Հա

Ազգային

12/09/2019 - 10:50

Այսօր ընդդիմութիւնը պէտք է կենտրոնանայ բուն օրակարգերի վրայ

Factor.am-ի հարցազրոյցը ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանի հետ:

«alikonline.ir» - Factor.am-ի հարցազրոյցը ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանի հետ:

 

- Արցախում տեղի ունեցած ՏԻՄ ընտրութիւններին մասնակցել է Դաշնակցութիւնը։ Ինչպէ՞ս էք գնահատում այդ ընտրութիւնները:

- Բաւականին լաւ որակի ընտրութիւններ տեղի ունեցան Արցախում: ՀՅԴ-ն, բնականաբար, մասնակցում էր, եւ 3 կուսակցութիւնների մէջ երրորդ արդիւնքն ենք ունեցել։ Մէկ տասնեակից աւելի համայնքներում ունեցել ենք կուսակցութեան թեկնածուներ։ Ունեցել ենք թեկնածուներ, օրինակ, Քարվաճառի շրջանում, որ ձայների շատ փոքր տարբերութեամբ պարտւել է, իսկ Աղաւնոյում յաղթել ենք։ Բազմաթիւ համայնքներում յաջողութեան են հասել այն թեկնածուները, որոնց մենք պաշտպանել ենք։

 

- Այս ընտրութիւններն աննախադէ՞պ էին ժողովրդավարութեան առումով։

- Ընդհանրապէս, Արցախի ընտրութիւնները միշտ բաւականին լաւ որակի են եղել։ Այս ընտրութիւնները եւս մէկ քայլ առաջ էին։

 

- 5 ամիս առաջ այն հարցին, թէ հնարաւո՞ր է Հանրապետական-Դաշնակցութիւն համագործակցութիւն արտախորհրդարանական ճակատում, Դուք ասել էիք, որ բաց եք համագործակցութեան համար։ Արդէն կա՞յ այդ համագործակցութիւնը։

- Այս պահին Հանրապետական կուսակցութեան հետ համագործակցութեան օրինակներ չունենք, բայց մենք շարունակում ենք նոյն քաղաքականութիւնը. եթէ կան օրակարգեր, որոնք բխում են մեր ծրագրերից, համագործակցութիւնը չենք բացառում արտախորհրդարանական տարբեր ուժերի հետ։ Անցնող ժամանակահատւածում մենք արտախորհրդարանական ուժերի հետ մի քանի համագործակցութեան լաւ փորձ ունենք, մէկ-երկու օրակարգով համագործակցել ենք եւ առաջիկայում եւս փորձելու ենք, ընդհանուր օրակարգեր ունենալու դէպքում, շարունակել համագործակցել։

 

- Պարոն Սաղաթելեան, որո՞նք են այն խնդիրները, որ այսօր կարող են միաւորել արտախորհրդարանական ուժերին։

- Դրանք բազմաթիւ են, բայց արտախորհրդարանական ուժերն ունեն նաեւ իրենց ուրոյն օրակարգերը։ Շատ հարցերում հնարաւոր չէ նաեւ ընդհանուր համախմբում կազմակերպել։ Ես կարծում եմ՝ այսօրւայ ընդդիմութեան հիմնական եւ կարեւոր խնդիրներից մէկն է՝ լինել զսպաշապիկ այսօրւայ իշխանութեան համար եւ թոյլ չտալ բարեփոխումների ու այլ լոզունգների տակ երկրում հաստատել մեկ մարդու իշխանութիւն։ Եւ որքան Հայաստանում լինի կազմակերպւած եւ կայացած ընդդիմութիւն, դա բխում է մեր ժողովրդի շահերից։

 

- Մի քանի օր առաջ Միքայէլ Մինասեանը յայտարարել է, որ Հայաստանում ընդդիմութիւն չկայ, որովհետեւ եղած ուժերի ուզածը ռեւանշիզմն է։ Դուք համաձա՞յն էք նրա հետ։

- ՀՅԴ-ի պարագայում որեւէ մէկը չի կարող նման բան ասել, ՀՅԴ-ն իրական արմատական, գաղափարական ընդդիմութիւն է։ Անցնող ժամանակահատւածում տարբերւել ենք նաեւ հէնց դրանով, որ մենք ոչ միայն քննադատել ենք իշխանութիւններին քաղաքականութեան համար, այլեւ ներկայացրել ենք այլընտրանքը։

