Հա

Ազգային

08/09/2018

Ես իմ գործունէութեամբ պէտք է վաստակեմ այն քւէները, որոնք ժողովուրդը պէտք է տայ ՀՅԴ-ին

Արագածոտնի մարզպետ Աշոտ Սիմոնեանը «Vesti.am»-ի հետ զրոյցում ամփոփել է պաշտօնավարման 100 օրը:

«alikonline.ir» - Արագածոտնի մարզպետ Աշոտ Սիմոնեանը «Vesti.am»-ի հետ զրոյցում ամփոփել է պաշտօնավարման 100 օրը:

 

- Նոր կառավարութեան ձեւաւորումից յետոյ Դուք միակ մարզպետն էք, որ շարունակեցիք պաշտօնավարել: Նոր կառավարութեան, նոր իրողութիւնների հետ ինչպէ՞ս էք յարմարւում:

- Շատ բնական եւ շատ լաւ: Նոր Հայաստանի նոր իրողութիւնների հետ, ըստ էութեան, մենք հաշտվելու խնդիր չունենք: Գոնէ ինձ համար այդ նոր իրողութիւնները նոր էին դեռեւս 2017 թւականի յուլիսի 13-ից, երբ ես նշանակւեցի Արագածոտնի մարզպետ եւ այն բոլոր մօտեցումներն ու գործելաոճը, որ ինձ համար գոնէ որդեգրել էի եւ որպէս մարզպետ մարզում իրականացրել եմ, բարեբախտաբար ամբողջովին համընկնում են նոր Հայաստանի, նոր Կառավարութեան մօտեցումների հետ: Ինձ համար այդ առումով աւելի հեշտ է եղել, որովհետեւ, կարելի է ասել, որ ես 7-8 ամիս դեռեւս նախորդ քաղաքական իշխանութեան պայմաններում աշխատել եմ այն մօտեցումներով, որոնք այսօր արդիական են եւ որոնք այսօր վարչապետի գլխաւորութեամբ նոր Կառավարութիւնն իր առջեւ խնդիր է դրել: Այդ առումով, որեւէ խնդիր չունենք եւ աւելին, ես նախապատրաստական շրջան եմ ունեցել դեռեւս նախորդ քաղաքական իշխանութեան ժամանակ:

 

- Դուք միակ մարզպետն էք, որի ծրագրերը շարունակականութեան մէջ են, այսինքն ստիպւած չէք եղել գալ եւ զրոյից սկսել: Այն խնդիրները, որոնք Ձեր առջեւ կային, այսօր աւելի հե՞շտ է լուծել, թէ՞, այնուամենայնիւ, որոշակի դժւարութիւններ կան:

- Խնդիրները գլոբալ առումով երկու խմբի կը դասակարգեմ. խնդիրներ, որոնք պայմանաւորւած են մեր մտածողութեամբ եւ խնդիրներ, որոնք այնուամենայնիւ, պայմանաւորւած են ֆինանսական եւ այլ միջոցների բացակայութեամբ:

 

- «Մեր մտածողութեամբ» ասելով Դուք ո՞ւմ նկատի ունէք:

- Բոլորիս: Յաջողութիւնը բոլորիս յաջողութիւնն է եւ մեր ձախողումը բոլորիս ձախողումն է: Երկու պարագայում էլ բոլորս պատասխանատու ենք մեր չափաբաժնի համապատասխան: Մենք իրօք մտածողութեան խնդիր ունենք, որովհետեւ, եթէ ուզում ենք լաւ ապրել, պէտք է գիտակցում ունենալ, որ լաւ ապրելու համար բոլորս պարտւոր ենք ինչ-որ բան անել: Եթէ մենք ուզում ենք լաւ դպրոց, լաւ մանկապարտէզ, լաւ համայնք ու լաւ ճանապարհ ունենալ, բոլորովս միասին պէտք է այդ պատկերացումն ու հաւատը ունենանք, որ այդ լաւին հասնելու համար բոլորս անելիք ունենք: Ես ասել եմ ու դա ինձ համար համոզում է, եթէ բոլորս նոյն ուղղութեամբ չնայենք եւ չհաւատանք այդ ուղղութեանը, միգուցէ տարբեր քաղաքական իշխանութիւններ փոխւելու պարագայում քիչ թէ շատ յաջողութիւններ ունենանք, բայց այնուամենայնիւ, էական բաղձալի յաջողութիւնը, որին ուզում ենք հասնել, չենք ունենայ, մինչեւ բոլորս չմտածենք, որ այլընտրանք չունենք, քան նայել, շարժւել այս ուղղութեամբ եւ բոլորիս ջանքերն ու միջոցները մէկտեղել, որպէսզի մեր յաջողութիւնն աւելի շուտ գայ եւ մեր քայլերն աւելի արագ լինեն: Սա է խնդիրը եւ այդ առումով, իրօք, մենք մտածողութեան, ընկալման լրջագոյն խնդիր ունենք:

