Հա

Քաղաքական

23/02/2019 - 09:00

«Համազգային օրակարգի ձեւաւորման շատ կարեւոր առաքելութիւն ունենք». Փաշինեանը հիւրընկալել է Գարեգին Բ եւ Արամ Ա կաթողիկոսներին

ՀՀ վարչապետ Նիկոլ Փաշինեանը փետրւարի 22-ին ՀՀ կառավարութիւնում հանդիպում է ունեցել Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց կաթողիկոսի եւ Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոսի հետ:

«alikonline.ir» - ՀՀ վարչապետ Նիկոլ Փաշինեանը փետրւարի 22-ին ՀՀ կառավարութիւնում հանդիպում է ունեցել Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց կաթողիկոսի եւ Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոսի հետ:

Ինչպէս «Արմէնպրես»-ին տեղեկացրին ՀՀ կառավարության տեղեկատւութեան եւ հասարակայնութեան հետ կապերի վարչութիւնից, ողջոյնի խօսքում ՀՀ վարչապետ Նիկոլ Փաշինեանը նշել է.

«Վեհափառ Տէր, Ամենայն Հայոց կաթողիկոս, 

Վեհափառ Տէր, Մեծի Տանն Կիլիկիոյ կաթողիկոս, 

Ուրախ եմ շատ Ձեզ տեսնելու եւ հանդիպելու համար: Իհարկէ, մենք նախկինում հանդիպել ենք, եւ ես ջերմութեամբ եմ յիշում Անթիլիաս կատարած իմ այցելութիւնը՝ Ձեր գործունէութեան յօբելեանի առիթով: Վեհափառ Հայրապետի հետ մեր հանդիպումները պարբերաբար են: Դրանց մի մասը լուսաբանւում են, միւս մասը չի լուսաբանւում, եւ ես շատ կարեւոր եմ համարում այս շփումը, այս խօսակցութիւնը: Եթէ անկեղծ ասեմ, նոյնիսկ մտածում եմ, որ խօսակցութիւնը դեռ չի էլ սկսւել, որովհետեւ սա մի շրջան էր, երբ մենք առաւել թերեւս զգուշաւոր ենք մօտենում հարցերին, եւ դա բնական է: Բայց ես կարծում եմ, որ այս ընթացքում մի բանում յաջողել ենք՝ կարողացել ենք խօսակցութեան իսկապէս անկեղծ եւ բաց մթնոլորտ ունենալ: Յատկապէս այս խօսակցութիւնը կարեւոր է մեր երկրի ապագայի վերաբերեալ, մեր ժողովրդի ապագայի վերաբերեալ, որովհետեւ կարծում եմ, որ մեր համազգային օրակարգի քննարկման շատ կարեւոր առաքելութիւն ունենք եւ մեր համազգային օրակարգի ձեւաւորման շատ կարեւոր առաքելութիւն ունենք: Մենք գիտենք մի բան. ե՛ւ մենք, ե՛ւ մեր ժողովուրդը, ե՛ւ մեր եկեղեցին, ե՛ւ մեր հոգեւոր դասը մի բանում համաձայն ենք, որ մենք չենք պարտւելու եւ պիտի յաղթենք այն մարտահրաւէրին հանդիման, որը մեր պետութեան, մեր ժողովրդի առաջ է, Հայաստանի Հանրապետութեան ւ Արցախի Հանրապետութեան, Սփիւռքի: Համոզւած եմ, որ այսպիսի շփումը, եկեղեցու հետ մեր յարաբերութիւնները եւ շփումը, քննարկումներն այս հարցում ունեն կարեւոր եւ վճռական նշանակութիւն: Շատ ուրախ եմ այսօրւայ առիթի համար եւ շնորհակալ եմ այցելութեան համար»: 

 

Ն.Ս.Օ.Տ.Տ. Գարեգին Երկրորդ Ամենայն Հայոց կաթողիկոսը իր խօսքում նշել է. 

