Հա

Քաղաքական

01/09/2019 - 10:20

«Կարծես թէ թիրախը հիմնականում այն տղաներն են, ովքեր անցել են պատերազմի բովով». Վարդգէս Բաղրեան

News.am-ի զրուցակիցն է Արցախի Ազգային ժողովի պատգամաւոր, «Ժողովրդավարութիւն» խմբակցութեան ղեկավար Վարդգէս Բաղրեանը:

«alikonline.ir» - News.am-ի զրուցակիցն է Արցախի Ազգային ժողովի պատգամաւոր, «Ժողովրդավարութիւն» խմբակցութեան ղեկավար Վարդգէս Բաղրեանը:

 

- Պարոն Բաղրեան, խօսակցութիւններ կան, որ ժողովրդավարական կուսակցութիւնը Արցախի առաջիկայ ընտրութիւններում առաջադրելու է Աշոտ Ղուլեանի թեկնածութիւնը։ Կուսակցութեան ներսում արդէն կա՞յ որոշում։

- Որոշում որպէս այդպիսին դեռ չկայ։ Ես առիթ ունեցել եմ մի քանի անգամ պատասխանելու նմանատիպ հարցերի։ Լինելու է համագումար աշնանը, համագումարն է որոշելու։ Եւ, բնականաբար, չի բացառւում եւ շատ հաւանական է, որ մենք առաջադրելու ենք մեր կուսակցութեան նախագահի թեկնածութիւնը, բայց կրկնում եմ՝ դեռ վերջնական որոշում չկայ․ դա համագումարի լիազօրութիւնն է, եւ կարծում եմ՝ այստեղ շահարկումներն անտեղի են։ Մի քիչ էլ սպասենք, ժամանակից առաջ չընկնենք։

 

- Ընտրութիւններին ընդառաջ Արցախում լարւածութեան աճ են կանխատեսում, ոմանք՝ փողոցային շարժում, ընդհուպ՝ անկարգութիւններ։ Դուք նման հաւանականութիւն տեսնո՞ւմ էք։

- Տեսէք, ես հաւատում եմ մեր ժողովրդի իմաստութեանը։ Որքան էլ որ տարբեր կարծիքներ լինեն, ես չեմ հաւատում, որ արցախցին կարող է ձեռք բարձրացնել արցախցու վրայ։ Ամէն ինչ պէտք է արւի օրէնքի սահմաններում։ Մենք ունենք սահմանադրութիւն, եւ որեւէ մէկը չի կարող շեղւել սահմանադրութեան տրամաբանութիւնից։ Այստեղ խօսքն անձերի մասին չէ, խօսքը երեւոյթի մասին է: Եւ սահմանադրութիւնը որեւէ մէկի համար բացառութիւն անել չի կարող։ Մենք իրաւական պետութիւն ենք կառուցում եւ բոլորը հաւասարապէս պատասխանատու են օրէնքի առջեւ: Հիմա, եթէ մենք կոնկրետ խօսում ենք այդ փոփոխութիւնների մասին՝ կապւած 48-րդ յօդւածի հետ: Մենք ինչպէ՞ս ենք պատկերացնում՝ Հայաստանի քաղաքացին իրաւունք ունի մասնակցելու Արցախում թէ՛ խորհրդարանական, թէ՛ նախագահական ընտրութիւնների՞ն։ Սա խախտում է ոչ միայն Արցախի Սահմանադրութիւնը, այլեւ հէնց Հայաստնի Հանրապետութեան Սահմանադրութեանն է հակասում։ Լաւ, այդ դէպքում ես նոյնպէ՞ս իրաւունք ունեմ Հայաստանում մասնակցելու խորհրդարանական ընտրութիւններին։ Եւ եւս մի կարեւոր հանգամանք. եթէ մարդը ընտրւելու իրաւունք ունի, նա աւելի շուտ ունի ընտրելու իրաւունք։ Այսինքն, դուք ընտրելու իրաւունք չունէք, բայց ընտրւելու իրաւունք ունէ՞ք Արցախում։ Հասկանում էք՝ նոնսենսի նման բան է ստացւում։ Եւ կարծում եմ՝ այդ առաջարկութիւնը նաեւ քաղաքական առումով շահաւէտ չէ Արցախի համար։ Սա կարող է մեր չարակամների, մեր հակառակորդների կողմից դարձեալ շահարկման առարկայ դառնալ եւ փորձեն ինչ-ինչ բաներում մեզ մեղադրել։ Եւ ելնելով այս ամենից՝ կարծում եմ, որ, այնուամենայնիւ, մարդիկ այնքան խոհեմ եւ խելացի կը լինեն, որ չեն դիմի որեւէ անկարգութիւնների, ամէն ինչ կարւի օրէնքի սահմաններում։

 

- Հայաստանում իշխանափոխութեանը յաջորդած որոշ զարգացումներ կարծիք են ստեղծել, որ արցախեան ազատագրման հերոսները հեղինակազրկւում են։ Դուք նման միտում տեսնո՞ւմ էք։

