուսումը կիսատ թողած անձանց։ Բախտ ունեցայ ընդունւել եւ երեք տարի հեռակայ ուսում ստանալ «Եւրոպական պատմութեան եւ մշակոյթի» բաժնում:

Թէեւ երկար տարիներ փորձառութիւն ունէի քաղաքական կեանքում, բայց պէտք է ասել, որ այդ համալսարանն ինձ բաւականին օգնեց հասկանալու եւ ճիշտ գնահատելու որոշ հարցեր:

 

- Անդամակցել էք Համազգայինի թատերական խմբին: Հետաքրքիր է՝ որպէս դերասա՞ն:

- Այո, որպէս դերասան: Դա շատ երիտասարդ տարիքում էր/ժպտում է․-հեղ․/։ Համազգային հայ կրթական միութեան շրջանակներում, Յունաստանում գործում էր թատերական խմբակ, եւ ես, որպէս ՀՅԴ երիտասարդական միութեան կենտրոնական վարչութեան անդամ, օգնեցի մի քանի ներկայացումների բեմականացմանը:

Յիշում եմ՝ խաղացել եմ Յակոբ Պարոնեանի «Մեծապատիւ մուրացկաններ» վէպի գլխաւոր հերոս Աբիսողոմ աղայի դերը։ Նաեւ մի քանի անգամ տէր հօր եւ ֆիդայիների դերեր։

Թատրոնի նկատմամբ սէրս առաջացել էր վաղ տարիքից եւ մինչեւ այսօր յաճախ եմ լինում ներկայացումների:

 

- 1991 թւականից առ այսօր աշխատում եւ ղեկավարում էք ՀՅԴ Հայ Դատի տարբեր գրասենեակներ: Ի՞նչ է Ձեզ համար Հայ Դատը. Արդեօ՞ք ապրելակերպ:

- Մինչեւ Բրիւսէլում հաստատւելս եւ Եւրոպայի ՀՅԴ Հայ Դատի գրասենեակի նախագահութիւնը ստանձնելը երկար տարիներ աշխատել եմ Յունաստանի Հայ Դատի յանձնախմբում ե՛ւ որպէս յանձնախմբի անդամ, ե՛ւ որպէս նախագահ:

Հայ Դատը իմ կեանքի ճանապարհն է։ Դեռեւս երկար ճանապարհ ունենք անցնելու՝ Արցախի ճանաչումը, Ցեղասպանութեան հատուցումը, Հայաստանի բարգաւաճումը, ջաւախքահայութեան եւ սիրիահայութեան հարցերը մեր առջեւ են։ Դա մեր առաքելութիւնն է եւ պարտաւորութիւնը:

 

- Հայ Դատի նպատակներին հասնելու ո՞ր փուլում ենք այսօր:

- Փուլ չի կարող լինել, որովհետեւ կեանքը մնայուն ընթացքի մէջ է։ Արցախը ազատագրւեց, բայց Արցախի հարցը չլուծւեց դրանով։ Հայաստանն այսօր անկախ է, բայց Հայաստանն ահագին մարտահրաւէրներ ունի իր առջեւ։ Բազմաթիւ երկրներ ճանաչել են Հայոց Ցեղասպանութիւնը, բայց Թուրքիայի կոցմից ճանաչումը եւ հատուցումը դեռեւս իրողութիւն չէ:

Նոյնիսկ եթէ վաղը Արցախի հարցը լուծւի, դրանից յետոյ պէտք է աշխատենք Արցախի բարգաւաճման եւ աւելի լայն շրջանակի, միջազգային ընտանիքի մէջ ընդգրկւելու ուղղութեամբ։ Հայաստանը բարգաւաճեցնելուց յետոյ պէտք է ջանք թափենք որպէսզի Հայաստանը կանգնի Սփիւռքի թիկունքին եւ բարգաւաճեցնի Սփիւռքի հայկական համայնքները։ Որքան մենք՝ հայերս գոյութիւն ունենանք, պէտք է պայքարենք: Այդ պայքարի մի բաժինը իր վրայ են վերցրել ՀՅԴ Հայ Դատի գրասենեակները։

