Հա

Քաղաքական

05/08/2018 - 10:30

Արմէն Բադալեան. «Փաշինեանի բարձր լեգիտիմութեան հարցը ներքին օգտագործման համար է ու դրսում չի աշխատում»

«tert.am»-ի հետ զրոյցում ընտրական եւ քաղաքական տեխնոլոգիաների փորձագէտ Արմէն Բադալեանն անդրադառնում է հարցին, թէ արդեօք ՌԴ արտգործնախարար Սերգէյ Լաւրովի յայտարարութիւնից ու Երւեանի արձագանքից յետոյ հայ-ռուսական յարաբերութիւններում առկայ է խորը ճգնաժամ, ինչպէս նաեւ հարցին, թէ օգոստոսի 17-ին վարչապետ Նիկոլ Փաշինեանի հանրահաւաքը կարո՞ղ է արդեօք դառնալ արտաքին քաղաքական գործուն խաղաքարտ: 

«alikonline.ir» - «tert.am»-ի հետ զրոյցում ընտրական եւ քաղաքական տեխնոլոգիաների փորձագէտ Արմէն Բադալեանն անդրադառնում է հարցին, թէ արդեօք ՌԴ արտգործնախարար Սերգէյ Լաւրովի յայտարարութիւնից ու Երւեանի արձագանքից յետոյ հայ-ռուսական յարաբերութիւններում առկայ է խորը ճգնաժամ, ինչպէս նաեւ հարցին, թէ օգոստոսի 17-ին վարչապետ Նիկոլ Փաշինեանի հանրահաւաքը կարո՞ղ է արդեօք դառնալ արտաքին քաղաքական գործուն խաղաքարտ:

 

- Պարո՛ն Բադալեան, օգոստոսի 17-ին հանրահաւաք է, որի առանցքում է լինելու Նիկոլ Փաշինեանի պաշտօնավարման 100 օրը: Այսուհանդերձ, վարչապետի թիմի առանցքային անդամներից մէկը Սերգէյ Լաւրովի յայտարարութիւնից յետոյ «Ֆէյսբուք»-ում գրեց, որ սա լինելու է ՀՀ ինքնիշխանութեան հանրահաւաքը, թէպէտ սա անմիջապէս սրբագրւեց Արարատ Միրզոյեանի մակարդակով։ Շատ փորձագէտներ համարում են, որ սրւած հայ-ռուսական յարաբերութիւնների ֆոնին այս հանրահաւաքը վարչապետի համար կարեւոր է հետեւեալով, որ նա ցանկանում է Բրիւսէլին ու յատկապէս Մոսկւային ցոյց տալ, որ ժողովուրդը կանգնած է իր թիկունքին, եւ ի տարբերութիւն նախորդ իշխանութիւնների` ինքն ունի ժողովրդի վստահութիւնը: Բայց հարց՝ արդեօ՞ք այս մեծ լեգիտիմութեան գործօնն արտաքին խաղաքարտ է: Թէ՞, այնուամենայնիւ, դա շատ կարեւոր է իր համար որպէս ներքին հարց՝ երկրի ներսում: 

- Դրսում սա չի աշխատում, որովհետեւ «դուրսը» առաջնորդւում է ռէալպոլիտիկայով՝ անկախ նրանից՝ դու լեգիտիմ ես, չես, ժողովրդավար ես, թէ չէ, երբ մեր շահերը համընկնում են, նրանք համագործակցում են, եթէ չեն համընկնում, չեն համագործակցում: Եւ լեգիտիմութեան հարցը ներքին օգտագործման համար է, ոչ թէ արտաքին: Կարելի է բերել բազմաթիւ օրինակներ: Օրինակ՝ Եւրոմիութիւնը բաւականին լաւ համագործակցում է Չինաստանի հետ, որը, առհասարակ, ժողովրդավարական երկիր չէ, այնտեղ չկայ ժողովրդավարութիւն, բայց շահերը համապատասխանում են եւ նորմալ համագործակցում են: Այնպէս որ, այդ՝ երկրում ժողովրդավարութեան, յեղափոխութիւն իրականացնելու գործօնը, որն այսօրւայ իշխանութիւնները ցանկանում են վաճառել Եւրոմիութեանը, չի անցնում: 

 

- Անգամ Եւրոմիութեա՞ն մօտ չի անցնում: 

