Հա

Քաղաքական

Չորեքշաբթի, 07 Օգոստոսի 2013 11:05

ԱԴՐԲԵՋԱՆ - «The Independent».- «Օսկարակիր ռեժիսոր Ռուստամ Իբրահիմբէկովը՝ ընդդէմ Իլհամ Ալիեւի»

alt«panorama.am» - Անգլիական «The Independent» լրատւականն անդրադարձել է Ադրբեջանի նախագահի երկու հիմնական թեկնածուներին՝ գործող նախագահ Իլհամ Ալիեւին եւ Ռուստամ Իբրահիմբէկովին, ով Ադրբեջանից բացի՝ ամենուր յայտնի է որպէս ռեժիսոր եւ սցենարիստ: Ադրբեջանում Իբրահիմբէկովն ընդդիմութեան միակ յոյսն է:
«The Independent»-ը նախ ներկայացնում է Իլհամ Ալիեւի անցած ուղին. «Պարոն Ալիեւը, ով յաջորդել է 10 տարի շարունակ Ադրբեջանի նախագահ հանդիսացած իր հօրը՝ Հէյդար Ալիեւին, փոխել է Սահմանադրութիւնը, որպէսզի կարողանայ սպասւող նախագահական ընտրութիւններում երրորդ անգամ վերընտրւել: Նա երկրի նաւթային արդիւնաբերութիւնից ստացած գումարներն օգտագործել է մայրաքաղաք Բաքուն արդիականացնելու եւ այն Կասպից ծովի փայլփլող Դուբայը դարձնելու համար»:

Ըստ պարբերականի՝ երկրի նաւթային պաշարների պատճառով՝ արեւմտեան կառավարութիւններն աչք են փակում Ադրբեջանի կոռումպացւած էլիտայի (շահածախւած վերնախաւի) վրայ, իսկ այն ադրբեջանցիները, ովքեր բարձրաձայնում են այդ խնդիրները, «խուլիգանութեան» մեղադրանքով յայտնւում են ճաղերի յետեւում: Խադիջա Իսմայիլովայի դէպքը լրագրողների հանդէպ հալածանքների վառ օրինակ է: Իր լրագրողական հետաքննութեան պատճառով՝ նրան սպառնացել են եւ անձնական բնոյթի լուսանկարներ հրապարակել:
Անգլիական աղբիւրն այնուհետեւ անդրադարձել է միւս թեկնածուին՝ ընդդիմութեան միակ առաջնորդ Ռուստամ Իբրահիմբէկովին: Վերջինս պնդում է, որ ինքը պատրաստւում է երկու տարով միջանկեալ նախագահ լինել, արդար եւ թափանցիկ խորհրդարանական ընտրութիւններ ու խորհրդարանական հանրապետութիւն ստեղծելու համար հանրաքւէ իրականացնել: Աւելին՝ Իբրահիմբէկովը համոզւած է, որ Ադրբեջան վերադառնալուն պէս՝ նրան կը ձերբակալեն կամ նոյնիսկ կը սպանեն: Հէնց այդ պատճառով էլ՝ նա դեռ Մոսկւայում է:
Հանրաքւէն եւ արդար ընտրութիւնները Իբրահիմբէկովի միակ ծրագրերը չեն: Իլհամ Ալիեւի դէմ դատական գործընթաց սկսելու իր ծրագրերի մասին հարցը շրջանցելով՝ ռեժիսորը հաւաստիացրել է. «Ես արիւնահեղութեան կողմնակից չեմ, բայց առնւազն պէտք է թալանւած գումարները վերադարձնելու մեխանիզմ լինի»:
Ի դէպ, Իբրահիմբէկովն ինքը ժամանակին Իլհամ եւ Հէյդար Ալիեւների մտերիմն է եղել: Համացանցում տարածւած տեսանիւթերից մէկում պարոն Ալիեւը ռեժիսորի տաղանդի ու Ադրբեջանին բերած նրա համբաւի համար կենաց է խմում: Ընդդիմադիր ռեժիսորի ասութեամբ՝ ինքը եւ մի շարք մշակութային գործիչներ ուրախ էին, որ Հէյդար Ալիեւին յաջորդել է երիտասարդ եւ առաջադէմ քաղաքական գործիչ, բայց 2007 թ. արդէն պարզ էր, որ Իլհամ Ալիեւի իշխանութիւնը գնալով աւելի աւտորիտար (միահեծան) է դառնում:
Ըստ ԱՄՆ-ի նախկին դիւանագէտ Ռեբեկա Վինսենտի, ով այժմ զբաղւում է Բաքւում մարդու իրաւունքների պաշտպանութեամբ, Ադրբեջանում 80-ից աւել քաղբանտարկեալներ կան եւ Զրպարտութեան մասին օրէնքի մէջ նոր փոփոխութիւնները, որոնց պատճառով՝ մարդիկ կարող են ձերբակալւել նախագահի կամ կառավարական գործիչների հասցէին «Ֆէյսբուք»-ում եւ այլ սոցիալական ցանցերում քննադատական գրառումներ կատարելու համար, աւելի քան անհանգստացնում են: Վերջերս մարզային քաղաքներում մի շարք բողոքի ցոյցեր տեղի ունեցան: «Այդ ցոյցերը աւելի կատաղի են դարձել, որը վկայում է աճող դժգոհութեան մասին»,- յաւելեց Վինսենտը:
Ընդդիմադիր բլոգեր եւ լրագրող Էմին Միլլին կարծում է. «Ռեժիմն այնքան կայուն չէ, ինչքան Ալիեւն է բոլորին վստահեցնում կամ ինչքան ամերիկեան եւ անգլիական հաստատութիւններն են յայտարարում, մարզերում մեր տեսած խռովութիւնները կարող են ապագայ իրադարձութիւնների միայն նախերգանքը լինել: Սա պատմական պահ է, քանի որ վերջին 20 տարւայ ընթացքում ընդդիմութիւնը երբեք այսպէս չի միաւորւել»:

 

Ամենաշատ ընթերցւած

Քւէարկութիւն

Կարո՞ղ է արդեօք նախագահի այցը Նիւ Եօրք նպաստել Իրանի միջազգային դիրքի ամրապնդմանը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։