Հա

Քաղաքական

20/10/2018 - 09:50

70% մանդատ ստացող ուժը ՀՀ ԱԺ-ում միանձնեայ որոշումներ կը կայացնի. ՀՅԴ-ն առաջարկեց սահմանել 31/69% յարաբերակցութիւն

ՀՀ ԱԺ պետաիրաւական հարցերի յանձնաժողովում թէժ քննարկում ծաւալւեց ընդդիմութեանը յատկացւող ձայների շուրջ: Ընտրական օրէնսգրքի նախագծով նախատեսւում է, որ ընդդիմութեանը պէտք է տրւի նւազագոյնը 30%: Սակայն ԱԺ ՀՅԴ խմբակցութեւնն առաջարկել է կառավարութեանը` այդ շեմը բարձրացնել` սահմանելով` 60/40 յարաբերակցութիւնը, այսինքն` իշխանութեանը տրւի 60%, ընդդիմութեանը` 40%:

«alikonline.ir» - ՀՀ ԱԺ պետաիրաւական հարցերի յանձնաժողովում թէժ քննարկում ծաւալւեց ընդդիմութեանը յատկացւող ձայների շուրջ: Ընտրական օրէնսգրքի նախագծով նախատեսւում է, որ ընդդիմութեանը պէտք է տրւի նւազագոյնը 30%: Սակայն ԱԺ ՀՅԴ խմբակցութեւնն առաջարկել է կառավարութեանը` այդ շեմը բարձրացնել` սահմանելով` 60/40 յարաբերակցութիւնը, այսինքն` իշխանութեանը տրւի 60%, ընդդիմութեանը` 40%: Գրում է «yerkir.am»-ը:

Խմբակցութեան քարտուղար Արմենուհի Կուրեղեանը, դիմելով արդարատութեան նախարարի պաշտօնակատար Արտակ Զէյնալեանին, ասաց, որ 2/3-ի դէպքում կը ստացւի, որ մեծամասնութիւն ունեցող քաղաքական ուժը միայնակ կարող է ընդունել սահմանադրական օրէնքները: «Մենք առաջարկում ենք` եթէ գոնէ այդ շեմը չէք դարձնում 3/5, ապա գոնէ սահմանենք այդ չափը 2/3 մինուս»,- ասաց պատգամաւորը:

Զէյնալեանն էլ հակադարձեց, որ եթէ քաղաքական ուժը ստացել է 5 տոկոս, որքանո՞վ է ժողովրդական, որ նրա տեսակարար կշիռը դարձւի 1/3: «Կար երկու առաջարկ` ընդդիմութեան շեմը իջեցնել` սահմանել 20%, եւ երկրորդ առաջարկը` բարձրացնել դարձնել 40 տոկոս: Կառավարութիւնը որոշեց թողնել նոյնը: Շատ հաւանական է, որ ուժերից մէկը ստանայ 90 տոկոս, այդ դէպքում` իջեցւում է 2/3-ի»,- ասաց նա:

Կուրեղեանը պնդեց. «Խօսքը վերաբերում է այն օրէնքներին, որոնք սահմանադրական են: Եթէ 80 մանդատ է ստացել քաղաքական ուժը, այդ 2/3-ը կայ, կարող է անցկացնել սահմանադրական օրէնքը, եթէ` 81, ապա` ոչ: Դրա համար ենք առաջարկում, որ եթէ 3/5-ը չեք ընդունում, գոնէ ընդունէք «2/3 մինուս»-ի տարբերակը, որպէսզի միանձնեայ որոշում կայացնելու հնարաւորութիւն չունենայ որեւէ կուսակցութիւն»:

Յանձնաժողովի նախագահ Գէորգ Կոստանեանն էլ իր հերթին յաւելեց` շատ տրամաբանական հարցադրում է: «Պատկերացնում ենք իրավիճակ` 4 կուսակցութիւն մուտք է գործել պառլամենտ, որպէսզի ապահովւի բազմակարծութիւն, բայց միեւնոյն ժամանակ` որոշումների կայացման եւ երկրի համար ճակատագրական որոշումներ կայացնելու համար սահմանում էք այնպիսի շեմ, որ եթէ 20 կուսակցութիւն էլ պառլամենտում ներկայացւած լինի, այնումենայնիւ, չի ազդելու որոշման կայացման վրայ: Մի կողմից ողջունելի եմ համարում, որ կառավարութիւնն առաջարկում է խորհրդարանում առնւազն 4 կուսակցութիւն լինի, բայց նոյն օրէնքով սահմանել էք այնպիսի համադրութիւն, որ ուզում է` 20 ուժ լինի, մէկ ուժն է ի վիճակի, օրինակ, Սահմանադրութիւն փոխել: Հետեւաբար, պառլամենտարիզմի եւ բազմակարծութեան իրագործումը վտանգւած է: Հարցադրումը ողջամիտ է, եւ դրա համար կարծում եմ, որ այս հարցի վերաբերեալ պէտք է բոլոր ռիսկերը գնահատել»,- շեշտեց Կոստանեանը եւ կոչ արեց յանձնաժողովականներին` ուշադրութիւն դարձնել բոլոր կանոնակարգումներին:

Նախարարի պաշտօնակատարն էլ հակադարձեց, որ 2/3-ը բացարձակ սկզբունք չէ եւ երաշխաւորւած չէ, երաշխաւորւած է կայուն մեծամասնութիւնը` 54%-ը: «Եթէ քաղաքական ուժը 2/3 կունենայ խորհրդարանում, դա բացարձակապէս պայմանաւորւած կը լինի ժողովրդական ընտրութիւնների արդիւնքով: Մենք հիմա փորձում ենք ստեղծել մի մեխանիզմ, որը կը հակակշռի ժողովրդավարութեանը` ապահովելու համար բազմակարծութիւնը»,- յայտարարեց նա:

«Ժողովրդավարութեանը հակակշռե՞լ»,- զարմացած հարցրեց Կոստանեանը:

«Այո, այս մեխանիզմը հակակշռում է ժողովրդավարութեանը. եթէ 90 տոկոս վարկանիշ ունի կուսակցութիւններից մէկը, մենք փորձում ենք դա նւազեցնել 2/3-ից աւելի պակաս»,- ասաց Զէյնալեանը:

Կոստանեանը հակադարձեց, որ խնդիրն այն է, որ կառավարութիւնը տեսականօրէն հակակշռում է, բայց գործնականում մնում է նոյնը:

Զէյնալեանին էլ դուր չեկաւ այն, որ Կոստանեանը ընդհատում է իրեն: «Դուք, իրաւունք չունէք ռեպլիկով ինձ ընդհատելու»,- ասաց նա:

Կոստանեանը նշեց, որ, որպէս յանձնաժողովի նախագահ, ունի, եւ ՀՀ ԱԺ կանոնակարգն իրեն թոյլ է տալիս:

«ՀՀ ԱԺ կանոնակարգը նման դրոյթ չունի»,- ասաց Զէյնալեանը:

«Եկէք գրազ գանք»,- յաւելեց Կոստանեանը:

Զէյնալեանը նշեց, որ ընտրական արդիւնքները եւրոպական դատարաններում վիճարկելու շատ մեծ փորձ ունի: «Ես իրաւապաշտպան էի եւ ընդդիմադիր էի, դրա համար շատ լաւ փորձ ունեմ, գիտեմ` պետութիւնը շատ լայն հայեցողութիւն ունի օրէնքով սահմանւած կարգով անցկացնելու տեսակէտից: Կառավարութեան դիրքորոշումն այդպիսին է, որ հաւասարակշռւած են այդ շահերը 2/3-ով, դա չի հակազդում Եւրոպական կոնւենցիային»,- ասաց նա:

Արմենուհի Կուրեղեանն էլ շեշտեց, որ եթէ, 30/70-ը դարձնելով 31/79, խախտւում է ժողովրդավարութիւնը, ապա եթէ 90 տոկոս ձայն հաւաքած կուսակցութիւնը դառնում է 70 տոկոսանոց ձայն ստացած կուսակցութիւն, ապա դա էլ է ժողովրդավարութեան խախտում: «Հիմա հարցը դա է` 90-ից իջեցնե՞լ 70, թէ՞ 69, որն է տարբերութիւնը»,- հարցրեց նա:

Զէյնալեանն էլ կրկնեց, որ ունեցել են երկու առաջարկ` իջեցնել 20 կամ բարձրացնել 40, կառավարութիւնը նախընտրել է թողնել նոյնը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։