 

- Եւրոպայի ՀՅԴ Հայ Դատի գրասենեակը բոլորովին վերջերս նախաձեռնել է երիտասարդների վերապատրաստման ծրագիր: Կը պատմէ՞ք ծրագրի մասին. ի՞նչ նպատակ է հետապնդում այն:

- Կարծում եմ, որ նոր սերնդին պէտք է փորձառութիւն ձեռք բերելու հնարաւորութիւն տալ եւ Եւրոպայի ՀՅԴ Հայ Դատի գրասենեակը ներկայ դրութեամբ իրականացնում է երիտասարդական երկու ծրագիր:

Արցախի երիտասարդների վերապատրաստման ծրագրի շրջանակներում 3-4 ամիսների ընթացքում ՀՅԴ Եւրոպայի Հայ Դատի գրասենեակում, այնուհետեւ Եւրոպական խորհրդարանում վերապատրաստում է անցել արդէն 3 երիտասարդ:

Հայաստանի երիտասարդների համար նախատեսւած «Վահան Յովհաննիսեան» վերապատրաստման ծրագրում ընգրկւել է արդէն 4 երիտասարդ: Այս ծրագրի տեւողութիւնը 5-5.5 ամիս է:

Ծրագրի շրջանակներում երիտասարդներին հնարաւորութիւն է ընձեռնւում մօտիկից ծանօթանալու Եւրոպային, Եւրոպական խորհրդարանին, աշխատելու խորհրդարանի պատգամաւորների հետ:

 

- Ձեր թիմի գերակշիռ մասը կազմում են երիտասարդները: Որքանո՞վ է կարեւոր երիտասարդների ներգրաււածութիւնը եւ ի՞նչ գնահատական կը տաք նոր սերնդին:

- Իմ առաքելութիւնը երիտասարդներ վերապատրաստելն է եւ փորձառութիւնս փոխանցելը։ Ամբողջ կեանքի ընթացքում ինձ բախտ է վիճակւել աշխատել երիտասարդների հետ, եւ միշտ հաւատ եմ ունեցել նոր սերնդի նկատմամբ:

ՀՅԴ Հայ Դատի գրասենեակների եւ յանձնախմբերի գերակշիռ մասը կազմում են երիտասարդները, որոնք յետեւում ունենալով մի քանի փորձառու մարդկանց, կը կարողանան դիմագրաւել եւ լուծումներ տալ բոլոր հարցերին:

Այն գնահատականները, որոնց արժանանում է Եւրոպայի Հայ Դատի գրասենեակը, հիմնականում պէտք է վերագրւեն երիտասարդների, որովհետեւ, եթէ երիտասարդները չլինէին, ես ոչինչ չէի կարողանայ անել: Իրենք կարեւոր դերակատարութիւն եւ մասնակցութիւն ունեն այդ աշխատանքներում։

 

- Մի շարք պետական պարգեւների եւ մեդալների էք արժանացել ինչպէ՛ս Արցախի, այնպէ՛ս էլ Հայաստանի իշխանութիւնների կողմից: Ի՞նչ զգացողութիւն էք ունենում պարգեւատրման պահին:

- Անշուշտ, երբ ինչ-որ մէկը պարգեւատրւում է իր կատարած աշխատանքերի համար, յուզիչ է: Պարգեւները յաւելեալ պարտաւորութիւն են, որովհետեւ դրանք արտայայտում են քեզ պարգեւատրողների հաւատը քո գործի եւ քո առաքինութեան նկատմամբ: Դա ինձ համար նոր մարտահրաւէրներ դիմագրաւելու եւ նոր թափով պայքարելու պարտաւորութիւն է։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։