- Ես խօսում էի ԵՄ-ի մասին, որը ժողովրդավարական արժէքների վրայ ստեղծւած միութիւն է, բայց արտաքին քաղաքականութեան մէջ առաջնորդւում է պրագմատիկ շահերով: Իսկ ՌԴ-ին հանրահաւաքով ինչ-որ մի բան ցոյց տալն անիմաստ է, եթէ անգամ 100 հազար մարդ դուրս գայ, որովհետեւ Ռուսաստանի համար բացարձակապէս միեւնոյն է՝ դու ժողովրդավա՞ր ես, թէ ոչ: Եւ որեւէ հանրահաւաք չի կարող Ռուսաստանին ինչ-որ մի բան ապացուցել: 

 

- Քաղաքական գործիչ, քաղաքագէտ Դաւիթ Շահնազարեանը կարծիք յայտնեց, որ հայ-ռուսական յարաբերութիւններում երբեւէ նման խորը ճգնաժամ չի եղել, այլ մարդիկ, հակառակը, ասում են՝ ի՞նչ է եղել, մենք ինքնիշխան երկիր ենք, իրենք միջամտում են մեր ներքին գործերին, եւ այլն: Համարո՞ւմ էք, որ միջադէպն այսքանով սպառւած է՝ հաշւի առնելով այն, որ ՌԴ պաշտպանութեան փոխնախարարը երէկ յայտարարեց, որ արտօնեալ գներով ՌԴ-ից զէնքի վաճառքի գործարքին որեւիցէ վտանգ չի սպառնում: 

- Նախ, արձանագրեմ, որ եղած միջադէպը որեւիցէ ձեւով չի ազդել հայ-ռուսական յարաբերութիւնների վրայ: Խնդիրն անգամ այդ միջադէպը չէ, հարցադրումն այն չէ, թէ սա կանդրադառնա՞յ հայ-ռուսական յարաբերութիւնների վրայ, թէ ոչ: Խնդիրն այն է, որ Հայաստանը արտաքին քաղաքական հեռանկարային կոնցեպտ չունի: Սա է ամենամեծ խնդիրը, եւ ոչ թէ հայ-ռուսական ինչ-որ յարաբերութիւններ կամ ճգնաժամեր: Եւ սա է, որ ժամանակ առ ժամանակ ծնելու է անհասկանալիութիւն: Դա ճգնաժամ չէ: 

 

- Չհասկացւածութիւն: 

- Անհասկանալիութիւն է: Այսինքն՝ չեն հասկանում որոշ բաներ: Դա ճգնաժամ չէ, դա այդ վիճակն է, որը հիմնւած է նրա վրայ, որ Հայաստանը չունի արտաքին քաղաքական հեռանկար, հասկանալի չէ՝ ինչն է Հայաստան-Ռուսաստան յարաբերութիւնների զարգացման հետագայ կոնտեքստը: Եւ խնդիրն այն է, որ իրենք չեն հասկանում, թէ դու ինչ ես ուզում: Հայաստանն ասում է, որ ինքը շարունակելու է նոյն արտաքին քաղաքականութիւնը, խորացնելու է ՀԱՊԿ-ի հետ համագործակցութիւնը ու ԵԱՏՄ-ի հետ համագործակցութեան արդիւնաւէտութիւնն է բարձրացնելու, բայց չի բացատրում՝ խորացում ասելով ի՞նչ է հասկանում: Եւ երկրորդ՝ անհասկանալի են նաեւ Հայաստան-ԵՄ եւ Հայաստան-ԱՄՆ արտաքին քաղաքական կապերը: Աւելին՝ վերջին երկուսի պարագայում չկայ նաեւ քաղաքական օրակարգ: Սա է Հայաստանի մեծագոյն պրոբլեմը, ոչ թէ այն, թէ ՌԴ-ն մեր ասածներն ինչպէս կընկալի: 

 

