Հա

Քաղաքական

11/08/2019 - 12:30

101-ամեայ ՀՄԸՄ-ի համար Արցախի մասնաճիւղն ամենամեծ նւէրն է

Համահայկական 7-րդ ամառային խաղերի բացման արարողութեանը մասնակցելու եւ Արցախի իշխանութեան ներկայացուցիչների հետ հանդիպելու առիթով այս օրերին Արցախում էր Հայ մարմնակրթական ընդհանուր միութեան Կենտրոնական վարչութեան ատենապետ Գառնիկ Մկրտչեանը: «Ապառաժ»-ի հետ հարցազրոյցում Գառնիկ Մկրտչեանը նշել է, որ տարիների երազ էր Արցախում ՀՄԸՄ-ի մասնաճիւղ ունենալը:

«alikonline.ir» - Համահայկական 7-րդ ամառային խաղերի բացման արարողութեանը մասնակցելու եւ Արցախի իշխանութեան ներկայացուցիչների հետ հանդիպելու առիթով այս օրերին Արցախում էր Հայ մարմնակրթական ընդհանուր միութեան Կենտրոնական վարչութեան ատենապետ Գառնիկ Մկրտչեանը: «Ապառաժ»-ի հետ հարցազրոյցում Գառնիկ Մկրտչեանը նշել է, որ տարիների երազ էր Արցախում ՀՄԸՄ-ի մասնաճիւղ ունենալը: «Արցախի անկախացումից յետոյ սկզբնական շրջանում սկսել էինք աշխատել Արցախում, բայց դրանից յետոյ ՀՄԸՄ-ի գործունէութիւնը դադարեց, որից յետոյ զանազան պատճառներով հնարաւոր չեղաւ վերականգնել: ՀՄԸՄ Կենտրոնական վարչութիւնը Արցախի նախագահների, վարչապետների, նախարարների հետ շփումներում միշտ էլ հետամուտ է եղել այս հարցի լուծմանը, բայց հնարաւոր չի եղել իրագործել արտօնութիւն ստանալու, նաեւ սկաուտական կազմակերպութեան հնարաւորութիւններին չհաւատալու պատճառներով: Հիմա կարող եմ ասել, որ Արցախի իշխանութիւնների հետ մեր աշխատանքի եւ շրջանի մարմինների աշխատանքի արդիւնքում մենք կարողացանք մեր առաջին պաշտօնական կորիզը ստեղծել»,- ասել է ՀՄԸՄ-ի ԿՎ ատենապետը՝ յոյս յայտնելով, որ այն լաւագոյն թթխմորը պիտի դառնայ Արցախում լուրջ գործունէութիւն տանելու համար:

Հայ մարմնակրթական ընդհանուր միութիւնը ստեղծւել է 1918 թ. Կ. Պոլսում: Այնուհետեւ Հայաստանի Առաջին Հանրապետութեան լուսաւորութեան նախարար Նիկոլ Աղբալեանի հրաւէրով սկսել է գործել Հայաստանում: 1921 թ. խորհրդային կարգերի հաստատումից յետոյ դարձել է սփիւռքեան կազմակերպութիւն: Սկզբնական շրջանում Միջին Արեւելքի երկրներում է լայն աշխատանք տարել, որից յետոյ սկսել է Միջին Արեւելքից տարածւել, նաեւ, հայերի տեղաշարժի հետ կապւած, հասել Եւրոպա, Ամերիկա, Աւստրալիա: Միութեան անդամների թիւն այժմ հասնում է 28 հազարի: ՀՄԸՄ-ի ՀԱՍԿ-ը (Հայաստանի ազգային սկաուտական կազմակերպութիւն) Սկաուտական շարժման միջազգային կազմակերպութեան անդամ է եւ ներկայացնում է Հայաստանի Հանրապետութիւնը:

«Ամբողջ աշխարհում այսօրւայ դրութեամբ ՀՄԸՄ-ն առանց Արցախի 110 մասնաճիւղ ունի, 111-րդը պիտի դառնայ Արցախի մասնաճիւղը: Արդէն նշանակւել է վարչութիւն, որի միջոցով սկսելու ենք մեր գործունէութիւնը: Երիտասարդ գործիչ է գործուղւել այստեղ, ում օգնութեամբ միութիւնը ծիլեր կարձակի եւ կը սկսի բերք տալ»,- մանրամասնել է Գառնիկ Մկրտչեանը՝ աւելացնելով, որ ՀՄԸՄ-ի գործունէութիւնն աշխարհով մէկ տարածւած է սկաուտական եւ մարզական ուղղութիւններով, որոնց աշխատանքները համակարգում են վարչութիւնները, յանձնախմբերը: «Մայիս ամսին հիմնեցինք երիտասարդական բաժին, որտեղ համախմբւում են 18-30 տարեկան երիտասարդներ, որոնք նախկինում խմբապետներ, մարզիկներ կամ անդամներ են եղել»,- յաւելել է մեր զրուցակիցը:

Ինչ վերաբերում է Արցախի շրջաններում մասնաճիւղեր բացելու հնարաւորութեանը, ապա ՀՄԸՄ ատենապետը նախ անհրաժեշտ է համարում Ստեփանակերտում ամուր հիմքերի վրայ դնել կառոյցը, որից յետոյ կարող են մտածել շրջաններում տարածւելու մասին: «ՀՄԸՄ-ն ունի բրգաձեւ կառավարման համակարգ: Ներքեւի խաւը անդամներն են, անդամներից յետոյ՝ վարչութիւնները, յանձնախմբերը, այնուհետեւ՝ Շրջանային վարչութիւնները եւ բարձրագոյն օղակը՝ Կենտրոնական վարչութիւնը: Կենտրոնական վարչութեան նստավայրը Լիբանանն է, իսկ անդամներն ընտրւում են տարբեր շրջաններից: Այժմ Կենտրոնական վարչութիւնն ունի 13 անդամ»,- ասել է Գառնիկ Մկրտչեանը:

Անդրադառնալով Արցախում մասնաճիւղ բացելու կարեւորութեան մասին հարցին, ՀՄԸՄ ատենապետը նշել է, որ յատկապէս սփիուռքահայութեան համար Արցախը իւրայատուկ նշանակութիւն ունի. «Մեր ժողովրդի հայրենիքի հետ ամենազգացական կապւածութիւնը Արցախն է: Հայաստանն արդէն անկախ է, բայց Արցախն ուրիշ պատմութիւն է: Արցախում մասնաճիւղ չունենալը մեծ վէրք էր, վիրաւորանք: Տարբեր քաղաքների, երկրների հայ համայնքների հետ հանդիպումների ժամանակ միշտ այս հարցն էին բարձրացնում: Պատասխանում էի, որ հարցն ընթացքի մէջ է, որովհետեւ չէի կարող ուրիշ պատասխան տալ: Այդ իսկ պատճառով՝ կարծում եմ, որ Արցախի կարեւորութիւնը ՀՄԸՄ-ի համար առանձնայատուկ է»:

«Հաւատում եմ, որ ՀՄԸՄ-ի դերակատարութիւնը մեծ կը լինի Արցախում, մանաւանդ՝ սկաուտական շարժումը: Մարզական բաղադրիչը կարող է այստեղի երիտասարդութեանն այնքան էլ չհետաքրքրել, որովհետեւ դպրոցներին կից կան սպորտային խմբակներ, մարզական ակումբեր: Իսկ սկաուտութիւնը, իմ կարծիքով, հեռանկարներ ունի: Հայ պատանին, երբ 3 տարեկանից անդամագրւում է ՀՄԸՄ-ին, այնուհետեւ տարիների ընթացքում դառնում խմբապետ, իր հագուստը, դաստիարակութիւնը նրան պատրաստում է՝ որպէս իսկական հայ, զինւոր՝ կարգապահութեան, վարք ու բարքի իմաստով»,- խօսելով հեռանկարների մասին՝ ասել է Գառնիկ Մկրտչեանը:

«Մենք ծերացած կազմակերպութիւն չենք, մեր եղբայրներից մէկի խօսքով՝ մենք 1 դար ու 1 տարեկան ենք: Ունենք հազարաւոր երիտասարդ, խանդավառ աղջիկներ եւ տղաներ: Իսկ արդէն 101-ամեայ ՀՄԸՄ-ի համար Արցախի մասնաճիւղն ամենամեծ նւէրն է»,- եզրափակել է Գառնիկ Մկրտչեանը:

 

Տաթեւիկ Աղաջանեան

Յարակից լուրեր

  • Ակնարկ. Պատերազմի դիմաց տարածք գործողութիւնը եւ անոր քաղաքական բաժինը
    Ակնարկ. Պատերազմի դիմաց տարածք գործողութիւնը եւ անոր քաղաքական բաժինը

