Հա

Ազգային

01/09/2018 - 14:35

Երբ լրատւամիջոցը վերածւում է կեղտոտ տեխնոլոգիաների խողովակի

Նախընտրական ժամանակահատւածները նորանկախ Հայաստանում միշտ էլ աչքի են ընկել ներքին լարւածութեան մեծացմամբ եւ, յատկապէս, կեղտոտ տեխնոլոգիաների կտրուկ ակտուալացմամբ: Քաղաքական պայքարը դառնում է աւելի թէժ, բայց քաղաքական ճամբարները ոչ բոլոր դրւագներում են կարողանում զերծ մնալ հակառակորդներին անխնա սեւացնելու, նրանց վրայ ցեխ շպրտելու գայթակղութիւնից` յուսալով, թէ կը կարողանան այդ կերպ մի քանի դիւիդենտ ճարել սեփական իմիջը դրական լոյսի մէջ ցուցանելու համար:

ՀՅԴ ֆէյսբուքեան էջում գրւած է. 

«Նախընտրական ժամանակահատւածները նորանկախ Հայաստանում միշտ էլ աչքի են ընկել ներքին լարւածութեան մեծացմամբ եւ, յատկապէս, կեղտոտ տեխնոլոգիաների կտրուկ ակտուալացմամբ: Քաղաքական պայքարը դառնում է աւելի թէժ, բայց քաղաքական ճամբարները ոչ բոլոր դրւագներում են կարողանում զերծ մնալ հակառակորդներին անխնա սեւացնելու, նրանց վրայ ցեխ շպրտելու գայթակղութիւնից` յուսալով, թէ կը կարողանան այդ կերպ մի քանի դիւիդենտ ճարել սեփական իմիջը դրական լոյսի մէջ ցուցանելու համար:

Նորութիւն չեմ ասի, եթէ նշեմ, որ քաղաքական շրջանակների կիրառած կեղտոտ տեխնոլոգիաների շարժիչ ուժը գրեթէ միշտ եղել են զանգւածային լրատւամիջոցները, որոնք նաեւ հրաշալի թաքստոց են ծառայում քաղաքական անփառունակների համար: Մամուլի հրապարակումներում նրանց դէմքը, սովորաբար, չի երեւում: Մէջտեղում լրատւամիջոցն է` իր ընթերցողով եւ հէնց այդ անմիջական շփման պահին էլ թաքստոցից նետւած թոյնը սահուն կերպով ներարկւում է ընթերցողին: Մեխանիզմը բաւականին հուսալի է, բայց այնքան բարդ չէ, որպէսզի քիչ թէ շատ քաղաքական հոտառութիւն ունեցողը չզգայ, թէ ինչ է կատարւում իրականում:

Ահաւասիկ առջեւում Երեւանի աւագանու ընտրութիւններ են եւ կրկին նոյն պատկերն է մեզանում: Չխօսելով մասնակից առանձին ուժերի ու դաշինքների էութեան մասին` նշեմ միայն, որ արդէն իսկ ուրւագծւում է այն լրատւամիջոցների շրջանակը, որոնք ստանձնել են քարոզարշաւն ու պայքարը մունդռելու «սուրբ» գործը: Շքերթը գլխաւորողների մէջ է, բնականաբար, «Ժամանակ» թերթը` «1in.am» էլեկտրոնային իր տարբերակով հանդերձ, որտեղ, չգիտես ինչ «պատահականութեամբ» կենտրոնացած է սկանդալային անցեալով մարդկանց մի շրջանակ, որոնք այսօր խուսափում են անգամ իրենց սեփական անուն ազգանուններով հանդէս գալ: «Մանր» խուլիգանութիւններով յայտնի են գլխաւոր խմբագրից մինչեւ զանազան Արծրունիներ ու Կայծունիները, որոնք իրենց կեանքում լիուլի ճաշակել են հասարակական պարսաւանքի դառը համը, սակայն միշտ փրկւել` ընտրած մասնագիտութիւնը սրա-նրա ոտքի տակ փալաս դարձնելու գնով:

Եւ ահա, «Ժամանակ» թերթը եւ «1in.am»-ը կրկին յայտնւել են սկանդալի կենտրոնում, այս անգամ Երեւանի քաղաքապետի ՀՅԴ թեկնածու Միքայէլ Մանուկեանի մասին մի ստայօդ հրապարակման պատճառով: ՀՅԴ Հանրային կապերի գրասենեակն արդէն իսկ հակադարձել է «Առաջին» լրատւականի այդ հրապարակմանը եւ ամենայն մանրամասնութեամբ հերքել ԶԼՄ-ի «փաստական» խեղաթիւրումներն ու զրպարտութիւնները, սակայն լրատւամիջոցը շարունակել է իր խոտոր ընթացքը` մէկ այլ հրապարակմամբ փորձելով արդարանալ, թէ ինքն, իբր, ոչ վաղ անցեալի իրողութիւններն է ներկայացրել:

Ես միշտ մտածել եմ, որ «Առաջին» լրատւականում «ճարպիկներ», «աֆերիստներ», «քցողներ» են աշխատում: Բայց որ նրանք կարող են նաեւ, շատ «միամիտ» լինել, չէի մտածել: Տեսէք` իրենց առաջին հրապարակման մէջ գրել են. «Ուշագրաւ է, որ ՀՅԴ թեկնածու Միքայէլ Մանուկեանը քրէական անցեալ ունի: Նա մեղադրւել եւ բանտարկւել է Երեւանի առաջին քաղաքապետ Համբարձում Գալստեանի սպանութեան համար»: Յետոյ, երբ ՀՅԴ-ից սրանց ասել են, որ դա զրպարտութիւն է, շուռ են եկել, թէ` մենք հիմնւել ենք հաւաստի աղբիւրների վրայ: Լաւ, իսկ այդ հաւաստի աղբիւրները ձեզ չե՞ն պատմել, որ Միքայէլ Մանուկեանին ներկայացւած մեղադրանքն այդպէս էլ չի հաստատւել եւ նա մէկ տարի անց ազատ է արձակւել: Հիմա ո՞վ քրէական անցեալ ունի` Միքայէլ Մանուկեա՞նը, թէ՞ այն ժամանակւայ ԱԱԾ-ն ու երկրի ղեկավարութիւնը, որոնք իրենց թիրախն էին դարձրել ընդդիմադիր կուսակցութեանն ու նրա անդամներին: Բա չէ՞ք ասի, ԱԱԾ տնօրէնի նախկին տեղակալ Գուրգէն Եղիազարեանն ասել է, որ ինքն է «բռնել» Միքայէլ Մանուկեանին: «Առաջին» լրատւականի «ասերը» նախկին պաշտօնեայի` անսթափ վիճակում արած այս յայտարարութիւնը համարում են Միքայէլ Մանուկեանի «քրէական անցեալի» ապացոյց` յոյս ունենալով, որ հասարակ ընթերցողը կուլ կը տայ խայծը: Բայց աւաղ, ԶԼՄ-ի գրչակների տարիքն իրօք չի ներում, որպէսզի յիշեն 1994 թւականից Դաշնակցութեան դէմ սկսւած տոտալ յարձակումը, որ պէտք է իր անփառունակ վախճանին հասնէր 97-98 թւականներին:

«Առաջին» լրատւականը, եթէ հաւատանք իրենց խօսքին, «այսօրւանից սկսած անդրադառնալու է ընտրական գործընթացի բոլոր մասնակիցներին՝ իրենց ծրագրերով ու թեկնածուներով, ինչպէս նաեւ անդրադառնալու է քարոզարշաւին՝ վերլուծելով 12 օրերի ընթացքը, հնչած գաղափարները, կուսակցութիւնների ու դաշինքների մարտավարութիւնը, նախընտրական խոստումները»: Եթէ համարենք, որ Դաշնակցութեան թեկնածուին արդէն իսկ «անդրադարձել են», ապա կարելի է ասել, որ դա արել են թերի եւ շատ ապաշնորհ ձեւով: Ինչո՞ւ եմ սա ասում, որովհետեւ Միքայէլ Մանուկեանին շատ-շատերը գիտեն Արցախեան հերոսամարտի օրերից, նրան ճանաչում են որպէս հարուստ կենսափորձ ունեցող, բնաւորութեամբ զուսպ եւ շիտակ հայ մարդու, որին ոչ պետական եւ ոչ էլ կուսակցական ղեկավար մարմիններում ստանձնած պաշտօնները չփոխեցին: Երեւանի քաղաքապետի այսօրւայ լաւագոյն թեկնածուներից մէկի` Միքայէլ Մանուկեանի մասին ուրիշ ասելիք չունէ՞ր «Առաջին» լրատւականը, թէ՞ որպէս լրատւամիջոց իր պարտքն է համարել հերթական ծառայութիւնը մատուցել ազգային արժէքներ չհանդուրժող եւ մեզանում արդէն 30 տարի մրափող նեոբոլշեւիկական շրջանակներին»:

Էդիկ Անդրէասեան

Յարակից լուրեր

  • Գործադիր իշխանութիւնը չպէտք է ճնշում գործադրի դատական իշխանութեան վրայ
    Գործադիր իշխանութիւնը չպէտք է ճնշում գործադրի դատական իշխանութեան վրայ

    Հայ Յեղափոխական Դաշնակցութեան Գերագոյն մարմնի անդամ Արծւիկ Մինասեանը, «Առաջին լրատւական»-ի հետ զրոյցում անդրադառնալով երկրորդ նախագահ Ռոբերտ Քոչարեանին կալանաւորելու յունիսի 25-ի որոշմանը, նշեց. «Ցաւօք, մեր վատագոյն կանխատեսումները, մեծ հաշւով, իրականութիւն են դառնում։ Դիտարկելով հարցը բացառապէս միայն իրաւունքի տեսակէտից՝ կարող ենք արձանագրւել, որ բազմաթիւ խախտումներ արդէն փաստւած են։ Սա վկայում է այն մասին, որ գործն անխոցելի չէ»։

  • Տեղի է ունեցել ՀՅԴ-ՌԱԿ հանդիպում
    Տեղի է ունեցել ՀՅԴ-ՌԱԿ հանդիպում

    ՀՅԴ Հայաստանի Գերագոյն մարմինը շարունակում է քաղաքական խորհրդակցութիւնների շարքը խորհրդարանական եւ արտախորհրդարանական ուժերի հետ՝ քննարկելու համար երկրում տիրող հասարակական-քաղաքական իրավիճակին առնչւող հարցեր:

  • ՀՅԴ ՄՈՀ գրասենեակի տեսակէտը ՀՀ ԱԺ-ում 2016 թ. ապրիլեան ռազմական գործողութիւնների հանգամանքներն ուսումնասիրող քննիչ յանձնաժողովի վերաբերեալ
    ՀՅԴ ՄՈՀ գրասենեակի տեսակէտը ՀՀ ԱԺ-ում 2016 թ. ապրիլեան ռազմական գործողութիւնների հանգամանքներն ուսումնասիրող քննիչ յանձնաժողովի վերաբերեալ

    ՀՀ վարչապետ Նիկոլ Փաշինեանի՝ 2016 թ. ապրիլեան ռազմական գործողութիւնների հանգամանքներն ուսումնասիրող` Ազգային ժողովի քննիչ յանձնաժողով ստեղծելու վերաբերեալ յայտնի յայտարարութեանը յաջորդեց համապատասխան յանձնաժողովի կազմաւորումը:

  • «Հորիզոն»-ի խմբագրական. ՀՅԴ Երիտասարդական միութիւններու հայրենի ճամբարները նպատակաուղղուած առաքելութիւն են
    «Հորիզոն»-ի խմբագրական. ՀՅԴ Երիտասարդական միութիւններու հայրենի ճամբարները նպատակաուղղուած առաքելութիւն են

    ՀՅԴաշնակցութեան աշխարհասփիւռ կառոյցի անքակտելի մասնիկն է ՀՅԴ Երիտասարդականը։ Հայ երիտասարդութիւնը քաղաքականացնելու եւ Հայ Դատի լուծման գործընթացին մէջ նորահաս սերունդը ներգրաւելու յստակ մտադրութեամբ, 1929 թուականին գումարուած ՀՅԴ ԺԱ. Ընդհանուր ժողովը պաշտօնապէս առաջադրեց երիտասարդական եւ պատանեկան միութիւն ստեղեծելու պահանջը, եւ այդ օրէն ի վեր, կուսակցութեան ընկերային-քաղաքական աշխարհընկալման առանցքային գաղափարներու դրօշակիրը դարձաւ Դաշնակցական երիտասարդութիւնը։

  • Տեղի է ունեցել ՀՅԴ - ԲՀԿ հանդիպում
    Տեղի է ունեցել ՀՅԴ - ԲՀԿ հանդիպում

    Յունիսի 17-ին, ՀՅԴ Հայաստանի Գերագոյն մարմնի նախաձեռնութեամբ, «Բարգաւաճ Հայաստան» կուսակցութեան ղեկավարութեան հետ տեղի է ունեցել միջկուսակցական հանդիպում, որին Դաշնակցութեան կողմից մասնակցել են ՀՅԴ Բիւրոյի անդամ Արսէն Համբարձումեանը, ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը եւ ՀՅԴ մասնագիտական ոլորտային յանձնախմբերի համակարգող Արծւիկ Մինասեանը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։