Հա

Քաղաքական

Շաբաթ, 01 Ապրիլի 2017 09:23

ՀՅԴ Բիւրոյի քաղաքական ներկայացուցիչը ամփոփեց ՀՅԴ նախընտրական քարոզարշաւը

Կայ քաղաքական ուժ, որ հենց Ադրբեջանի քարոզիչն է դարձել, որովհետեւ այն, ինչ ասում են նրանք, դուք ուղիղ կը լսէք նաեւ պաշտօնական Բաքւի շուրթերից

«alikonline.ir»- Մարտի 31-ին ՀՅԴ Բիւրոյի քաղաքական ներկայացուցիչ Արմէն Ռուստամեանը լրագրողների հետ հանդիպման ժամանակ ամփոփեց նախընտրական քարոզարշաւը: Նրա խօսքով՝ Դաշնակցութիւնն այն քաղաքական ուժն է, որը որեւէ վարչական լծակ չի օգտագործել ընտրութիւնների արդիւնքների վրայ ազդելու համար: Տեղեկացնում է ՀՅԴ Բիւրոյի պաշտօնական կայքը:

«Մենք զերծ ենք մնացել գայթակղութիւնից` օգտագործել որեւէ լծակ: Ժողովրդավարական ընտրութիւններ ունենալու համար լուրջ հիմքեր ենք ստեղծել, չնայած նրան, որ վարկանիշային թեկնածուների մեծ թիւը եւ, առհասարակ, վարկանիշային ընտրակարգը մեր սրտով չէր: Սա կոմպրոմիսի արդիւնք էր, բայց ասում ենք, որ բարձր մակարդակի ընտրութիւններ անցկացնելու տարբերակը մի քիչ նսեմացւել է այս ընտրակարգով»,- ասաց Ռուստամեանը՝ յաւելելով, որ իրենք խնդիր են դրել ժողովրդին բացատրել, որ չի կարելի գերդաստանային կապերի միջոցով գնալ ընտրութիւնների:

Հարցին՝ առաջիկայ խորհրդարանում ՀՅԴ-ն պայքարելո՞ւ է ռէյտինգային ընտրակարգի դէմ, եւ քննարկումներ լինելո՞ւ են այս առնչութեամբ ՀՀԿ-ի հետ, նա պատասխանեց, որ այդ ընտրակարգին դէմ են նաեւ այլ քաղաքական ուժեր: «Մենք հէնց սկզբից ենք ունեցել քննարկումներ ՀՀԿ-ի հետ: Մեր գործընկերները տեղեակ են, որ մենք սրան դէմ ենք, հէնց յարմար առիթ եղաւ, մենք այս խնդիրը կրկին բարձրացնելու ենք: Բոլոր քաղաքական ուժերն էլ դէմ են խօսել ռէյտինգային ընտրակարգին»,- նշեց Ռուստամեանը:

Նրա խօսքով՝ ստեղծւած է մի իրավիճակ, որ իշխանութեան վերարտադրութիւն չլինի: «Իշխանութիւնների վերարտադրութեան համար երկու հիմք կար` մեծամասնական ընտրակարգը, բացակաների, ուրիշների փոխարէն քւէարկութիւնները, որոնք լցոնումների, կարուսելների հնարաւորութիւն էին տալիս, եւ սա բերում էր նրան, որ լինում էին ուռճացւած թւեր: Այս ընտրութիւններին մասնակցութիւնը լինելու է շատ աւելի քիչ, որովհետեւ ուրիշների փոխարէն քւէարկութիւն չի լինելու: Մենք այդ երկու ռեսուրսներից զրկել ենք իշխանութիւններին»,- ասաց Ռուստամեանը:

ՀՅԴ Բիւրոյի քաղաքական ներկայացուցիչ Արմէն Ռուստամեանի խօսքով՝ քաղբանտարկեալ լինելու համար պէտք է հինգ չափորոշիչի համապատասխանել: Այսօր պատասխանելով լրագրողների հարցին՝ ՕՐՕ դաշինքի համակիր Սամուէլ Բաբայեանի ձերբակալութեան հիմքում շատերը տեսնում են քաղաքական դրդապատճառ, Դաշնակցութիւնն ինչպէ՞ս է գնահատում նախընտրական շրջանում նման ձերբակալութիւններն ու իրադարձութիւնները, յատկապես, որ ՀՅԴ-ն ոչ վաղ անցեալում ունեցել է ձերբակալութիւնների փորձ, նա ասաց. «Մեզ մօտ շատ աւելի տխուր փորձ է եղել, կուսակցութիւն է փակւել: Եթէ ինչ-որ անձ յանցագործութիւն է կատարում եւ եթէ կատարել է նախընտրական փուլում, ուրեմն այդ յանցագործութեան դէմ որեւէ քայլ չպէ՞տք է կատարւի, նա չպէ՞տք է պատժւի: Մերը յստակ քաղաքական էր, որովհետեւ փակւեց կուսակցութիւնը: Եթէ յանցագործութիւն է կատարւում, ժամանակահատւածը կապ չունի, պէտք է պատժւի, ով էլ լինի»:

Ռուստամեանի խօսքով՝ Սամուէլ Բաբայեանին իրենք ճանաչել են լաւագոյն յատկանիշներով՝ ազատագրական պայքարի ժամանակ:

«Ցաւում եմ, որ նրա անունն այս պատմութեան մէջ կայ, բայց քանի օրէնքով ուժի մէջ մտած դատավճիռ չկայ, մենք պարտաւոր ենք առաջնորդւել անմեղութեան կանխավարկածով: Բայց ես չեմ բացառում… Ասում են, որ ծուխն առանց կրակի չի լինում, ինչ-որ մի բան կայ, բայց ի՞նչ կայ, ես տեղեակ չեմ, քննութիւն է ընթանում, եւ քանի քննութեան տւեալները չկան, դրանց մասին խօսելն անլուրջ է»,- նշեց նա` յաւելելով. «Իհարկէ, մարդիկ կարող են սա օգտագործել, նախընտրական փուլում շատերն անկապ բաներ են անում, հիմա չեն հրաժարւի դա անելու գայթակղութիւնից, բայց քաղբանտարկեալ անւանել կամ նման յայտարութիւններ անել, կարծում եմ, շատ վաղաժամ է. քաղբանտարկեալ լինելու համար հինգ չափանիշ է պէտք»:

Արմէն Ռուստամեանը լրագրողների հետ հանդիպման ժամանակ անդրադարձաւ առաջին նախագահ Լեւոն Տէր-Պետրոսեանի առաջ քաշած՝ Ղարաբաղյան խնդրի կարգաւորմանն առնչւող թեզերին: «Այս ամէնի մէջ, որպէս դրական կողմ, տեսնում եմ այն, որ մենք ամբողջ աշխարհին ներկայանում ենք որպէս քաղաքակիրթ ժողովուրդ, հանդուրժող հասարակութիւն ունեցող պետութիւն, որտեղ կարող են ազատ քննարկումներ իրականացւել, ինչպիսին իրականացնում է ՀԱԿ-ը»,- ասաց նա` յաւելելով, որ տպաւորութիւն է՝ վերոնշեալ քաղաքական ուժն իրականացնում է Ադրբեջանի քարոզչութիւնը:

«Կայ քաղաքական ուժ, որ հենց Ադրբեջանի քարոզիչն է դարձել, որովհետեւ այն, ինչ ասում են նրանք, դուք ուղիղ կը լսէք նաեւ պաշտօնական Բաքւի շուրթերից»,- նշեց Ռուստամեանը:

Նա համոզւած է, որ այդ առաջարկը կործանանար է ՝ նկատի ունենալով այն հարեւանի գործօնը, ում հետ, ըստ այդ ծրագրի, պէտք է այդ խաղաղութիւնն ունենանք: «Այդ հարեւանն ուզում է քո՝ օր առաջ ոչնչացումը, դրանով է դաստիարակում իր ամբողջ սերնդին, որեւէ զիջում այդ հարեւանը չի պատրաստւում կատարել: Այդ որ ասում են` փոխզիջում, իրականում նման բան չկայ: Ադրբեջանի ամենաբարձր զիջումն այն է, որ Ղարաբաղին տան ինքնավարութիւն Ադրբեջանի կազմում: Դա ծիծաղելի է պարզապէս: Էլ չեմ ասում, որ այդ ծրագիրն առաջարկելուց առաջ պէտք էր յարգել սեփական ժողովրդի կարծիքը եւ հաշւի նստել ժողովրդի կարծիքի հետ, իսկ այդ կարծիքի հետ Տէր-Պետրոսեանը երբեք հաշւի չի նստել»,- ընդգծեց ՀՅԴ-ական գործիչը:

Նրա բնորոշմամբ՝ Լեւոն Տէր-Պետրոսեանն իր կեանքի նպատակն է դարձրել մեզ պարտադրել բոլորովին այլ հայեցակարգ, որը չի համատեղւում Ղարաբաղի ժողովրդի պատկերացումների հետ:

Դիտարկմանը, թէ Լեւոն Տէր-Պետրոսեանն ասում է, որ ինքն առաջարկում է այն ծրագիրը, որի շուրջ Հայաստանի իշխանութիւններն են բանակցում, Ռուստամեանն արձագանգեց. «Նախ` հարց է առաջանում` եթէ Սերժ Սարգսեանը դա անում է, Լեւոն Տէր-Պետրոսեանի մէջտեղ գալու իմաստը ո՞րն է: Հիմա դու եկել ես հրապարակ, ի՞նչ ես անում, համ էլ ասում ես ՝ ես ընդդիմութի՞ւն եմ: Յետոյ էլ ասում է՝ միայն այդ մասով է պաշտպանում Սարգսեանին, բայց միւս խօսքն էլ այն է լինում, որ այն բոլոր պրոբլեմները, որ այսօր Հայաստանում կան՝ արտագաղթ եւ այլ չլուծւած խնդիրներ, Ղարաբաղի չլուծւած խնդրի պատճառով են: Սա նշանակում է, որ նա արդարացնում է գոյութիւն ունեցող խնդիրները»:

Ռուստամեանը նշեց նաեւ, որ մադրիդյան սկզբունքները ներառում են կարեւոր տարրեր, որոնց մասին Լեւոն Տէր-Պետրոսեանը չի ցանկանում խօսել: «Այդտեղ կարգավիճակի լուծման ձեւ կայ, նրա ժամանակ այդ լուծումը չկար, կար փուլային տարբերակ` որ ամէն ինչ յանձնենք, նոր յետոյ անդրադառնանք կարգավիճակի հարցին: «Տարածքներ կարգավիճակի դիմաց» սկզբունքը ենթադրում է կարգավիճակի ստացում, յետոյ նոր տարածքների յանձնում, իսկ նրանք հակառակն են ասում: Թող դրա մասին խօսեն, ուրիշներին մեղադրելը հեշտ է: Լեւոն Տէր-Պետրոսեանը թող պատասխանի հարցին՝ ո՞նց եղաւ, որ իր շրջապատը հանդուրժում էր իրեն, բայց երբ փաստաթուղթ բերւեց, եւ Անվտանգութեան խորհուրդը հասկացաւ, որ այս փաստաթղթի ստորագրումն ինչ վտանգներ է պարունակում, որ դա ձեռնտու է Ադրբեջանին, այլ պահւածք որդեգրեց: Ադրբեջանը մադրիդեան սկզբունքներին դէմ է, սա շատ կարեւոր է»,- ասաց նա:

Արձագանգելով դիտարկմանը` եթէ այս փաստաթուղթը չստորագրւի, մեզ առաջարկւելու է աւելի վատ պայմաններով փաստաթուղթ, Ռուստամեանն ասաց. «Պատերազմի մէջ գտնւող երկրում այսպիսի՝ ուժերը ջլատող քարոզչութիւն իրականացնել ինչպէ՞ս կարելի է: Նա ասում է այն, ինչ ասում է Արբեջանը»:

Նրա խօսքով՝ Եւրոխորհրդի իր գործընկերների բերանից նոյն բանն է լսում, բայց չէր ցանկանայ նոյն շարքում տեսնել նաեւ Լեւոն Տէր-Պետրոսեանին: «Նրանց ես նոյն պատասխանն եմ տալիս` բայղուշութիւն մի՛ արէք մեր ժողովրդի գլխին»,- եզրափակեց Արմէն Ռուստամեանը:

 

Յարակից Հրապարակումներ

  • Դաշնակցութեան կառուցողական մօտեցումը կոալիցիոն կառավարման
    Դաշնակցութեան կառուցողական մօտեցումը կոալիցիոն կառավարման

    Կոալիցիոն կառավարման նկատմամբ Դաշնակցութեան կառուցողական մօտեցումը էականօրէն կը բխի մեր ժողովուրդին ու հայրենիքին ճիշդ կերպով եւ լաւօրէն ծառայելու յանձնարարութենէն։ Այդ իսկ պատճառով Դաշնակցութիւնը միշտ նախանձախնդիր եղած է, որպէսզի կոալիցիաներու հիմքը կազմեն քաղաքական եւ գաղափարական սկզբունքները, ոչ թէ պաշտօններու շուրջ առեւտուրը։