 

- Բոլորով գործ անելու համար աշխատատեղ է պէտք: Արագածոտնի մարզը հիմնականում գիւղատնտեսական մարզ է, բայց նաեւ խոշոր քաղաքային համայնքներ կան, որտեղ սոցիալական լուրջ խնդիրներ կան յատկապէս գործազրկութեան հետ կապւած: Ի՞նչ էք անում այդ ուղղութեամբ:

- Դուք ճիշտ էք նկատում: Այո, մեր մարզը գիւղատնտեսական մարզ է եւ այդ առումով Հանրապետութեան համախառն գիւղատնտեսական արտադրանքի 10 եւ աւելի տոկոսը մեր մարզում է արտադրւում: Մենք այստեղ աշխատատեղերի ստեղծման բաւականին լուրջ խնդիրներ ունենք, ինչի կարգաւորման համար մենք մեր 17-25 թւականների ռազմավարութեան ծրագրի մէջ ներառել ենք այն քայլերի յաջորդականութիւնը, որով պայմանաւորւած պէտք է մարզում փոքրիկ-փոքրիկ աշխատատեղեր ստեղծենք, որոնք տարբեր ոլորտներում են լինելու՝ տեքստիլ արդիւնաբերութիւն, գիւղատնտեսութիւն, վերամշակող արդիւնաբերութիւն, սննդի վերամշակում: Կարելի է ասել, որ դրանց հիմքերը կամաց-կամաց դրւում են եւ այստեղ մենք եւս պէտք է մտածենք եւ արտադրենք մի բան, որը շուկայում եւ ամենակարեւորը՝ միջազգային շուկայում մրցունակ արտադրանք լինի: Այդ առումով գիւղատնտեսութեան ոլորտում գոնէ ժամանակակից գիւղատնտեսական տեխնոլոգիաների կիրառմամբ եւ ինտենսիւ այգիների հիմնմամբ մենք ցոյց ենք տալիս, որ գիւղատնտեսութիւնը ոչ միայն հանապազօրեայ հացը վաստակելու միջոց է, այլեւ ամբողջ աշխարհում դա լրջագոյն բիզնես է եւ եթէ մենք զբաղւում ենք այն մօտեցումներով եւ ընկալմամբ, որ ամբողջ աշխարհում են հիմա անում, գիւղացիները գոնէ մի շարք համայնքներում տեսել են, որ այդ գիւղատնտեսութիւնը լրջագոյն բիզնես է եւ իր եկամտաբերութեամբ չի զիջում որեւէ այլ բիզնեսի: Մենք ծրագրեր ունենք նաեւ տեքստիլ արդիւնաբերութիւնը զարգացնելու. խօսքը մինչեւ 500 աշխատատեղ ստեղծելու մասին է, որն ուզում ենք իրականացնել Ապարան քաղաքում: Մենք անցեալ Կառավարութեան օրօք դրա հիմքերը դրել ենք եւ հիմա ունենք համաձայնութիւնը նոր Կառավարութեան՝ դա շարունակելու: Կարծում եմ՝ մենք այդ գործընթացը կը յաջողենք եւ Ապարանում 500 աշխատատեղ ունենալը, հաւաստիացնում եմ, զբաղւածութեան լրջագոյն խնդիր կը լուծի: Մենք ամենեւին նպատակ չունենք մարզում հիմնելու 1-2 հսկայական եւ մեծ գործարաններ եւ դրանցով փորձել լուծել աշխատատեղերի խնդիր: Մենք ընդհակառակը, նպատակ ունենք ամէն բնակավայրում, ամէն համայնքում տեղի ներուժը հաշւի առնելով ստեղծել փոքրիկ աշխատատեղեր. որոշ դէպքերում 5, որոշ դէպքերում 10, որոշ դէպքերում 50, առանձին դէպքերում մինչեւ 500 աշխատատեղ ունեցող ձեռնարկութիւն: Աշխատատեղերի ստեղծմամբ մարզում նաեւ կը բարձրանայ կենսաապահովման մակարդակը եւ կիջնի աղքատութեան մակարդը: Այդ առումվ նոյնպէս ուզում եմ ասել, որ մենք ընկալման խնդիր ունենք:

 

- Եթէ Աշտարակի տարածաշրջանը մայրաքաղաքին աւելի մօտ է ու աւելի շատ ինտեգրւած է մայրաքաղաքին, ապա Թալինը, Ապարանը բաւական հեռու են աշխարհագրական առումով ու նաեւ սպեցիֆիկայով՝ ժողովրդի մտածողութեամբ, աւանդապաշտութեամբ միգուցէ այլ են: Այդտեղ տուրիզմի, այլ ենթակառուցւածքների զարգացումը ձեր ծրագրերում կա՞յ: Բացի այդ, ձեր ասած նախաձեռնութիւնների համար ֆինանսական միջոցներ կա՞ն, ուրւագծւո՞ւմ են:

- Անշուշտ կան, այդ ֆինանսական միջոցները մասնաւոր հատւածի ներդրումներն են: Խօսեցիք տուրիզմի մասին: Մարզն իր պատմամշակութային արժէքներով բաւականին մեծ ժառանգութիւն ունի եւ այդ առումով ունենք ուրւագծւած այն տուրիստական վայրերը, որոնց ուղղութեամբ պէտք է աշխատանքներ իրականացնենք եւ այդ աշխատանքներում թիւ մէկը ենթակառուցւածքներն են, որոնք պէտք է փորձենք կամաց-կամաց բարելաւել, զարգացնել եւ տուրիստին տուրիստական վայր հասնելու համար քիչ թէ շատ բաւարար պայմաններ ստեղծել: Միեւնոյն ժամանակ մտածում ենք նաեւ ոչ միայն աւանդական տուրիզմի մասին, այլեւ տուրիզմի բոլոր տեսակների մասին եւ, հաւատացէք, որ այստեղ եւս բաւականին մեծ պոտենցիալ ունենք: Պատահական չէ, որ նախորդ տարւայ համեմատ այս տարւայ ընթացքում մօտաւորապէս 25-26 տոկոսով աւելի շատ տուրիստների հոսք է նկատւել դէպի մարզ: Ուզում եմ մի կարեւոր բան ընդգծել, որ տարիներ շարունակ տուրիզմի զարգացումը կապել ենք բացառապէս մեր եկեղեցիների եւ պատմամշակութային արժէքների հետ, բայց ժամանակակից աշխարհի փորձը ցոյց է տալիս, որ տուրիզմը ոչ միայն եկեղեցիներ եւ պատմամշակութային արժէքներ են, այլ այդ տուրիզմն ունի բազմաճիւղ այլ վեկտորներ, որոնք աւելի շատ տուրիստներ են ներգրաւում, քան թւարկածներս: Այդ առումով, կարծում եմ, մինչեւ տարեվերջ կունենանք նաեւ ամբողջական փաթեթը որպէս տուրիստական մարզ, պատկերացում, թէ ինչպէս պէտք է տուրիստին բերենք Արագածոտնի մարզ, եւ որ ամենակարեւորն է այդ տուրիստն Արագածոտնի մարզից գնալուց յետոյ մտածի, այնուամենյանիւ, եւս մէկ անգամ Արագածոտնի մարզ վերադառնալ եւ իր բարեկամին, ծանօթին ու հարեւանին անպայման խորհուրդ տայ այցելել:

 

