Հա

Քաղաքական

Երեքշաբթի, 18 Ապրիլի 2017 09:50

Իրանը զգուշացրել է Ադրբեջանին

Իրանի շահագրգռութիւնն այստեղ յստակ է: Թեհրանի համար անընդունելի է տարածաշրջանում երրորդ երկրների ռազմական ներկայութիւնը: Ուղիղ իմաստով խօսքը վերաբերում է արցախեան հակամարտութեան գօտում խաղաղապահների առկայութեանը, որոնք փաստօրէն կանգնելու են Իրանի հիւսիսային սահմանին: 

ՅԱԿՈԲ ԲԱԴԱԼԵԱՆ

 

Յուսով եմ Հայաստանն ու Ադրբեջանը ղարաբաղեան խնդրի խաղաղ կարգաւորման հարցում վճռական կը լինեն եւ երրորդ ուժերի միջամտութիւն ու ճգնաժամի խորացում թոյլ չեն տայ, ապրիլի 16-ին Թեհրանում ընդունելով Ադրբեջանի պաշտպանութեան նախարար Հասանովին՝ յայտարարել է Իրանի պաշտպանութեան նախարար Հոսէյն Դեհղանը:

Հասանովը Թեհրան էր ժամանել բաւական մեծ պատւիրակութեամբ, եւ քննարկումների շարքում ներառւած էր նաեւ Արցախի հակամարտութռան թեման:

Պարզ չէ, թէ Ադրբեջանի պաշտպանութեան նախարարն այդ թեմայով ինչ ակնկալիք է ունեցել Թեհրանից, սակայն Իրանի պաշտպանութեան նախարարի յայտարարութիւնը գրեթէ բաց տեքստով յորդոր է Ադրբեջանին՝ ձեռնպահ մնալ իրավիճակի ռազմական լարումից: Բանն այն է, որ իրավիճակի ռազմական լարման դէպքում «երրորդ երկրների» միջամտութիւնը դառնալու է անխուսափելի: Իրանի պաշտպանութեան նախարարը յոյս է յայտնում, որ Ադրբեջանն ու Հայաստանը վճռական կը լինեն եւ թույլ չեն տայ այդպիսի զարգացում:

Խօսքն իհարկէ առաջին հերթին վերաբերում է Բաքւին, քանի որ պատերազմը Բաքւի հռետորաբանութեան անբաժանելի տարրն է: Իրանի պաշտպանութեան նախարարը փաստացի յայտնում է, որ Իրանի համար անընդունելի է պատերազմի նոր բռնկումը, ինչպէս ապրիլին:

Մի քանի շաբաթ առաջ Իրանի նախագահ Հասան Ռոհանին յայտարարել էր, որ ապրիլին հիւսիսային սահմանին բռնկւած անհանգստութեան համար Իրանը պատւիրակութիւններ է գործուղել Երեւան եւ Բաքու՝ իրավիճակը հանդարտեցնելու համար:

Ռոհանին փաստօրէն բացայայտել էր ապրիլեան պատերազմի մինչ այդ կարծես թէ անյայտ մի դրւագ: Այսինքն, պնդումները, թէ հրադադարը հաստատւել է Ռուսաստանի ջանքով, այդքան էլ միարժէք չեն:

Իրանի շահագրգռութիւնն այստեղ յստակ է: Թեհրանի համար անընդունելի է տարածաշրջանում երրորդ երկրների ռազմական ներկայութիւնը: Ուղիղ իմաստով խօսքը վերաբերում է արցախեան հակամարտութեան գօտում խաղաղապահների առկայութեանը, որոնք փաստօրէն կանգնելու են Իրանի հիւսիսային սահմանին:

Միեւնոյն ժամանակ, Թեհրանն անկասկած գիտակցում է, որ խօսքը լինելու է պարզապէս Ռուսաստանի ռազմական ներկայութեան մասին:

Հէնց դրա շուրջ էր կառուցւած մի քանի տարի շարունակ ծաւալւած կազանեան պլանը եւ դրան կարող էր հանգեցնել նաեւ ապրիլեան պատերազմը: Ահա թէ ինչու Իրանն անմիջական պատւիրակութեան մակարդակով սկսել է աշխատել կողմերի հետ, իրավիճակը կայունացնելու համար: Երկարատեւ ռազմական գործողողութիւնը կաւարտւի ոչ թէ Հայաստանի կամ Ադրբեջանի, այլ երկուսի ռազմական պարտութեամբ եւ Ռուսաստանի յաղթանակով, որը կը գայ թէ՛ Հայաստանի, թէ՛ Ադրբեջանի համար արիւնալի պատերազմը կանխելու եւ իր «խաղաղապահ ներկայութիւնը» հաստատելու:

Ապրիլի 16-ին Իրանի պաշտպանութեան նախարար Հուսէյն Դեհղանը փաստօրէն Ադրբեջանի պաշտպանութեան նախարարին զգուշացնում է այդօրինակ արկածախնդրութեան կրկնութիւն թոյլ չտալու մասին:

«lragir.am»

Յարակից Հրապարակումներ

Ամենաշատ ընթերցւած

Քւէարկութիւն

Արժանի՞ էր արդեօք Ռոնալդուն տարւայ լաւագոյն ֆուտբոլիստի կոչմանը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։