Հա

Ազգային

12/07/2018 - 10:30

Արմէն Ռուստամեանը` կառավարութեանը. «Անզիջում պահւածքը խափանում է քաղաքական զարգացումները եւ կոնսենսուսի հնարաւորութիւնը»

Ցանկացած քննարկում ի վերջոյ կարեւոր է, որովհետեւ մտքերի ազատ փոխանակում է տեղի ունենում, մանաւանդ այնպիսի կարեւոր հարցում, ինչպիսին ընտրական օրէնսգիրքն է: Խորհրդարանում լրագրողների հետ զրոյցում ասաց ՀՀ ԱԺ ՀՅԴ խմբակցութեան ղեկավար Արմէն Ռուստամեանը:

«alikonline.ir» - Ցանկացած քննարկում ի վերջոյ կարեւոր է, որովհետեւ մտքերի ազատ փոխանակում է տեղի ունենում, մանաւանդ այնպիսի կարեւոր հարցում, ինչպիսին ընտրական օրէնսգիրքն է: Խորհրդարանում լրագրողների հետ զրոյցում ասաց ՀՀ ԱԺ ՀՅԴ խմբակցութեան ղեկավար Արմէն Ռուստամեանը: Տեղեկացնում է «yerkir.am»-ը:

Յիշեցնենք, որ յուլիսի 10-ին ՀՀ ԱԺ-ում Ընտական օրէնսգրքի բարեփոխումների շուրջ քննարկումներին առաջին անգամ ներկայացել էր կառավարութեան ներկայացուցիչ Դանիէլ Իոաննիսեանը, ով ակնարկել էր, որ կառավարութիւնը չի ընդունի ԱԺ յանձնաժողովի առաջարկները եւ կը ներկայացնի իր առաջարկները: Ռուստամեանն ասաց, որ բոլոր հեղինակաւոր կառոյցները, այդ թւում Եւրոպայի Խորհուրդը, պահանջում են, որ փոփոխութիւնները կատարենք համախոհութեամբ: Ըստ նրա` դրան չձգտել չի կարելի: «Մեր նպատակն ի սկզբանէ եղել է դա` անել ամէն ինչ, որպէսզի համախոհութեամբ հասնենք մէկ միասնական նախագծի»,- ասաց նա:

Նրա խօսքով՝ յուլիսի 10-ին պարզ դարձաւ, որ այս հարցի հետ կապւած տարընթերցումներ կան:

«Մեզ համար անհասկանալի է, եւ խնդիր է մնում` մենք ի վերջոյ մէ՞կ, թէ՞ երկու նախագծով ենք ներկայանալու: Մենք դէմ չենք երկու տարբերակին էլ, երկուսն էլ ընդունելի է, եթէ երկու տարբերակով ենք ներկայանալու բանավէճը տեղափոխւելու է ԱԺ: Դրա անպատեհութիւնն այն է, որ յայտնի չէ` ի վերջոյ ինչ ելք կունենայ այդ քննարկումը: Բացի դրանից` մի քիչ անհասկանալի է դառնում. եթէ կառավարութիւնն ինքնուրոյն նախագիծ է բերում, բայց չէ՞ որ կառավարութիւնը հիմնւում է այն քաղաքական ուժերի վրայ, որոնք հէնց նոյն այդ քննարկումն են անում այլ ձեւաչափով: Մի քիչ անհասկանալի է այս նախագծի քաղաքական պատւէրը որտեղի՞ց է գալիս: Քաղաքական ուժերը, որ ԱԺ-ում կան, բացի հանրապետականից, արտացոլւած են կառավարութեան մէջ, հիմա նոյն մեր կուսակցութեան կառավարութեան ներկայացուցիչներն ի՞նչ պէտք է անեն»,- հարց բարձացրեց նա:

Նա նշեց, որ եթէ ՀՀ կառավարութիւնը փորձելու է իր նախագիծը ներկայացնել, ՀՅԴ-ն պաշտպանելու է իր թեզերը, որոնք որ համաձայնեցրել են,եւ որոնք որ իրենց համար ընդունելի է: «Նորից կառաջանայ խնդիր, որ կառավարութիւնը քւէարկութեամբ պէտք է որոշման գայ: Մենք չենք ուզում այդ վիճակն առաջանայ, մենք ասում ենք` բոլորս մինչ այդ ինչ ունենք ասելու համադրենք այդ մեր ասածները եւ յանգենք կոսնենսուսային նախագծի»,- բացատրեց նա: Դիտարկմանը` ՀՀ վարչապետն իր նախկին յայտարարութիւններում ասում էր` պէտք է քաղաքական ուժերի հետ քննարկենք, համախոհութեամբ լինի, հիմա փորձում է շրջանցել այդ յայտարարութիւնները, Ռուստամեանն արձագանգեց. «Ես այդպիսի վաղաժամ գնահատական չէի տայ, մենք առայժմ սա վերագրում ենք պարոն Իոաննիսեանի տեսակէտներին, ինքը շատ տեղերում պարզապէս իր կարծիքն էր ներկայացնում, մենք այսօր դրա հիման վրայ չենք կարող ասել, որ կայ պաշտօնական կառավարութեան մօտեցում. դա չկայ: Մենք դիտում ենք, որ մասնագիտական խումբը ինչ-որ աշխատանք է տարել, որը օգտակար ենք համարում:Դանիէլը չէր կարող ներկայացնել կառավարութիւնը, կառավարութիւնը կարող է ներկայացնել վարչապետը, առնւազն իր բացակայութեամբ առաջին փոխվարչապետը»: Նա նշեց, որ կառավարութեան առաջարկները նոյնպէս քննարկելի առաջարկներ են:

«Այս փուլը ես համարում եմ նորմալ, որ փակուղային չէ, մենք կարող ենք զուգահեռ էլ աշխատել, բայց այդուամենայնիւ չպէտք է ձգտել երկու նախագծերի ճանապարհով գնալ, այլ պէտք է համաձայնեցնել մօտեցումները, եւ գտնել այն ընդունելի տարբերակը, որի հիման վրայ կարելի է ձեւաւորել կոնսենսուս, եւ նախաձեռնողներն էլ լինեն այդ կոնսենսուսի արդիւնքում ընդգրկւած քաղաքական ուժերը եւ այդպէս դրւի ԱԺ-ում քննարկման եւ գնանք ընտրութիւնների»,- ասաց նա:

Հարցին էլ` եթէ հաստատւի, որ կառավարութիւնն իսկապէս ուզում է առանձին նախագիծ ներկայացնել, ո՞րն է լինելու քաղաքական ուժերի դիրքորոշումը, Ռուստամեանը պատասխանեց, որ տեսականօրէն այդպիսի վիճակ կարող է առաջանալ, եւ որ ինքը դա չի բացառում:

«Մենք ինքնանպատակ որեւէ նախագիծ չենք պաշտպանելու, պաշտպանելու ենք այն նախագիծը, որտեղ հնարաւորինս ընդգրկւած են մեր առաջարկները, որովհետեւ համարում ենք, որ մեր առաջարկները սկզբունքային նշանակութիւն ունեցող են, բայց պատրաստ ենք յղկել, մշակել, համդրելի դարձնել, եւ բնական է` մենք կը ձեւաւորենք մեր մօտեցումը: Եթէ այդ մօտեցմանը կը համապատասխանի կառավարութեան առաջարկը, մենք խնդիր չունենք նաեւ կառավարութեան առաջարկը պաշտպանել այդ պարագայում: Կարող է ստացւել այնպէս, որ այդ երկու նախագծերն իրարից շատ չեն տարբերւում: Եթէ իրենք անպայման ուզում են կառավարութիւնն ինչ-որ նախաձեռնողի դիրքում մնայ… իսկ եթէ տարբերւող լինեն, կանոնակարգը թոյլ է տալիս երկու նախագծերն էլ քննարկել եւ յետոյ քւէարկել, միեւնոյնն է ԱԺ-ն է որոշելու»,- ասաց նա: Հարցին էլ` նրա մօտ տպաւորութիւն կա՞ր, որ կառավարութիւնը չի ցանկանում հաշւի նստել խորհրդարանական ուժերի հետ եւ ի վերջոյ հաշւի չի առնելու նրանց որոշումները, նա ասաց. «Ես չեմ ուզում իմ որոշ տպաւորութիւններ բարձրաձայնել, ես իսկապէս կոչ կանէի, որ որեւէ մէկը չփորձէր այսպէս ասած` սեփականացնել ճշմարտութիւնը եւ պարտադրէր իր տեսակէտը: Դա մեզ երբեք լաւ տեղ չի տարել: Այդ ճանապարհով անցել ենք եւ այդ ճանապարհով լաւ տեղ չես հասնում: Միշտ պէտք է փոխզիջումների ճանապարհ ունենալ, անզիջում, կոշտ դիրքորոշումները խափանում են համաձայնութիւնները: Անզիջում պահւածքը խափանում է քաղաքական զարգացումները եւ կոնսենսուսի հնարաւորութիւնը»:

Յարակից լուրեր

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։