Հա

Ազգային

17/01/2019 - 12:45

Դիլետանտիզմը հակացուցւած է արտաքին քաղաքականութեանը

«Իմ քայլը» խորհրդարանական խմբակցութեան պատգամաւոր Հայկ Կոնջորեանը նախօրէին, ՀՀ ԱԺ արտաքին յարաբերութիւնների մշտական յանձնաժողովի նախագահի ընտրութեան հարցի քննարկման ժամանակ անդրադառնալով Հայաստանի աշխարհաքաղաքական դիրքաւորմանը, հանդէս է եկել չափազանց վիճահարոյց յայտարարութեամբ` նշելով, որ Հայաստանը շրջապատւած է «աւտորիտար Թուրքիայով, աւտորիտար բնոյթի Իրանով, աւտորիտար Ադրբեջանով»:

ԱՐԱՄ ՇԱՀՆԱԶԱՐԵԱՆ

 

«Իմ քայլը» խորհրդարանական խմբակցութեան պատգամաւոր Հայկ Կոնջորեանը նախօրէին, ՀՀ ԱԺ արտաքին յարաբերութիւնների մշտական յանձնաժողովի նախագահի ընտրութեան հարցի քննարկման ժամանակ անդրադառնալով Հայաստանի աշխարհաքաղաքական դիրքաւորմանը, հանդէս է եկել չափազանց վիճահարոյց յայտարարութեամբ` նշելով, որ Հայաստանը շրջապատւած է «աւտորիտար Թուրքիայով, աւտորիտար բնոյթի Իրանով, աւտորիտար Ադրբեջանով»:

Աւելի ուշ, փորձելով սրբագրել Իրանի մասով իր արտայայտութիւնը, նա ասել է, որ դա «բանաւոր խօսքում եղած վրիպակ էր» եւ «իր մասնաւոր ձեւակերպումը», որը «բացարձակապէս չի արտայայտում մեծամասնութեան ձեւակերպումը»: Պատգամաւորը նշել է, որ փորձելու է սովորել վրիպակից եւ ամէն բան անել` նման բացթողումներից խուսափելու համար:

Այն, որ ՀՀ նորընտիր իշխանութիւնների շարքերը հիմնականում համալրւած են դիլետանտներով, պարզ է արդէն բոլորին: Հարեւանցի տեղեկութիւններ ու գիտելիքներ ունեցող անձինք մի օրում եւ բախտի բերմամբ յայտնւել են երկրի ղեկավար օղակներում: Նրանք բացարձակապէս չեն համապատասխանում իրենց զբաղեցրած պաշտօնին կամ հանգամանքին եւ, բնականաբար, չգիտեն, թէ որ ամբիոնից ինչպէս պէտք է արտայայտւել, ինչ պէտք է ասել կամ ինչից պէտք է խուսափել: Եթէ ներքին քաղաքական հարցերի հետ կապւած նրանց վրիպումները, ոչ համարժէք արտայայտութիւններն ու գնահատականները կամ, այսպէս կոչւած, «լեզւական սայթաքումները», այդուհանդերձ, հնարաւոր է ինչ-որ կերպ լղոզել կամ պարտակել, ապա նոյնը չի կարելի ասել չափազանց զգայուն արտաքին քաղաքականութեան ոլորտի մասին, որին միանշանակ հակացուցւած են նման վրիպակները կամ «լեզւական սայթաքումները»:

ՀՀ նորակոչ իշխանութիւնների` ամենատարբեր նշանակութեան եւ տրամաչափի ներկայացուցիչները մէկ անգամ ընդմիշտ պէտք է հասկանան ու գիտակցեն, որ դիլետանտիզմը որեւէ տեղ չի կարող ունենալ արտաքին քաղաքականութեան ոլորտում:

Վերադառնալով Հայկ Կոնջորեանի՝ Իրանի հետ կապւած կոնկրետ արտայայտութեանը, պէտք է նշենք, որ Հայաստանի փոխյարաբերութիւններն Իրանի հետ բարձր մակարդակի վրայ են եւ ունեն բոլոր հնարաւորութիւններն ու հեռանկարները վերաճելու ռազմավարական մակարդակի, եւ նման արտայայտութիւնները որեւէ տրամաբանութեան մէջ չեն տեղաւորւում: Չմոռանանք, որ նման արտայայտութիւնները կարող են համապատասխան հետեւութիւնների առիթ տալ տարածաշրջանային իրադարձութիւնների, տարածաշրջանում ուժերի վերադասաւորման եւ վերադիրքաւորման ու ԼՂ հակամարտութեան հետ կապւած վերջին զարգացումների ֆոնին:

Նման արտայայտութիւնները գալիս են ապացուցելու, որ ՀՀ իշխանութիւնների շրջանում կան անձնաւորութիւններ, որոնք բացարձակապէս հաշւի չեն առնում Իրանի պէս կարեւորագոյն երկրի դերը, նշանակութիւնը եւ կշիռը՝ որպէս ազդեցիկ ու առանցքային խաղացողի տարածաշրջանային իրադարձութիւններում: Իրանի հետ կապւած (ինչպէս նաեւ ռազմավարական նշանակութեան այլ դաշնակիցների եւ գործընկեր կառոյցների) հարցերով պէտք է զբաղւեն ոչ թէ շարքային դիլետանտները, այլ փորձառու դիւանագէտներն ու երկկողմ յարաբերութիւնների բոլոր ծալքերին ու նրբութիւններին ծանօթ, բարձրակարգ մասնագէտները, որպէսզի կարողանան տարածաշրջանային քաղաքականութեան մէջ ճիշտ եզրահանգման գալ եւ ճիշտ յարաբերութիւններ կառուցել ու զարգացնել:

Այլապէս Հայաստանը ստիպւած է լինելու նման վրիպումների, «լեզւական սայթաքումների» կամ անձնական տեակէտների ու կարծիքների համար չափազանց թանկ գին վճարել:

«Yerkir.am»

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։