Հա

Քաղաքական

09/01/2019 - 12:10

«Ղարաբաղեան հակամարտութեան կարգաւորումը պէտք է լինի ԱՄՆ առաջնահերթութիւնը». ամերիկացի վերլուծաբան

ԱՄՆ-ն պէտք է առաջնային համարի Լեռնային Ղարաբաղի հակամարտութեան դիւանագիտական լուծումը գտնելը: Նման կարծիքի է ամերիկացի վերլուծաբան Վիլեամ Մաք Հենրին, որը Արտաքին քաղաքականութեան հարցերով երիտասարդ մասնագէտներ հասարակական կազմակերպութեան փորձագէտներից մէկն է: 

«alikonline.ir» - ԱՄՆ-ն պէտք է առաջնային համարի Լեռնային Ղարաբաղի հակամարտութեան դիւանագիտական լուծումը գտնելը: Նման կարծիքի է ամերիկացի վերլուծաբան Վիլեամ Մաք Հենրին, որը Արտաքին քաղաքականութեան հարցերով երիտասարդ մասնագէտներ հասարակական կազմակերպութեան փորձագէտներից մէկն է: Այս մասին գրում է «News.am»-ը:

Նրա խօսքով՝ չնայած ղարաբաղեան հակամարտութիւնը 2016 թւականի քառօրեայ պատերազմի ժամանակ յայտնւեց խորագրերում, ճգնաժամը չի արժանացել արեւմտեան քաղաքական գործիչների պատշաճ ուշադրութեանը, յատկապէս Միացեալ Նահանգներում: Վերլուծաբանի կարծիքով՝ յետխորհրդային տարածքում սառեցւած հակամարտութիւնները ոչ միայն թուլացնում են բուն հակամարտութեան մէջ ներգրաււած կողմերին, այլեւ Ռուսաստանի կողմից օգտագործւում են Կրեմլի նպատակներին հասնելու համար այս կամ այն տարածաշրջանի քաղաքականութեան մանիպուլացման նպատակով: Այս ենթատեքստում նա առանձնապէս կարեւոր է համարում, որ Վաշինգտոնում այս տարածաշրջանին աւելի շատ ուշադրութիւն դարձնեն:

«Դժւար է պատկերացնել, թէ ինչո՞ւ պէտք է աշխարհի այլ ծայրում չկարգաւորւած հակամարտութեան կարգաւորումը ծառայի ԱՄՆ շահերին: Այդուհանդերձ, այս հակամարտութեան կարգաւորումը Միացեալ Նահանգների համար ռազմավարական նշանակութիւն ունի Հայաստանի աշխարհագրական դիրքի պատճառով: Երկիրը գտնւում է ԱՄՆ երկու մրցակիցների՝ Իրանի եւ Ռուսաստանի կողքին, եւ սահմանակցում է երկու կարեւոր դաշնակիցներին՝ Թուրքիային եւ Վրաստանին: Դրանից բացի, Ադրբեջանի հետ սառեցւած հակամարտութիւնը խոչընդոտում է Հայաստանի տնտեսական աճին եւ տարածաշրջանային առեւտրային կապերի ընդլայնմանը, քանի որ Թուրքիան, որպէս Ադրբեջանի դաշնակից, Հայաստանի հետ սահմանները փակել է»,- նշում է Մաք Հենրին:

Նշելով, որ Հայաստանում իշխանափոխութեան հետ կապւած՝ ոմանք յոյս ունեն, որ Նիկոլ Փաշինեանն իր իշխանութիւնը կօգտագործի հակամարտութեան դիւանագիտական կարգաւորման համար՝ հեղինակը շեշտում է, որ, ցաւօք, «Հայաստանում ԱՄՆ կառավարութեան վերջին դիւանագիտական մանեւրումները պայմանաւորւած չէին կառուցողական ներքաղաքական իրադարձութիւններով»: Վերլուծաբանը նշում է, որ ԱՄՆ նախագահի ազգային անվտանգութեան հարցերով խորհրդական Ջան Բոլթոնը Հայաստան իր այցի ընթացքում, հակառակը, «ցուցադրեց չկշռադատւած դիւանագիտական վարպետութիւն՝ Հայաստանի վրայ ճնշում գործադրելով, որ փակի Իրանի հետ իր սահմանը՝ առաջին հերթին ընդգծելու փոխարէն, որ ԱՄՆ-ն Հայաստանին աջակցում է Լեռնային Ղարաբաղում սառեցւած հակամարտութեան փոխընդունելի եւ խաղաղ լուծման որոնման հարցում»:

Վերլուծաբանը կարծում է, որ այս տարածաշրջանի նկատմամբ ԱՄՆ աւելի ակտիւ քաղաքականութիւնը պէտք է ցոյց տայ, որ ԱՄՆ-ն մինչ կը կարողանայ լուծել աշխարհաքաղաքական աւելի լուրջ խնդիրները, ինչպիսին է Իրանի տնտեսական ազդեցութեան սահմանափակումը, պէտք է նախ այս սառեցւած հակամարտութեան խաղաղ կարգաւորման որոնման գործում հանդէս գայ որպէս կառուցողական աշխարհաքաղաքական մասնակից: «Եթէ հակամարտութիւնը կարգաւորւի, սա ոչ միայն Եւրասիայում միւս հակամարտութիւնների դադարեցման դրական օրինակ կը ծառայի, այլեւ աշխարհաքաղաքականութեան տեսակէտից անկայուն տարածաշրջանում կը ստեղծի աւելի շատ անդրսահմանային առեւտրային կապեր»,- ամփոփում է հեղինակը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։