- Ցաւօք սրտի, տեսնում եմ։ Ես, առիթ եղել է, արտայայտւել եմ հէնց նոյն Աննա Յակոբեանի մտքի հետ կապւած, թէ հազարաւոր տղաներ զոհւել են յանուն ոչնչի։ Իմ խորին համոզմամբ՝ դա անընդունելի է։ Կամ վերջերս Արա Պապեանի համեմատութիւնը Ամուլսարի եւ Ղարաբաղի միջեւ։ Ընդհանրապէս, միայն հիւանդ երեւակայութիւն ունեցող մարդու ուղեղում կարող է նման համեմատութիւն ծագել։ Ի՞նչ է սա։ Եւ եթէ Արցախի առաջին նախագահը եւ Հայաստանի երկրորդ նախագահը այսօր գտւնում է կալանքի տակ, եւ գոնէ ես չեմ տեսել որեւէ փաստարկ, որեւէ յօդաբաշխ բացատրութիւն, թէ ինչի համար է նա կալանաւորւած։ Կարծում եմ, որ ամէն դէպքում ճիշտ է ասւած, որ արդարութիւնը հիւանդանում է, բայց չի մահանում։ Արդարութիւնը վերականգնւելու է, եւ ամէն ինչ իր տեղն է ընկնելու։ Ուղղակի որքան շուտ, այնքան լաւ, որովհետու այս իրավիճակը, որ տիրում է Հայատանում, կարծում եմ, բոլոր մտահոգ մարդկանց համար, բոլոր մտածող մարդկանց համար ուղղակի անընդունելի է։ Այս վրէժխնդրութեան մթնոլորտը, այս միմեանց դէմ, չգիտեմ, գործեր տալու, գործեր թխելու։ Բաներ կան, որ ուղղակի ինձ համար գոնէ անընդունելի են։ Կամ Ապրիլեան պատերազմի հետ կապւած այդ յանձնաժողովի ստեղծումը։ Այսինքն ի՞նչ ենք մենք անում, փորփրում ենք, որ ի՞նչ, պատերազմը դեռ չի աւարտւել։ Եւ ռուսերէն յայտնի խռսք կայ, չէ՞, а судьи кто?՝ դատաւորներն ովքե՞ր են, ովքե՞ր են դատում, թէ ինչ է եղել։ Ես չեմ ասում, թէ մենք պիտի թոյլ տանք՝ ով ինչ ուզում է անի։ Քաւ լիցի, խօսքը դրա մասին չէ, մեղաւորը պէտք է անշուշտ պատժւի, բայց մեղաւորներ փնտրելուց առաջ իշխանութիւնները պէտք է գործ անեն: Ես չեմ հաւատում, շատ լաւ ճանաչելով նաեւ Սամուէլ Կարապետեանին, որ նա կարող է հրաման արձակել, որպէսզի հայը կրակի հայի վրայ, բացառում եմ: Այսինքն, մարդիկ, նոյն Ռոբերտ Քոչարեանը, նոյն Սերժ Սարգսեանի անունն են հիմա շօշափում, նոյն Սամուէլ Կարապետեանը եւ բոլոր նրանք, ովքեր անցել են պատերազմով, յաղթել են պատերազմում, երկիր են ազատագրել, երկիր են կառուցել, ճանապարհ են անցել, յանկարծ նրանց մտքով անցնի եւ հրաման արձակեն, որ հայը կրակի հայի վրա՞յ։ Ես չեմ հաւատում։

 

- 2018 թ. ապրիլին Հայաստանում տեղի ունեցած իրադարձութիւններից յետոյ Արցախի ռազմական վերնախաւում փոփոխութիւններ տեղի ունեցան։ Եւ Հայաստանի եւ Արցախի իշխանութիւնները պաշտօնապէս հերքում են լուրերը, որ այս հարցում Հայաստանի նոր իշխանութիւնների կողմից ճնշում է եղել։ Այդ դէպքում, ինչո՞վ է պայմանաւորւած այն, որ այս փոփոխութիւնները յաջորդեցին Հայաստանում նոր իշխանութեան ձեւաւորմանը։