«Շնորհակալութիւն, պարոն վարչապետ:

Այսօր ուրախ առիթ ունենք Ձեզ այցելելու Մեծի Տանն Կիլիկիոյ Կաթողիկոսի՝ Արամ Առաջինի հետ: Շնորհակալ ենք այս հնարաւորութեան համար,  որ ընձեռել էք: Արամ Առաջին կաթողիկոսը, ինչպէս գիտէք, մի քանի օր է, որ արդէն գտնւում է Հայաստանում՝ Մայր Աթոռ Սուրբ Էջմիածնում, եւ մենք միասնաբար այս օրերին անդրադարձ ունեցանք մեր եկեղեցուն յուզող, մեր եկեղեցու առջեւ ծառացած զանազան հարցերի, խնդիրների, ինչպէս նաեւ քննարկման նիւթ եղաւ մեր միջեւ մեր ազգային կեանքը յուզող հարցերն ու խնդիրները: Արամ Կաթողիկոսին, անշուշտ, մենք ներկայացրեցինք, որ Ձեր հրամանով ստեղծւած է մի հյանձնախումբ պետութեան եւ եկեղեցու միջեւ առկայ հարցերն ուսումնասիրելու, քննելու եւ դրանք բարւօք լուծման առաջնորդելու: Նաեւ, բնականաբար, մենք անդրադարձանք մեր եկեղեցու առաքելութեանը, մեր ազգային կեանքում, մեր հոգեւոր կեանքում՝ կարեւորելով մեր գործունէութիւնը մեր ժողովրդի հոգեւոր միասնութեան, մեր ժողովրդի ազգային միասնութեան, ինչպէս նաեւ մեր երկրի կեանքի առաջընթացի համար: Մենք ընդգծեցինք, մասնաւոր կարգով, անհրաժեշտութիւնը, որպէսզի մեր երկրում տիրի կայունութիւնը, տիրի սիրոյ մթնոլորտը: Եւ հայ եկեղեցին այս առումով, ինչպէս ողջ մեր պատմութեան ընթացքին, երբ ունեցել ենք պետութիւն, պետականութիւն, միշտ եղել է պետութեան կողքին եւ իր զօրակցութիւնն է բերել պետութեան ապահով, անվտանգ գոյութեանը եւ նրա ազգանւէր գործունէութեանը: Այս աշխատանքները մենք այլ առիթներով էլ բազմիցս ասել ենք, որ Հայ առաքելական եկեղեցին պիտի շարունակի նոյն նախանձախնդրութեամբ, որպէսզի մեր ժողովուրդը կարողանայ միասնական ջանքերով յաղթահարել բոլոր դժւարութիւնները, բոլոր խնդիրները, որոնք ծառացած են այսօր մեր երկրի, մեր պետութեան եւ աշխարհասփիւռ մեր ժողովրդի առջեւ: Բնականաբար, դա թէ՛ Արցախի անկախ պետականութեան ճանաչման  հարցն է, թէ՛ Հայոց ցեղասպանութեան, եւ թէ՛ մեր երկրի կայուն, ապահով, առաջընթաց կեանքը:

Մենք կրկին անգամ ցանկանում ենք մեր շնորհակալութիւնը յայտնել այսօրւայ հանդիպման համար եւ մեր բարեմաղթանքները բերել Ձեզ, Ձեր գործունէութեան յաջողութեանը»: 

 

Այնուհետեւ խօսքով է հանդէս եկել Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոսը, ով, մասնաւորապէս, նշել է.

