Հա

Քաղաքական

31/07/2018 - 12:10

Show must go on

«Քաղաքացիական պայմանագրի» քաղաքապետի թեկնածուն վերջերս կուսակցութեանն անդամակցած դերասան Հայկ Մարութեանն է` Նիկոլ Փաշինեանի մասնակցութեամբ` վարչութեան՝ մի քանի ժամ տեւած նիստից յետոյ յայտնել է ԱԺ պատգամաւոր Ալէն Սիմոնեանը։ 

«alikonline.ir» - «Քաղաքացիական պայմանագրի» քաղաքապետի թեկնածուն վերջերս կուսակցութեանն անդամակցած դերասան Հայկ Մարութեանն է` Նիկոլ Փաշինեանի մասնակցութեամբ` վարչութեան՝ մի քանի ժամ տեւած նիստից յետոյ յայտնել է ԱԺ պատգամաւոր Ալէն Սիմոնեանը։ Գրում է «irates.am»-ը:

«Ընտրութիւնը տեղի է ունեցել երկու փուլով։ 

Երկրորդ փուլ են անցել Հայկ Մարութեանը եւ Ալէն Սիմոնեանը: Երկրորդ փուլով «Քաղաքացիական պայմանագրի» առաջին համար է ընտրւել իմ ընկեր Հայկ Մարութեանը»,- ասել է Ալէն Սիմոնեանը։ ՔՊ-ից 4 հոգի էր ինքնաառաջադրւել քաղաքապետի թեկնածու՝ պատգամաւոր Ալէն Սիմոնեանը, դերասան Հայկ Մարութեանը, սոցիալական հարցերի փոխնախարար Զարուհի Բաթոյեանը եւ վարչապետի օգնական Սրբուհի Ղազարեանը: Երեւանը քաղաքապետ չունի յուլիսի 9-ից՝ մայրաքաղաքը 7 տարի ղեկավարած Տարօն Մարգարեանի հրաժարականից յետոյ։ Յուլիսի 16-ին արտահերթ նիստում աւագանին իր կազմից նոր քաղաքապետ չընտրեց, թէեւ թեկնածու ունէր` Զարուհի Փոստանջեանը:

Նիստը տապալւեց` քւորում չկար: Այժմ կառավարութիւնը պէտք է ցրի աւագանին ու նշանակի արտահերթ ընտրութիւններ: Երեւանի մասին օրէնքով` արտահերթ ընտրութիւնն անցկացւում է աւագանու լիազօրութիւնների ժամկէտը կրճատելուց յետոյ ոչ շուտ, քան 30, եւ ոչ ուշ, քան 40 օրում:

Հայկ Մարութեանին կողմ է քւէարկել 8, Ալէն Սիմոնեանին` 5 հոգի:

Կարգին Հայկօն Նիկոլ Փաշինեանի թեկնածուն է, որ յեղափոխութիւնից յետոյ անդամագրւեց ՔՊ-ին` մինչ այդ ելոյթներ ունենալով Հանրապետութեան հրապարակում` ապահովելով շոու բիզնեսի ներկայութիւնը յեղափոխութեանը:

Ի՞նչ քաղաքապետ կարող է լինել Կարգին Հայկօն: Այս ընտրութիւնը ծաղր չէ՞ մի մայրաքաղաքի համար, որ պետութեան կէսն է: Ինքը` Հայկ Մարութեանը հասկանո՞ւմ է` ի՞նչ է ասում, երբ ընտրութիւնից յետոյ յայտարարում է` «Երեւանի քաղաքապետը չպէտք է լինի պաշտօնեայ»: Իսկ ո՞վ պէտք է լինի: «Նա պէտք է լինի լինի ձեզնից մէկը, մեզնից մէկը, մեր քաղաքի ժողովրդից մէկը: Եթէ, իհարկէ, մենք յաղթենք այս ընտրութիւններում, ես լինելու եմ ձեզնից մէկը եւ այդ աչքերով ենք նայելու մեր քաղաքին եւ այդ աչքերով բոլորով միասին մեր քաղաքը բերելու ենք այն վիճակին, ինչը բոլորս ենք ցանկանում, որ մենք բոլորս հպարտանանք: Ես, այսպէս ասած, թեւերս քշտած մեր երեւանցիների հետ միասին պէտք է լուծեմ մեր Երեւանի խնդիրները: Ես այդպէս եմ ընկալում այդ պաշտօնը»:

