Հա

Ազգային

06/12/2018 - 10:50

Կիրօ Մանոյեան. «Մենք հայրենիքի շահերն առեւտուր չենք անում»

Դեկտեմբերի 5-ին Հայ Յեղափոխական Դաշնակցութիւնը իր նախընտրական ծրագիրը ներկայացրեց Սեւանում հրաւիրւած հանրահավաքի ժամանակ: ՀՅԴ Բիւրոյի անդամ, Բիւրոյի Հայ Դատի եւ քաղաքական հարցերի գրասենեակի պատասխանատու Կիրօ Մանոյեանն իր ելոյթում նշեց, որ այս ընտրութիւնները կարեւոր են երկրի համար, քանի որ խոստանում են լինել նոր որակի ընտրութիւններ: 

«alikonline.ir» - Դեկտեմբերի 5-ին Հայ Յեղափոխական Դաշնակցութիւնը իր նախընտրական ծրագիրը ներկայացրեց Սեւանում հրաւիրւած հանրահավաքի ժամանակ: ՀՅԴ Բիւրոյի անդամ, Բիւրոյի Հայ Դատի եւ քաղաքական հարցերի գրասենեակի պատասխանատու Կիրօ Մանոյեանն իր ելոյթում նշեց, որ այս ընտրութիւնները կարեւոր են երկրի համար, քանի որ խոստանում են լինել նոր որակի ընտրութիւններ: Նրա խօսքով` թէեւ քարոզարշաւն այնքան էլ յոյս չի ներշնչում այդ նոր որակի մասին, բայց, ամէն դէպքում, այդ հնարաւորութիւնը կայ: Տեղեկացնում է «yerkir.am»-ը:

ՀՅԴ Բիւրոյի անդամը խօսեց նաեւ այն մասին, թէ ինչու պէտք է քւէարկել Դաշնակցութեան օգտին: «Այս ընտրութիւնների արդիւնքում, որ տեղի են ունենում նոր Սահմանադրութեան կարգով, չի լինելու խորհրդարանում որեւէ ուժ, որ միայնակ կարողանայ ունենալ 2/3-ից աւել: Դրա համար էլ այսօրւայ իշխանութեան քւէների մի մասն իրականում փոշիանալու են: Փոշիանալու են, քանի որ 80 տոկոս էլ ստանան` իրականում խորհրդարանում ներկայացւած պէտք է լինեն ընդամենը 67 տոկոսով: Այդ իսկ պատճառով էլ կարիք չկայ յաւելեալ ճիգ գործադրել եւ ձեր քւէն տալ իշխող կուսակցութիւնը»,- ասաց Կիրօ Մանոյեանը:

Նա նշեց, որ նախորդ իշխանութեան ներկայացուցիչներին ձայն տալու մասին չի էլ խօսում եւ չի կարծում, որ ժողովուրդը նրանց շատ է կարօտել, ուստի նրանց քւէարկելու անհրաժեշտութիւն չկայ: Նրանք իրականում, ըստ Մանոյեանի, Հայաստանի վերանկախացման առաջին օրւանից միշտ եղել են իշխանութիւն եւ ընդդիմութիւն լինելու փորձ չունեն.«Հիմա ասում են, որ ուժեղ ընդդիմադիր կը լինեն, բայց ընդդիմութիւն լինելու փորձ չունեն: Իսկ միւս ուժերը, որոնք մինչեւ հիմա խորհրդարանում ներկայացւել են, տեսել էք, որ եղել են դաշինք, դաշինքը կիսւել է, ու այդ կիսւածը նորից կիսւել է: Ճիշտ է, երեք կուսակցութիւններ են, բայց այդ երեքը միասին չկարողացան երկու տարի դիմանալ, իսկ սա լաւ բան չի յուշում, թէ ինչ որակի աշխատանք պէտք է տանեն միասնաբար»:

Խօսելով նոր ձեւաւորւած կուսակցութիւնների մասին` Մանոյեանը նշեց, որ դրանց մի մասն ընտրութիւններից մի քանի օր առաջ են գրանցւել որպէս կուսակցութիւն: Մանոյեանի խօսքով` դրանցից 4-5-ն իրենց նպաստն ունեն տեղի ունեցած քաղաքացիական նախաձեռնութիւնների մէջ, բայց այդ նախաձեռնութիւններում էլ չկարողացան համախմբւել ու վերածւել են 4-5 կուսակցութիւնների:

«Վստահ եմ, որ բոլոր ուժերի ծրագրերում էլ լաւ կէտեր կան, բայց պէտք է նայել, թէ դրանց մասին խօսողն ով է: Մեր դէպքում` մենք մի քանի հիմնական կէտեր ենք առաջ քաշել, եւ մեր կենսագրութիւնն է վկայ, որ մենք ինչ ասում ենք, այդ ուղուց չենք շեղւել: Ազգային խնդիրների առաջնահերթութիւն, հողի պաշտպանութիւն, ազգային արժէքների պաշտպանութիւն, Արցախի հարցում ընդհանրապէս առանց զիջելու զարգացում, սոցիալական արդարութիւն եւ կառավարման համակարգի բարելաւում` սրանք են Դաշնակցութեան ծրագրի հիմնաքարերը»,- ասաց Մանոյեանը:

Նա նշեց նաեւ, որ պէտք է քւէ տալ Դաշնակցութեանը ոչ միայն այն պատճառով, որ Դաշնակցութիւնը 128 տարւայ պատմութիւն ունի, այլ նաեւ այն պատճառով, որ վերանկախացած Հայաստանում, Արցախում 1989-ից ներկայացրել է իր դէմքը: Մանոյեանի խօսքով` ժողովուրդն արդէն իսկ տեսել է` Դաշնակցութիւնն ինչ կարող է անել:

«Մենք արել ենք շատ աւելին մեր` խորհրդարանում ներկայացւած 5-7 պատգամաւորներով: Չկայ մէկ այլ նման խմբակցութիւն, որ 5-7 պատգամաւորով այնքան աշխատանք կատարէր, որքան մենք: Իսկ մենք արել ենք, արդիւնքի հասել` ե՛ւ երբ ընդդիմադիր էինք, ե՛ւ երբ իշխանութեան մաս ենք կազմել: 2009-16 թթ. եղել ենք ընդդիմութիւն, բայց մարդիկ ասում են` 10 տարի աշխատել եք Սերժ Սարգսեանի հետ: 2008-ին էլ Դաշնակցութիւնը նախագահի իր թեկնածուն ունէր` լուսահոգի Վահան Յովհաննիսեանը, այսինքն` այդ ժամանակ էլ Սերժ Սարգսեանին չէինք պաշտպանում, իսկ 2013-ին ժողովրդին կոչ էինք արել չքւէարկել իշխանութեան թեկնածոյի օգտին, այլ ցանկացած մէկ այլ թեկնածոյի տալ քւէ»,- ասաց Մանոյեանը:

Նա յիշեցրեց, որ այդ ընթացքում կարողացան խորհրդարանում ընդդիմութեանը համախմբել: Մանոյեանը մէջբերեց Լեւոն Տէր-Պետրոսեանի խօսքը, ով ասել էր, թէ այս ինչ սքանչելի քառեակ է: Ըստ Մանոյեանի` այն, որ միասնաբար կարողացել են մի քանի հարցերի ուղղութեամբ աշխատել, փաստ է.«Այդ հարցերից կարեւորը կենսաթոշակային պարտադիր բաղադրիչի մօտեցմանը դէմ լինելն էր, որը հասցրեցինք մինչեւ Սահմանադրական դատարան: Այսօրւայ այս նոր կուսակցութիւնների մէջ ընդգրկւածների մի մասը նոյնպէս մասնակցել են այդ աշխատանքներին, բայց նրանք չէին ուզում, որ կուսակցութիւնների հետ շատ շփումներ ունենալ»:

Մանոյեանը հաւաստիացրեց, որ Դաշնակցութեանը յաջողւել է արդիւնքի հասնել, երբ իշխանութեան մաս են կազմել: Որպէս օրինակ` Մանոյեանը յիշեցրեց 2005-ի ու 2015-ի սահմանադրական փոփոխութիւնները:

«Այսօր, եթէ խորհրդարանում ընդդիմութիիւնն ինչ-որ լծակներ ունի, դրա մէջ մեծագոյն դերակատարութիւն ենք ունեցել մենք: Մենք ենք, որ առաջին օրւանից պնդել ենք, որ Ազգային ժողովում պէտք է ընդդիմութեանը լծակներ տալ: Մինչեւ 2008 թւականը, եթէ խորհրդարանում ընդդիմութիւնն ունենար 49 տոկոս ներկայացւածութիւն, ոչ մի լծակ չունէր, ինչի համար էլ անընդհատ փորձ էր արւում փողոց դուրս գալով հարցերը լուծել: Սակայն 2008-ի մարտի 1-ից յետոյ հնարաւոր եղաւ բարեփոխումներ կատարել»,- ասաց Մարգարեանը:

Խօսելով խորհրդարանական կառավարմանն անցնելու մասին` Մանոյեանը նշեց, որ այդ անցումը կատարելու ժամանակ շատերն ասում էին, թէ սա Սերժ Սարգսեանի` 3-րդ անգամ պաշտօնավարման համար է նման փոփոխութիւն լինում: Սակայն, ըստ Մանոյեանի, փաստն այն է, որ չկարողացաւ նա երրորդ անգամ նախագահ լինել` շնորհիւվ նոր Սահմանադրութեան:

«Ձեր քւէն Դաշնակցութեանը տալով` դուք վստահ կը լինէք, որ խորհրդարանում ներկայացւած է մի կուսակցութիւն, որը հայ իրականութեան մէջ միակ համահայկական կուսակցութիւնն է` իր նպատակներով, գաղափարներով ու կառոյցով: Վերջին 27 տարիներին ով էլ եղել է իշխանութիւն, ինչ-որ պահի զգացել են անհրաժեշտութիւն ու գործակցել են Դաշնակցութեան Սփիւռքի կառոյցների հետ: Պարզ է, որ դա այն բանի համար չէ, որ Դաշնակցութիւնը ներկայացւած լինի Աժ-ում` հայրենիքի շահերը մենք առեւտուր չենք անում, սակայն պարզ է նաեւ, որ եթէ Դաշնակցութիւնը ներկայացւած լինի խորհրդարանում, այդ համագործակցութիւնը շատ աւլի մեծ արդիւնք կը տայ»,- ընդգծեց Մանոյեանը:

Յարակից լուրեր

  • «Ստեղծւած լարւածութեան պատճառը իշխանութիւնների հակասարական, չկշռադատւած գործողութիւններն են». Իշխան Սաղաթելեան
    «Ստեղծւած լարւածութեան պատճառը իշխանութիւնների հակասարական, չկշռադատւած գործողութիւններն են». Իշխան Սաղաթելեան

    ՀՅԴ-ն գտնում է, որ Ամուլսարի հանքի շահագործման հարցի շուրջ ստեղծւած լարւածութեան պատճառը ՀՀ իշխանութիւնների հակասարական, չկշռադատւած գործողութիւններն են, որի արդիւնքում՝ հասարակութեան մօտ մեծ սպասումներ էին ձեւաւորւել եւ որն իրենք չկարողացան սպասարկել. Tert.am-ի հետ զրոյցում նման տեսակէտ յայտնեց ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը: 

  • Ընկեր Վահանին յիշելիս
    Ընկեր Վահանին յիշելիս

    Ծնունդդ շնորհաւոր ընկեր Վահան, քեզ անսահման շատ ենք կարօտում:

  • ԶՈՄ-ականները՝ ՀՅԴ Ստեփանակերտի «Նիկոլ Դուման» կենտրոնում
    ԶՈՄ-ականները՝ ՀՅԴ Ստեփանակերտի «Նիկոլ Դուման» կենտրոնում

    Օգոստոսի 13-ին ՀՅԴ Ստեփանակերտի «Նիկոլ Դուման» կենտրոն են այցելել Արցախի Հանրապետութեան Մարտունի քաղաքում պատանեկան ճամբար իրականացնող ՀՅԴ Լիբանանի «Զաւարեան» Ուսանողական Միութեան անդամներ Հրագ Կարամինասեանը եւ Սելին Գրիգորեանը:

  • Սեւրի երկրորդ շնչառութեանը սպասելիս
    Սեւրի երկրորդ շնչառութեանը սպասելիս

    Սեւրի պայմանագիրը դարձաւ 99 տարեկան:

    1920 թւականի օգոստոսի 10-ին Փարիզի արւարձանում՝ Սեւրում, Անտանտի երկրների եւ Օսմանեան կայսրութեան կողմից ստորագրւեց հաշտութեան պայմանագիր, որը պաշտօնապէս հաստատում էր կայսրութեան բաժանումը Եւրոպայի եւ Մերձաւոր Արեւելքի միջեւ:

  • Կառավարման ճիշտ տարբերակը խորհրդարանական համակարգն է
    Կառավարման ճիշտ տարբերակը խորհրդարանական համակարգն է

    Սահմանադրական բարեփոխումներ իրականացնելու դէպքում, նախեւառաջ, պէտք է վերացնել սուպերվարչապետական ինստիտուտը։ Այս մասին «Փաստինֆօ»-ի հետ զրոյցում ասաց Հայ Յեղափոխական Դաշնակցութեան Գերագոյն մարմնի ներկայացուցիչ Իշխան Սաղաթելեանը։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։