«Սիրելի պարոն վարչապետ,

ահաւասիկ սա մեր երկրորդ հանդիպումն է, եւ այս անգամ  աւելի պաշտօնապէս՝ որպէս վարչապետ ողջունում եմ Ձեր առաքելութիւնը, որովհետեւ հայրենակերտումին նւիրւած որեւէ անձի գործը սովորական իմաստով գործ չէ, այլ իր էութեամբ եւ նպատակով առաքելութիւն է, եւ այդ առաքելութիւնը  պէտք է կատարւի կոչումի գիտակցութեամբ: Եւ ես վստահ եմ, որ այս գիտակցութեամբ Դուք  լծւած էք այս առաքելութեանը՝ Ձեր շուրջն ունենալով պատասխանատուներ, երիտասարդ տարրեր նոյն առաքելութեան ճանապարհին: Հետեւաբար, Ձեզ մաղթում եմ ամենայն բարիք եւ ամբողջական յաջողութիւն, ինչպէս միշտ ասել եմ, կը կրկնեմ. Ձեր յաջողութիւնը հայրենիքի յաջողութիւնն է, հայրենիքի յաջողութիւը մեր ամբողջ ազգի յաջողութիւնն է, որովհետեւ Հայաստանի Հանրապետութիւնը Հայաստանի Հանրապետութեան սահմաններից անդին յարաբերաբար Սփիւռքին որոշ պատասխանատւութիւններ ունի: Հետեւաբար, ես Ձեր առաքելութիւնն աւելի համապարփակ կերպով եմ տեսնում: Իմ սպասումս է, որ ժողովրդի սպասումները, կարիքները հանգրւանային կերպով իրագործւեն: Այդ յանձնառութեամբ Դուք այս առաքելութեանը լծւեցիք եւ Ձեր բոլոր հրապարակային խօսքերի մէջ կարեւորութեամբ շեշտեցիք, որ ժողովրդից էք գալիս, ժողովուրդն է իշխանութիւնը, եւ ժողովրդի սպասումներն են, որոնք պէտք է մղիչ ուժը դառնան Ձեր եւ կառավարութեան առաքելութեան: Բնականաբար, պէտք է լինել իրատես. չի կարելի անմիջականօրէն զգացութիւնը պայծառակերպել եւ այդ սպասումներն իրագործել: Հանգրւանային կերպով առաջատւական ընթացքով իմ սպասումս է, որ ժողովրդի սպասումները, կարիքները, ակնկալութիւնները իրագործւեն: Եւ այս ընթացքի մէջ նաեւ իմ սպասումս է, որ կարեւորութեամբ շեշտէք բազմակարծիքութեան բերելիք նպաստը Ձեր առաքելութեամբ՝ թէ՛ խորհրդարանից ներս, թէ՛ խորհրդարանից դուրս:

Տարբեր կարծիքներ ունենալը հարստացուցիչ է՝ պայմանով, որ դրանք ինչ-որ տեղ իրար հետ հանդիպեն, իրար հետ շփւեն՝ մեր համազգային արժէքների եւ իդէալների շուրջ: Պէտք է այնպէս անել, որ մենք բեւեռացումներ չառաջացնենք: Եթէ կան բեւեռացումներ, այդ բեւեռացումները պէտք է կամրջւեն նոյն արժէքների շուրջ: Եւ այս ուղղութեամբ  եկեղեցու դերը ես շատ կարեւոր եմ համարում: Ուրախ եմ, որ Ձեր խօսքի մէջ կարեւորութեամբ անդրադարձաք եկեղեցու դերին: Վեհափառն ինքն էլ ասաց, որ եկեղեցի-պետութիւն այս յարաբերութիւնները, աւելի ճիշտ՝ գործակցութիւնը, պիտի ասեմ, նկատի ունեմ հրամայական է թէ՛ ազգաշինութեան, թէ՛ հայրենակերտումի իմաստով: Բնականաբար, կան տարբեր կարծիքներ, տարբեր մօտեցումներ: Ինչպէս ասացի, այդ տարբերութիւնները պէտք է դառնան վերջին հաշւով հարստացուցիչ, որովհետեւ մենք բոլորս էլ նոյն օղակի մէջ ենք եւ նոյն ճամփի վրա ենք գտնւում:

Հետեւաբար, պարոն վարչապետ,  մէկ անգամ եւս Ձեզ մաղթում ենք յաջողութիւն Ձեր առաքելութեան մէջ: Աստւած պահի Ձեզ եւ մեր սիրելի հայրենիքը»:

Յարակից լուրեր

  • Պոպուլիստի «ճակատագիրը»․ ասել այն, ինչ ամբոխն ուզում է լսել
    Պոպուլիստի «ճակատագիրը»․ ասել այն, ինչ ամբոխն ուզում է լսել