- Վերջերս հրապարակումներ եղան, որ Արագածոտնի նախկին մարզպետը որոշակի կոռուպցիոն սկանդալների մէջ է: Դրա մասին ինչ-որ բան ունէ՞ք ասելու:

- Բացի այն, ինչ մամուլն է ասում, ես աւելացնելու որեւէ բան չունեմ: Ընդամենը տեղեակ եմ, որ նախաքննութիւն է ընթանում, իրաւապահ մարմինները կարծում եմ համապատասխան քրէական գործին ընթացք կը տան եւ նախաքննութիւնը ցոյց կը տայ չարաշահում տեղի ունեցե՞լ է, թէ՞ ոչ:

 

- Առջեւում ԱԺ ընտրութիւններ են: Մինչեւ այս Կառավարութիւնը սովորաբար ՏԻՄ մարմինները բաւական ակտիւ մասնակցութիւն են ունեցել իրենց կուսակցական շահերը տեղում առաջ տանելու եւ այլն: Ձեր առջեւ նման խնդիր դրւա՞ծ է պաշտօնապէս, թէ՞ Դուք ինքներդ, որպէս դաշնակցական, ամէն ինչ անելու էք, որ ձեր մարզում Դաշնակցութիւնը յաջողութիւններ ունենայ:

- Իմ պատկերացումը կուսակցականի եւ կուսակցական պաշտօնեայի` ընտրութիւններում կուսակցութեանը օգնելու առումով շատ պարզ է: Այդ բանաձեւը հետեւեալն է. ես իմ գործունէութեամբ եմ վաստակելու այն քւէները, որոնք պէտք է ՀՅԴ-ին ժողովուրդը հաւատալով տայ: Համոզւած եմ, որ եթէ մենք ուզում ենք ունենալ ժողովրդավար հասարակութիւն, հասարակութիւնը պէտք է հասկանայ, թէ քաղաքական այս կամ այն ուժը ներկայացնող մարզպետը, նախարարը կամ հասարակ քաղաքացին իր գործուէնութեամբ ի՞նչ տեսլական ունի մեր երկրի, մեր ապագայի, վաղւայ օրւայ հետ կապւած: Մեզ՝ որպէս պետական պաշտօնեաներ, հնարաւորութիւն է ընձեռւած որոշակի ժամանակահատւած նաեւ դրսեւորւել եւ ցոյց տալ, թէ մենք ինչպէս ենք պատկերացնում մեր մարզի զարգացումը, մեր ապագան եւ մեր մօտեցումներն աւելի լաւ երկիր ու հայրենիք կառուցելու գործում: Եթէ ես իմ գործով պէտք է մէկ այլ բան ցոյց տամ, իսկ ընտրութիւնների ժամանակ փորձեմ մէկ այլ բան անել, հաւատացած եղէք, մեր հասարակութիւնը շատ լաւ հասկանում է ով ով է եւ անցել են այն ժամանակները, որ վախի, ճնշման կամ այլ միջոցներով մարդկանց պէտք է փորձել դէպի քո կողմը գրաւել, որպէսզի քո կուսակցութեանը քւէ տան: Այդպէս չի լինելու: Հասարակութիւնը շատ լաւ տեսնում է ով ով է, ինչպէս է աշխատում, ինչպէս է պատկերացնում մեր վաղւայ օրը, ինչով էլ պայմանաւորւած է լինելու մեր ապագայ բոլոր ընտրութիւնները. նախեւառաջ գոնէ սա, որը Կառավարութեան ծրագրով պէտք է լինի մէկ տարւայ ընթացքում: Ժողովուրդը հաւատաց ու հասկացաւ, որ իրօք իշխանութիւնն իրեն է պատկանում եւ մենք՝ իշխանաւորներս, մեր գործողութիւններվ երբեք ու երբեք պէտք է չանենք մի բան, որպէսզի այդ հաւատը մարի, այլ ընդհակառակը, մեր գործողութիւններով պէտք է այդ հաւատը արմատաւորենք, ամրապնդենք եւ հաւատացած եղէք, որ այդ միասնութիւնն է, որ վաղը մեզ հնարաւորութիւն է տալու աւելի լաւ երկիր ու հայրենիք կառուցելու:

Էդւարդ Սարիբէկեան

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։