Հա

Քաղաքական

04/11/2018 - 09:20

Ամենայն Հայոց կաթողիկոսն իր գոհունակութիւնն է յայտնել ՀՅԴ կեցւածքի վերաբերեալ

Նոյեմբերի 3-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնում ընդունեց Հայ Յեղափոխական Դաշնակցութեան պատւիրակութեանը` գլխաւորութեամբ ՀՅԴ Բիւրոյի ներկայացուցիչ Հրանտ Մարգարեանին:

«alikonline.ir» - Նոյեմբերի 3-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնում ընդունեց Հայ Յեղափոխական Դաշնակցութեան պատւիրակութեանը` գլխաւորութեամբ ՀՅԴ Բիւրոյի ներկայացուցիչ Հրանտ Մարգարեանին: Տեղեկացնում է «yerkir.am»-ը:

Հանդիպմանը անդրադարձ կատարւեց հայրենի պետութեան առջեւ ծառացած մարտահրաւէրներին, ազգային-եկեղեցական կեանքին, յուզող խնդիրներին, ազգային ինքնութեան եւ արժեհամակարգի պահպանութեանն ուղղւած քայլերին: Խօսւեց նաեւ ժողովրդի կեանքում Եկեղեցու առաքելութեան առաւել աշխուժացմանն ուղղւած ծրագրերի եւ ձեռնարկների մասին:

Մասնաւորապէս անդրադառնալով վերջին շրջանում Հայոց Եկեղեցու դէմ տեղ գտնող յարձակումներին` տիար Հրանտ Մարգարեանն այս կապակցութեամբ վերահաստատեց կուսակցութեան դիրքորոշումը` ամբողջական զօրակցութիւն յայտնելով Մայր Աթոռ Սուրբ Էջմիածնին եւ Ամենայն Հայոց Հայրապետին:

Վերջինս ընդգծեց, որ կուսակցութիւնը, գիտակից Հայ Եկեղեցու ազգապահպան եւ հոգեւոր առաքելութեան կարեւորութեանը, շարունակելու է զօրավիգ եւ նեցուկ լինել նրան:

Իր հայրական օրհնութիւնը բերելով հայորդիներին` Ամենայն Հայոց կաթողիկոսը գոհունակութեամբ անդրադարձաւ կուսակցութեան կեցւածքին` գնահատելով դրսեւորած ոգին եւ գիտակցութիւնը: Վեհափառ Հայրապետն արձանագրեց, որ ժողովրդի զօրակցութիւնը եւ նախանձախնդրութիւնը Մայր Եկեղեցու եւ իրենց սրբազան հաւատքի հանդէպ արտայայտութիւնն են այն իրողութեան, որ Հայոց Եկեղեցին մեր ազգի ինքութեան եւ գոյութեան հիմնական երաշխաւորներից է:

Նորին Սրբութիւնը հաստատեց, որ հակառակ բոլոր դժւարութիւնների Եկեղեցին եւ հոգեւոր դասն անշեղօրէն շարունակելու են իրենց փրկչական եւ ազգապահպան առաքելութիւնը` ի նպաստ հայոց կեանքի պայծառութեան եւ բարօրութեան:

Նորին Սրբութիւնը խօսեց նաեւ ժողովրդի եւ Եկեղեցու առջեւ ծառացած մարտահրաւէրների մասին` նշելով, որ ազգի հոգեւոր զօրութեամբ եւ միասնականութեամբ են դարերի ընթացքում յաղթահարւել բոլոր դժւարութիւնները եւ արձանագրւել յաղթանակները: Հայոց Հայրապետի խօսքով` այսօր եւս, դժւարութիւնների եւ փորձութիւնների դիմակայման ճանապարհին, մեր ազգը պէտք է հետեւողը դառնայ նախնեաց որդեգրած այս կեցւածքի եւ փորձառութեան:

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։