Հա

Քաղաքական

12/05/2019 - 09:50

«Հայաստան-Արցախ ռազմավարական դաշինք» ֆորումի հռչակագիրը

«Հայաստան-Արցախ ռազմավարական դաշինք» ֆորումի հռչակագիրը

Հիմք ընդունելով Հայաստանի անկախութեան մասին 1990 թ. օգոստոսի 23-ի, ԼՂՀ հռչակման մասին 1991 թ. սեպտեմբերի 2-ի հռչակագրերը եւ արձանագրելով Արցախի ինքնիշխանութեան հռչակման ու դրան յաջորդած գործընթացի օրինականութիւնն ու համապատասխանութիւնը միջազգային եւ ներպետական իրաւական կառուցակարգերին, յարգելով Արցախի ժողովրդի՝ սեփական իշխանութիւնները ձեւաւորելու անօտարելի իրաւունքը, հաստատելով հաւատարմութիւնը Միաւորւած ազգերի կազմակերպութեան կանոնադրութեան նպատակներին, սկզբունքներին եւ Հելսինկեան եզրափակիչ ակտին, կարեւորելով միջազգային իրաւունքի եւ, մասնաւորապէս, ՄԱԿ-ի կանոնադրութեան՝ միջազգային խաղաղութեան, անվտանգութեան եւ մարդու իրաւունքների պաշտպանութեան հարցերի փոխկապակցւածութիւնն ու անքակտելիութիւնը, հաշւի առնելով, որ Ադրբեջանի կողմից Արցախի շրջափակումը եւ իբրեւ միջազգային իրաւունքի սուբեկտ նրա ճանաչւած չլինելու հանգամանքը էապէս սահմանափակում են Արցախի Հանրապետութիւնում մարդու իրաւունքների ու ազատութիւնների լիարժէք իրացումը,

համոզւած լինելով, որ՝

- Ղարաբաղեան հիմնախնդրի յանգուցալուծման եւ տարածաշրջանում կայուն խաղաղութեան, անվտանգութեան ապահովման երաշխիքը ժողովուրդների իրաւահաւասարութեան եւ ինքնորոշման իրաւունքի անվերապահ կիրառումն է,

- Արցախի Հանրապետութեան միջազգային ճանաչման գործընթացը համազգային առաջնահերթութիւն է,

- հակամարտութեան չկարգաւորւած վիճակը ոչ մի կերպ չի կարող կաշկանդել այդ տարածքներում բնակւող մարդկանց հիմնարար իրաւունքներն ու ազատութիւնները,

նկատի ունենալով՝

- 1994 թ. մայիսի 12-ից հրադադար հաստատելու մասին Լեռնային Ղարաբաղի, Ադրբեջանի եւ Հայաստանի միջեւ կնքւած համաձայնագրով եւ հրադադարի անժամկէտ ռեժիմը ամրագրող հետագայ եռակողմ համաձայնագրերով ձեռք բերւած պարտաւորութիւններն ամրապնդելու անհրաժեշտութիւնը,

- 1994 թ. Բուդապեշտում կայացած ԵԱՀԿ գագաթաժողովի որոշմամբ ամրագրւած լիարժէք եռակողմ բանակցային ձեւաչափի վերականգնման առաջնահերթութիւնը,

- Հայաստանի յանձնառութիւնը՝ երաշխաւորելու Արցախի ժողովրդի անվտանգութիւնն ու ինքնորոշման իրաւունքի իրացումը եւ անվտանգութեան ապահովման հետ կապւած հարցերում համաձայնեցւած գործողութիւնների անհրաժեշտութիւնը,

- 2016 թ. ապրիլեան պատերազմական գործողութիւններից յետոյ հրադադարի ռեժիմի վերահսկման վերաբերեալ «Վիեննա-Սանկտ Պետերբուրգ-Ժնեւ» օրակարգի եւ այդ շրջանակներում ձեռք բերւած համաձայնութիւնների խափանումը, Ադրբեջանի կողմից խաղաղ կարգաւորման միջազգայնօրէն ընդունւած նորմերից փաստացի հրաժարումը, ինչպէս նաեւ պատերազմը վերսկսելու նրա շարունակական սպառնալիքները,

- բանակցային գործընթացի լիարժէքութեան եւ արդիւնաւէտութեան ապահովման առումով Արցախի Հանրապետութեան լիիրաւ մասնակցութեան անխուսափելիութիւնը,

- բանակցային գործընթացում Արցախի Հանրապետութեան անկախ կարգավիճակի, նրա տարածքային ամբողջականութեան վերականգնման եւ անվտանգութեան հետ կապւած հարցերի լուծման առաջնահերթութիւնը,

- Ադրբեջանի կողմից Արցախի շրջափակման եւ մեկուսացման քաղաքականութեանը հակազդելու անհրաժեշտութիւնը,

- մարդու հիմնարար իրաւունքների իրացման, անվտանգութեան, ռազմական համագործակցութեան, արտաքին քաղաքական գործունէութեան եւ բազմաթիւ այլ բնագաւառների հետ կապւած Հայաստանի եւ Արցախի Հանրապետութիւնների իրաւայարաբերութիւնների՝ մինչ օրս լիարժէք կարգաւորւած չլինելու հանգամանքը, ինչպէս նաեւ մինչեւ հակամարտութեան վերջնական խաղաղ կարգաւորումը Հայաստանի Հանրապետութեան եւ Արցախի Հանրապետութեան իրաւապայմանագրային յարաբերութիւնները նոր մակարդակի բարձրացնելու անհրաժեշտութիւնը.