    Ինչո՞ւ Նիկոլ Փաշինեանը, Հայաստանի զարգացման կարճաժամկէտ եւ միջնաժամկէտ զարգացման ծրագրերը բախտի քմահաճոյքին թողած, որոշեց ներկայացնել 2050 թ. Հայաստանի «տեսլականը»։ Ընդ որում` կոնկրետ թւերով ու ցուցանիշներով, այն դէպքում, երբ ՀՀ կառավարութեան գործունէութեան հնգամեայ ծրագրում շատ քիչ են կոնկրետ թւերը։ Ի՞նչ երեւոյթի հետ գործ ունենք։

  • ՀՀ տնտեսութեան սեւ-սպիտակը. ինչու տնտեսագէտին չի ոգեւորում այն, ինչ ոգեւորել է վարչապետին
    ՀՀ տնտեսութեան սեւ-սպիտակը. ինչու տնտեսագէտին չի ոգեւորում այն, ինչ ոգեւորել է վարչապետին

    Տնտեսագէտ Սուրէն Պարսեանը խոշոր հարկատուների ցանկում դրական տեղաշարժ չի տեսնում։ Մուտքերն աւելացել են, բայց տնտեսութեան կառուցւածքը չի փոխւել։

    Ի տարբերութիւն ՀՀ վարչապետի, տնտեսագէտ Սուրէն Պարսեանը ՀՀ խոշոր հարկատուների կիսամեակային ցուցանիշներով ոգեւորւած չէ։

  • Հակասութիւն կայ վարչապետի յայտարարած թւերի եւ կառավարութեան ծրագրի միջեւ
    Հակասութիւն կայ վարչապետի յայտարարած թւերի եւ կառավարութեան ծրագրի միջեւ

    Ժողովրդագրութեան ոլորտը բաւականին բարդ ոլորտ է, եւ ցաւով պիտի արձանագրենք, որ մեր հասարակութիւնը արդէն ոչ միայն ծերացող է, այլ նաեւ ծնելիութեան ցուցանիշները էապէս բացասական միտում ունեն եւ արդէն տարիներ շարունակ, եւ դա շարունակւում է։ Այս մասին NEWS.am-ի հետ զրոյցում ասաց ՀՅԴ Բիւրոյի տնտեսական հետազօտութիւնների գրասենեակի ծրագրերի համակարգող, տնտեսագէտ Թադէոս Աւետիսեանը:

  • Վարչապետի արտայայտութիւնների մասին
    Վարչապետի արտայայտութիւնների մասին

    Մի քանի օր է անընդհատ մտածում եմ, Ստեփանակերտի Վերածնունդ հրապարակում կայացած ժողովրդական հաւաքի ընթացքում, ՀՀ վարչապետ՝ Նիկոլ Փաշինեանի արտայայտած մտքերի շուրջ, որն ոչ այլ ինչ է եթէ ոչ ժողովրդի սրտից ու հոգուց ելած խօսք ու բաղձանք: Ախր այն որ հայն է, որ չի ցանկանայ մեր ժողովրդի թիւն աւելանայ, ոչ թէ հինգ միլիոնով, այլ կրկնակի եւ մի բան էլ աւել, քանզի քանակն է որ ծնում է նաեւ համապատասխան որակ:

  • ՀՀ վարչապետը Հանրապաետութեան նախագահին հրաւիրել է ԵԱՏՄ բարձրագոյն խորհրդի նիստին
    ՀՀ վարչապետը Հանրապաետութեան նախագահին հրաւիրել է ԵԱՏՄ բարձրագոյն խորհրդի նիստին

    ՀՀ վարչապետ Նիկոլ Փաշինեանը հանրապետութեան նախագահ դոկտ. Հասան Ռոհանիին հրաւիրել է Երեւան` մասնակցելու հոկտեմբերին կայանալիք ԵԱՏՄ բարձրագոյն խորհրդի նիստին:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։