Հա

Քաղաքական

18/03/2019 - 09:30

Մեր քաղաքում առաջնահերթութեան կարգով բազում խնդիրներ կան

Ինչպէս յայտնի է, Օպերայի յարակից տարածքի ապամոնտաժւող սրճարաններից երկուսը ՀՅԴ-ականներինն է: Մասնաւորապէս, սրճարաններից մէկը պատկանում է ԱԺ նախկին պատգամաւոր դաշնակցական Միքայէլ Մանուկեանին, որ Երեւանի աւագանու արտահերթ ընտրութիւններում գլխաւորում էր ՀՅԴ համամասնական ցուցակը: Սակայն «Ժողովուրդ» օրաթերթին յայտնի դարձաւ, որ վերջինիս պատկանող սրճարանը դեռ չի ապամոնտաժւելու, որովհետեւ սրճարանի հետ կապւած գործը դատարանում է:

«alikonline.ir» - Ինչպէս յայտնի է, Օպերայի յարակից տարածքի ապամոնտաժւող սրճարաններից երկուսը ՀՅԴ-ականներինն է: Մասնաւորապէս, սրճարաններից մէկը պատկանում է ԱԺ նախկին պատգամաւոր դաշնակցական Միքայէլ Մանուկեանին, որ Երեւանի աւագանու արտահերթ ընտրութիւններում գլխաւորում էր ՀՅԴ համամասնական ցուցակը: Սակայն «Ժողովուրդ» օրաթերթին յայտնի դարձաւ, որ վերջինիս պատկանող սրճարանը դեռ չի ապամոնտաժւելու, որովհետեւ սրճարանի հետ կապւած գործը դատարանում է: Կարճ ասած՝ քաղաքապետարանն այս մասով սպասում է դատարանի որոշմանը: «Ժողովուրդ» օրաթերթը տեղի ունեցող իրադարձութիւնների մասին զրուցել է Հայ Յեղափոխական Դաշնակցութեան Գերագոյն մարմնի ներկայացուցիչ Իշխան Սաղաթելեանի հետ:

 

- Պարո՛ն Սաղաթելեան, տեղի ունեցող իրադարձութիւնների մասին ի՞նչ կարծիք ունի Դաշակցութիւնը: 

- Քանի որ դա մեծ քաղաքական հարց չէ, այս պահին նման խնդիր չկայ պաշտօնական կարծիք յայտնելու, բայց երեւոյթը, իհարկէ, մտահոգիչ է մեզ համար: Ու նաեւ քաղաքացիների դժգոհութիւնը ու նաեւ ոստիկանութեան ձեռնարկած քայլերը, եւ յայտնի է այս ամէնի պատճառը: Մեր քաղաքում առաջնահերթութեան կարգով բազում-բազում խնդիրներ կան: Այսինքն՝ այդ ամէն ինչը թողնել միանգամից, մտածել Օպերայի տարածքի սրճարանները հանելու եւ քանդելու մասին, այս տրամաբանութեան մէջ չի տեղաւորւում, եւ, բնականաբար, մարդիկ սոցիալական խնդիր ունեն, աշխատատեղերի խնդիր ունեն, եւ դժգոհութիւնը շատ հասկանալի է մեզ համար:

 

- Քանի որ Դաշնակցութիւնը եղել է իշխանութեան մէջ, ուզում ենք հետաքրքրւել՝ որքանով էք տեղեակ դրա հետ կապւած փաստաթղթերից: Արդեօք ամէն բան այն ժամանակ օրինակա՞ն է եղել քաղաքապետարանի կողմից:

- Մենք փաստաթղթերից եւ օրինականութիւնից տեղեակ չենք: Ու եթէ նման գործողութիւններ կատարւում են, ապա ամէն ինչ պէտք է լինի օրէնքի տառին համապատասխան: Բնականաբար, մենք ծանօթ չենք այս ներքին որոշումներին եւ փաստաթղթերին, բայց գիտենք, որ կան սեփականատէրեր, որոնք իրօք ունեն փաստաթղթեր, որոնք էլ յայտարարում են եւ ցոյց են տալիս: Ամէն բան մեր ուշադրութեան կենտրոնում է: Կարեւորն այն է, որ ինչ տեղի է ունենում, տեղի ունենայ օրինականութեան սահմաններում:

 

- Այսինքն՝ այս փուլում Դուք բողոքողների տեսակէ՞տն էք պաշտպանում:

- Նրանց տեսակէտը մեզ համար հասկանալի եւ ընդունելի է, որովհետեւ մարդիկ պատճառաբանութիւններ են հնչեցնում; Նախ` ներդրումների խնդիր կայ: Մարդկանց պէտք է ժամկէտ տան: Աշխատատեղերի խնդիր կայ, ներդրումները հետ բերելու խնդիր կայ: Եթէ նախկինում նման բաներ են տեղի ունեցել, մէկ օրւայ մէջ գալ, ասել` ամէն ինչ քանդում ենք, եւ դրանով փակում ենք բոլոր հարցերը, եւ դրա կողքին խօսել երկիր բերւող ներդրումներից, տնտեսութիւնը խթանելուց, սա չի ընկալւում այս տրամաբանութեան մէջ: Երբ որ քաղաքային իշխանութիւնը իր առջեւ դրւած խնդիրների մեծ մասը կիրականացնի, կը գայ, կը հասնի այդ տարածքներին, դրանով էլ կը զբաղւի, եւ այդ դժգոհութիւնը չի լինի: Քաղաքացիները պարզ մի բան են ասում՝ բազմաթիւ խնդիրները, որ կայ այս քաղաքի առջեւ, չէք լուծել, հենց առաջին օրը տրակտորը բերել քանդում էք:

 

- Այս փուլում լաւագոյն լուծումը ո՞րը կը լինի:

- Լաւագոյն լուծումը կը լինի այն, որ տնտեսվարողների հետ նստեն, մանրամասն խօսեն, հասկանան ճիշտ ելքերը եւ ճանապարհները գտնեն, ոչ թէ բերեն ոստիկանական զօրքը շարեն, հետեւից տեխնիկան մտցնեն, սկսեն քանդել:

 

- Տեղեակ ենք, որ դաշնակցական մի քանի գործիչներ եւս սրճարաններ ունեն այդ տարածքում: Օրինակ՝ պարոն Միքայէլ Մանուկեանը: Իր հետ խօսե՞լ էք այս մասին: Ի՞նչ է պատրաստւում անել:

- Կայ դաշնակցական, որը սրճարաններից մէկում ինչ-որ մի բաժնեմաս ունի, բայց դա ընդհանրապէս կուսակցութեան եւ կուսակցութեան քաղաքական գծի եւ դիրքորոշումների հետ չի կարող կապ ունենալ:

 

- Ընդամենը մի հոգի՞:

- Այո, հաւանաբար: Բայց դրանով մենք չենք առաջնորդւում եւ մենք էստեղ մեր կուսակցական ընկերոջը կամ միւսին պաշտապնելու խնդիր չունենք: 5-6 սրճարանի մասին է խօսքը:

 

- Օրինակ` կենտրոնի թաղապետը ասում է, որ օրէնքով աւելի քիչ աշխատակիցներ են գրանցւած, քան իրականում կան:

- Այդ ամէնը չգիտեմ: Պէտք է տեղում դնել, նայել, հասկանալ, բայց ակնյայտ է, չէ՞, որ փողոց դուրս եկածների մեծ մասը այդտեղի աշխատակիցներ են եւ շատ յստակ խնդիրներ են բարձրացնում՝ վաղը ինչո՞վ ենք զբացւելու, որտե՞ղ ենք աշխատելու: Միայն աշխատակիցների խնդիրը չէ: Ե՛ւ սեփականատէրերի խնդիրն է, ե՛ւ այլ քաղաքացիների խնդիրն է: Ինչո՞ւ միայն այդ զբօսայգին: Ուրիշ տեղերում էլ նման խնդիրներ կան: Ընդհանրապէս, եթէ խօսում ենք քաղաքը սխալ կառուցապատելու մասին, ապա այս քաղաքի կէսը պէտք է քանդւի: Ա՞յս ենք ուզում: Եթէ նման բան կայ, թող ասեն, սկսում ենք այստեղից, այսքան բան ենք քանդելու, մեր հասարակութիւնն է, թող որոշի իր հետագայ քայլերը: Եթէ քաղաքի համար լաւ բան է տեղի ունենում, մենք դէմ չենք, բայց պէտք է մինչեւ վերջ քննարկենք, հասկանանք:

 

- Հնարաւո՞ր է, որ Դուք՝ որպէս Հայաստանի պատմութեան մէջ մեծ դեր ունեցող քաղաքական ուժի ներկայացուցիչ, խօսէք պարոն Հայկ Մարութեանի կամ աւագանու անդամների հետ՝ փորձելով ինչ-որ առաջարկներ ներկայացնել:

- Տեսնենք` ընթացքը ինչպէս է զարգանում: Հետագայում ինչ կը լինի, ինչպիսի յայտարարութեամբ հանդէս կը գանք, ինչ նախաձեռնութեամբ, այս պահին որոշում չունենք: Մեր սպասելիքն այն է, որ քաղաքային իշխանութիւնները, մասնաւորապէս` քաղաքապետը, կը հասկանայ, որ նման մեթոդներով հարցերը չեն լուծւում, եւ տնտեսվարող սիւբեկտների հետ նորմալ բանակցութիւններ կը վարեն ճիշտ լուծումներ գտնելու համար:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։