- Դժւար է միանշանակ ասել, ես յստակ տեղեկութիւններ չունեմ, բայց տրամաբանութիւնը դա է յուշում։ Այսինքն՝ բոլոր նրանք, ովքեր ինչ-ինչ հարցերում հնարաւոր է, որ համաձայն չլինեն Հայաստանի իշխանութիւնների այս կամ այն քայլի հետ, յայտնւում են թիրախում։ Ի՞նչ է նշանակում՝ պաշտպանութեան նախարարի պաշտօնից հեռանալը։ Ես որեւ է բան բնականաբար չունեմ, եւ չեմ էլ կարող ունենալ նոր նախարարի /դէմ/, գտնում եմ, որ նա հրաշալի սպայ է եւ ճանապարհ է անցել, բայց ինձ համար անհասկանալի է, թէ ինչու են ազատում Արցախի Պաշտպանութեան նախարարին, հրամանատարին առանց որեւէ բացատութեան։ Եւ կարծես թէ թիրախը հիմնականում այն տղաներն են, ովքեր անցել են պատերազմի բովով։ Իսկապէս, բազմաթիւ հարցեր կան, որ մտահոգում են մեզ, եւ ճիշտ չեմ համարում լռելը այդ մասին։ Մենք պետութիւն ենք կառուցել, որտեղ պէտք է լինի խօսքի ազատութիւն։ Հիմա եթէ ես այսպէս եմ մտածում եւ չպիտի բարձրաձայնեմ, եթէ նոյնիսկ պատգամաւորը, լրագրողը, շարքային քաղաքացին պիտի վախենայ կամ ընկրկի, ինչ-ինչ բաներից եւ չուզենայ ինչ-որ գլխացաւանքների մեջ ընկնելու չասի իր կարծիքը, այսպէս ո՞ւր ենք գնալու։ Այս դէպքում մենք էլ մեր մեղքի բաժինն ենք ունենալու։

 

- Նիկոլ Փաշինեանը վերջերս յայտարարեց, որ ինքը շատ դառնացած է այն իրավիճակով, որով ինքը՝ որպէս վարչապետ, ժառանգութիւն է ստացել Լեռնային Ղարաբաղի հարցի կարգաւորման բանակցային գործընթացը։ Դուք ինչպէս է՞ք գնահատում նախորդի շխանութիւնների վարած բանակցային գործընթացը, եւ Հայաստանում նոր իշխանութեան ձեւաւորումից յետոյ ի՞նչ տեղաշարժեր էք տեսնում բանակցային գործընթացում։

- Որեւէ տեղաշարժ չեմ տեսնում, չեմ էլ լսել, որ շուրջ տարի է անցել, ես մինչեւ հիմա էլ չգիտեմ՝ որն է Հայաստանի նոր իշխանութիւնների հայեցակարգը ՝ կապւած Լեռնային Ղարաբաղի հիմնախնդրի հետ։ Աւելին, արւել են յայտարարութիւններ, որոնք ուղղակի ինչ-որ տեղ սեպ են խրում երկու հայկական պետութիւնների միջեւ այն առումով, որ ինձ համար անհասկանալի է, թէ ինչ է նշանակում՝ դաւադիր ուժերը փորձում են պատերազմ հրահրել, հողեր յանձնել եւ մեղքը բարդել Հայաստանի վարչապետի վրայ։ Եթէ կան փաստեր, բռնէք այդ մարդկանց, թող պատկան մարմինները աշխատեն այդ ուղղութեամբ։ Իսկ ես աւելի քան վստահ եմ, որ Ղարաբաղում չի կարող գտնւել մէկը, ում մտքով անգամ անցնի, առաւել եւս նրանց, ովքեր ազատագրել են այդ հողերը, չգիտեմ ինչ, ինչ միֆական նպատակների համար հողեր յանձնել։ Ինչի՞ մասին է խօսքը։ Կամ ի՞նչ յեղափոխութիւն, հակայեղափոխութիւն։ Նախ չեմ ընդունում, որ Հայաստանում եղել է յեղափոխութիւն, որ մի բան էլ այստեղ լինի հակայեղափոխութիւն։ Հայաստանում եղել է իշխանափոխութիւն, իմ տպաւորութեամբ, նաեւ դրսի ուժերի միջնորդութեամբ օգնութեամբ կամ հովանաւորութեամբ, ինչպէս կուզէք։ Իսկ ինչ մնում է նախորդ իշխանութիւններին՝ կապւած ղարաբաղեան խնդրի հետ նրանց գործունէութեանը, ես կարծում եմ, որ միշտ էլ եղել է հաւասարակաշռւած քաղաքականութիւն։ Բալանսաւորւած, այո, որովհետեւ ես երկար տարիներ լինելով այս ամէն ինչի մէջ, ես չեմ յիշում, որ Հայաստանի եւ ասենք Ռուսաստանի յարաբերութիւնները երբեւէ այսքան լարւած վիճակում լինեն։ Եւ դա որեւէ լաւ բան չի խոստանում, հասկանո՞ւմ էք։ Բոլոր փակագծերը չեմ ուզում բացել, բայց այն ինչ տեղի է ունենում հայկական իրականութեան մէջ, մեզ չի կարող չմտահոգել։ Հիմա ջայլամի քաղաքականութիւն վարենք, գլուխներս կոխենք աւազի մէջ եւ ասենք՝ վայ, ինչ լաւ է, հա՞։ Հասկանում էք, ես գտնում եմ, որ միմեանց դէմ թակարդներ գլորելու փոխարէն մենք պէտք է խելք խելքի տանք ամբողջ ազգով, խելօքներով խելք խելքի տան եւ մտածեն, թէ ինչպէս ենք դիմակայելու նոր մարտահրաւէրներին, որ մեզ սպասւում է, ինչպէս ենք դուրս գալու այս վիճակից։ Ես գտնում եմ, որ թիւ մէկ խնդիրը դա է հանրութեան առջեւ ծառացած։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։