Հա

Ազգային

11/09/2018 - 09:05

«Մենք Արամի տեսակն ենք». ՀՅԴ-ն քարոզարշաւի մեկնարկը տւեց Արամ Մանուկեանի արձանի մօտից

Երեւանի աւագանու արտահերթ ընտրութիւնների քարոզարշաւի մեկնարկը ՀՅԴ-ն տւեց Արամ Մանուկեանի արձանի մօտից: 

«alikonline.ir» - Երեւանի աւագանու արտահերթ ընտրութիւնների քարոզարշաւի մեկնարկը ՀՅԴ-ն տւեց Արամ Մանուկեանի արձանի մօտից: Տեղեկացնում է «yerkir.am»-ը:

Դաշնակցութեան ցուցակը գլխաւորող Միքայէլ Մանուկեանը ելոյթում նշեց, որ քարոզարշաւի մեկնարկի տեղը պատահական չէ ընտրւած. 1918 թւականին Արամ Մանուկեանը կարողացաւ համախմբել երեւանցիներին, մեր ժողովրդին եւ յաղթանակ տանել Սարդարապատի հերոսամարտում: Այն ժամանակ Երեւանը դեռեւս Հայաստանի մայրաքաղաքը չէր, քանի որ Հայաստանն անգամ անկախ պետութիւն չէր:

«Մենք Արամի տեսակն ենք` պայքարող տեսակ, միաւորող տեսակ»,- ասաց Մանուկեանը եւ վստահեցրեց, որ ՀՅԴ-ն կարող է համախմբել երեւանցիներին:

Ըստ նրա` սպասւում է դժւար աշխատանք, եւ ամբողջ թիմով երեւանցիներին են ներկայացնելու իրենց ծրագիրը` Երեւանի տեսլականը:

ՀՅԴ անդամ, ՀՀ գիւղատնտեսութեան նախարար Արթուր Խաչատրեանը յայտնեց, որ իրենք պատրաստւում են նոր էջ բացել Երեւանի պատմութեան մէջ:

«Մինչեւ սեպտեմբերի 22-ը մենք ներկայացնելու ենք մեր ծրագրերը, մեր մօտեցումները, որոնք կիրականացնենք, երբ յաղթենք այս ընտրութիւններում: Իսկ մենք չենք կասկածում, որ կը յաղթենք: 2800-ամեայ Երեւանի պատմութեան մէջ եղել են տարբեր էջեր: Այս էջը բեկումնային է լինելու մեր մայրաքաղաքի համար»,- ասաց նա:

Խաչատրեանի խօսքով` Երեւանը բազմաթիւ խնդիրներ ունի, իսկ իրենք ունեն դրանց լուծման տարբերակները:

«Որեւէ մէկիս չի բաւարարում հանրային տրանսպորտի վիճակը, կանաչ տարածութիւնների սակաւութիւնը, կեղտը, որը տեսնում ենք Երեւանի փողոցներում: Բողոքելու համար շատ բան պէտք չէ: Լուծումների համար պէտք է միտք, կամք եւ ուժ, որը մենք ունենք, ու պատրաստ ենք դրանք օգտագործել ի շահ Երեւանի»,- նշեց նախարարը:

ՀՅԴ ցուցակի չորրորդ համարը` Հայ օգնութեան միութեան` ՀՕՄ-ի կենտրոնական վարչութեան անդամ Ալեսեա Բեջանեանը ելոյթում նշեց, որ բոլորը պէտք է գործեն «յանուն»-ի սկզբունքով` յանուն հայրենիքի, ընդ որում` ՀՅԴ-ն միշտ է գործել այդ սկզբունքով: Յիշեցնենք, որ Երեւանի աւագանու ընտրութիւններում ՀՅԴ-ի կարգախօսն է` «Միասին` յանուն Երեւանի»:

«Երեւանը պէտք է լինի համահայկական մայրաքաղաք, լինի ամէն հայի մայրաքաղաքը: Մենք ունենք փորձ եւ աշխարհասփիւռ մեր կառոյցի միջոցով բազմաթիւ ծրագրեր ենք իրականացրել, օրինակ` մեր ջանքերով կարողացել ենք աշխարհի տարբեր կէտերում գտնել քոյր քաղաքներ Սիսիանի, Կապանի, Վանաձորի, Շուշիի համար: Եւ այդ քոյր քաղաքները աջակցութեան ձեռք են մեկնել մեր քաղաքներին»,- ասաց Ալեսեա Բեջանեանը:

Նրա խօսքով` ՀՅԴ թիմը յաւակնոտ է, ծրագիրը` նոյնպէս: Թիմում շատ են պրոֆեսիոնալները, հայրենասէրները` նոյնպէս: «Մենք վստահ ենք, որ յաջողելու ենք, եւ մեր յաջողութիւնից է կախւած երեւանցու յաջողութիւնը»,- ասաց Բեջանեանը:

ՀՅԴ քարոզարշաւը մեկնարկեց աւտոարշաւով: Աւագանու թեկնածուները 10 օր կը շրջեն Երեւանի բոլոր համայնքներով:

Յարակից լուրեր

  • «Ստեղծւած լարւածութեան պատճառը իշխանութիւնների հակասարական, չկշռադատւած գործողութիւններն են». Իշխան Սաղաթելեան
    «Ստեղծւած լարւածութեան պատճառը իշխանութիւնների հակասարական, չկշռադատւած գործողութիւններն են». Իշխան Սաղաթելեան

    ՀՅԴ-ն գտնում է, որ Ամուլսարի հանքի շահագործման հարցի շուրջ ստեղծւած լարւածութեան պատճառը ՀՀ իշխանութիւնների հակասարական, չկշռադատւած գործողութիւններն են, որի արդիւնքում՝ հասարակութեան մօտ մեծ սպասումներ էին ձեւաւորւել եւ որն իրենք չկարողացան սպասարկել. Tert.am-ի հետ զրոյցում նման տեսակէտ յայտնեց ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը: 

  • Ընկեր Վահանին յիշելիս
    Ընկեր Վահանին յիշելիս

    Ծնունդդ շնորհաւոր ընկեր Վահան, քեզ անսահման շատ ենք կարօտում:

  • ԶՈՄ-ականները՝ ՀՅԴ Ստեփանակերտի «Նիկոլ Դուման» կենտրոնում
    ԶՈՄ-ականները՝ ՀՅԴ Ստեփանակերտի «Նիկոլ Դուման» կենտրոնում

    Օգոստոսի 13-ին ՀՅԴ Ստեփանակերտի «Նիկոլ Դուման» կենտրոն են այցելել Արցախի Հանրապետութեան Մարտունի քաղաքում պատանեկան ճամբար իրականացնող ՀՅԴ Լիբանանի «Զաւարեան» Ուսանողական Միութեան անդամներ Հրագ Կարամինասեանը եւ Սելին Գրիգորեանը:

  • Սեւրի երկրորդ շնչառութեանը սպասելիս
    Սեւրի երկրորդ շնչառութեանը սպասելիս

    Սեւրի պայմանագիրը դարձաւ 99 տարեկան:

    1920 թւականի օգոստոսի 10-ին Փարիզի արւարձանում՝ Սեւրում, Անտանտի երկրների եւ Օսմանեան կայսրութեան կողմից ստորագրւեց հաշտութեան պայմանագիր, որը պաշտօնապէս հաստատում էր կայսրութեան բաժանումը Եւրոպայի եւ Մերձաւոր Արեւելքի միջեւ:

  • Կառավարման ճիշտ տարբերակը խորհրդարանական համակարգն է
    Կառավարման ճիշտ տարբերակը խորհրդարանական համակարգն է

    Սահմանադրական բարեփոխումներ իրականացնելու դէպքում, նախեւառաջ, պէտք է վերացնել սուպերվարչապետական ինստիտուտը։ Այս մասին «Փաստինֆօ»-ի հետ զրոյցում ասաց Հայ Յեղափոխական Դաշնակցութեան Գերագոյն մարմնի ներկայացուցիչ Իշխան Սաղաթելեանը։

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։