Հա

Ազգային

18/09/2019 - 10:50

«Իշխանութիւնը ցանկանում է «խամաճիկ» դատական համակարգ, եւ դա անում է հանրային պահանջի, ժողովրդավարութեան, արդարութիւն հաստատելու լոզունգների տակ». Իշխան Սաղաթելեան

Ո՛չ Ազգային ժողովի նախագահը, ո՛չ խմբակցութեան ղեկավարը նման լիազօրութիւն եւ իրաւասութիւն չունեն: Tert.am-ի հետ զրոյցում ասաց ՀՅԴ Հայաստանի ԳՄ ներկայացուցիչ Իշխան Սաղաթելեանը՝ մեկնաբանելով ՀՀ ԱԺ նախագահ Արարատ Միրզոյեանի եւ ԱԺ «Իմ քայլը» խմբակցութեան՝ երէկ արած յայտարարութիւնները՝ Սահմանադրական դատարանի եւ ՍԴ նախագահ Հրայր Թովմասեանի լիազօրութիւնների դադարեցման գործընթաց սկսելու մասին։

«alikonline.ir» - Ո՛չ Ազգային ժողովի նախագահը, ո՛չ խմբակցութեան ղեկավարը նման լիազօրութիւն եւ իրաւասութիւն չունեն: Tert.am-ի հետ զրոյցում ասաց ՀՅԴ Հայաստանի ԳՄ ներկայացուցիչ Իշխան Սաղաթելեանը՝ մեկնաբանելով ՀՀ ԱԺ նախագահ Արարատ Միրզոյեանի եւ ԱԺ «Իմ քայլը» խմբակցութեան՝ երէկ արած յայտարարութիւնները՝ Սահմանադրական դատարանի եւ ՍԴ նախագահ Հրայր Թովմասեանի լիազօրութիւնների դադարեցման գործընթաց սկսելու մասին։

Սաղաթելեանի խօսքով՝ շատ յստակ է, որ իշխող քաղաքական ուժը գնում է դատական իշխանութիւնը իւրացնելու հակաօրինական ճանապարհով, որն անընդունելի է եւ դատապարտելի: «Իրենց յայտարարած ժողովրդավարական եւ իրաւական երկրում չի կարող  նման պրոցես տեղի ունենալ: Իշխանութիւնն, ընդհանրապէս, ցանկանում է «խամաճիկ» դատական համակարգ, եւ դա անում է հանրային պահանջի, ժողովրդավարութեան, արդարութիւն հաստատելու լոզունգների տակ»,- նշեց նա:

Իշխան Սաղաթելեանը, անդրադառնալով այն կարծիքներին, թէ պատահական չէ, որ այդ յայտարարութիւնները եղան հէնց երէկ՝ ՀՀ երկրորդ նախագահ Ռոբերտ Քոչարեանի խափանման միջոցի հնարաւոր փոփոխութեան նախօրէին, ասաց. «Չենք կարող ասել, թէ կապ չունի նաեւ այսօրւայ դատավարութեան հետ, բայց միայն սրանով չէ պայմանաւորւած: Սա անձերի պաշտպանութեան հարց չէ, այլ՝ պետական ինստիտուտների, Սահմանադրութեան, օրէնքների պաշտպանութեան հարց»:

Մեր զրուցակիցն անդրադարձաւ նաեւ ԱԺ «Իմ քայլը» խմբակցութեան պատգամաւոր Տիգրան Ուլիխանեանի ֆէյսբուքեան գրառմանը, թէ «ԱԺ մեծամասնութեան կողմից որեւէ պաշտօնեայի լիազօրութիւնները դադարեցնելու վերաբերեալ գործընթաց սկսելու մասին յայտնելուց (կամ նոյնիսկ դրա մասին ակնարկելուց) անմիջապէս յետոյ տւեալ պաշտօնեան անյապաղ, առանց այլեւայլութիւնների հրաժարական պիտի տայ՝ անկախ տւեալ պաշտօնեայի ինքնավարութեան աստիճանից։ Միակ առաջնային մանդատով օժտւած կառոյցի դէմ ուղղակի խաղ չկայ ու չպիտի լինի։ Ի յեճուկս ԱԺ-ի գործող պաշտօնեայ չի կարող լինել եւ վերջ։ Հրայր Թովմասեանը չի պաշտօնավարելու եւ վերջ։ Յոյս ունեմ՝ ինքնակամ կը գնայ. դեռ կարող է»։

«Դա լկտիութեան դրսեւորում էր:  Ժողովուրդն իրենց այդ մանդատը չի տւել, որ ասեն՝ «մեր դէմ խաղ չկայ, ինչ ուզենք, կարող ենք անել», եւ ժողովրդի անունից անեն այն, ինչ ուզում են: Այդ մանդատը գործ անելու, ժողովրդի ու պետութեան առջեւ ծառացած խնդիրները լուծելու եւ ոչ թէ նման մեծամիտ ու լկտի յայտարարութիւններ անելու համար է»,- ասաց Իշխան Սաղաթելեանը:

Յիշեցնենք՝ ՀՀ ԱԺ նախագահ Արարատ Միրզոյեանը խորհրդարանում հանդէս եկաւ յայտարարութեամբ՝ անդրադառնալով ՍԴ-ում եւ վերջինիս շուրջ ստեղծւած իրավիճակին: ԱԺ նախագահը, մասնաւորապէս, նշեց. «Ես կարծում եմ, որ ՀՀ ԱԺ-ն՝ որպէս ՀՀ ժողովրդի օրինական եւ լեգիտիմ ներկայացուցիչ եւ առաջնային մանդատով օժտւած միակ քաղաքական ինստիտուտ, Սահմանադրութեամբ իրեն վերապահւած լիազօրութիւնների շրջանակներում իր դիրքորոշումը պիտի արտայայտի ՍԴ խնդիրների եւ իրավիճակի կապակցութեամբ»:

ԱԺ «Իմ քայլը» խմբակցութիւնն էլ կայացած փակ նիստից յետոյ յայտարարեց, որ սկսում է ՍԴ նախագահ Հրայր Թովմասեանի լիազօրութիւնները դադարեցնելու գործընթաց՝ որպէս հիմք ունենալով վերջինիս կողմից կարգապահական խախտումը։

Յայտարարութեամբ հանդէս եկաւ նաեւ ՀՅԴ Հայաստանի ԳՄ-ն՝ կոչ անելով իշխանութեան օրէնսդիր եւ գործադիր ճիւղերին՝ դադարեցնել հակասահմանադրական ընթացքը, զերծ մնալ հակապետական գործողութիւններից:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։