Հա

Քաղաքական

13/01/2019 - 08:55

Ռուս քաղաքագէտ. «ՌԴ-ի հետ ՀՀ ղեկավարութեան բարձրորակ յարաբերութիւնները չափազանց կարեւոր են ԼՂ խնդրի համատեքստում»

Հայաստանի նոր իշխանութիւնների եւ Ռուսաստանի միջեւ պէտք է կերտւեն կառուցողական յարաբերութիւններ, որպէսզի հնարաւոր լինի կանխել Հանրապետութեան ներսում սուր բեւեռացումն ու ՌԴ-ի հետ յարաբերութիւնների եւ եւրասիական ինտեգրման վերագնահատումը: «Քաղաքական անցումներն ու կոնֆլիկտները Հարաւային Կովկասում» պարբերականում նման տեսակէտ է յայտնել ռուս քաղաքագէտ Սերգէյ Մարկեդոնովը:

«alikonline.ir» - Հայաստանի նոր իշխանութիւնների եւ Ռուսաստանի միջեւ պէտք է կերտւեն կառուցողական յարաբերութիւններ, որպէսզի հնարաւոր լինի կանխել Հանրապետութեան ներսում սուր բեւեռացումն ու ՌԴ-ի հետ յարաբերութիւնների եւ եւրասիական ինտեգրման վերագնահատումը: «Քաղաքական անցումներն ու կոնֆլիկտները Հարաւային Կովկասում» պարբերականում նման տեսակէտ է յայտնել ռուս քաղաքագէտ Սերգէյ Մարկեդոնովը: Փոխանցում է «Yerkir.am»-ը:

«Նոր ղեկավարութեան հետ բարձրորակ յարաբերութիւնները չափազանց կարեւոր են ԼՂ հարցի կարգաւորման համատեքստում: Դրանց շնորհիւ Երեւանը կը կարողանայ յաղթահարել բանակցութիւններում առկայ լճացումն ու վերադառնալ Բաքւի հետ իմաստալից երկխօսութեանը»,- նշել է քաղաքագէտը:

Ըստ Մարկեդոնովի՝ անհրաժեշտ է մշակել ռուս-հայկական յատուկ ինտեգրացիոն փաթեթ, որը կամուրջ կը դառնայ ԵՄ-ի եւ ԵԱՏՄ-ի միջեւ:

«Չնայած այս հարցը ուղղակիօրէն չի առնչւում կոնֆլիկտի կարգաւորմանը, այս «եւ-եւ» մոդելը եւ Մոսկւայի ու Բրիւսէլի միջեւ բացայայտ նախընտրանքի մերժումը կարեւոր ռազմավարութիւն է՝ հաշւի առնելով ՌԴ-Արեւմուտք պրագմատիկ յարաբերութիւնների հեռանկարները»,- շարունակում է նա:

ԼՂ հակամարտութեան համատեքստում Մարկեդոնովը նշում է, որ պէտք է ակտիւացնել Ռուսաստան-Ադրբեջան-Հայաստան եռակողմ գործընթացները՝ ԵԱՀԿ Մինսկի խմբի ձեւաչափին զուգահեռ: Ըստ նրա՝ «այս ձեւաչափին յաջողւել է Երեւանին ու Բաքւին հեռու պահել Հարաւային Օսիայի սցենարի կրկնութիւնից եւ նոյնիսկ փոխադարձ համաձայնութեան հասնել մարդասիրական հարցերում, ինչպէս նաեւ ընդհուպ մօտենալ «հիմնական սկզբունքների» շուրջ փոխզիջմանը»:

«Ի լրումն ռուսական աճող մասնակցութեանը՝ այս ձեւաչափը Մոսկւային թոյլ կը տայ պահպանել համագործակցային կապերը ԵԱՀԿ ՄԽ խմբի երկու համաքնախագահների՝ Ֆրանսիայի եւ ԱՄՆ-ի հետ, որոնք պատրաստ են այս ուղղութեամբ Ռուսաստանի հետ համագործակցութեանը: Այս համատեքստում Ռուսաստանի արդիւնաւէտութիւնը կուժեղացնի Մոսկւայի եւ Վաշինգտոնի միջեւ վստահութիւնը եւ կը նպաստի աւելի լայն միջազգային խնդիրների լուծմանը»,- շեշտել է Մարկեդոնովը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։