Հա

Քաղաքական

22/08/2019 - 10:20

«Ամուլսարի հարցում ԱԺ մեծամասնութիւնը ճեղքւել է, որը բերելու է քաղաքական դաշտի լուրջ փոփոխութիւնների՝ նոր կառավարութիւն կամ նոր ԱԺ ընտրութիւններ». Ստեփան Դանիէլեան

Ուղիղ ժողովրդավարութեան մասին յայտարարութիւնն ընդամենը հերթական դեմագոգիան, պոպուլիզմն էր, որը առաջ չգնաց, մեխանիզմի չվերածւեց: Այս մասին Tert.am-ի հետ զրոյցում ասաց քաղաքագէտ Ստեփան Դանիէլեանը՝ անդրադառնալով Ամուլսարի հարցի հանրաքւէով լուծմանը: Քաղաքագէտի կարծիքով՝ Ամուլսարի հանքի շահագործման վերաբերեալ կառավարութեան դիրքորոշումն, ըստ էութեան, արդէն բերել է խորհրդարանական մեծամասնութեան ճեղքման, որն ըստ նրա՝ քաղաքական դաշտի շատ լուրջ փոփոխութիւնների պատճառ կը դառնայ:

«alikonline.ir» - Ուղիղ ժողովրդավարութեան մասին յայտարարութիւնն ընդամենը հերթական դեմագոգիան, պոպուլիզմն էր, որը առաջ չգնաց, մեխանիզմի չվերածւեց: Այս մասին Tert.am-ի հետ զրոյցում ասաց քաղաքագէտ Ստեփան Դանիէլեանը՝ անդրադառնալով Ամուլսարի հարցի հանրաքւէով լուծմանը: Քաղաքագէտի կարծիքով՝ Ամուլսարի հանքի շահագործման վերաբերեալ կառավարութեան դիրքորոշումն, ըստ էութեան, արդէն բերել է խորհրդարանական մեծամասնութեան ճեղքման, որն ըստ նրա՝ քաղաքական դաշտի շատ լուրջ փոփոխութիւնների պատճառ կը դառնայ: «Եթէ ճեղքումը բաւականին զգալի լինի, այդ դէպքում մենք արդէն գործ կունենանք խորհրդարանական մեծամասնութեան փլուզման հետ, իսկ խորհրդարանական մեծամասնութեան փլուզումը խորհրդարանական ճգնաժամ է նշանակում: Ըստ Սահմանադրութեան՝ եթէ կառավարութիւնը չի ունենում մեծամասնութիւն, արդէն նոր կառավարութեան խնդիր է առաջանում, իսկ եթէ դա էլ չի յաջողւում, նոր խորհրդարանական ընտրութիւններ»,- նշեց Ստեփան Դանիէլեանը:

 

- Պարոն Դանիէլեան, «Թաւշեայ յեղափոխութիւնից» յետոյ իշխանութիւնները յայտարարում էին Հայաստանում ուղիղ ժողովրդավարութեան գործիքներ ներդնելու մասին, մասնաւորապէս, հանրաքւէների միջոցով այս կամ այն հարցերին լուծումներ տալը: Սակայն, Ամուլսարի հարցի դէպքում, կարծես, նման սցենար չի քննարկւում կառավարութիւնում:

- Ուղիղ ժողովրդավարութիւնը Նիկոլ Փաշինեանի կողմից շահարկւում էր, որպէսզի հիմնաւորի հանրային ճնշումների միջոցով իշխանութիւնների վրայ ազդելը եւ արդիւնքում նաեւ իշխանափոխութիւնն իրականացնելը: Սա աւելի շատ հռետորական դաշտում էր եւ իր գործողութիւններին ինչ-որ իրաւական հիմք տալու համար էր: Սակայն, ուղիղ ժողովրդավարութիւնը դա ե՛ւ փիլիսոփայութիւն է, ե՛ւ աշխարհայեացք է, ե՛ւ իրաւական մեխանիզմներ են, որոնք շատ երկրներում կիրառւում են՝ յատկապէս տեղական խնդիրները լուծելու համար: Ամենայայտնին Շւէյցարիայի օրինակն է: Բայց մենք տեսանք, որ ինչպէս շատ խոստումներ՝ Սահմանադրութեան փոփոխութիւն, կուսակցութիւնների մասին օրէնք եւ այլն, ուղղակի քարոզչական բնոյթ ունէին: Իրաւական դաշտի փոփոխութիւն տեղի չունեցաւ: Աւելին, երբ այդ գործողութիւնները շարունակւեցին՝ ճանապարհ փակել եւ այլն, ինքն արդէն նախկին իշխանութիւնների նման փորձում է ուժ կիրառել: Ուղիղ ժողովրդավարութիւնն այն չէ, որ ամէն մէկը վեր է կենում եւ ինչ ուզում անում է, ուղիղ ժողովրդավարութիւնը հանրաքւէների օրէնքի փոփոխութիւնն է, որը Հայաստանում տեղի չունեցաւ: Այսինքն՝ այդ ուղիղ ժողովրդավարութիւնը հերթական դեմագոգիան, պոպուլիզմն էր ընդամենը, որը առաջ չգնաց, մեխանիզմի չվերածւեց:

 

- Ինչ էք կարծում, Ամուլսարի հարցը կարո՞ղ է քաղաքական մեծ օրակարգ դառնալ կամ սկիզբ դնել քաղաքական մեծ օրակարգի:

- Այն արդէն դարձել է՝ մի քանի պատճառով: Առաջինը՝ Նիկոլ Փաշինեանին սատարող ուժերի մէջ առաջատար դեր ունէին բնապահպանները, որոնք հանրային գործունէութեան, ակտիւիզմի փորձ ունէին: Փաստօրէն, այդ ամբողջ շերտը Նիկոլ Փաշինեանի համար մէկ պաշտպաններից մէկն էր, որը հիմա դառնում է Նիկոլ Փաշինեանի համար մէկ թշնամին: Երկրորդ պատճառը, որը դեռեւս այդքան էլ լուրջ չի ընկալւում հանրութեան կողմից, խորհրդարանական մեծամասնութեան ճեղքումն է: Խորհրդարանական մեծամասնութիւնն, ըստ էութեան, արդէն ճեղքւել է:

 

- 5-6 պատգամաւորի՝ Ամուլսարի հանքի շահագործման դէմ արտայայտւելը ճեղքո՞ւմ էք համարում:

- Այո, 5-6 պատգամաւորների դէմ արտայայտւելը ճեղքում եմ համարում, աւելի շուտ՝ մի քանի տասնեակ պատգամաւորների լուռ մնալը նոյնպէս ճեղքում է նշանակում: Կարծում եմ՝ այդ մարդիկ դեռեւս խուսափում են կարծիք յայտնել, եւ դեռ պարզ չէ՝ նրանց որ մասը որտեղ կը յայտնւի: Եթէ ճեղքումը բաւականին զգալի լինի, այդ դէպքում մենք արդէն գործ կունենանք խորհրդարանական մեծամասնութեան փլուզման հետ, իսկ խորհրդարանական մեծամասնութեան փլուզումը խորհրդարանական ճգնաժամ է նշանակում: Ըստ Սահմանադրութեան՝ եթէ կառավարութիւնը չի ունենում մեծամասնութիւն, արդէն նոր կառավարութեան խնդիր է առաջանում, իսկ եթէ դա էլ չի յաջողւում, նոր խորհրդարանական ընտրութիւններ: Սա սպասելի էր, ոչ ոք չէր կարող կանխատեսել, թէ դա կը լինի Ամուլսարի հարցը կամ այլ մի հարց, բայց կանխատեսելի էր, որ որեւէ մի հարց բերելու է նման ճեղքման, որովհետեւ «Իմ քայլը» խմբակցութիւնում յայտնւած մարդիկ քաղաքական թիմ չէին ներկայացնում, դա պահի ազդեցութեան տակ ձեւաւորւած մարդկանց խումբ էր: Հիմա, երբ քաղաքական խնդիր է առաջանում, բնականաբար, ճեղքւածք է առաջանում, որովհետեւ դա կուռ, գաղափարախօսութիւն ունեցող թիմ չէ: Այդ ճեղքումը բերելու է քաղաքական դաշտի շատ լուրջ փոփոխութիւնների: Այսօր մարդիկ դեռ լաւ չեն պատկերացնում դրա հետեւանքները:

 

- Ձեր կանխատեսմամբ՝ հնարաւոր խորհրդանական ճգնաժամն ի՞նչ ժամանակահատւածում կը լինի:

- Չեմ կարող ասել՝ առաջիկայ ամիսների հարց է, թէ մէկ տարւայ ընթացքում, բայց առաջին տպաւորութիւնն այն է, որ այս գործընթացը կարող է բաւականին արագ ընթանալ:

 

ՅԱԿՈԲ ԱՍԼԱՆԵԱՆ

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։