Հա

Ազգային

04/05/2019 - 10:20

Հեռուստատեսութեան բացայայտ շահագործումը

Առաջին Ալիքի եթերով հարցազրոյցի հրաւիրուած ՀՅԴ Հայաստանի Գերագոյն Մարմնի Ներկայացուցիչ Ընկ. Իշխան Սաղաթէլեանի ելոյթը այսօր եւ՛ս մէկ օրինակն է, թէ ինչպիսի՞ հրապարակագրական վարքագծով հանդէս կու գայ իշխանական մամուլը, երբ հարցը կը վերաբերի երկրէն ներս նոր եւ առողջ քաղաքական այլընտրանք ձեւաւորելու հրամայականին։

ԿԱՐՕ ԱՐՄԷՆԵԱՆ

 

Առաջին Ալիքի եթերով հարցազրոյցի հրաւիրուած ՀՅԴ Հայաստանի Գերագոյն Մարմնի Ներկայացուցիչ Ընկ. Իշխան Սաղաթելեանի ելոյթը այսօր եւ՛ս մէկ օրինակն է, թէ ինչպիսի՞ հրապարակագրական վարքագծով հանդէս կու գայ իշխանական մամուլը, երբ հարցը կը վերաբերի երկրէն ներս նոր եւ առողջ քաղաքական այլընտրանք ձեւաւորելու հրամայականին։

Պահ մը այնպէս թուեցաւ, որ Պր. Պետրոս Ղազարեանի յայտագիրը ստեղծուած էր ամէն գնով խծբծելու Դաշնակցութեան յայտարարութեան թէզերը։ Եւ այդ մէկը ընելու՝ ամենէն կամայական միջամտութիւններով, բեմը գրաւելու ապաշնորհ քայլերով և Ընկ. Սաղաթելեանի լուսաբանական պատասխանները իրենց բոյնին մէջ խեղդելու յստակ միտումով։ Ասիկա բացարձակապէս անընդունելի է։ Ի վերջոյ հարցազրոյցի այս յայտագիրը կը ծառայէ ի՞նչ բանի։ Պր. Ղազարեանի դերասանական շնորհնե՞րը ցուցադրելու, թէ հանրութիւնը լուսաբանելու։ Որոշեցէ՛ք, Պր. Ղազարեան, որպէսզի ըստ այնմ կողմնորոշուինք նաև մենք՝ ձեր հեռուստակայանի ունկնդիրներս աշխարհով մէկ։

Ընկ. Սաղաթելեան մեծ պաղարիւնով տարաւ այս անճաշակ բեմադրութիւնը և այդ բանին համար պէտք է շնորհաւորել զինք։ Դաշնակցութեան յայտարարութիւնը համարձակ մարտահրաւէր մըն է ուղղուած իշխանութեան։ Ինչպէ՞ս ան իրականութեան կը վերածուի։ Կ՚ապրինք և կը տեսնենք։ Այն ինչ, որ տեղի ունեցաւ Առաջին Ալիքի առանձնաշնորհեալ եթերով շարունակութիւնն է այն խուճապահար յարձակողականին, որուն ականատես կ՚ըլլանք ՀՅԴ Հայաստանի Գերագոյն Ժողովի գումարումէն ի վեր իշխանական կողմի հարթակներէն։ Վերջ տուէք այս տղայական մարզանքներուն և վերադարձէք ձեր գործին, քանի որ այդ գործին որակն է, որ պիտի ճշտէ ձեր ապագան։ Միայն այդ շինիչ ճամբով է, որ դուք կրնաք դիմագրաւել Դաշնակցութեան առողջ մարտահրաւէրը։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։