Հա

Քաղաքական

Շաբաթ, 18 Մարտի 2017 10:00

Աղւան Վարդանեան. «Անցողիկ շեմի մասին թող միւսները մտածեն»

ՀՀ ԱԺ ՀՅԴ խմբակցութեան քարտուղար Աղւան Վանդանեանը «tert.am»-ի հետ հարցազրոյցում վստահութիւն յայտնեց, որ ՀՅԴ-ն առաջիկա ԱԺ ընտրութիւններում յաղթահարելու է անցողիկ շեմը։ Նա ասաց, որ իրենց խնդիրն է՝ յենւել հասարակութեան այն շերտերի վրայ, որոնք քաղաքացի են կամ դառնում են քաղաքացի, մարդիկ, որոնք իսկապէս ունեն երկրի քաղաքացուն բնորոշ յատկութիւններ։

«alikonline.ir» - ՀՀ ԱԺ ՀՅԴ խմբակցութեան քարտուղար Աղւան Վանդանեանը «tert.am»-ի հետ հարցազրոյցում վստահութիւն յայտնեց, որ ՀՅԴ-ն առաջիկա ԱԺ ընտրութիւններում յաղթահարելու է անցողիկ շեմը։ Նա ասաց, որ իրենց խնդիրն է՝ յենւել հասարակութեան այն շերտերի վրայ, որոնք քաղաքացի են կամ դառնում են քաղաքացի, մարդիկ, որոնք իսկապէս ունեն երկրի քաղաքացուն բնորոշ յատկութիւններ։

 

- Պարո՛ն Վարդանեան, «tert.am»-ի հետ զրոյցում հոգեբանն անդրադարձել էր այս ընտրութիւնների «թշւառութեանը»՝ ասելով, որ եթէ նախկինում գառ էին մորթում, ապա այսօր ծնկի են իջնում քաղաքական ուժի առաջնորդի առջեւ: Դրա վերաբերեալ ի՞նչ կարծիք ունէք:

- Գիտէք, հասարակութիւնը շատ տարբեր է, մեր հասարակութիւնը շատ բազմաշերտ է, եւ ամէն տեսակ էլ կայ: Ես վստահ եմ, որ այդ կարգի մեթոդները մեր հասարակութեան շատ փոքր մասի համար է գործում: Ես նաեւ վստահ եմ, որ մեր հասարակութեան հիմնական մասը՝ հայ մարդը, աշխատող, քրտինքով, արժէքներ ունեցող, մշակոյթ ունեցող է: Մենք մեր մեծերի ստեղծած ժողովուրդն ենք՝ սկսած այբուբենի ստեղծումից կամ աւելի առաջ: Բայց, ցաւօք, սոցիալական պայմանները, քաղաքական ուժերի վարքագիծը յաճախ մեր ժողովրդին դարձնում են տեսակ, որին կարելի է խաբել, կարելի է համոզել, որին կարելի է կաշառել, որին կարելի է խոստանալ, բայց յետոյ խոստումը չանել, ձայնն առնել, յետոյ մոռանալ նրան ամբողջապէս:

Մեր խնդիրը ո՞րն է՝ յենւել հասարակութեան այն շերտերի վրայ, որոնք քաղաքացի են կամ դառնում են քաղաքացի՝ անկախ իրենց ցանկութիւնից, որոնք ունեն իսկապէս երկրի քաղաքացուն բնորոշ յատկութիւններ, մտահոգ են, ուզում են ինչ-որ բան փոխել, ուզում են մասնակցել, մի կողմ չեն քաշւում, չեն գնում ոչ մեզ համապատասխան արժէքների հետեւից: Այդ մարդկանց թիւը մեծ է, ուղղակի պէտք է այդ մարդկանց ճանապարհ տալ, յատկապէս երիտասարդութեան շրջանում: Մենք փայլուն երիտասարդուիւն ունենք, որոնց պարզապէս պէտք է ճանապարհ տանք: Ես վստահ եմ, որ վաղ թէ ուշ հայ ժողովրդի բացարձակ մեծամասնութիւնն ապրելու է այս արժէքներով, ոչ թէ այլ արժէքներով:

 

- Մէկ այլ ծայրայեղութիւն էլ կայ, որը նկատել էր, եւ այդ մասին գրել էր նկարիչ Սամուէլ Սեւադան: Ըստ նրա՝ քաղաքական ուժերը, ոչ միտումնաւոր, բայց երբեմն չափն անցնում են՝ ժողովրդի վիճակը նկարագրելու նպատակով ժողովրդին անւանում են թշւառ, անպատիւ, անատամ, բոմժ եւ այլն:

- Ես չգիտեմ, թէ յատկապէս որ քաղաքական ուժերն են այդպէս արտայայտւում, բայց եթէ կան այդպիսի քաղաքական ուժեր, եթէ կան այդպիսի՝ իրենց քաղաքական գործիչներ համարողներ, ապա անպատիւն ու բոմժն իրենք են:

Ես ասում եմ՝ մենք մշակոյթ, պատմութիւն ունեցող ժողովուրդ ենք: Ուղղակի մենք ենք մեղաւոր, որ մեր ժողովրդի մի մասն այսօր այս վիճակում է եւ գնում է այլ բաների հետեւից: Յայտնի իմաստուն խօսք է, որը ես միշտ ասում եմ՝ ցանկացած ժողովրդի հինգ տոկոսը տականքներ են, սրիկաներ են, մեծ-մեծ խոսողներ են, եւս հինգ տոկոսը՝ ազնւագոյն արժէքներ ունեցող, իրենց գենը կրող, նւիրեալ, ծառայող քաղաքացիներ են, եւ կախւած նրանից, թէ որ տեսակն է իշխում երկրի մէջ՝ առաջի՞ն, թէ երկրորդ, միւս իննսուն տոկոսը սկսում է նմանւել նրան:

Սա է մեր խնդիրը: Եթէ մենք իսկապէս ունենք նւիրեալներ, որոնց նպատակը ծառայելն է, մեր ժողովրդի իննսուն տոկոսը կը նմանւի նրան:

 

- Ինչո՞վ է պայմանաւորւած, որ Հայ Յեղափոխական Դաշնակցութիւնն այս խորհրդարանական ընտրութիւններին շատ սուր քննադատութիւններով հանդէս չի գալիս: Միայն ընտրակաշառք բաժանելու մասին են քննադատութիւնները:

- Ընտրակաշառքների մասին շատ սուր քննադատութիւն արել ենք, անում ենք եւ շարունակելու ենք անել: Մենք երկու բան չենք կարողանում տանել՝ ամբոխավարութիւնը, որեւէ հիմք չունեցող պոպուլիզմը, երբ խոստումներ են տալիս, բաներ, որոնք բացարձակապէս անիրականանալի են: Դա ինձ համար անընդունելի եւ դատապարտելի է։

Միւս կողմից էլ նայէք․ որեւէ այլ քաղաքական ուժ չի համարձակւի Դաշնակցութեան հասցէին նման արտայայտութիւններ անել, որովհետեւ իրենք գիտեն ե՛ւ Դաշնակցութեան ուժը, ե՛ւ դերը: Նրանք չեն համարձակւի Դաշնակցութեան հասցէին նման բան ասել:

Մենք, ասել եմ, թշնամիներ չունենք այս երկրում: Բայց քաղաքական ուժերի մէջ հասարակութիւնը պէտք է ընտրութիւն կատարի: Ինքը պէտք է համեմատի եւ տեսնի, թէ որն է իրական կուսակցութիւնը, որը ինչ է արել եւ ինչ է անում: Մենք գործ ենք անում:

 

- Դու՞ք էլ չէք ցանկանում որեւէ մէկին քննադատել:

- Ի՞նչ ունեմ ես քննադատելու: Կայ, օրինակ, Լեռնային Ղարաբաղի հետ կապւած դիրքորոշում, եւ եթէ ուշադիր նայել էք, բոլոր միւս կուսակցութիւնները, բացի մէկ դաշինքից, ասում են այն, ինչ Դաշնակցութիւնը տարիներ շարունակ ասել է: Այսօր քաղաքական օրակարգում չկայ մի հարց թէ՛ իշխանութեան, թէ՛ ընդդիմութեան մէջ, որ Դաշնակցութեան բարձրացրած հարցերը չեն:

Երէկ (մարտի 16-«alikonline.ir») ես լսում եմ այլ կուսակցութեան թեկնածուներից մէկին, որը բառ առ բառ կրկնում էր Արցախի հարցով Դաշնակցութեան տեսակէտները: Բոլոր հարցերի վերաբերեալ մենք մեր տեսակէտները չենք փոխել: Դաշնակցութիւնը փոփոխւում է, նորանում է, աւելի ժամանակակից է դառնում, երիտասարդութիւն է գալիս, բայց իր տեսակէտները չի փոխում:

 

- Կարծիքի ուսումնասիրման համառուսաստանեան կենտրոնը...

- Ես պատւիրւած սոցիոլոգիական հարցումներին բացարձակապէս չեմ հաւատում: Ես գիտեմ պատւիրատուներին, գիտեմ պատւիրատուների տւած թւերի նպատակը: Ես ունեմ իմ համոզումները, մեր սոցիոլոգիական հարցումները, որտեղ Դաշնակցութեան ցուցանիշներն աւելի բարձր են:

 

- Անցողիկ շեմի՞ց են բարձր:

- Անցողիկ շեմի մասին թող միւսները մտածեն, որոնք ասում են, որ եթէ 51 տոկոս չեղանք, մեզ պէտք չէ, մենք չգիտենք՝ ինչ կանենք... 70 տոկոսը շեմը կը յաղթահարենք: Այն միւսն ասում է՝ մեզ տւէք 51 տոկոս, որ մենք այս անենք, այն անենք... Իրենց ասածները մենք անում ենք, մենք այսօր իշխանութեան մէջ ենք եւ անում ենք այն, ինչը որ ուրիշները խոստանում են անել եւ անում ենք աւելին, քան իրենք:

Յարակից Հրապարակումներ

Ամենաշատ ընթերցւած

Քւէարկութիւն

Տնտեսական առումով ինչպիսի՞ն կը լինի իրանական 1396 տարին:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։