- Մայիսի 8-ին ԱԺ-ի կողմից վարչապետ ընտրւելուց առաջ ԱԺ արտաքին յարաբերութիւնների յանձնաժողովի նիստին հանրապետական պատգամաւորները չկարողացան Փաշինեանից կորզել որեւէ փաստ, խօսք, որը ՌԴ-ի կողմից լաւ չէր ընկալւի, սակայն նա հիմա անում է քայլեր, որոնք մեղմ ասած, ՌԴ իշխանութիւնների «սրտով կարող են չլինել»: Ինչո՞ւ թոյլ տրւեց Երեւան-Մոսկւա այս երկխօսութիւնը: Ի վերջոյ, ռուսները պնդում են, թէ իրենք ասում են, որ ընդամէնը նախապէս Խաչատուրովին պէտք էր փոխարինել որեւէ այլ գեներալով: Իսկ յետոյ, ձեր ներքին գործն է, քրէական հետապնդում արէք, դատէք, կալանաւորէք, բայց կասկածի տակ մի դրեք ռազմաքաղաքական բլոկի ղեկավարի ստորագրութիւնները տարբեր փաստաթղթերի տակ: Այլ կերպ ասած՝ ռուսական կողմի բողոքը Ձեզ համար հասկանալի՞ է: 

- Ռուսները չեն բողոքում, իրենք պաշտօնապէս յայտարարել են, որ այն, ինչ տեղի է ունենում Խաչատուրովի հետ կապւած, Հայաստանի ներքին գործն է: Նաեւ, իհարկէ, ասացին, որ դա կարող է խնդիրներ առաջացնել ՀԱՊԿ-ի հետագայ ինտեգրացիոն պրոցեսների համար: 

 

- Իրենք փորձագիտական մակարդակով ասել են՝ նա ունի հայկական ազգանուն, բայց նա միջազգային պաշտօնեայ է, որին պէտք էր նախապէս յետ կանչել, փոխարինել մէկ այլ գեներալով, յետոյ դատել: 

- Կապ չունի՝ պաշտօնեայ է, թէ չէ, եւ կրկնում եմ՝ հայ-ռուսական յարաբերութիւններում խնդիր չկայ, կան անհասկանալիութեան պահեր, երբ մի երեւոյթ Հայաստանի կողմից մի կերպ է մեկնաբանւում, ՌԴ-ի կողմից՝ մէկ այլ: Այս անհասկանալիութեան պահերն անցնում են: Իհարկէ, կարող են հետագայում էլ առաջանալ: 

 

- Միջադէպն այլեւս սպառւա՞ծ է, այսինքն:

- Այո: 

 

- Ասում էք՝ Փաշինեանը չունի արտաքին քաղաքական հայեցակարգ, ըստ Ձեզ՝ ինչո՞ւ: 

- Չգիտեմ՝ ինչու չունի, բայց նա ինչ ընտրւել է, ամէն հնարաւոր վայրերում ու բոլոր հնարաւոր լրատվամիջոցներին ասում է, որ արտաքին քաղաքական վեկտորը չի փոխւելու, եւ ինքը հաւատարիմ է մնալու Ռուսաստանին: Դա կարելի է մէկ անգամ ասել, մի քանի անգամ չի կարելի ասել, որովհետեւ մի 10 անգամ ասելուց յետոյ ՌԴ ղեկավարութիւնը Լաւրովի բերանով մի միջամտութիւն Հայաստանի ներքին գործերին իրականացրեց: Դա նշանակում է, որ Հայաստանի իշխանութիւնները պէտք է հասկանան, որ ռուսներն ասում են, որ դու հաւատարիմ ես մնում, բայց դա Ռուսաստանի վրայ չի ազդում: Հետեւաբար՝ Հայաստանը սա պէտք է դադարեցնի, որովհետեւ սա իրեն սպառել է: Կրկնում եմ՝ չկայ նաեւ ՀՀ-ԱՄՆ, ՀՀ-ԵՄ յարաբերութիւնների զարգացման կոնցեպտ, այն դէպքում, երբ Հայաստանում ԵՄ պատւիրակութեան ղեկավարը շատ յստակ ասաց, որ եթէ դու չես փոխում ԵՄ-ի նկատմամբ քո վերաբերմունքը, ուրեմն՝ մի սպասիր Եւրոմիութիւնից: Աւելին՝ մենք տեսնում ենք, որ հայ-ամերիկեան յարաբերութիւնների քաղաքական օրակարգը ձեւաւորելու փոխարէն իշխանութիւններն ամէն քայլ անում են հայ-ամերիկեան PR յարաբերութիւնները զարգացնելու համար: Այսինքն՝ ամէն ինչ անում են, որ ՄԱԿ-ի գագաթնաժողովին ՀՀ ղեկավարը ԱՄՆ ղեկավարի հետ մէկ ձեռքսեղմում ունենայ, դա նկարահանւի եւ դա ցոյց տան որպէս հայ-ամերիկեան յարաբերութիւնների զարգացում: Դա հայ-ամերիկան քաղաքական օրակարգ չէ, ընդամէնը հայ-ամերիկեան PR յարաբերութիւններ են: 

