Հա

Քաղաքական

26/07/2016

Անդրէ Լոշակ.- ««Աւրորա»-ն փաստեց, որ մարդիկ հրաշքներ են գործում»

Յուլիսի 15-ին «Ոսկէ ծիրան» միջազգային կինոփառատօնի շրջանակներում ՀԲԸՄ-ի Երեւանի գրասենեակում տեղի ունեցաւ լրագրող, ռեժիսոր, «ՏԵՖԻ» մրցանակի դափնեկիր Անդրէ Լոշակի վարպետութեան դասը, ով նկարահանել էր «Աւրորա» մրցանակի յաւակնորդների մասին պատմող ֆիլմերը:

«mediamax.am» - Յուլիսի 15-ին «Ոսկէ ծիրան» միջազգային կինոփառատօնի շրջանակներում ՀԲԸՄ-ի Երեւանի գրասենեակում տեղի ունեցաւ լրագրող, ռեժիսոր, «ՏԵՖԻ» մրցանակի դափնեկիր Անդրէ Լոշակի վարպետութեան դասը, ով նկարահանել էր «Աւրորա» մրցանակի յաւակնորդների մասին պատմող ֆիլմերը:


«Աւրորա» մրցանակի եւ ֆիլմերի մասին
Ֆիլմերը հերոսներին ներկայացնող հինգ րոպէանոց տեսանիւթեր են:
Իհարկէ, պատմութիւնները վախենալու են, բայց լուսաւոր կողմեր էլ ունեն: «Աւրորա» մրցանակը հէնց այն մարդկանց մասին է, ովքեր սարսափելի, կրիտիկական պայմաններում անհաւանական մարդկային յատկանիշեր են ցուցադրում:
Այն պահին, երբ համաձայնեցի նկարահանել տեսանիւթերը, արդէն մի տարի ղեկավարում էի «Այսպիսի գործեր» առցանց պարբերականը: Այն ստեղծւել է « Օգնութիւն է պէտք» բարեգործական հիմնադրամի հարթակի վրայ: Մենք գրում ենք այն մասին, թէ ինչ վատ է ամէն բան, այն մասին, որ Ռուսաստանի կառավարութիւնը չի աջակցում հիւանդ երեխաներին ու ծերերին, որոնք մահանում են անօգնական վիճակում:
Մի անգամ մի կամաւոր մօտեցաւ ինձ: Կարծում եմ, որ կամաւորները մարդկային մի առանձին տեսակ են, հիանում եմ նրանցով՝ նրանք զոհաբերում են սեփական ազատ ժամանակը յանուն ուրիշների: Եւ նա ասաց ինձ, որ իրեն հարկաւոր է ոգեշնչւել, ինչ-որ տեղից ուժ ստանալ ու խնդրեց, որ ինչ-որ ոգեւորող նիւթ գրեմ: Մտածեցի դրա մասին՝ մեզ ցաւ ու տառապանք է շրջապատում, ու լրագրողը, յայտնւելով վատ լուրերի շրջապտոյտի մէջ, երբեմն մոռանում է, որ մարդիկ ոգեշնչման կարիք ունեն: Հէնց այդ ժամանակ էլ իմ կեանքում յայտնւեց «Աւրորա»-ն:
Այս պատմութիւնները յոյս են տալիս: Հասկանում ես, որ բարին կարող է յաղթել չարին:


Աշխատանքային գործընթացը
Նախապատրաստական աշխատանքների համար քիչ ժամանակ ունէինք՝ ընդամենը երկու ամիս: «Աւրորա»-ի յաւակնորդների մասին կարդացի բոլոր այն նիւթերը, որոնք հասանելի են անգլերէն լեզւով:
Շատ բարդ խնդիր էր մեր առջեւ դրւած, պիտի պատմէինք Հերակլէսի ու Պրոմեթեւսի մակարդակի հերոսութիւններ կատարած մարդկանց մասին: Ու այդ ամէնը՝ ընդամենը հինգ րոպէում: Բայց հնարաւո՞ր է արդեօք հաշւած րոպէների ընթացքում էպոս ներկայացնել: Յետոյ որոշեցինք, որ հէնց հերոսները կը պատմեն իրենց մասին:


Սայիդա Ղուլամ Ֆաթիմա
Նա ակտիւիստ է եղել արդէն ուսանողական տարիներից: Ամէն ինչ զոհաբերեց, որպէսզի փրկի մարդկանց, ովքեր Պակիստանում ստրկութեան մէջ են ապրում: Ֆաթիման յամառ ու պարզ կին է: Ֆաթիմայի մասին դեռ մէկ տարի առաջ որեւէ մէկը չգիտէր, երբ «Humans of New York» բազմամիլիոնանոց բլոգի հեղինակը գրեց նրա մասին: Նրա պատմութիւնը «պայթեցրեց» «ֆէյսբուք»-ը եւ նա սկսեց նւիրատւութիւններ ստանալ, որոնց շնորհիւ, վերջապէս, բնակարան վարձեց իր համար, քանի որ իր տունը տւել էր ստրկութիւնից ազատւածներին:


Մարգարիտ Բարանկիցէ
«Թագուհի Մեգին» մրցանակը ստացաւ: Նա իսկապէս սուրբ մարդ է: Իր աչքի առջեւ սպանել էին իր 72 հարեւաններին, իսկ նա շարունակում էր հաշտութիւն գտնելու ջանքերը: Մրցանակը ստանալու պահին նա արդէն բաւականին յայտնի էր ամբողջ աշխարհում: Նա հիասքանչ կին է, իսկական թագուհի. վարակում է հաւատքի, սիրոյ ու յոյսի էներգիայով: Նրա շուրջը բոլորը սկսում են երգել ու ուրախանալ:


Հայր Բեռնար Կինւի
Երիտասարդ է, 32 տարեկան է: Սքայփի միջոցով ենք կապ հաստատել իր հետ: Սկզբում Բեռնարը թաքցնում ու բուժում էր քրիստոնեաներին, յետոյ՝ մուսուլմաններին:


Բժիշկ Թոմ Կատենա
Թոմ Կատենան իմ սիրելի հերոսն է: Նա իմ կուռքն է դարձել: Երբեք չէի հանդիպել մի մարդու, ով սեփական կամքով եւ հետեւողական կերպով Քրիստոսի ուղին է կրկնում:


Հաւատքի մասին
Միմեանցից տարբերւող այս մարդկանց մի բան է միաւորում՝ նրանք բոլորը հաւատում են: Ֆաթիման հաւատում է սոցիալ յեղափոխութեան ու նոր աշխարհ ստեղծելու հնարաւորութեանը: Բեռնարը, Թոմն ու Մեգին հաւատում են, որ մարդկութիւնը կը փրկւի: Նրանք բոլորն էլ հաւատում են մարդկանց, եւ հէնց այդ հիմնաքար որակն էլ տարբերում է նրանց միւսներից:
Հաւատքը սարեր է շրջում: Հէնց դա ես հասկացայ: Պէտք է հաւատալ բարութեանն ու մարդկանց, ու այդ ժամանակ հրաշքներ են տեղի ունենում:

ԼԵՆԱ ԳԷՈՐԳԵԱՆ
Լուսանկարը՝
ՄԱՐԻԱՄ ԼՈՐԵՑԵԱՆԻ

Յարակից լուրեր

  • Ու՞ր են գնում միլիոնները․«Աւրորա»-ի համահիմնադիրը պատասխանել է քննադատներին
    Ու՞ր են գնում միլիոնները․«Աւրորա»-ի համահիմնադիրը պատասխանել է քննադատներին

    «Աւրորա» մրցանակի համահիմնադիր Վարդան Գրեգորեանը պարզաբանել է՝ ինչու մրցանակային հիմնադրամի միջոցները չեն ներդնում Հայաստանի տնտեսութեան տարբեր սեկտորներում, այլ տրամադրում են առանձին անհատների, որոնք, թէեւ, անկասկած, վաստակ ունեն մարդասիրութեան գաղափարների սփռման գործում, այնուամենայնիւ, հեռու են հայկական իրականութիւնից։ 

  • Յայտնի է «Աւրորա» մրցանակի այս տարւայ յաղթողի անունը
    Յայտնի է «Աւրորա» մրցանակի այս տարւայ յաղթողի անունը

    «Աւրորա» մարդասիրական նախաձեռնութիւնն այս անգամ մեծարանքի է արժանացրել իրաւաբանին՝ Մեանմայում ընդդէմ անարդարութեան եւ յանուն ռոհինջա ժողովրդի իրաւունքների մղած պայքարում դրսեւորած անհատական զոհողութիւնների համար: 

  • Սամանտա Փաւերը միանում է «Աւրորա» մրցանակի Ընտրող յանձնաժողովին
    Սամանտա Փաւերը միանում է «Աւրորա» մրցանակի Ընտրող յանձնաժողովին

    ՄԱԿ-ում ԱՄՆ նախկին դեսպան Սամանտա Փաւերը միացել է «Աւրորա» մրցանակի Ընտրող յանձնաժողովին: Դեսպան Փաւերը Ընտրող յանձնաժողովի միւս անդամների հետ, որոնք հեղինակաւոր հումանիտար գործիչներ են, մարդու իրաւունքների պաշտպաններ եւ պետութիւնների նախկին ղեկավարներ, ընտրելու է 1 միլիոն դոլարի «Աւրորա» ամենամեայ մրցանակի դափնեկիրներին:

  • «Աւրորա» մրցանակի համար կատարւել է 750 առաջադրում. չկրկնւող թեկնածուների թիւն աճել է 100 տոկոսով
    «Աւրորա» մրցանակի համար կատարւել է 750 առաջադրում. չկրկնւող թեկնածուների թիւն աճել է 100 տոկոսով

    2018 թւականի «Աւրորա» մարդասիրական մրցանակի համար կատարւել է 750 առաջադրում, որոնցից 509-ը՝ չկրկնւող թեկնածութիւններ:

    Առաջադրման փուլի ընթացքում (2017 թւականի մայիսի 29-ից սեպտեմբերի 8-ը) յայտեր են ուղարկւել 12 լեզւով՝ 115 երկրից, այդ թւում՝ ԱՄՆ-ից, Ռուսաստանից, Եգիպտոսից, Հայաստանից, Հնդկաստանից, Գերմանիայից, Միացեալ Թագաւորութիւնից, Պակիստանից, Ուկրայինայից եւ Քենիայից: 

  • «Ոսկէ ծիրան 2017»-ի յաղթողները յայտնի են
    «Ոսկէ ծիրան 2017»-ի յաղթողները յայտնի են

    Յուլիսի 15-ին «Ոսկէ ծիրան 2017» երեւանեան միջազգային կինոփառատօնն աւարտւեց, եւ յաղթողների անունները յայտնի են: Փառատօնի գլխաւոր մրցանակին՝ Ոսկէ ծիրանին, միջազգային խաղարկային մրցոյթում արժանացաւ  «Ցանկալի Դուրգան», ռեժիսոր՝ Սանալ Կումար Սասիդհարան (Հնդկաստան):

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։