Այսինքն` շոուն շարունակւում է` յեղափոխութիւնն ասպարէզ է բերում ու առանցքային պաշտօններ տալիս մարդկանց, որ միայն մէկ որակ ունեն` ապաքաղաքակա՞ն են, բայց ՔՊ անդամ: Կառավարման ունակութիւնների մասին նրանց պատկերացումը հենւում է յայտնի ասոյթի վրայ` «Գործեր կան, որ անելով են սովորում», բայց այդ ասոյթը ունի շարունակութիւն`«Գործեր կան, որ մինչեւ չսովորեն` չեն արւում»: Հիմա Հայաստանը փորձադա՞շտ է: Միւս կողմից` ՔՊ-ն բացայայտօրէն ընտրութիւն չունէր` կամ Ալէն Սիմոնեանը, կամ Հայկ Մարութեանը: Ըստ ամենայնի` նորակազմ կուսակցութիւնն արդէն այնքան է կարծրացել, որ նոր թեկնածուների չի կարողանում առաջադրել: Ալէն Սիմոնեանին նախապատրաստում են ապագայ ԱԺ նախագահի դերին, իսկ քաղաքապետը մնում է Կարգին Հայկոն: Բայց նոյնիսկ միջին մակարդակի դերասանը պիտի իմանար, որ քաղաքականութիւն է մտնում, որտեղ ամէն խօսքը գին ու հետեւանք ունի, որտեղ գերկուշտ են սոփեստութիւնից ու պոպուլիզմից ու աշխատանք են ուզում: Առնւազն:

Յայտարարութիւնը` «Ես ձեզնից մէկն եմ», երեւանցուն այլեւս ոչինչ չի ասում, ընդամէնը վկայում է, որ ինքն էլ չգիտի` ուր է գնում ու ինչի համար: Շարքային երեւանցուն պէտք չէ քաղաքապետ, որ ընդամենը իր աչքերով է նայելու քաղաքին ու «քաղաքը բերելու է այն վիճակին, ինչը բոլորս ենք ցանկանում»: Բոլորիս ցանկութիւնը այնքան մաշւած ու հալից ընկած պատկերացում է, որ նոյնիսկ Նիկոլ Փաշինեանի հեղինակութիւնը չի փրկի ու բովանդակութիւն չի հաղորդի: Երեւանցուն կոնկրետ ծրագիր է պէտք ու այդ ծրագիրը կատարելու մեխանիզմ: Ոչ թէ հպարտութիւն, այլ նորմալ գործող ենթակառուցւածքներ ու յարմարաւէտութիւն: Եվ փաստը, որ Նիկոլ Փաշինեանի մասնակցութեամբ ՔՊ վարչութեան նիստում մայրաքաղաքի քաղաքապետի թեկնածու է ընտրւում Կարգին Հայկօն, վկայում է, որ ՔՊ-ն չունի ոչ մարդկային, ոչ քաղաքական ռեսուրսներ եւ ապավինում է միայն համաժողովրդական աջակցութեանը: Իսկ դա ամենաանկայուն ռեսուրսն է` վաղը ոչ թէ Հայկ Մարութեանից, այլ նրան ընտրած Նիկոլ Փաշինեանից են պատասխան պահանջելու: Երեւանը հազարաւոր խնդիրներ ունի, որոնց լուծումը դերասանական միջին ունակութիւններից բացի` պահանջում է աշխատանքային փորձ ու տնտեսավարման ունակութիւններ: Կարգին Հայկոյի ընտրութիւնը վկայում է, որ թաւշեայ յեղափոխութիւնը իր էլիտար հատւածում մնում է շոուի մակարդակին: Ցաւօք: Ու դա ուղղւելու է հէնց յեղափոխութեան դէմ:

Անահիտ Ադամեան

 

Յ.Գ. Ոմանք կարծում են, որ Կարգին Հայկոյին Երեւանի քաղաքապետի թեկնածու առաջադրելը փակեց «Ելք» դաշինքի գոյութեան-չգոյութեան հարցը: Իրականում միանգամայն հակառակն է` այդ ընտրութիւնը հաստատում է, որ ՔՊ-ն միայնակ քաղաքականութեան մէջ չի կարողանում ապահովել քաղաքականութեան ներկայութիւնը ու քաղաքական լուծումների հնարաւորութիւնը եւ ԱԺ արտահերթ ընտրութիւններից առաջ իրաւունք չունի համաժողովրդական հեղինակութեան ու գերբարձր վարկանիշի հետ խաղեր տալ` միայնակ գնալով այնտեղ` չիմանալով որտեղ, բերելու` չգիտի` ինչ: Թէպէտ այդ ընկալումը էյֆորիան չյաղթահարած ՔՊ-ականների համար նոյնն է, ինչ որեւէ մէկը կանգնի ու նրանց ասի` «Դուք կապ չունէք, մէկ է, արեւն ամէն օր արեւելքից է ծագելու ու արեւմուտքում մայր մտնելու»: Նրանք դա կը վիճարկեն ու վարչութեան աղմկոտ ու տեւական նիստ կանեն` որոշելու արեւածագի ու մայրամուտի տեղն ու ժամը: Իսկ ընդհանրապէս Կարգին Հայկոյին արժի ձայն տալ միայն մէկ դէպքում, երբ կարգին քաղաքապետի խօսք տայ, որ հեռուստաէկրանից մէկընդմիշտ կանհետանայ իր ձանձրալի ու տաֆտոլոգիայի մէջ խրւած նախայեղափոխական կերպարը:

Յարակից լուրեր

  • «Զոհրաբ Մնացականեանի պաշտօնանկութեան հարցն օրակարգում է». «Փաստ»
    «Զոհրաբ Մնացականեանի պաշտօնանկութեան հարցն օրակարգում է». «Փաստ»

    «Փաստ» թերթը գրում է. ««Փաստ» թերթի տեղեկութիւններով՝ Նիկոլ Փաշինեանի մօտ մի քանի անգամ բարձրացւել է ԱԳ նախարար Զոհրաբ Մնացականեանի պաշտօնանկութեան հարցը: 

  • «4.9 տոկոս տնտեսական աճը յեղափոխական չէ». Արթուր Խաչատրեան
    «4.9 տոկոս տնտեսական աճը յեղափոխական չէ». Արթուր Խաչատրեան

    «Յեղափոխական» հռչակւած տնտեսական ծրագիրը դանդաղեցրել է երկրի տնտեսական աճը՝ Yerkir.am-ին ասաց ՀՅԴ Հայաստանի ԳՄ անդամ անդամ Արթուր Խաչատրեանը:

  • Ամուլսարի հարցում իշխանութիւնը չի արդարացրել սպասելիքները
    Ամուլսարի հարցում իշխանութիւնը չի արդարացրել սպասելիքները

    «Ցանկութիւն չունեմ ինչ-որ մէկի, առաւել եւս՝ Ալէն Սիմոնեանի ասածները մեկնաբանել: Մեր տեսակէտներն ու մօտեցումներն այդ հարցում սպառիչ են: ՀՅԴ-ն յայտարարութեամբ հանդէս է եկել, Բնապահպանութեան նախկին նախարար, ՀՅԴ-ական Արծւիկ Մինասեանն էլ օրերս ծաւալուն մեկնաբանութիւն է տւել»,- Aravot.am-ի հետ զրոյցում անդրադառնալով ԱԺ փոխնախագահ Ալէն Սիմոնեանի՝ Ամուլսարի շահագործման վերաբերեալ ՀՅԴ-ի յայտարարութեան շուրջ հնչեցրած գնահատականին, թէ ՀՅԴ-ն հանրութեանը հաճոյանալու եւ քաղաքական փնտրտուքների նպատակ ունի, ասաց ՀՅԴ Բիւրոյի անդամ Արսէն Համբարձումեանը:

  • ՀՀ վարչապետն անդրադարձաւ իրանահայերին բանկերի կողմից վարկ չտրամադրելու խնդրին
    ՀՀ վարչապետն անդրադարձաւ իրանահայերին բանկերի կողմից վարկ չտրամադրելու խնդրին

    ՀՀ վարչապետ Նիկոլ Փաշինեանը միաժամանակ Հայաստանի եւ Իրանի քաղաքացի հանդիսացողներին յորդորում է որեւէ բանկի կողմից վարկ չստանալու դէպքում դիմել մէկ այլ բանկ` նշելով, որ կառավարութիւնը բանկին չի կարող պարտադրել, որպէսզի այն վարկ տրամադրի։

  • Պոպուլիստի «ճակատագիրը»․ ասել այն, ինչ ամբոխն ուզում է լսել
    Պոպուլիստի «ճակատագիրը»․ ասել այն, ինչ ամբոխն ուզում է լսել

    Ինչո՞ւ Նիկոլ Փաշինեանը, Հայաստանի զարգացման կարճաժամկէտ եւ միջնաժամկէտ զարգացման ծրագրերը բախտի քմահաճոյքին թողած, որոշեց ներկայացնել 2050 թ. Հայաստանի «տեսլականը»։ Ընդ որում` կոնկրետ թւերով ու ցուցանիշներով, այն դէպքում, երբ ՀՀ կառավարութեան գործունէութեան հնգամեայ ծրագրում շատ քիչ են կոնկրետ թւերը։ Ի՞նչ երեւոյթի հետ գործ ունենք։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։