Հա

Ազգային

18/06/2019 - 14:30

Արցախեան հիմնահարցը՝ առանցքային

ՀՀ եւ Արցախի իշխանութիւնների միջեւ առկայ են լարւած յարաբերութիւններ: Ինչքան էլ երկու կողմից բացատրութիւններ տրւեն, հաւաստիքներ հնչեցւեն սոցիալական ցանցերում, այս կամ այն ճամբարին պատկանող զանգւածային լրատւական միջոցներում առկայ են մեղադրանքների եւ հակասութիւնները բացայայտող երկկողմանի հրաձգութիւններ:

ՀՀ եւ Արցախի իշխանութիւնների միջեւ առկայ են լարւած յարաբերութիւններ: Ինչքան էլ երկու կողմից բացատրութիւններ տրւեն, հաւաստիքներ հնչեցւեն սոցիալական ցանցերում, այս կամ այն ճամբարին պատկանող զանգւածային լրատւական միջոցներում առկայ են մեղադրանքների եւ հակասութիւնները բացայայտող երկկողմանի հրաձգութիւններ: Լարւածութիւնը սկսւել է դեռեւս 2018 թւականի դեկտեմբերին տեղի ունեցած ՀՀ ԱԺ ընտրական քարոզարշաւի ժամանակ, երբ պատգամաւորական թեկնածու Սասուն Միքայէլեանը 2018 թւականի ապրիլի իշխանափոխութիւնը առաւել արժեւորեց, քան Արցախեան յաղթանակը:

Բանն այն է, որ վերջին 20 տարիներին, մինչեւ 2018 թւականի ապրիլին տեղի ունեցած իշխանափոխութիւնը Հայաստանի թէ՛ ներքին, թէ՛ արտաքին քաղաքականութեան դաշտում առանցքային տեղ է գրաւել Արցախեան հիմնահարցը: Մինչեւ իսկ Լեւոն Տէր-Պետրոսեանի իշխանութեան աւարտը պայմանաւորւել է Արցախեան հիմնախնդրի վերաբերեալ իշխող ընտրանու ներսում գոյութիւն ունեցող հակասութիւնների պատճառով: Չենք կարող չնկատել, որ Արցախեան հիմնահարցի դոմինանտութիւնն օգտագործւել է իշխանութեան դէմ ուղղւած արդարացի պահանջներին դիմակայելու համար, որն իր բացասական ազդեցութիւնն է ունեցել հասարակութեան որոշ շերտերի մէջ Արցախեան հարցի շուրջ զգայունութեան ձեւաւորման հարցում:

Այսուհանդերձ, Արցախեան հիմնահարցի առանցքայնութիւնը դարձել է հայ ժողովրդի ազգային ազատագրական պայքարի գաղափարական լիցք, որը համայն հայութեան մօտ կարեւոր նշանակութիւն ունի՝ թէ՛ սփիւռքեան մակարդակում հայապահպանութեան եւ թէ՛ ներհայաստանեան մակարդակում ինքնապաշտպանութեան եւ ձեռք բերածի պահպանման ու զարգացման ուղու մէջ: Հէնց այդտեղից է իմաստաւորւում Դաշնակցութեան ռազմավարական մօտեցումները խտացնող, ներկայ օրերում մեզ անհրաժեշտ՝ «Զարգանալ՝ չզիջելով» կարգախօսի ուղերձը:

Այսօր Հայաստանի տարածքը, ի շնորհիւ ազատագրական պայքարում ձեռք բերած յաջողութիւնների, 42 հազար քառակուսի կիլոմետր է, որի պահպանումն ու բարգաւաճումը պէտք է լինի հայկական պետական համակարգի կարեւորագոյն առաքելութիւնը:

Ելնելով վերոնշեալից, Արցախի պետական համակարգի առանցքային հիմնահարցը նաեւ որպէս անվտանգութեան տարր պէտք է հանդիսանա Արցախի տարածքի զարգացումն ու 12 հազար քառակուսի կիլոմետր կազմող անկախ երկրի բարգաւաճումը: Այս կարեւորագոյն ուղին է, որի հիման վրայ պէտք է ձեւաւորւի համազգային զարգացման հեռանկարը:

Վերադառնալով Հայաստանի եւ Արցախի իշխանութիւնների միջեւ առկայ լարւածութեանը, ՀՅ Դաշնակցութիւնը համոզւած է, որ այս հարցը կը լուծւի ԱՀ եւ ՀՀ միջեւ ռազմավարական դաշինքի կնքման միջոցով: Այսպիսով կը կանխարգելւեն կամայական կամ ճաշակային մօտեցումները, եւ պարզ ու յստակ կը դառնայ իւրաքանչիւր կողմի սահմանները եւ պարտաւորութիւնները միւսի նկատմամբ: Բնական զարգացում ապահովելու համար պարտաւոր ենք կանխարգելել իւրաքանչիւր ճնշում: Դա կարող է լինել թէ՛ ներքին եւ թէ՛ արտաքին դաշտից:

Քաղաքական վերադասաւորումների լոյսի ներքոյ վերը նշւած հարցերը այն հիմնադրոյթներն են, որոնց հիման վրայ իւրաքանչիւր քաղաքական ուժ պէտք է ձեւաւորի իր տեսլականը եւ շունչ ու հոգի տայ Արցախի քաղաքացու պատւէրին:

 

«Ապառաժ»-ի խմբագրական,

17 յունիսի, 2019 թ.

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։