    Տաւուշի մարզի հիւսիսային հատուածին մէջ հայկական զինեալ ուժերուն իրականացուցած գործողութեան շնորհիւ 140 հեկտար տարածք ազատագրուած է եւ անցած հայկական ուժերու վերահսկողութեան տակ: Գործողութիւնը եղած է հակադարձութիւն, երբ Ազրպէյճանի սահմանապահ ծառայութեան ստորաբաժանումները փորձած են միջդիրքային տարածքին մէջ յառաջանալ եւ նոր բնագիծ զբաղեցնել «Բաբաքեար» կոչուող լերան շրջակայքին մէջ:

  • Մեր հիմնական առաջնահերթութիւներից է, որ Արցախը զերծ մնայ որեւէ ցնցումներից
    Մեր հիմնական առաջնահերթութիւներից է, որ Արցախը զերծ մնայ որեւէ ցնցումներից

    Վերջերս «Երկիր Մեդիա» հեռուստատեսութեանը տւած հարցազրոյցում ՀՅԴ Բիւրոյի ներկայացուցիչ Յակոբ Տէր-Խաչատուրեանն անդրադարձել է նաեւ Արցախում կայանալիք նախագահական եւ ԱԺ ընտրութիւններին:

    Ստորեւ ներկայացնում ենք այդ հարցազրոյցից մի հատւած.

  • Ո՞վ է կորցրել Համահայկական օրակարգը
    Ո՞վ է կորցրել Համահայկական օրակարգը

    Դաշնակցական մտաւորական, հրապարակագիր եւ հրապարակախօս Սեդօ Պոյաճեանն իր ֆէյսբուքեան էջում գրում է. «Ձախէն եւ աջէն խօսում են Համահայկական օրակարգի մասին։ Ըստ հայկական սովորութեան, այս հարցը եւս վերածուել է լոզունգի։ Այսօր մենք չունենք այն ղեկավար սերունդը, որ ատակ է պատկերացնել, տեսլականացնել, ծրագրել եւ պահանջուած աշխատանքի միջոցներն ու ճանապարհը ներկայացնել ժողովրդին։

  • Խմբագրական. Համահայկական օրակարգի փոխլրացուցիչ ենթակէտերը
    Խմբագրական. Համահայկական օրակարգի փոխլրացուցիչ ենթակէտերը

    Համահայկական օրակարգի ձեւաւորման հրամայականին շուրջ ակնկալելի է, որ ծաւալին հրապարակային քննարկումներ: Օրակարգի կէտերը բնականաբար կ՛ըլլան գերակայ ուղղութիւններ եւ օրինաչափօրէն հետզհետէ Հայաստանի եւ Արցախի հանրապետութեանց կարեւորագոյն խնդիրներուն կը միացնեն համասփիւռքեան-համահայկական հիմնահարցեր: Թէ՛ օրակարգի ձեւաւորման եւ թէ՛ օրակարգի կէտերու կատարողականութեան գործիքակազմերու կամ կառուցակարգային խնդիրներու մասին վստահաբար թափ կը հաւաքեն կազմակերպելի խորհրդակցութիւնները:

  • «Պատճառը բանակցային գործընթացի, հանդիպումների ոչ արդիւնաւէտ լինելն է». փորձագէտը՝ վերջին օրերին ՀՀ-Ադրբեջան սահմանին հակառակորդի կրակոցի արդիւնքում ՀՀ ԶՈւ-ի կորստի եւ 3 վիրաւորի մասին
    «Պատճառը բանակցային գործընթացի, հանդիպումների ոչ արդիւնաւէտ լինելն է». փորձագէտը՝ վերջին օրերին ՀՀ-Ադրբեջան սահմանին հակառակորդի կրակոցի արդիւնքում ՀՀ ԶՈւ-ի կորստի եւ 3 վիրաւորի մասին

    Օգոստոսի 13-ին, Հայաստանի սահմանին հակառակորդի կողմից արձակւած կրակոցի հետեւանքով պայմանագրային զինծառայող է վիրաւորւել. վերջին 20 օրերի ընթացքում Հայաստան-Ադրբեջան սահմանին հակառակորդի կրակի հետեւանքով ՀՀ ԶՈւ-ն ունեցել է մէկ կորուստ, եւ գրանցւել է վիրաւորման երկու դէպք: Հայաստանի սահմանին հակառակորդի կողմից լարւածութեան մեծացման պատճառների, դրա հետեւանքների մասին Tert.am-ը զրուցել է ռազմական փորձագէտ, ՀՅԴ անդամ Արթուր Եղիազարեանի հետ։

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։