Հա

Քաղաքական

12/09/2018 - 11:30

«Դատաւորը չպէտք է անօրինական առնչութիւն ունենայ իրաւապահ մարմնի հետ». ՀՀ ՄԻՊ արձագանգը՝ սկանդալային հեռախօսազրոյցին

Ազատութիւնից զրկելը պէտք է լինի ոչ թէ տեղեկութիւն ստանալու նպատակ, այլ ստացած տեղեկութիւնների արդիւնք: Այս մասին ասւած է ՀՀ ԱԱԾ տնօրէնի եւ ՅՔԾ պետի հեռախօսազրոյցի սկանդալային ձայնագրութեան վերաբերեալ ՀՀ Մարդու իրաւունքների պաշտպան Արման Թաթոյեանի յայտարարութիւնում:

«alikonline.ir» - Ազատութիւնից զրկելը պէտք է լինի ոչ թէ տեղեկութիւն ստանալու նպատակ, այլ ստացած տեղեկութիւնների արդիւնք: Այս մասին ասւած է ՀՀ ԱԱԾ տնօրէնի եւ ՅՔԾ պետի հեռախօսազրոյցի սկանդալային ձայնագրութեան վերաբերեալ ՀՀ Մարդու իրաւունքների պաշտպան Արման Թաթոյեանի յայտարարութիւնում:

«Մարդու իրաւունքների պաշտպանի կողմից մանրամասն ուսումնասիրւել են Ազգային անվտանգութեան ծառայութեան տնօրէնի եւ յատուկ քննչական ծառայութեան պետի գաղտնալսւած հեռախօսային խօսակցութեան ձայնագրութիւնը: Ուսումնասիրւել են նաեւ այդ պաշտօնատար անձանց պարզաբանումները՝ կապւած գաղտնալսման փաստի, հեռախօսային խօսակցութեան ու դրա հրապարակման հետ:

Նախ, անթոյլատրելի է ցանկացած հեռախօսային խօսակցութեան անօրինական գաղտնալսում: ՀՀ Սահմանադրութեան մակարդակով բարձր երաշխաւորւած է հաղորդակցութեան, այդ թւում՝ հեռախօսային խօսակցութիւնների գաղտնիութեան իրաւունքը: Հաղորդակցութեան ազատութիւնը եւ գաղտնիութիւնը կարող են սահմանափակւել միայն օրէնքով՝ բացառապէս Սահմանադրութեամբ նախատեսւած նպատակների համար եւ երաշխիքների պահպանմամբ: Մարդու իրաւունքների պաշտպանի կողմից ի գիտութիւն է ընդունւել Ազգային անվտանգութեան ծառայութեան եւ յատուկ քննչական ծառայութեան ղեկավարների հեռախօսային խօսակցութեան գաղտնիութեանը ոչ իրաւաչափ միջամտութեան առնչութեամբ ՀՀ գլխաւոր դատախազութիւնում քրէական գործի հարուցումը եւ այդ առիթով նախաքննութիւն նախաձեռնելը: Պաշտպանն ուշադրութեան կենտրոնում կը պահի այս գործի քննութեան ընթացքը:

Դրանից բացի՝ ցանկացած քրէական գործի քննութեան ընթացքում անձի իրաւունքների ապահովման կարեւորագոյն երաշխիքներից է նախաքննութեան օբիեկտիւութիւնն ու զերծ լինելը անօրինական որեւէ ազդեցութիւնից: Այս առնչութեամբ արձանագրւել են քրէական հետապնդման մարմինների յայտարարութիւններն այն մասին, որ առկայ են վերջին ժամանակաշրջանի քրէական գործերով նախաքննութեան ու իրենց նկատմամբ անօրինական ազդեցութիւն գործադրելու փորձեր: Նման երեւոյթները մտահոգիչ են: Այդպիսի ցանկացած դէպք պէտք է դառնայ առանձին քննութեան առարկայ, իսկ դրանք գործադրող անձինք պէտք է ենթարկւեն պատասխանատւութեան:

Դատական իշխանութիւնն անկախ է ցանկացած մարմնից կամ անձից: Դատաւորն ինքը պէտք է սեփական վարքագծով ցոյց տայ, որ անկախ է որեւէ մէկից եւ պէտք է իւրաքանչիւր որոշում կայացնի՝ բացառապէս առաջնորդւելով իր ներքին համոզմամբ՝ ներկայացւած ապացոյցների պատշաճ հետազօտման հիման վրայ:

Ըստ հեռախօսային խօսակցութեան մէջ առկայ տւեալների՝ դատաւորն ինքն է դիմել իրաւապահ մարմնին ու խնդրել իր աշխատանքի ուղղորդում կոնկրետ քրէական գործով: Այս մասին քրէական հետապնդման մարմինները յայտարարել են նաեւ այդ խօսակցութեան ձայնագրութեան հրապարակումից յետոյ: Նշւած երեւոյթը խիստ մտահոգիչ է ու դատապարտելի, այս պրակտիկան վտանգում է դատաւորի հեղինակութիւնն ու արդարադատութեան համակարգը երկրում: Դատաւորը չպէտք է անօրինական առնչութիւն ունենայ իրաւապահ մարմնի հետ ու ձեռնարկի իր անկախութիւնը խաթարող քայլեր: Մտահոգիչ է նաեւ գաղտնալսւած հեռախօսային խօսակցութեան այն հատւածը, որն առնչւում է դատաւորի աշխատանքին միջամտութեանը:

Կալանքի հետ կապւած՝ պէտք է նկատի ունենալ, որ այն ունի կիրառութեան հիմքերի ու իրաւաչափութեան պայմանների սպառիչ շրջանակ, որոնք իւրաքանչիւր դէպքում անհատական մօտեցման պայմաններում պէտք է դառնան դատական ստուգման առարկայ: Ազատութիւնից զրկելը պէտք է լինի ոչ թէ տեղեկութիւն ստանալու նպատակ, այլ ստացած տեղեկութիւնների արդիւնք»,- ասւած է օմբուդսմենի յայտարարութիւնում:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։