Հա

Քաղաքական

08/10/2019 - 12:20

«Ուժային կառույցները պէտք է աշխատեն անվտանգութեան ու իրաւակարգի ապահովման նպատակով, ոչ թէ քաղաքական հակառակորդների դէմ». Աւետիք Չալաբեան

Չալաբեանի համոզմամբ՝ Հայաստանում ձեւաւորւող հանրային արդիւնքը պէտք է հաւասարաչափ բաշխւի բնակչութեան տարբեր շերտերի միջեւ՝ ծայրայեղ լարւածութիւնը եւ դրա արդիւնքում ծնւող ատելութիւնը մեղմելու համար:

«alikonline.ir» - Հարաւային կովկասի տարածաշրջանը շատ լուրջ մարտահրաւէրների առջեւ է, դրանք սրւել են, եւ կարեւոր է հասկանալ՝ որքանո՞վ է Հայաստանն արդիւնաւէտ դիմագրաւում դրանց: «Արմնիւզ» ՀԸ «#ՕրաԽնդիր» հաղորդմանը նման կարծիք է յայտնել «Ազգային օրակարգ» կուսակցութեան համահիմնադիր Աւետիք Չալաբեանը. «Նախկին ուժերը, աւելի երկար լինելով իշխանութեան մէջ, աւելի խորութեամբ էին հասկանում մարտահրաւէրները, դրանց աղբիւրները, սակայն ոչ միշտ էր դրանց արդիւնաւէտ կերպով դիմագրաւում, ինչպէս՝ Ապրիլեան պատերազմը»: Ըստ Չալաբեանի՝ ՀՀ արտաքին հակառակորդները վաղուց հայաստանի նկատմամբ հիբրիդային պատերազմ են մղում:

Քաղաքական գործչի պնդմամբ՝ կասկած չկայ, որ նախորդ իշխանութիւններն ունեն ռեւանշիստական նկրտումներ, եւ դա զարմանալի չէ: Խնդիրն այն է, թէ որքանո՞վ հայաստանեան հասարակութեան տարբեր շերտերը, նախկին ու ներկայ իշխանութիւնները եւ նոր ստեղծւող քաղաքական ուժերը կը կարողանան վերադառնալ աւելի քաղաքակիրթ երկխօսութեան դաշտ. «Մենք չենք կարողանում նորմալ ընտրութիւններով իշխանութիւն ձեւաւորել, քանի որ մեր հասարակութիւնը մի ծայրայեղութիւնից միւսն է գնում, տեսնում է կա՛մ հերոսների, կա՛մ հրեշների: Հրեշներն այդպիսին են դարձել, քանի որ մենք ենք թոյլ տւել, դա մեր թողտւութիւնն է եղել»:

Չալաբեանի համոզմամբ՝ Հայաստանում ձեւաւորւող հանրային արդիւնքը պէտք է հաւասարաչափ բաշխւի բնակչութեան տարբեր շերտերի միջեւ՝ ծայրայեղ լարւածութիւնը եւ դրա արդիւնքում ծնւող ատելութիւնը մեղմելու համար:

Ըստ քաղաքական գործչի՝ երկրի համար բացարձակ շահեկան չէ, որ ամբողջ քաղաքական երկխօսութիւնը տեղի է ունենում անցեալի շուրջ. «Պատրանք է, թէ անցեալի բոլոր չարագործութիւնների ու սխալների հարցում արդարութիւնը հնարաւոր է վերականգնել: Կարելի է փորձել ուղղել ապագան, անցեալը մեր ձեռքում չէ»:

Չալաբեանի կարծիքով՝ անհնար է համատարած բոլորին պատժել, քանի որ հարց է առաջանում՝ ո՞ւմ պատժել, ո՞ւմ թողնել. չէ՞ որ այդ համակարգի մէջ տասնեակ հազարաւոր մարդիկ են ներգրաււած եղել:

Ըստ քաղաքական գործչի՝ ուժային կառոյցների տրամաբանութեան մէջ կարեւոր է կայունութիւնն ու յստակութիւնը. «Նախորդ իշխանութիւններն ուժային կառոյցներն օգտագործում էին իբրեւ քաղաքական գործիք: Բայց նոր իշխանութիւններն էլ են հիմա սկսում գնալ այդ ուղղութեամբ: Ուժային կառոյցները պէտք է աշխատեն անվտանգութեան ու իրաւակարգի ապահովման նպատակով, ոչ թէ քաղաքական հակառակորդների դէմ»:

«Վարչապետի ու կառավարութեան մօտեցումն է՝ անընդհատ սլաքներն ուղղել ուրիշների վրայ եւ խուսափել պատասխանատւութիւնից»,- ամփոփել է Աւետիք Չալաբեանը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։