Հա

Քաղաքական

13/04/2019 - 10:30

Փաշինեանի՝ Իրանին վերաբերող հարցի պատասխանը շատ բարձր է գնահատւել

Ապրիլի 11-ին ՀՀ վարչապետ Նիկոլ Փաշինեանը ելոյթով հանդէս է եկել ԵԽԽՎ գարնանային նստաշրջանի լիագումար նիստում, որից յետոյ պատասխանել է ԵԽԽՎ պատւիրակութեան անդամների կողմից բարձրացրած հարցերի:

«alikonline.ir» - Ապրիլի 11-ին ՀՀ վարչապետ Նիկոլ Փաշինեանը ելոյթով հանդէս է եկել ԵԽԽՎ գարնանային նստաշրջանի լիագումար նիստում, որից յետոյ պատասխանել է ԵԽԽՎ պատւիրակութեան անդամների կողմից բարձրացրած հարցերի:

Իրանագէտ Գոհար Իսկանդարեանն, անդրադառնալով Իրանին վերաբերող հարցի Ն. Փաշինեանի պատասխանին, «Orer.am»-ի հետ զրոյցում նշեց, որ շատ հետաքրքիր էր ՀՀ վարչապետի այն դիտարկումը, որ Իրանի շուրջ ծաւալւող խնդիրների պատճառով որոշակի առումով տուժում է նաեւ շրջափակման մէջ գտնւող Հայաստանը:

«Հարցն իսկապէս կարեւոր էր, որը բարձրացւեց ԵԽԽՎ-ի բարձր ամբիոնից, քանի որ, Հայաստանը հարեւան Իրանի հետ տնտեսական կապերի զարգացման խնդիր ունի: Այսօր մենք, փաստօրէն, չենք կարողանում այդ կապերը զարցացնել մի քանի պատճառով, որոնցից մէկը, օրինակ, երկու երկրների բանկային համակարգերի ոչ լիարժէք աշխատանքն է: Միացեալ Նահանգները, Իրանի բանկային համակարգի նկատմամբ պատժամիջոցներ կիրառելով, դժւարացնում է նաեւ Հայաստան-Իրան առեւտրաշրջանառութիւնը, ինչը մեծ խնդիր է: Այս եւ այլ խնդիրների մասին պէտք է բարձրաձայն խօսել, քանի որ Հայաստանը երկու կողմից շրջափակւած է, եւ եթէ խնդիր ունենայ նաեւ Իրանի հետ, ապա մեզ համար յաւելեալ բարդութիւններ կառաջանան: Երէկւայ ելոյթում, փաստօրէն, այդ մասին վարչապետը հնչեցրեց աշխարհի ամենաբարձր ամբիոններից մէկից, ինչն արձանագրելը շատ կարեւոր է»,- նշեց Գ. Իսկանդարեանը:

Փաշինեանի կողմից միջազգային բարձր ամբիոնում հնչեցրած յաջորդ կարեւոր ուղերձն, ըստ իրանագէտի այն է, որ Հայաստանի բոլոր Եւրոպական գործընկերները ողջունում են Հայաստան-Իրան յարաբերութիւնները, քանի որ փաստացի դրան այլընտրանք չկայ: Վարչապետի կողմից կարեւոր էր արձանագրել նաեւ, որ Հայաստանը յայտնւել է մի այնպիսի իրավիճակում, որ պէտք է բարեկամների միջեւ ընտրութիւն կատարի, ինչը եթէ չասենք անհնարին է, ապա շատ դժւար է:

«Կարծում եմ այդ ուղերձը եւս շատ կարեւոր էր Իրանի Իսլամական Հանրապետութեան համար, քանի որ միջազգային բարձր հարթակում բարձրաձայնւել է այն մասին, որ այդ պատժամիջոցների արդիւնքում ոչ միայն Իրանն է տուժում, այլեւ Իրանի հետ համագործակցող միւս երկրները նոյնպէս: Կարեւոր արձանագրում էր, որ միւս երկրների կողմից Իրանի հետ ունեցած խնդիրները թէեւ չեն վերաբերում Հայաստանին, սակայն Հայաստանը եւս դրանց հետեւանքով տուժում է»,- ասաց Գ. Իսկանդարեանը:

Խօսելով Իրանի շուրջ կրկին մութ ամպեր կուտակւելու մասին՝ իրանագէտը նշեց, որ ԱՄՆ-ը գնալով աւելի ու աւելի է խստացնում կիրառւող պատժամիջոցները, ինչը լրացուցիչ խնդիրներ է առաջացնում: Մտահոգիչ է նաեւ այն, որ ԻՀՊԿ-ն յայտնւել է Միացեալ Նահանգների կողմից ահաբեկչական խմբերի շարքին է դասւելու խնդրի առջեւ:

«Պէտք է նշել, որ պատմութեան մէջ առաջին անգամ պետութեան զինւած ուժերն ամբողջութեամբ ահաբեկչական զինւած խմբաւորում որակելու փորձ է արւում: Անհասկանալի է, սակայն, թէ Միացեալ Նահանգներն ինչ ձեւակերպումներով է այն հիմնաւորելու, երբ խօսքը երկրի ողջ զինւած ուժերի մասին է: Այս պարագայում Հայաստանի կողմից Իրանին աջակցելու քայլը պէտք է տարբեր մակարդակներում Իրանի հետ կապւած յարաբերութիւների բարձրաձայնումը լինի, քանի որ Հայաստանն այն ներուժը չունի, որ կարողանայ այլ օժանդակութիւն ցուցաբերել հարեւան երկրին: Պէտք է նշեմ նաեւ, որ Իրանի ղեկավարութիւնը շատ բարձր է գնահատում Հայաստանի կողմից իրեն ձեռք մեկնելու ցանկացած քայլ, ինչը Իրանը չի տեսնում ո՛չ Վրաստանի, ո՛չ էլ Ադրբեջանի կողմից»,- ասաց Գ. Իսկանդարեանը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։