Յարակից լուրեր

  • Ժողովրդին մեղադրելու արւեստը
    Ժողովրդին մեղադրելու արւեստը

    Ով ինչ ուզում է ասի,  մեր ժողովուրդը միշտ լաւն է ու այդպէս էլ պիտի լինի։ Սա այսպէս է, որովհետեւ մեր ժողովուրդը մեր ուժի, մտքի, աշխատանքի եւ ստեղծագործութեան միակ աղբիւրն է։ Սա այսպէս է, որովհետեւ ժողովուրդը մեր անցեալի, ներկայի ու ապագայի թէ՚ ներշնչարանն է եւ թէ ապաւէնը։ Եւ լինենք անկեղծ ու խոստովանենք, թէ  այս համոզումն ու հաւատքը հետեւողականապէս ունեցել է եւ ունի միայն Հայ Յեղափոխական Դաշնակցութիւնը։

  • Ասք 800 հազար անբանի, 350 հազար ճռռացողի եւ վարչապետի տւայտանքների մասին
    Ասք 800 հազար անբանի, 350 հազար ճռռացողի եւ վարչապետի տւայտանքների մասին

    Եթէ մարդ չգիտենայ, թէ գործազրկութեան համար ինչքան նպաստ է ստանում մէկ ընտանիքը, Հայաստանի Հանրապետութեան կառավարութեան նկատմամբ կը լցւի անհուն երախտագիտութեամբ. ուրիշ այդ ո՞ր պետութիւնն է բնակչութեան գրեթէ 30 տոկոսին (ըստ վարչապետ Փաշինեանի՝ 800 հազար մարդ) վճարում գործազրկութեան նպաստ: 

  • Դատելով Նիկոլ Փաշինեանի խօսքերից` նա լուծման ձեւերը դեռ այնքան էլ չի պատկերացնում
    Դատելով Նիկոլ Փաշինեանի խօսքերից` նա լուծման ձեւերը դեռ այնքան էլ չի պատկերացնում

    Քանի որ մեր յարգարժան վարչապետի պաշտօնակատարը 800,000 «պորտաբոյծների» մասին կարեւոր յայտնագործութիւն արեց, երէկ էլ մեծ մասդ հասցրեցիք ձեր կարծիքը դրա մասին բուռն արտայայտել, մի քանի միտք էլ ես ձեր հետ կիսւեմ։

  • Ինչպէ՞ս խօսել հայրենադարձութեան մասին, եթէ հայրենադարձութեան հայեցակարգ չկայ. Ռուզաննա Առաքելեանի հարցը` Փաշինեանին
    Ինչպէ՞ս խօսել հայրենադարձութեան մասին, եթէ հայրենադարձութեան հայեցակարգ չկայ. Ռուզաննա Առաքելեանի հարցը` Փաշինեանին

    ԱԺ ՀՅԴ խմբակցութեան պատգամաւոր Ռուզաննա Առաքելեանն այսօր ԱԺ նիստի ընթացքում ՀՀ վարչապետի պաշտօնակատար Նիկոլ Փաշինեանի հետ հարցուպատասխանի շրջանակներում ուշադրութիւն հրաւիրեց հայաստանեան մարզերի եւ գիւղերի վիճակին` հնչեցնելով երկու հարց:

  • Նիկոլենց «իզմ»-ի հետքերով
    Նիկոլենց «իզմ»-ի հետքերով

    «Իզմ»-երու ժամանակաշրջանը անցած է, յայտարարած էր Փաշինեան, ու խուսափած ինքզինք ու իր ղեկավարած ուժը գաղափարական առումով դասակարգելէ։ Անցումային շրջանի շեմին՝ գուցէ կարելի էր ժամանակաւորապէս անտեսել այդ անհեթեթ խուսանաւումը. քաղաքական կեանքի բնականոնացման եւ մօտալուտ ամբողջական իշխանափոխութեան լոյսին տակ, սակայն, էապէս կարեւոր է պարզել առաջատար ուժի գաղափարական ու արժէհամակարգային ընկալումները։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։