Հա

Քաղաքական

25/10/2018 - 12:20

Ընդամէնը քաղաքական տհասութիւն է

Թէպէտ ԱԺ ՀՅԴ խմբակցութիւնը որոշում ունէր՝ կողմ քւէարկել կառավարութեան ներկայացրած ՀՀ «Ընտրական օրէնսգիրք» սահմանադրական օրէնքում փոփոխութիւններ եւ լրացումներ կատարելու մասին նախագծին, սակայն խմբակցութեան երկու պատգամաւոր չմասնակցեցին քւէարկութեանը: Նրանց եւ եւս հինգ պատգամաւորի շնորհիւ կամ պատճառով նախագիծն այդպէս էլ չընդունւեց:

«alikonline.ir» - Թէպէտ ԱԺ ՀՅԴ խմբակցութիւնը որոշում ունէր՝ կողմ քւէարկել կառավարութեան ներկայացրած ՀՀ «Ընտրական օրէնսգիրք» սահմանադրական օրէնքում փոփոխութիւններ եւ լրացումներ կատարելու մասին նախագծին, սակայն խմբակցութեան երկու պատգամաւոր չմասնակցեցին քւէարկութեանը: Նրանց եւ եւս հինգ պատգամաւորի շնորհիւ կամ պատճառով նախագիծն այդպէս էլ չընդունւեց: Չքւէարկողների թւում էր նաեւ ԱԺ ՀՅԴ խմբակցութեան պատգամաւոր Սուրէն Մանուկեանը, ում հետ էլ զրուցեց «Իրաւունք»-ը:

 

- Պարոն Մանուկեան, ՀՅԴ խմբակցութիւնը որոշում ունէր` կողմ քւէարկելու, ինչո՞ւ չմասնակցեցիք քւէարկութեանը, ինչը նաեւ որոշ պատգամաւորների կողմից որակւեց որպէս սաբոտաժ:

- Նախ առաւօտեան նիստին մասնակցել եմ, եւ մինչեւ նիստն ունեցել ենք խմբակցութեան նիստ, որը միաձայն որոշում է կայացրել, որ պէտք է կողմ քւէարկենք Ընտրական օրէնսգրքի նախագծին, ինչին ես էլ եմ համամիտ եղել: Մասնակցել եմ առաւօտեան քւէարկութեանը, որի երկրորդ քւէարկութեամբ միայն քւորում ապահովւեց, իսկ դրանից յետոյ անձնական հարցերով դուրս եմ եկել ԱԺ-ից: Աստւած չանի, որ ինչ-որ մէկի հետ էլ նման անձնական խնդիր առաջանայ ու չմասնակցի քւէարկութեանը: Բայց ես ընդամէնը ներկայ չեմ եղել, որ կողմ քւէարկէի: Ինչպէ՞ս կարելի է սա սաբոտաժ համարել, երբ ես, իշխանութեան մէջ լինելով, առաջիններից էի, որ միացայ ժողովրդական շարժմանը: Այնպէս որ, սա սաբոտաժ համարելն ընդամենը քաղաքական տհասութիւն է, որ ինչ-որ մէկը փորձում է այդպէս վարկաբեկել:

 

- ԱԺ «Ծառուկեան» խմբակցութիւնում էլ 4 պատգամաւոր չէր մասնակցել քւէարկութեանը, բայց չգիտես ինչու բոլորը մատնանշում են չքւէարկած երկու ՀՅԴ-ական պատգամաւորին: Ի՞նչ կասէք այս մասին:

- Չգիտեմ` ով է սաբոտաժի ենթարկել քւէարկութիւնը, ով` ոչ, ցանկացած մարդ իր արարքի համար է պատասխանատու: Երբ իմ ապրած տարիներն ու հետագիծը նայէք, կը հասկանանք, որ ոչ ոք ինձ կեանքում չի կարող ասել` սա այսպէս արա, նա` այնպէս: Ես կուսակցական մարդ եմ, որը յարգում է այդ կուսակցութեան եւ խմբակցութեան որոշումները: Եթէ չցանկանայի, որ նախագիծն անցնէր, խմբակցութեան նիստին դէմ կարտայայտւէի, բայց այդպէս չի եղել:

 

- Այսինքն` հիմա, երբ պատգամաւորների ստորագրութեամբ կրկին Ազգային ժողով է բերւելու Ընտրական օրէնսգրքի նախագիծը, պատրաստւում էք կո՞ղմ քւէարկել:

- Միանշանակ, պատրաստ եմ, եւ իմ կարծիքը ոչ մէկը չի կարող փոխել: Ես իմ խմբակցութեան, կուսակցութեան հետ եմ, ինչ որոշում կայացնեն, այդպէս էլ կը լինի:

 

- Բայց Դուք ռէյտինգային ընտրակարգով ընտրւած պատգամաւոր էք, ինչպէ՞ս ստացւեց, որ հիմա կողմ էք փակ համամասնական ցուցակին, ինչը ենթադրում էր այս նախագիծը:

- Ինձ համար էական տարբերութիւն չկայ` ռէյտինգային ընտրակարգ կը լինի, թէ` ոչ: Կուսակցութեան ներսում մարդիկ ցուցակն այնպէս են կազմելու, որ նախկինում, ովքեր վարկանիշով բարձր են եղել, առաջին համարներում լինեն: Ինձ համար աւելի լաւ է, որ չլինի, որովհետեւ ես կը լինեմ կուսակցութեան առաջին համարներում, ու դրանով պայմանաւորւած` իմ անցողիկութիւնը ԱԺ աւելի հեշտ կը լինի:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։