Հա

Ազգային

06/07/2019 - 10:50

Մեզ համար ընդունելի չեն վեթինգն է՛լ, անցումային արդարադատութիւնն է՛լ

ՀՅԴ ԳՄ անդամ Արթուր Խաչատրեանը «Ժողովուրդ» օրաթերթի հետ զրոյցում ասաց, որ իրենք շարունակում են այս օրերին ակտիւ հանդիպումներ ունենալ տարբեր քաղաքական ու արտախորհրդարանական ուժերի հետ: Ըստ Արթուր Խաչատրեանի` իրենց նպատակը կուսակցութիւնների դիրքորոշման մասին տեղեկութիւն ունենալն է տարբեր քաղաքական ու տնտեսական հարցերի վերաբերեալ: 

«alikonline.ir» - ՀՅԴ ԳՄ անդամ Արթուր Խաչատրեանը «Ժողովուրդ» օրաթերթի հետ զրոյցում ասաց, որ իրենք շարունակում են այս օրերին ակտիւ հանդիպումներ ունենալ տարբեր քաղաքական ու արտախորհրդարանական ուժերի հետ: Ըստ Արթուր Խաչատրեանի` իրենց նպատակը կուսակցութիւնների դիրքորոշման մասին տեղեկութիւն ունենալն է տարբեր քաղաքական ու տնտեսական հարցերի վերաբերեալ:

 

- Պարո՛ն Խաչատրեան, ՀՅԴ-ն ստւերային կառավարութիւն է ստեղծել, որպէսզի իշխանութիւնների վարած քաղաքականութիւնը բուռն քննադատութեան ենթարկեն: Ի՞նչ փուլում են հիմա Ձեր աշխատանքները, ուսումնասիրո՞ւմ էք հայրենի իշխանութիւնների գործունէութիւնը, Ձեզ դո՞ւր է գալիս նրանց աշխատանքը:

- Դա մասնագիտական ոլորտային յանձնախմբերն են, որոնցից իւրաքանչիւրը պատասխանատու է մի ոլորտում ուսումնասիրութեան, կուսակցութեան քաղաքականութեան մշակման համար: Եթէ, օրինակ, ասում ենք` գիւղատնտեսութեան մէջ այս բանը ճիշտ չի, պէտք է հիմք ունենանք ասելու համար, թէ ինչու ճիշտ չի: Կամ եթէ ասում են` սա ճիշտ չի, պէտք է առաջարկենք մեր ճիշտ տարբերակը` նոյնը Հարկային օրէնսդրութեան հետ կապւած, այսպէս կոչւած, անցումային արդարադատութեան հետ կապւած եւ այլն: Այսինքն` մեր յայտարարութիւնները մերկապարանոց չլինեն, դա խորը ուսումնասիրութեան արդիւնքում է: Ստւերային կառավարութիւն ասւածը կուսակցութեան ժողովում ստեղծւած բանաձեւ է, որը աւելի շատ բրիտանական համակարգից եկած բառամթերք է, դա ընդդիմութեան համապատասխան այն մարդիկ են, ովքեր ոլորտների համար պատասխանատու են: Ստւերային կառավարութիւնը տասնեակ տարիներ կայ, գիւտ չի արւել, դա եղել է տարբեր երկրներում:

 

- Բայց այժմ ի՞նչ փուլում է գտնւում Ձեր կուսակցական կառավարութիւնը, ի՞նչ էք ուսումնասիրում, որը վերաբերում է հայրենի կառավարութեանը:

- Սովորական ամենօրեայ աշխատանք է, սեփական մօտեցումներն են մշակւում, եւ ինչ-որ մի պահի աւելի լայն փաստաթղթով հանդէս կը գանք:

 

- Տեղեկութիւններ կան, որ ՀՅԴ-ն աւելի ակտիւ գործունէութիւն է սկսելու աշնանը. որքանո՞վ են ճիշտ այդ տեղեկութիւնները:

- Կուսակցութիւնն աշխատում է իր բնականոն կեանքով, քննադատութիւնը սեզոնային բնոյթ չունի: Եթէ իշխանութիւնները վաղը մի հատ ինչ-որ փաստաթուղթ հրապարակ բերեն, որը քննադատութեան ենթակայ է, մենք կը քննադատենք. չենք սպասելու սեպտեմբերին: Ուղղակի սեպտեմբերը, ինչպէս բոլոր երկրներում, կեանքը աւելի ակտիւանում է, ամառն աւելի պասիւ շրջան է: Բայց դա չի նշանակում, որ եթէ կայ քննադատութեան ենթակայ հարց, լինի, ու մենք չքննադատենք, չկայ նման բան: Մենք մարզերում եւս ակտիւ գործունէութիւն ենք իրականացնում: Գերագոյն մարմնի անդամները ու այդ ոլորտային յանձնախմբերի անդամները պարբերաբար մարզեր են այցելում, նորմալ աշխատանքներ ենք իրականացնում, նորմալ կուսակցական կեանք է: Քանի որ մեր կուսակցութիւնը, ի տարբերութիւն շատերի, մարզային կառոյցներ ունի, այնտեղ եւս շատ ինտենսիւ աշխատում ենք:

 

- ՀՅԴ ԳՄ-ն վերջին ժամանակներս հանդիպումներ է ունենում տարբեր կուսակցութիւնների ղեկավարների հետ: Ո՞րն է այդ հանդիպումների նպատակը. գուցէ ներքին կոալիցիաներ եք պատրաստւում ստեղծել այդ կուսակցութիւնների հետ:

- Մենք հանդիպել ենք ԲՀԿ-ի հետ, հանդիպել ենք «Մեկ Հայաստան» կուսակցութեան հետ, հանդիպում ենք ունեցել Հրանտ Բագրատեանի «Ազատութիւն» կուսակցութեան հետ, Դեմոկրատական կուսակցութեան հետ, Ռամկավար-ազատական կուսակցութեան հետ, իհարկե շարունակւում են քաղաքական կոնսուլտացիաները: Հանդիպումների նպատակը կուսակցութիւնների դիրքորոշումների ճշտումներն են տարբեր հարցերի վերաբերեալ` տնտեսական, արտաքին քաղաքականութեան վերաբերեալ, անցումային արդարադատութեան վերաբերեալ: Մեզ մօտ ամէն ինչ շատ թափանցիկ է: «Դաշնակցութիւնը» փորձում է հասկանալ տարբեր կուսակցութիւնների մօտեցումը հարցերի լայն սպեկտորի շուրջ ու անհրաժեշտութեան դէպքում նաեւ ջանքերը միաւորել: Եթէ լինի օրակարգ, որը բոլորի համար ընդունելի է, ապա կը հասկանանք մեր անելիքները:

 

- Իսկ ի՞նչ դիրքորոշում ունի ՀՅԴ-ն վեթինգ իրականացնելու ու անցումային արդարադատութեան հետ կապւած: Արդեօք իշխանութիւններին յաջողւելո՞ւ է այդ երկու գործընթացները պատւով իրականացնել:

- Նախ պէտք է հասկանալ, թէ այդ վեթինգն իրենից ինչ է ներկայացնում, ինչ է նշանակում վեթինգ, այդ վեթինգի մեխանիզմը, լիազօրութիւնները ԲԴԽ-ն ունի: Օրէնքը հնարաւորութիւններ չի՞ ընձեռնում, որ գնում են օրէնքով չնախատեսւած քայլերի ու օրէնքի խախտմամբ, մասնաւորապէս` դատարանների մուտքերը փակելը: ԲԴԽ-ն դրա համար է ստեղծւած. այն դատաւորները, որոնք չեն բաւարարում պահանջներին, այդ դատաւորների նկատմամբ սանկցիա է կիրառւում: Հանրութեան համար անհասկանալի բառ մէջբերելով` ինչի՞ ենք ուզում հասնել, ես չեմ հասկանում: Մեզ համար ընդունելի չեն վեթինգն է՛լ, անցումային արդարադատութիւնն է՛լ: Անցումային արդարադատութիւն տեղի է ունենում այն երկրներում, որտեղ եղել է քաղաքացիական պատերազմ, ու այդ երկիրն անցել է այդ պատերազմով: Այսինքն` ինչ-որ մի պահ օրէնքները երկրում չի գործել, ու դա հասարակութեան համախմբման մեխանիզմ է: Հայաստանն այդ ճանապարհը չի անցել, ՀՀ-ում միշտ օրէնքները գործել են, լաւն են եղել, վատն են եղել, այլ խնդիր է, բայց դրանք գործել են: Այս իշխանութիւնը ձեւաւորւել է այս օրէնսդրութեամբ` ընտրւել է վարչապետ, ձեւաւորւել է կառավարութիւն, ընտրւել է նոր խորհրդարան, ու դա արւել է գործող օրէնսդրութեամբ: Այսինքն` մենք չենք ունեցել օրէնսդրական վակուում, որպէսզի վակուումի ժամանակ տեղի ունեցած դէպքերը դատւեն անցումային արդարադատութեան միջոցով: Անցումային արդարադատութիւնը կարող է հասարակութեան մէջ պառակտում մտցնել:

 

Զրուցեց Սոնա Գրիգորրանը

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։