Print this page
25/07/2018 - 08:40

Արամ Ա Վեհափառ Հայրապետ. «Հ.Մ.Ը.Մ.-ն արժանի է իւրաքանչիւր հայի եւ ամբողջ հայութեան բարձր գնահատանքին ու խոր յարգանքին»

Հայ Մարմնակրթական Ընդհանուր միութեան 100-ամեակին նւիրւած միջոցառումները եւ Համա-Հ.Մ.Ը.Մ.-ական 11-րդ բանակումը Հայաստանում դեռեւս ընթանում են:

«alikonline.ir» - Հայ Մարմնակրթական Ընդհանուր միութեան 100-ամեակին նւիրւած միջոցառումները եւ Համա-Հ.Մ.Ը.Մ.-ական 11-րդ բանակումը Հայաստանում դեռեւս ընթանում են:

Մեծի Տանն Կիլկիոյ կաթողիկոսութեան միաբաններից գերշ. Տ. Նարեկ արք. Ալեէմէզեանն ու հոգշ. Տ. Պետրոս վրդ. Մանուէլեանը յուլիսի 24-ին մասնակից դարձան Երեւանի օպերային թատրոնի դահլիճում Հ.Մ.Ը.Մ.-ի 100-ամեակին նւիրւած հանդիսութեանը: Տեղեկացնում է «yerkir.am»-ը:

Պաշտօնական հանդիսութեան ընթացքում հոգշ. Տ. Պետրոս վրդ. Մանուէլեանն ընթերցեց Ն.Ս.Օ.Տ.Տ. Արամ Ա  Վեհափառ Հայրապետի Սրբատառ Կոնդակը.

«Մեծի Տանն Կիլիկիոյ կաթողիկոսութեան Անթիլիասի Մայրավանքէն հայրապետական օրհնութեամբ, քրիստոնէական ջերմ սիրով ու ազգային վառ ապրումներով կ՛ողջունենք ձեզ, Հ.Մ.Ը.Մ.-ի Կեդրոնական Վարչութիւնը, ինչպէս նաեւ աշխարհացրիւ Հ.Մ.Ը.Մ.-ի ընտանիքը:

Ներկայ տարին 100-ամեակն է Հայ Մարմնակրթական Ընդհանուր միութեան (Հ.Մ.Ը.Մ.):

Արդարեւ, 1918-ին Պոլսոյ մէջ Շաւարշ Քրիսեան, Յովհաննէս Հինդլեան, Գրիգոր Յակոբեան եռեակին կողմէ հիմնուած մարմնակրթական այս Միութիւնը իր եզակի դերը ունեցաւ մեր ժողովուրդի կեանքէն ներս: Եզակի դեր մը, որ չսահմանափակուեցաւ միայն մարզական բնագաւառէն ներս, այլ ներառեց նաեւ հայ կեանքի ընկերային, կրթական, մշակութային, պահանջատիրական մարզերը: Եզակի դեր մը, որ չմնաց միայն տեղական ու տեղայնական պայմաններուն ու մտահոգութիւններուն առնչուած, այլ եղաւ գերազանցօրէն համահայկական. Սփիւռքի բոլոր գաղութներէն ներս եւ Հայաստանի ու Արցախի վերանկախացումէն ետք` նաեւ հայրենի հողին վրայ դառնալով կենդանի ներկայութիւն: Եզակի դեր մը, որ երբեք չդարձաւ լուսանցքային, այլ իր զօրեղ ազդեցութիւնը ունեցաւ նոր սերունդներու հայեցի դաստիարակութեան մէջ: Վերջապէս, եզակի դեր մը, որ եղաւ ու մնաց համապարփակ, ազգային ձգտումներուն ու աւանդութիւններուն կենսագործման շաղախելով նաեւ մեր հոգեւոր ու բարոյական արժէքներն ու սկզբունքները:

Այսպէ՛ս եղաւ Հ.Մ.Ը.Մ.-ը հարիւր տարիներ շարունակ: Ա՛յս ոգիով ու տեսլականով գործեց ու կազմակերպեց: Ա՛յս հաւատքով ու յանձնառութեամբ նոր սերունդներուն` ազգին ու հայրենիքին համար ապրելու ու ծառայելու գիտակցութիւնը ու նուիրումը ներարկեց:

Արդ, հարիւրամեայ իր ծառայութեամբ բեղմնաւոր ու հզօր Հ.Մ.Ը.Մ.-ը արժանի է իւրաքանչիւր հայու եւ ամբողջ հայութեան բարձր գնահատանքին ու խոր յարգանքին: Կառոյցները միջոց են. էականը ու ճառագայթողը` ծառայութեամբ թրծուած նպատակասլաց գործն է: Այսօր Հ.Մ.Ը.Մ.-ը մեր ժողովուրդին կը ներկայանայ դար մը ամբողջ նուիրական առաքելութիւն մը հաւատարմօրէն կատարած ըլլալու արդար հպարտութեամբ ու խոր ցնծութեամբ:

Մեծի Տանն Կիլիկիոյ կաթողիկոսութեան հայրապետները միշտ գնահատողը ու քաջալերողը եղած են Հ.Մ.Ը.Մ.-ին: Անոնց արդար գնահատանքին կը միացնենք նաեւ Մեր ջերմ գնահատանքը` համահայկական ոգիով«, պահանջատիրական կամքո, հայակերտումի յանձնառութեամբ ու հայրենիքի հզօրացման ի խնդիր գործող ու ծառայող Հ.Մ.Ը.Մ.-ին:

Վստահ ենք, որ 100-ամեակը նոր մարտահրաւէր մը պիտի դառնայ Հ.Մ.Ը.Մ.-ին` առաւել նուիրումով շարունակելու իր առաքելութիւնը մեր ժողովուրդի կեանքէն ներս, ի Հայաստան, յԱրցախ եւ ի սփիւռս աշխարհի:

Կ՛աղօթենք առ Բարձրեալն Աստուած, որ Իր երկնային հովանիին ներքեւ միշտ ամուր ու կենսունակ պահէ Հայ Մարմնակրթական Ընդհանուր միութիւնը, ամրացնէ անոր շարքերը ու զօրացնէ անոր մշակներուն ազգին ծառայելու կամքը:

Ողջ լերուք ի Տէր, զօրացեալ շնորհօք Ս. Հոգւոյն եւ յաւէտ օրհնեալ ի Մէնջ. Ամէն:

Աղօթարար`

ԱՐԱՄ Ա. ԿԱԹՈՂԻԿՈՍ

ՄԵԾԻ ՏԱՆՆ ԿԻԼԻԿԻՈՅ»

Յարակից լուրեր