Հա

Ազգային

06/10/2018 - 10:35

Սպարտակ Սէյրանեան. «Բումերանգի օրէնքը քաղաքականութեան մէջ շատ աւելի ազդու է գործում»

Ընտրական օրէնսգրքի բարեփոխումների յանձնախումբը ամռանը արձակուրդ չգնաց, քննարկեց եւ օգոստոսի սկզբին ԸՕ բարեփոխումների փաթեթը ներկայացրեց կառավարութիւն, մինչդեռ կառավարութիւնից 2 ամիս որեւէ տեղեկութիւն չեղաւ, հետեւաբար, մեղադրել խորհրդարանական խմբակցութիւններին, այդ թւում «Ելք»-ին, որ ամէն ինչ արել են, որ արտահերթ խորհրդարանական ընտրութիւնները արագ չլինեն, սխալ է։

«alikonline.ir» - Ընտրական օրէնսգրքի բարեփոխումների յանձնախումբը ամռանը արձակուրդ չգնաց, քննարկեց եւ օգոստոսի սկզբին ԸՕ բարեփոխումների փաթեթը ներկայացրեց կառավարութիւն, մինչդեռ կառավարութիւնից 2 ամիս որեւէ տեղեկութիւն չեղաւ, հետեւաբար, մեղադրել խորհրդարանական խմբակցութիւններին, այդ թւում «Ելք»-ին, որ ամէն ինչ արել են, որ արտահերթ խորհրդարանական ընտրութիւնները արագ չլինեն, սխալ է։ Այս մասին այսօր՝ հոկտեմբերի 5–ին, «news.am»-ի հետ հարցազրոյցում ասաց ՀՅԴ Բիւրոյի անդամ, ՀՀ ԱԺ ՀՅԴ խմբակցութեան պատգամաւոր Սպարտակ Սէյրանեանը։

«Երբ խորհրդարանական բոլոր ուժերը՝ կոնսենսուսով, օգոստոսի 1-ին պատրաստեցին Ընտրական օրէնսգրքի նախագիծը, բոլորի ակնկալիքը այն էր, որ ԸՕ վրայ կառավարութիւնն էլ իր աշխատանքը անի եւ սեպտեմբերի առաջին քառօրեային, ենթադրում էինք, այդ փաթեթը կը մտնի ԱԺ քննարկման, 2 ընթեցումով հոկտեմբերի սկզբներին կանցնէր, կուղարկէինք Վենետիկի յանձնաժողով։ Չի բացառւում, որ վերադառնար  հոկտեմբերի կէսերին եւ նոյեմբերի սկզբին կը յայտարարէինք, որ դեկտեմբերին տեղի ունենար արտահերթ խորհրդարանական ընտրութիւններ»,- ակնկալւած ժամանակագրութիւնը ներկայացրեց Սպարտակ Սէյրանեանը։

Նրա համար այդպէս էլ հանելուկ է մնաց, թէ ինչո՞ւ է յատկապէս դեկտեմբեր ամիսը նշել վարչապետը եւ ոչ, ասենք, յունւարի կէսը. «Ներդրողները մէկ ամսում պէտք է հիասթափւէի՞ն ու ներդրումներ չանէի՞ն, կամ սփիւռքահայերը բնակարան չէի՞ն գնի Հայաստանում»։

Նրա համոզմամբ ՀՀ ԱԺ կանոնակարգ-օրէնքի հետ կապւած պատմութիւնները զուտ պատրւակ էին՝ լեգիտիմացնելու ընտրութիւնները դեկտեմբերին անցկացնելու մտադրութիւնը։

«Համբերատար սպասում էինք, որ մեր խմբակցութեան հետ էլ կը հանդիպի վարչապետը, մտածում էինք, որ հիմանաւոր տեղեկատւութիւն մեզ կը տրամադրի, պարզւեց, որ որոշել է՝ կամ ՀՀ ԱԺ-ն համաձայնութիւն է տալիս վերջնագրին կամ ԱԺ-ն պէտք է ինքնալուծարւի։ Այստեղ խնդիր առաջացաւ՝ ԱԺ-ն ինքնալուծարւում է իրաւունքի ուժո՞վ, թէ՞ ուժի իրաւունքով»,- ասաց ՀՅԴ պատգամաւորը։

Հարցին՝ դեռ ուժի մէ՞ջ է բանակցելու յայտարարութիւնը՝ հաշւի առնելով ՀՅԴ նախարարներին ու մարզպետներին պաշտօնից ազատելու փաստը, Սէյրանեանը պատասխանեց. «Մենք ամենայն անկեղծութեամբ եւ պատրաստակամութեամբ ամիսներ առաջ յայտարարեցինք, որ ընդունում ենք Նիկոլ Փաշինեանի հրաւէրը՝ մաս կազմելու ազգային համաձայնութեան կառավարութեան, քանի որ հայերէնին ոչ վատ տիրապետելով՝ հասկանում էինք, որ այդ բնութագրումը ենթադրում է կարեւոր հարցերի շուրջ համաձայնութիւն։ Ցաւօք սրտի, այդպէս չեղաւ»։

Կարեւոր շատ հիմնախնդիրներ, նրա խօսքով՝ ոչ միայն չեն քննարկւում գործընկեր քաղաքական ուժերի հետ, այլեւ նրանց առաջարկութիւնները ընկալւում են սւիններով։

«Իմ համոզմամբ՝ ազգային համաձայնութեան կառավարութեան այդ «համաձայնութեան» բաղադրիչը չկար արդէն օգոստոսի 17-ի հանրահաւաքից սկսած, երբ հարթակին տեսանք ոչ թէ կառավարութեան անդամներին, այլ մէկ քաղաքական ուժի»,- նկատեց Սպարտակ Սէյրանեանը։

Նա յաւելեց, որ «բումերանգի օրէնքը» քաղաքականութեան մէջ շատ աւելի ազդու է գործում, քան բնութեան մէջ, հետեւաբար, որպէսզի առաջիկայ խորհրդարանական ընտրութիւնները որեւէ կերպ չպիտակաւորւեն, չպէտք է թոյլ տալ, որ ԱԺ-ին պարտադրւի դիրքորոշում։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։