Հա

Քաղաքական

Չորեքշաբթի, 20 Սեպտեմբերի 2017 12:20

Սերժ Սարգսեան. «Մենք 2018 թւականի գարուն ենք մտնելու առանց հայ-թուրքական սին արձանագրութիւնների»

Սեպտեմբերի 19-ին ՄԱԿ-ի Գլխաւոր ասամբլեայի 72-րդ նստաշրջանում հնչեցրած իր ելոյթի ժամանակ ՀՀ նախագահ Սերժ Սարգսեանը յատուկ անդրադարձ է արել նաեւ հայ-թուրքական արձանագրութիւններին:

«alikonline.ir» - Սեպտեմբերի 19-ին ՄԱԿ-ի Գլխաւոր ասամբլեայի 72-րդ նստաշրջանում հնչեցրած իր ելոյթի ժամանակ ՀՀ նախագահ Սերժ Սարգսեանը յատուկ անդրադարձ է արել նաեւ հայ-թուրքական արձանագրութիւններին: ՀՀ նախագահի ելոյթի այդ հատւածը՝ ստորեւ.

Յարգելի՛ պարոն նախագահ,

Վերջին անգամ այս նոյն բարձր ամբիոնից խօսելիս՝ անդրադարձայ Հայոց Ցեղասպանութեան միջազգային ճանաչման գործընթացին եւ պարտքս համարեցի մէկ առ մէկ երախտագիտութիւն յայտնել բոլոր այն երկրներին, որոնք ճանաչել էին իմ ժողովրդի դէմ Օսմանեան կայսրութիւնում կատարւած այդ հրեշաւոր ոճիրը:

Պատւոյ ու Պատասխանատւութեան այս բարձր ամբիոնից պարտքս եմ համարում երախտագիտութիւն յայտնելու այն երկրներին, որոնք ճանաչեցին կամ վերահաստատեցին իրենց դիրքորոշումը Հայոց Ցեղասպանութեան վերաբերեալ:

Շնորհակալութիւն` անկախ այդ ճանաչման ձեւաչափից եւ օգտագործւած ձեւակերպումներից:

Շնորհակալութիւն շատ ու շատ երկրների բոլոր այն գործիչներին, պետական մարմիններին, տարածքային միաւորներին կամ կազմակերպութիւններին, որոնք ի լուր աշխարհի իրենց անունով են իրերը կոչում: Դա իսկապէս կարեւոր է, քանի որ ուրացումը ճանապարհ է հարթում ցեղասպանութեան նոր ոճիրների համար:

Այս կապակցութեամբ պէտք է յիշենք, որ յաջորդ տարի Միաւորւած ազգերի ընտանիքը նշելու է Ցեղասպանութեան յանցագործութիւնը կանխարգելելու եւ պատժելու մասին կոնւենցիայի 70-ամեակը: Հայաստանն այդ առիթով հանդէս է գալու նոր նախաձեռնութեամբ, եւ մենք բոլորին հրաւիրում ենք մեզ միանալ եւ պաշտպանել այդ նախաձեռնութիւնը:

Այսուհանդերձ, մենք Հայոց Ցեղասպանութեան ճանաչումը երբեք նախապայման չենք դարձրել Հայաստանի եւ Թուրքիայի երկկողմ յարաբերութիւնները կանոնակարգելու համար: Աւելին, հէնց Հայաստանի նախաձեռնած գործընթացի շնորհիւ 2009 թւականի հոկտեմբերին կնքւեցին Ցյուրիխեան արձանագրութիւնները:

Այդ փաստաթղթերն առ այսօր չեն վաւերացւել եւ հանգրւանել են պաշտօնական Անկարայի մութ գզրոցներում: Թուրքիայի կառավարութիւնը անհեթեթ նախապայմաններ է առաջ քաշում դրանք վաւերացնելու համար, որոնք բնաւ չեն բխում արձանագրութիւնների տառից եւ ոգուց: Այդ ամէնի հանդէպ հայ ժողովրդի յստակ վերաբերմունքը ես արտայայտեցի երեք տարի առաջ՝ այս բարձր ամբիոնից:

Այժմ եկել է լրացուցիչ պարզաբանում տալու ժամանակը: Թուրքիայի ղեկավարութիւնը սխալւում է, եթէ մտածում է, որ ինքը կարող է առյաւէտ պատանդ վերցնել այդ փաստաթղթերը եւ վաւերացնել միայն իրեն յարմար առիթով: Արձանագրութիւնները բանակցւել են ներկայիս պայմաններում՝ առկայ խնդիրներին լուծում գտնելու համար:

Դրանց կենսագործման ուղղութեամբ շարունակաբար որեւէ դրական տեղաշարժի բացակայութեան պայմաններում Հայաստանը այդ երկու արձանագրութիւնները յայտարարելու է առ ոչինչ: Մենք 2018 թւականի գարուն ենք մտնելու առանց այդ, ինչպէս, ցաւօք սրտի, փորձը ցոյց տւեց, սին արձանագրութիւնների:

Հայաստանը, այնուամենայնիւ, շարունակում է համոզւած լինել, որ իւրաքանչիւր երկու հարեւան պետութիւններ պարտաւոր են հիմնել եւ վայելել կանոնաւոր յարաբերութիւններ՝ իրենց միջեւ հնարաւոր բոլոր տարաձայնութիւնները քննարկելու եւ դրանց լուծումները գտնելու նպատակով:

Յարակից Հրապարակումներ

Ամենաշատ ընթերցւած

Քւէարկութիւն

Ինչպէ՞ս էք վերաբերւում Երուսաղէմը որպէս Իսրայէլի մայրաքաղաք ճանաչելու Թրամփի որոշմանը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։