«Հայաստան-Արցախ ռազմավարական դաշինք» ֆորումը, ի պաշտպանութիւն այս դաշինքի պատշաճ իրաւական ամրագրման,

- նախաձեռնում է համահայկական աջակցութիւն ապահովելու գործընթաց,

- ձեւաւորում է այդ աշխատանքները կազմակերպող մարմին եւ

- կոչ է անում Հայաստանի Հանրապետութեան եւ Արցախի Հանրապետութեան օրէնսդիր եւ գործադիր իշխանութեան մարմիններին՝ համապատասխան քայլեր ձեռնարկել հնարաւորինս սեղմ ժամկէտներում իրաւապայմանագրային յարաբերութիւնների բացը լրացնելու եւ համապարփակ համագործակցութեան պայմանագիր կնքելու ուղղութեամբ։

ք. Ստեփանակերտ, Արցախի Հանրապետութիւն

2019 թ. մայիսի 7

Յարակից լուրեր

  • Լսարան-հանդիպում` «Հայաստան-Արցախ ռազմավարական դաշինք» նիւթով
    Լսարան-հանդիպում` «Հայաստան-Արցախ ռազմավարական դաշինք» նիւթով

    Կազմակերպութեամբ ՀՅԴ «Գ. Նժդեհ» կոմիտէի քարոզչական յանձնախումբին երէկ` ուրբաթ, 31 մայիս 2019-ին, երեկոյեան ժամը 8:30-ին, Զալքայի ՀՅԴ «Գ. Նժդեհ» ակումբին մէջ տեղի ունեցաւ լսարանային հանդիպում մը` «Հայաստան-Արցախ ռազմավարական դաշինք» նիւթով, որուն զեկուցաբերն էր ՀՅԴ Լիբանանի Կեդրոնական կոմիտէի անդամ, «Հայաստան-Արցախ ռազմավարական դաշինք»-ի կազմակերպական կոմիտէի անդամ Մելիք Գարագաւորեան:

  • «Հայաստան-Արցախ ռազմավարական դաշինք»-ն աւելի արդիւնաւէտ կը դարձնի բանակցային գործընթացը
    «Հայաստան-Արցախ ռազմավարական դաշինք»-ն աւելի արդիւնաւէտ կը դարձնի բանակցային գործընթացը

    Ստեփանակերտում մայիսի 7-ին ՀՅԴ նախաձեռնութեամբ անցկացւեց «Հայաստան-Արցախ ռազմավարական դաշինք» ֆորումը, որի ընթացքում ընդունւեց հռչակագիր եւ ընտրւեց կազմկոմիտէ: Մայիսի 27-ին ՀՅԴ Բիւրոյի գրասենեակում գումարւեց կազմկոմիտէի երկրորդ նիստը՝ օրակարգում ունենալով կազմկոմիտէի գործունէութեան հաստատումը:

  • Ռազմավարական դաշինք՝ միասնական օրակարգի հարթակ
    Ռազմավարական դաշինք՝ միասնական օրակարգի հարթակ

    Մայիսի առաջին տասնօրեակում Արցախեան թեման միշտ էլ շօշափւել է: Դա առաջին հերթին պայմանաւորւած է Շուշիի ազատագրման օրւայ նշումով եւ Արցախեան գաղափարի շուրջ յաղթանակի օրւայ առիթով համախմբման արտայայտիչ դրսեւորմամբ: Այս տարին եւս բացառութիւն չեղաւ:

  • Աւելորդ վախեր Հայաստան-Արցախ ֆորումի շուրջ
    Աւելորդ վախեր Հայաստան-Արցախ ֆորումի շուրջ

    ՀՅ Դաշնակցութեան նախաձեռնութեամբ Ստեփանակերտում այս օրերին տեղի է ունենում «Հայաստան-Արցախ ռազմավարական դաշինք» ֆորումը՝ Հայաստանի Հանրապետութեան եւ Արցախի Հանրապետութեան իրաւապայմանագրային յարաբերութիւնները նոր մակարդակի բարձրացնելու օրակարգով: Ֆորումին մասնակցում են Հայաստանի, Արցախի եւ սփիւռքի քաղաքական, ռազմական, փորձագիտական, հանրային շրջանակները ներկայացնող` այդ գաղափարի մի քանի տասնեակ կողմնակիցներ:

  • «Սփիւռքի հետ կապերի ամրապնդման գործը միայն Դաշնակցութեանն է մնացել». ՌԱԿ ատենապետ
    «Սփիւռքի հետ կապերի ամրապնդման գործը միայն Դաշնակցութեանն է մնացել». ՌԱԿ ատենապետ

    Կարեւոր է, որ ունենանք Արցախ-Հայաստան ռազմավարական դաշինքը. Ստեփանակերտում «Հայաստան-Արցախ ռազմավարական դաշինք» ֆորումում ելոյթի սկզբում նշեց Ռամկավար-ազատական կուսակցութեան ատենապետ, «Ազգ» շաբաթաթերթի գլխաւոր խմբագիր Յակոբ Աւետիքեանը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։