 

- Ադեկւատ կուսակցութեան հիմնադիր անդամ Արթուր Դանիէլեանը յայտարարել է, որ ընդդիմութեան կոնսոլիդացիայի համար առաջնորդի լաւագոյն թեկնածուն Միքայէլ Մինասեանն է, ու նա այդպիսին է նաեւ Դաշնակցութեան համար։ Այդպէ՞ս է, թէ՞ ոչ։

- Ես լուրջ չեմ վերաբերւում իր այդ յայտարարութեանը։ Դա կեղծ, հնարովի, արհեստական օրակարգ է եւ ընդդիմադիր դաշտում նման խնդիր չկայ։

 

- Ընդդիմութեան դաշտում կա՞յ այնպիսի խնդիր, որ ինչ-որ մէկն անպայման պէտք է առաջնորդի նրան։

- Ես կարծում եմ՝ այսօր ընդդիմութիւնը պէտք է ոչ թէ փնտրի առաջնորդ եւ դրա վրայ ժամանակ ծախսի ու հնարաւոր սրացումներ առաջացնի ընդդիմութեան դաշտում, այլ պէտք է կենտրոնանայ բուն օրակարգերի վրայ եւ նման կեղծ, շինծու, բանսարկու բաների վրայ ժամանակ չծախսի։

 

- Դաշնակցութիւնն այսօր ունի՞ իշխանութեան հետ համագործակցութեան եզրեր։

- Մենք բազմաթիւ անգամ ասել ենք, եւ յաճախ սա այլ կերպ են մեկնաբանում, որ որտեղ կայ պետութեան շահ, կայ ժողովրդի եւ պետութեան իրաւունքների պաշտպանութեան հարց եւ խնդիր, յատկապէս՝ Հայաստանից դուրս, մենք կանգնելու ենք պետութեան կողքին, ո՛չ իշխանութեան։ Այս իմաստով մենք համագործակցութեան օրինակներ այս ընթացքում ունեցել ենք եւ շարունակելու ենք ունենալ։ Սա չի նշանակում, որ մենք մեր քայլերով եւ գործողութիւններով նպաստելու ենք իշխանութեան հեղինակութեան բարձրացմանը, իշխանութեան հետ ենք համագործակցում։ Բայց հարցեր կան, որ, այո՛, մենք յանուն պետութեան համագործակցելու ենք։ Եթէ պետութիւնն ունի խնդիր, կապ չունի, թէ ովքեր են իշխանութեան գլխին, մենք համագործակցելու ենք։

 

- Դուք Ամուլսարի հարցում սպասու՞մ էք հանրային ըմբոստացում։

- Մենք կարծում ենք, որ, այո՛, իրավիճակը բաւականին կը թեժանայ, եւ այս ամէնի մեղաւորը Հայաստանի իշխանութիւններն են, որոնք այս մէկ տարւայ ընթացքում հասարակութեան մէջ ձեւաւորեցին չարդարացւած սպասումներ։

 

- Այսինքն՝ հասարակութիւնը սպասում էր, որ չի՞ շահագործւելու:

- Այո՛, ու այդ սպասումը ձեւաւորել էր իշխանութիւնն իր ոչ հետեւողական քայլերի ու պոպուլիզմի արդիւնքում։ Այսօր ունենք իրականութիւն, երբ իշխանութիւնը խնդիր ունի։ Եւ եթէ նա առանց կասկածները փարատելու գնայ հանքի շահագործման, սրացումներ լինելու են։

 

- Վարչապետն ասում է, որ Ամուլսարը չշահագործելու իրաւական հիմքեր չկան։

- Մէկ տարի առաջ ինչո՞ւ չէր ասում այդ մասին, թող մէկ տարի առաջ հասարակութեանն ասէր, որ իրաւական հիմքեր չկան։ Եւ այն ժամանակ լուծում տար, ու այս լարւածութիւնը տեղի չէր ունենայ։

 

- Մէկ տարի առաջ նա, գուցէ, այդ խորութեամբ չէր տիրապետում խնդրին։

- Հէնց դա է խնդիրը։

 

