Հա

Ազգային

07/05/2019 - 09:30

Մեր առանցքային նպատակը Թուրքիայի կողմից Ցեղասպանութեան ճանաչումն է

Հայոց Ցեղասպանութեան 104-րդ տարելիցի կապակցութեամբ «Ապառաժ»-ը զրուցել է ՀՅԴ Եւրոպայի Հայ Դատի գրասենեակի հաղորդակցութեան պատասխանատու Յարութ Շիրինեանի հետ:

«alikonline.ir» - Հայոց Ցեղասպանութեան 104-րդ տարելիցի կապակցութեամբ «Ապառաժ»-ը զրուցել է ՀՅԴ Եւրոպայի Հայ Դատի գրասենեակի հաղորդակցութեան պատասխանատու Յարութ Շիրինեանի հետ:



- Օրեր առաջ յիշատակեցինք Հայոց Ցեղասպանութեան 104-րդ տարելիցը: Ինչպիսի՞ արդիւնքներ ենք գրանցւել վերջին տարիների ընթացքում Եւրոպայում Հայոց Ցեղասպանութեան ճանաչման հարցում:

- Եւրոպայում Հայոց Ցեղասպանութեան ճանաչման գործընթացի շուրջ կարծես նոր աշխուժութիւն է նկատւում, եւ ասեմ, որ այսօր հայամէտ մթնոլորտ է տիրում այստեղ:

Ինչ վերաբերում է արդիւնքներին, ապա ասեմ, որ ապրիլի 27-ին Պորտուգալիայի խորհրդարանը հանդէս է եկել Հայոց Ցեղասպանութեան ճանաչման յայտարարութեամբ: Ապրիլի 10-ին Իտալիայի խորհրդարանը երկրորդ անգամ պաշտօնապէս ընդունել է Հայոց Ցեղասպանութիւնը եւ կոչ արել կառավարութեանը՝ հետեւել իր օրինակին: Ֆրանսիայում Ապրիլի 24-ը յայտարարւել է ցեղասպանութիւնների ոգեկոչման օր, իսկ անցեալ տարի Հոլանդիայի խորհրդարանը ճանաչել եւ իր կառավարութեանն է դիմել՝ ճանաչել Հայոց Ցեղասպանութիւնը եւ մասնակից դառնալ Ապրիլի 24-ին Հայաստանում կազմակերպւող ոգեկոչման արարողութիւններին:

Եւրոպական այս երկրների վերը նշւած որոշումները ողջունելի են եւ կարող են բաւական մեծ ճնշում գործադրել Թուրքիայի վրայ՝ Հայոց Ցեղասպանութիւնը ճանաչելու եւ հատուցման գործընթացին անցնելու տեսանկիւնից:

 

- Ապրիլի 24-25-ին Բելգիայի խորհրդարանն ընդունել է ցեղասպանութիւնների ժխտողականութեան դէմ քրէականացման օրէնք, որի մէջ, սակայն, Հայոց Ցեղասպանութիւնը չներառւեց: Ինչպէ՞ս կը մեկնաբանէք տեղի ունեցածը եւ ի՞նչ քայլեր է պատրաստւում նախաձեռնել Հայ Դատի գրասենեակը:

- Բելգիայի խորհրդարանի կողմից ընդունւած ցեղասպանութիւնների ժխտումը քրեականացնող օրէնքը վերաբերում է միայն միջազգային դատարաններով վաւերացւած ցեղասպանութիւններին: Չնայած նրան, որ օրէնքի նախագիծն առաջարկւել է Եւրոմիութեան կողմից՝ վերը նշւած յստակ սահմանափակումով, որը սակայն պարտադիր չէր, մենք յոյս ունէինք, որ խորհրդարանական, սենատի եւ կառավարութեան մակարդակներով Հայոց Ցեղասպանութիւնը ճանաչած Բելգիան հաշւի չի առնի Եւրոմիութեան այդ սահմանափակումը:

Պէտք է ասեմ, որ Բելգիայի որոշման վրայ ազդել են շուրջ մէկ ամսից տեղի ունենալիք ընտրութիւնները: Այսօր Բելգիայում ապրում է 300 հազար թուրք եւ միայն 30 հազար հայ: Ընտրութիւնների նախաշեմին քաղաքական կուսակցութիւնները չուզեցին վնասել թուրքական մեծ գաղութին եւ կորցնել ձայներ: Սակայն ցաւալի է, որ Հայոց Ցեղասպանութեան քրէականացման հարցը, ընտրական հաշւարկների հետ պայմանաւորւած, դուրս է մնացել:

Մենք այս իրողութիւնը դիտարկում ենք որպէս մարդու իրաւունքների, այլատեացութեան եւ ռասիզմի դրսեւորում եւ ընտրութիւնների աւարտից յետոյ պատրաստւում ենք քայլեր ձեռնարկել, որպէսզի օրէնքը վերանայւի: Բոլոր ցեղասպանութիւնների ժխտողականութիւնը պէտք է քրէականացւի, եւ Բելգիան պէտք է պաշտպանի իր երկրում ապրող հայ քաղաքացիների իրաւունքները:

 

- Ի՞նչ առանձայատկութիւն ունեն թուրքական եւ ադրբեջանական լոբբին եւ ինչպէ՞ս է հնարաւոր հակադարձել:

- Հակահայկական լոբբիի առանձնայատկութիւնն այն է, որ թուրքերն ու ադրբեջանցիները մէկ ճակատ կազմած են աշխատում մեր դէմ՝ ֆինանսաւորում ստանալով իրենց պետութիւնների ղեկավարների կողմից: Ահա այս է մեր եւ իրենց լոբբիի տարբերութիւնը: Հայոց Ցեղասպանութիւնից յետոյ Եւրոպայում ձեւաւորւած հայկական գաղութները ստեղծել են կազմակերպութիւններ, որոնք այս տարիների ընթացքում կապեր են հաստատել, եւ այսօր մենք շարունակում ենք այդ գործը:

Հայկական լոբբին Եւրոպայում աշխատում է տեղի մարդուժի եւ համայնքային անդամների նւիրւածութեան եւ աշխատանքի շնորհիւ՝ պաշտպանելով Հայ Դատը, բարձրացնելով Հայոց Ցեղասպանութեան ճանաչման, հատուցման եւ Արցախի անկախութեան ճանաչման հարցերը, պայքար է տանում Արցախի Հանրապետութեան մեկուսացման դէմ եւ Արցախի ժողովրդի ազատ ինքնորոշման իրաւունքը պաշտպանելու ուղղութեամբ:

Այս բոլոր աշխատանքները մենք անում ենք համայնքային ներուժի շնորհիւ: Մենք մեր աշխատանքները կազմակերպում եւ յաջողութիւն ենք գրանցում առանց միլիոնաւոր դոլարների, առանց ազդեցութեան եւ ճնշումների:

 

- ՀՅԴ Եւրոպայի Հայ Դատի գրասենեակի օրակարգում Հայոց Ցեղասպանութեան ճանաչմանն ուղղւած աշխատանքներն ի՞նչ թիրախաւորումներ են ունենալու առաջիկայում:

- Հայոց Ցեղասպանութեան ճանաչման պայքարը կը մնայ առաջնային Հայ Դատի գրասենեակի համար, որովհետեւ կան դեռեւս Եւրոպական երկրներ, որոնք չեն ճանաչել մեր Ցեղասպանութիւնը: Առաջիկայ ամիսներին մենք աշխատելու ենք յատկապէս Իսպանիայի եւ Մեծ Բրիտանիայի վրայ, որպէսզի մի քանի տարուց Եւրոպական միութեան բոլոր երկրները ճանաչած լինեն Հայոց Ցեղասպանութիւնը:

Եւրոպայում Հայոց Ցեղասպանութեան ճանաչման գործընթացը կարեւոր է, սակայն մեր առանցքային նպատակը Թուրքիայի կողմից Ցեղասպանութեան ճանաչումն է եւ, իհարկէ, հատուցումը: Հայ ժողովրդին պէտք է վերադարձւի իր կրած ցաւի հատուցումը եւ պապական հողերը:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։