  • Ա. Ռուստամեան. «ՀՅԴ-ական նախարարների փոփոխութիւն չի լինի»
    Ա. Ռուստամեան. «ՀՅԴ-ական նախարարների փոփոխութիւն չի լինի»

    Ինչ վերաբերում է պորտֆելներին, Ա. Ռուստամեանն ասաց, որ այս պահին պահպանում են այն, ինչ որ կայ, փոփոխութիւն այս առումով նախատեսւած չէ. «Բայց այդ հնարաւորութիւնը պահպանւում է, հետագայում աշխատանքային կարգով ըստ անհրաժեշտութեան, ըստ կադրերի նշանակման նպատակայարմարութեան, այս խնդիրները կարող են իրենց լուծումները ստանալ: Ակնյայտ է, որ նախարարների փոփոխութիւն չի լինի, որովհետեւ արդէն հրաժարւել են պատգամաւորութեան մանդատներից»:

  • Ստորագրւեց ՀՀԿ-ՀՅԴ կոալիցիոն յուշագիրը
    Ստորագրւեց ՀՀԿ-ՀՅԴ կոալիցիոն յուշագիրը

    Քաղաքական վերոնշեալ երկու ուժերը կոալիցիոն յուշագրով քաղաքական պատասխանատւութիւն են ստանձնել կառավարութեան ողջ գործունէութեան համար: Ստորագրւած փաստաթղթում ամրագրւած են քաղաքական կոալիցիայի շրջանակներում համագործակցութեան ռազմավարական նպատակները, կոալիցիայի առաջնահերթութիւնները, գործունէութեան եւ կազմակերպման կարգը:

    Հայաստանի Հանրապետական կուսակցութեան կողմից փաստաթուղթը ստորագրել է ՀՀԿ նախագահի տեղակալ Արմէն Աշոտեանը, Հայ Յեղափոխական Դաշնակցութիւն կուսակցութեան կողմից՝ ՀՅԴ Հայաստանի Գերագոյն մարմնի ներկայացուցիչ Աղւան Վարդանեանը:

  • Գագիկ Մինասեան. «ՀՀԿ-ՀՅԴ նոր կոալիցիոն յուշագիրը նախորդի կրկնութիւնը չի լինելու»
    Գագիկ Մինասեան. «ՀՀԿ-ՀՅԴ նոր կոալիցիոն յուշագիրը նախորդի կրկնութիւնը չի լինելու»

    ՀՀԿ-ի եւ ՀՅԴ-ի միջեւ ստորագրւելիք նոր կոալիցիոն յուշագիրը նախորդի կրկնութիւնը չի լինելու, բայց որեւէ մանրամասներ ներկայացնելը կոռեկտ չի լինի: «tert.am»-ի հետ զրոյցում այս մասին ասաց ՀՀԿ Գործադիր մարմնի անդամ Գագիկ Մինասեանը:

  • Արմէն Ռուստամեան. «Թող միւս նախարարներն էլ այնքան խիզախութիւն ունենային, որ առաջադրւէին, տեսնէին, թէ ինչ է մտածում իրենց մասին ժողովուրդը»
    Արմէն Ռուստամեան. «Թող միւս նախարարներն էլ այնքան խիզախութիւն ունենային, որ առաջադրւէին, տեսնէին, թէ ինչ է մտածում իրենց մասին ժողովուրդը»

    «Հիմա վաղը, միւս օրը, եթէ Դաշնակցութիւնն իր կադրային բազայի վրայ պէտք է յենւի՝ ինչ-որ գործեր անելու համար, մենք առաջին հերթին պէտք է առաջնորդւենք այն կադրերով, որ առաջին հերթին ռէյտինգային քւէարկութիւնների միջոցով արտայայտել են իրենց ազդեցութիւնը տարածքներում։ Եւ իրենց ձայներն իսկապէս «մաքուր» ձայներ են, ազնւօրէն ձեռք բերւած ձայներ են։ Դա իրական ռէյտինգ է: Օրինակ՝ Արծւիկ Մինասեանն էլ ռէյտինգայինով առաջադրւեց, ճիշտ է, առաջինը չէր, երկրորդն էր ընտրատարածքում, բայց փորձեց: Թող միւս նախարարներն էլ այնքան խիզախութիւն ունենային, որ առաջադրւէին, տեսնէին ժողովուրդն իրենց մասին ինչեր է մտածում»,- ասել է Արմէն Ռուստամեանը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։