- Այսօր վարչապետն ունի հանրային մեծ վստահութիւն, ինչո՞ւ չհաւատալ նրա խօսքին։

- Մենք չենք ասում, որ իրաւական հիմքեր կան, մենք ասում ենք՝ այն բոլոր փաստարկները, որոնք ներկայացնում էք եւ ասում, որ հանքի շահագործումն անվնաս է, դրանք համոզիչ չեն։ Իմիջիայլոց, առաջիկայ երկու օրը մենք կը ներկայացնենք մեր մասնագիտական եզրակացութիւնը հանքի շահագործման հետ կապւած։ Դրանք կը լինեն մեր դիտարկումները՝ ուսումնասիրութիւնների եւ հրապարակւած եզրակացութիւնների հիման վրայ, որտեղ կը լինեն բոլոր մտահոգութիւնները, ինչպէս նաեւ մեր առաջարկութիւնները։

 

- Եթէ, այնուամենայնիւ, պարզւի, որ վտանգ չկայ, արժէ՞ շահագործել։

- Եթէ համոզւած փաստարկներով այն բոլոր խնդիրները, որոնք բարձրաձայնւում են, հիմնաւորւեն, կարելի է հանքը շահագործել։ Բայց այս պարագայում դա նպատակայարմար չէ, որովհետեւ փաստարկները համոզիչ չեն։

 

- Վարչապետը խնդրել է, որպէսզի ջերմուկցիները բացեն Ամուլսարի ճանապարհը։ Կարծես թէ նրա խնդրանքի պատասխանն առայժմ բացասական է։ Ո՞րը պիտի լինի վարչապետի քայլը։

- Վարչապետն ինքը թող որոշի իր քայլերի յաջորդականութիւնը, յատկապէս, որ յաճախ նրա որոշումները շատ ծանր կշռադատւած չեն։ Հետեւաբար, չեմ կարող կանխատեսել յաջորդ քայլը։ Միայն մի բան պիտի ասեմ, որ ուժով հարց չլուծւի եւ առիթ չդառնայ հասարակութեանը եւս մէկ անգամ բաժանելու, կողմերի ու դէմերի բաժանելու։

 

- Դաշնակցութեան դիրքորոշումը ո՞րն է Ռոբերտ Քոչարեանի քրէական հետապնդման մասով, յատկապէս՝ Սահմանադրական դատարանի որոշումից յետոյ։

- Դժբախտաբար, մեր երկրում այսօր կայ մի երեւոյթ, այսօր բոլորն իրենց վերապահում են դատախազի կամ դատաւորի դեր՝ սկսած ԱԺ պատգամաւորից, վերջացրած իր խոհանոցում տոլմա փաթաթող տնային տնտեսուհուց։ Ես ինձ իրաւունք չեմ վերապահում ասելու՝ Քոչարեանը մեղաւոր է կամ անմեղ։ ՍԴ-ի հետ կապւած, բաւականին մասնագիտական հարթութեան մէջ են քննարկումները։ Ես կարող եմ քաղաքական գնահատական տալ, ըստ որի՝ Ռոբերտ Քոչարեանի դատավարութիւնն ուղղորդւած է։ Եւ իրաւապահ ու դատական համակարգն իշխանութիւնների կողմից ենթարկւում է ճնշման: Եւ դա իրականութիւն է՝ սկսած յայտնի զանգից մինչեւ դատաւորի հետապնդումը: Այս իմաստով մենք մեր մտահոգութիւնը յայտնել ենք մէկ տարի առաջ։ Սա Հայաստանի արդարադատութեան ու ժողովրդավարութեան համար էական նշանակութիւն ունի։ Եթէ վաղն այսօրւայ իշխանութիւնների նկատմամբ մէկ այլ իշխանութիւն վարւի այնպէս, ինչպէս վարւում են Ռոբերտ Քոչարեանի հետ, մենք կրկին բարձրաձայնելու ենք։ Ձեր յաջորդ հարցը կանխելու համար ասեմ, որ սա չի նշանակում, որ մենք վաղը Ռոբերտ Քոչարեանի հետ դաշինք ենք կազմելու, բեւեռ ենք ձեւաւորելու։ Սա յատուկ ասում եմ տարբեր շրջանակների մկկոցները կանխելու համար։ Բայց մենք գտնում ենք, որ, այո՛, Ռոբերտ Քոչարեանի դատավարութիւնը գնում է ուղղորդւած։

 

Մհեր Արշակեան

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։