Հա

Քաղաքական

15/05/2019 - 08:40

Ռոբերտ Քոչարեանի համար երաշխաւորագիր ներկայացրած Բակօ Սահակեանը եւ Արկադի Ղուկասեանը կը ներկայանան դատարան

Երեւան քաղաքի ընդհանուր իրաւասութեան դատարանում, երէկ՝ մայիսի 14-ին նախագահութեամբ Դաւիթ Գրիգորեանի, շարունակւել է ՀՀ երկրորդ նախագահ Ռոբերտ Քոչարեանի, ՀՀ պաշտպանութեան նախկին նախարար Սէյրան Օհանեանի, ՀԱՊԿ նախկին գլխաւոր քարտուղար Իւրի Խաչատուրովի, ՀՀ նախագահի աշխատակազմի նախկին ղեկավար Արմէն Գէորգեանի գործով դատավարութիւնը:

«alikonline.ir» - Երեւան քաղաքի ընդհանուր իրաւասութեան դատարանում, երէկ՝ մայիսի 14-ին նախագահութեամբ Դաւիթ Գրիգորեանի, շարունակւել է ՀՀ երկրորդ նախագահ Ռոբերտ Քոչարեանի, ՀՀ պաշտպանութեան նախկին նախարար Սէյրան Օհանեանի, ՀԱՊԿ նախկին գլխաւոր քարտուղար Իւրի Խաչատուրովի, ՀՀ նախագահի աշխատակազմի նախկին ղեկավար Արմէն Գէորգեանի գործով դատավարութիւնը: Հաղորդում է «Yerkir.am»-ը:

Դատարանը շարունակել է քննել Ռոբերտ Քոչարեանի կալանքի` հիմնաւոր լինել-չլինելու հարցը:

Քոչարեանի պաշտպաններից Յովհաննէս Խուդոյեանը նիստի ընթացքում ներկայացրեց Արցախի նախկին եւ ներկայիս նախագահներ Արկադի Ղուկասեանի եւ Բակօ Սահակեանի անձնական երաշխաւորութիւնը Քոչարեանի խափանման միջոց կալանաւորումը փոխելու վերաբերեալ։

«Կարւորելով, որ գործի բացայայտումը պէտք է կատարւի բացառապէս իրաւական ճանապարհով՝ արդար դատաքննութեան իրականացման միջոցով, եւ հաշւի առնելով Արցախի Հանրապետութեան առաջին եւ ՀՀ երկրորդ նախագահ Ռոբերտ Քոչարեանի մեծ վաստակը երկու Հանրապետութիւնների կայացման հարցում, նրա հսկայական աւանդը Արցախեան պատերազմում եւ Հայոց բանակաշինութեան մէջ, երաշխաւորում ենք՝ Արցախի Հանրապետութեան առաջին եւ ՀՀ երկրորդ նախագահ Ռոբերտ Քոչարեանի նկատմամբ կալանաւորումը որպէս խափանման միջոց դադարեցնելու դէպքում վերջինս կը դրսեւորի պատշաճ վարքագիծ, չի խոչընդոտի գործի քննութեանը, չի խուսափի վարոյթ իրականացնող մարմին ներկայանալուց, չի կատարի Քր. օրէնսգրքով չթոյլատրւած արարք: Երաշխաւորում ենք ազատութեան պայմաններում դատավարութեան ամբողջ ընթացքում նրա դատարան ներկայանալը, դատավարական պարտաւորութիւնների կատարումը, ուստի խնդրում ենք կիրառւած կալանաւորումը փոխարինել ազատութիւնից չզրկելու հետ կապւած այլ խափանման միջոցով»,- ասւած է երաշխաւորագրում: 

Նախագահող դատաւոր Դաւիթ Գրիգորեանը նշեց, որ երաշխաւոր հանդէս եկող անձինք պէտք է ներկայանան դատարան եւ վերահաստատեն իրենց կամաարտայայտութիւնը, դա պահանջում է Քրէական դատավարութեան օրէնսգիրքը: 

«Բնական է, որ պէտք է դատարան հրաւիրւեն երաշխաւորները, պէտք է պահպանւի դատարանի կողմից նշւած ընթացակարգը, դատարանը պէտք է համոզւի` նրանց կամաարտայայտութեան հետ կապւած, որից յետոյ կը լսի միւս կողմի կարծիքը եւ կը քննարկի միջնորդութիւնը»,- ասաց նա: 

Քոչարեանի խափանման միջոցի հարցի քննութիւնը կը շարունակւի այսօր՝ մայիսի 15-ին։ Պաշտպանները կը շարունակեն ներկայացնել իրենց դիրքորոշումը, ինչից յետոյ դատարանը երկրորդ նախագահի կալանքը փոփոխելու, վերացնելու կամ անփոփոխ թողնելու վերաբերեալ որոշում կը կայացնի:

Իսկ երէկւայ նիստի աւարտին Քոչարեանը շրջւեց, շնորհակալութիւն յայտնեց իր աջակիցներին եւ ասաց, որ արդէն կարող են գնալ։ Աջակիցները նրան ճանապարհեցին ծափերով։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։