Հա

Քաղաքական

04/11/2018 - 11:10

«Դեռ ճիշտ չի ասել, որ «Լոյս» դաշինքը պառակտւած է». «Հանրապետութեան» անդամը փակագծեր բացեց

«Լուսաւոր Հայաստան» եւ «Հանրապետութիւն» կուսակցութիւնները դեռ յստակ որոշում չունեն՝ դաշինքով կը մասնակցեն ընտրութիւններին, թէ առանձին։

«alikonline.ir» - «Լուսաւոր Հայաստան» եւ «Հանրապետութիւն» կուսակցութիւնները դեռ յստակ որոշում չունեն՝ դաշինքով կը մասնակցեն ընտրութիւններին, թէ առանձին։ Այս մասին «news.am»-ի հետ զրոյցում ասաց «Հանրապետութիւն» կուսակցութեան անդամ, «Լոյս» դաշինքի աւագանու անդամ Անի Խաչատրեանը՝ անդրադառնալով լուրերին, որ «Լոյս» դաշինքը պառակտման շեմին է, քանի որ չեն կարողանում համաձայնութեան գալ ընտրութիւններին մասնակցելու ձեւաչափի հարցում:

«Մենք այսօր կամ վաղը հանդէս կը գանք յայտարարութեամբ։ Տարբեր քննարկումներ ունեցել ենք, այդ թւում այն տարբերակով, որ «Հանրապետութիւն» կուսակցութեան անդամները «Լուսաւոր Հայսատան»-ի ցուցակով մասնակցեն ընտրութիւններին։ Դեռ ճիշտ չէ ասել, որ «Լոյս» դաշինքը պառակտւած է, երբ որ կը լինի յայտարարութիւն, նոր կարող ենք ասել, որ «Լոյս» դաշինքը գոյութիւն չունի»,- ասաց Անի Խաչատրեան։

«Լուսաւոր Հայաստան» կուսակցութեան անդամ Դաւիթ Խաժակեանն էլ ասաց, որ  դեռ ընդհանուր որոշում  չունեն, միասնական որոշում ունենալու դէպքում հանդէս կը գան յայտարարութեամբ։

Նշենք, որ «Լուսաւոր Հայաստան»-ի նախագահ Էդմոն Մարուքեանն էլ հրաժարւեց հարցազրոյց տալ: Երկու կուսակցութիւնների մի քանի անդամներ էլ ընդհանրապէս չպատասխանեցին «news.am»-ի զանգերին։

Յատկանշական է, որ նոյեմբերի 3-ին լրագրողները «Հանրապետութիւն» կուսակցութեան անդամ, արդարադատութեան նախարարի պաշտօնակատար Արտակ Զէյնալեանից հետաքրքրւել են, թէ արդեօք ինքը կը լինի՞ «Լուսաւոր Հայաստան» կուսակցութեան ցուցակում, ինչին նա յստակ բացասական պատասխան է տւել: Փոխարէնը նշել է, որ «Լոյս» դաշինքով մասնակցութեան հարցը դեռ քննարկումների փուլում է. «Կոնսուլտացիաները շարունակւում են ձեւաչափի շուրջ, կը որոշենք, թէ ինչ ձեւաչափով ենք մասնակցելու ընտրութիւններին: Դետալները շուտով կը հրապարակւեն»,- ասել է նա:

Նշենք, որ մամուլում լուրեր են շրջանառւում, որ ՀՀ ԱԺ առաջիկայ արտահերթ ընտրութիւններին «Հանրապետութիւն» եւ «Լուսաւոր Հայաստան» կուսակցութիւնները, հնարաւոր է, առանձին մասնակցեն:

Ըստ այդ լուրերի, քննարկումների ժամանակ «Լուսաւոր Հայաստան»-ի նախագահ Էդմոն Մարուքեանը մտահոգութիւն է յայտնել, որ դաշինքով ընտրութիւններին մասնակցելու դէպքում 7 տոկոսի շեմը յաղթահարելու դժւարութիւններ կառաջանան եւ առաջարկել է Արամ Սարգսեանին, որ միասին ընտրութիւններին մասնակցեն «Լուսաւոր Հայաստան» կուսակցութեան ցուցակով:

Արամ Սարգսեանն էլ չի համաձայնել այս առաջարկին եւ պատակայարմար է համարել դաշինքով մասնակցութիւնը, քանի որ նրա կարծիքով՝ այդ դէպքում միասին կը կարողանան անցողիկ շեմը յաղթահարել: Արդէն մի քանի օր է, կողմերին չի յաջողւում ընդհանուր յայտարարի գալ:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։